Advertisements

Daily Archives: மே 22nd, 2009

வாஸ்து: வாஸ்து சாஸ்திரமும் ஐடி நெருக்கடியும்!

வாஸ்து: வாஸ்து சாஸ்திரமும் ஐடி நெருக்கடியும்!

மிக அழகான வீடு ஒன்றைக் கட்டியிருப்பார்கள். சிறிதுநாள் கழித்துப் பார்த்தால் அந்த வீட்டின் ஒரு பகுதியை இடித்துக் கொண்டிருப்பார்கள். என்ன என்று கேட்டால், வாஸ்துப்படி திருத்தி அமைக்கிறோம் என்பார்கள். சிலர் வீடு கட்ட ஆரம்பிக்கும்போதே வாஸ்து நிபுணரை கலந்து ஆலோசித்து வீடு கட்டுவார்கள். எந்த இடத்தில் தண்ணீருக்காக ஆழ்குழாய் அமைப்பது, எந்த இடத்தில் சமையலறை கட்டுவது என்றெல்லாம் வாஸ்து நிபுணர்கள் சொல்லித் தருவார்கள்.

வீடுகளுக்கு மட்டுமில்லை, தொழிற்சாலைகளையும் வாஸ்து சாஸ்திரப்படி எவ்வாறு அமைப்பது? என்று ஆலோசனை தருகிறார் வாஸ்து சாஸ்திர நிபுணர் மகேஷ் வர்மா. இதற்காக இந்தியாவின் பல இடங்களுக்கு அடிக்கடி பறந்து கொண்டிருக்கிறார் அவர்.

வாஸ்து சாஸ்திரம் நவீன அறிவியலோடு பொருந்திப் போகும் ஒன்று என்று கூறுகிறார் மகேஷ் வர்மா.

கடந்த இருபது ஆண்டுகளுக்கும் மேலாக சோதிடம், எண்கணிதம், வாஸ்து போன்றவற்றில் அனுபவமிக்கவரான அவரை சென்னை செüகார்பேட்டையில் உள்ள அவருடைய அலுவலகத்தில் சந்தித்துப் பேசினோம்.

வாஸ்து சாஸ்திரம் விஞ்ஞானத்துக்குப் பொருத்தமானது என்று எப்படிக் கூறுகிறீர்கள்?

வாஸ்து என்று சொன்னால் அதை மூடநம்பிக்கை என்று நினைப்பவர்கள் இருக்கிறார்கள். உண்மையில் வாஸ்து சாஸ்திரம் நமது முன்னோர்கள் அனுபவப்பூர்வமாக உணர்ந்ததன் அடிப்படையில் எழுதப்பட்ட ஒன்று.

வாஸ்து சாஸ்திரத்தில் வீட்டின் சமையலறை அக்னிமூலையில் அமைக்கப்பட வேண்டும் என்று கூறப்பட்டிருக்கிறது. அக்னிமூலையில் அமைக்காமல் வீட்டின் நடுவில் சமையலறையை அமைத்தால் என்ன ஆகும்? சமையல் வாசனை, சமையல் அறையில் இருந்து வரும் புகை எல்லாமும் வீட்டுக்குள்ளிருந்து வெளியே போகாது. அதைச் சுவாசிப்பவர்களுக்கு சுவாச நோய்கள் உண்டாகும். மேலும் வீட்டின் நடுப்பாகத்தில் சமையலறை இருந்தால் எதிர்பாராமல் தீ விபத்து ஏற்பட்டால் வீட்டுக்குள் இருப்பவர்கள் வெளியே வரமுடியாமல் தீ விபத்தில் சிக்கிக் கொள்வார்கள். இதையெல்லாம் யோசித்துத்தான் வீட்டின் சமையலறை இந்த இடத்தில் இருக்க வேண்டும் என்று நமது முன்னோர்கள் கூறினார்கள்.

சமையலறை கிழக்குப் பாகத்தில் அமைக்கப்படும்போது நல்ல சூரிய வெளிச்சம் வரும். காற்று வரும். புகையை வெளியே அடித்துக் கொண்டு போகும்.

அதுபோல ஈசான மூலையில் தண்ணீர் இருக்க வேண்டும் என்று வாஸ்து சாஸ்திரத்தில் சொல்வார்கள். ஆழ்குழாய், கிணறு போன்றவற்றை அந்த இடத்தில் அமைப்பது நல்லது. வீட்டின் தென்மேற்கு மூலையைக் கழிவுகள் போடும் இடமாக அமைக்க வேண்டும் என்று வாஸ்து சொல்கிறது. ஈசானமூலை இருக்கும் இடத்துக்கு எதிர்ப்புறத்தில் தென்மேற்கு அமைகிறது. கழிவுகளும் தண்ணீரும் ஒரே இடத்தில் இருந்தால் வியாதி பரவும் அல்லவா? அதற்காகத்தான் வேறு இடத்தில் கழிவுகளைப் போடும் இந்த ஏற்பாடு.

வீடுகளுக்கு மட்டும் இல்லை. தொழிற்சாலைகளுக்கும் கூட இந்த வாஸ்து பொருந்தும். தண்ணீர் உள்ள பகுதியும், கழிவுகள் செல்லும் பகுதியும் ஒரே இடத்தில் இருந்தால் என்ன ஆகும்? தொழிற்சாலைக் கழிவுகளில் பல ரசாயனப் பொருள்களாகவும் கூட இருக்கலாம்.

அவை நிலத்தடி நீரில் கலந்தால் அதைப் பயன்படுத்தும் மனிதர்கள் கடுமையாகப் பாதிக்கப்படுவார்கள். எனவே வாஸ்து முறைப்படி அமைத்தால் தொழிற்சாலைக் கழிவுகள் செல்லும் பகுதியும், தண்ணீர் இருக்கும் பகுதியும் வேறு வேறு இடத்தில் இருக்கும்.

வீட்டில் ஜன்னல்களை கிழக்குப் பகுதியில் வைக்க வேண்டும் என்று வாஸ்து சாஸ்திரம் சொல்கிறது. அதிலும் கீழ்த்தளத்தில் அதிக ஜன்னல்களும், மேல் மாடியில் அதைவிடக் குறைந்த ஜன்னல்களும் வைக்கப்பட வேண்டும் என்றும் கூறுகிறது. ஜன்னல்கள் வழியாக காலையில் சூரிய வெளிச்சம வீட்டுக்குள் வரும்.

அதனால் புழு,பூச்சிகள், கண்ணுக்குத் தெரியாத கிருமிகள் அழிந்துவிடும். வடகிழக்குப் பகுதியில் இருந்து வரும் காற்று வீட்டுக்குள் புகுந்து சுற்றிவரும். காற்றோட்டமாக இருக்கவும், வியாதிகள் வராமல் தடுக்கவும்தான் கிழக்குப் பகுதியில் ஜன்னல்கள் வைக்க வேண்டும் என்று வாஸ்து சாஸ்திரம் சொல்கிறது.

வீட்டின் கீழ்த்தளத்தில் காற்று குறைவாக வீசும். எனவே அதிக ஜன்னல்கள் வைக்க வேண்டும். மேலே செல்லச் செல்ல காற்று அதிமாக வீசும். எனவே குறைவான ஜன்னல்கள் போதும்.

தொழிற்சாலையின் மெயின் வாசல் வடகிழக்கில் இருந்தால் நல்லது. ஏனென்றால் நல்ல காற்று நிறைய வரும். அதனால் தொழிற்சாலையின் வடபாகத்தைக் காலியாக விட வேண்டும். அதில் குப்பைகளைப் போடக் கூடாது. போட்டால் அவற்றைக் காற்று அடித்துக் கொண்டு தொழிற்சாலைக்குள் கொண்டுவந்துவிடும்.

தொழிற்சாலையின் தென்கிழக்குப் பாகத்தில் புகைக் கூண்டு அமைத்தால் புகைக்கூண்டிலிருந்து வெளிவரும் புகை தொழிற்சாலைக்குள் வராது. காரணம் வடகிழக்கில் பகுதியில் இருந்தே காற்று வீசுகிறது. அதனால் புகை வேறு பகுதிக்குச் சென்றுவிடும். சில தொழிற்சாலைகளில் வேலை செய்பவர்களுக்கான குடியிருப்பு தொழிற்சாலைக்குள்ளேயே இருக்கும்.

அந்தக் குடியிருப்புகளை வடமேற்குப் பகுதியில் அமைப்பது நல்லது. வடமேற்குப் பகுதி சந்திரனைச் சார்ந்தது. அதனால் மன அமைதி ஏற்படும் என்று வாஸ்து சொல்கிறது. உண்மையில் அந்தப் பகுதியில் தொழிற்சாலைப் பணியாளர்கள் குடியிருந்தால் தொழிற்சாலைக் கழிவுப் பொருட்களோ, புகையோ அவர்களைப் பாதிக்காது.

தொழிற்சாலையின் மேற்கூரையில் விழும் மழைத் தண்ணீர் கிழக்கு அல்லது மேற்குப் பக்கம் இறங்கும்படி அமைக்க வேண்டும். தென்மேற்கில் இறங்கும்படி அமைத்தால் அங்குள்ள குப்பை, கழிவுப் பொருட்களுடன் மழைத் தண்ணீர் கலந்து பல தீய விளைவுகளை உருவாக்கும்.

இப்படி வாஸ்து சாஸ்திரத்தில் கூறப்பட்டிருக்கும் பல விஷயங்கள் இன்றைய நவீன வாழ்க்கைக்குப் பொருந்தும் விதத்தில் உள்ளன.

நவீன வாழ்க்கைக்குப் பொருந்தும்விதத்தில் இருக்கின்றன என்கிறீர்கள். ஆனால் நெரிசலான நகர்ப்புறங்களில் வாஸ்து சாஸ்திரப்படி வீடுகளைக் கட்ட முடியாதே?

நகரத்தில் ஒரு வீட்டையோ, தொழிற்சாலையையோ முழுக்க முழுக்க வாஸ்து சாஸ்திரத்தின்படி அமைப்பது சிரமம். நகரத்தின் நெரிசலான தெருக்களில் ஒரு வீடும் இன்னொரு வீடும் ஒட்டிக் கொண்டு இருக்கும். கிழக்குப் பக்கத்தில் ஜன்னல்களே வைக்க முடியாது. வாஸ்து சாஸ்திரம் சொல்லிய பலவற்றைக் கடைப்பிடிக்க முடியாது.

அதிலும் ஏற்கனவே கட்டி முடித்த வீட்டை ஒன்றும் செய்ய முடியாது. நகர்ப்புறங்களில் உள்ள வீடுகளில் வாஸ்து சாஸ்திரப்படி சில திருத்தங்களை வேண்டுமானால் செய்யலாம். முழுக்க முழுக்க வாஸ்து சாஸ்திரத்தைக் கடைப்பிடிக்க வேண்டுமானால் பங்களாதான் கட்ட வேண்டும்.

ஆனால் நகரத்தின் மையமான பகுதியில் கூட புதிதாக வீட்டையோ அல்லது 50 – 100 ஃபிளாட்களையோ கட்ட வேண்டும் என்றால் வாஸ்து சாஸ்திரத்தைக் கடைப்பிடித்துக் கட்ட முடியும். ஆனால் பூமி முழுவதையும் பயன்படுத்தி வீடு கட்ட முடியாது. தேவையான அளவுக்குக் காலி இடம் விட்டு வீடு கட்டினால் 80 சதவீதம் வரை வாஸ்து சாஸ்திரத்தின்படி கட்டலாம்.

ஒரு தொழில் நல்லமுறையில் நடப்பதற்கும், நலிவடைவதற்கும் பல்வேறு காரணங்கள் இருக்கின்றன. தற்போது ஐடி தொழில் நலிவுக்குக் காரணம், உலக அளவிலான பொருளாதார நெருக்கடி. அப்படியிருக்க வாஸ்து சாஸ்திரப்படி அமைக்கப்பட்ட தொழிற்சாலைகளோ, நிறுவனங்களோ நன்றாக இயங்கும் என்று எப்படிச் சொல்ல முடியும்?

வாஸ்து சாஸ்திரத்தின்படி அமைக்கப்பட்ட தொழிலகங்கள் கூட சரிவர இயங்க முடியாதநிலை ஏற்படுவதுண்டு. ஒன்றை நினைவில் வைக்க வேண்டும். பொதுவான சூழ்நிலைக்கு உட்பட்டே எல்லாரும் செயல்பட முடியும். உதாரணமாக ஐடி தொழிலுக்கான வாய்ப்பு உலக அளவில் குறைந்துவிட்டது என்றால் நமது நாட்டிலும் பல தொழிலகங்கள் நஷ்டம் அடையும்.

இழுத்து மூடக் கூடிய நிலையும் ஏற்படலாம். அதில் பல வாஸ்து சாஸ்திரத்தின்படி அமைக்கப்பட்ட தொழிலகங்களாகக் கூட இருக்கலாம். இங்கே இன்னொன்றையும் பார்க்க வேண்டும். என்னதான் உலகம் முழுதும் பாதிப்பு இருந்தாலும் சில ஐடி நிறுவனங்கள் எந்தப் பாதிப்பும் இல்லாமல் இயங்கிக் கொண்டுதானே இருக்கின்றன? அதற்கு என்ன காரணம் சொல்ல முடியும்?

அனுபவப்பூர்வமாக உண்மையாக இருக்கும் பல விஷயங்களை விஞ்ஞானப்பூர்வமாக நிரூபிப்பது எல்லாச் சமயங்களிலும் முடியாது. வாஸ்து, சோதிடம் போன்றவையும் இதில் சேர்ந்ததே.

Advertisements

புத்திரன் என்றால்… (ஆன்மிகம்)

புத்திரன் என்றால்… (ஆன்மிகம்)

மனித வாழ்க்கை சில நற்காரியங்களுக்காக ஏற்பட்டது. அவரவர்களுக்கு விதிக்கப்பட்ட நியம, அனுஷ்டானங்களை சரிவர செய்ய வேண்டியது கடமை.
கணவனும், மனைவியும் குடும்பம் நடத்தி, சமைத்து, சாப்பிட்டு, ஏதோ மனம் போன படி குதூகலமாக வாழ்க்கை நடத்திக் கொண்டிருந்தால் அது இல்லறம் அல்ல. குடும்ப வாழ்க்கையில் பல தேவ பூஜை, அதிதி பூஜை, பந்துக்களுக்கு உதவு வது, நல்ல காரியங்களுக்கு உதவி செய்வது என பல விஷயங்கள், “தர்மம்’ என்று சொல்லப்பட்டுள்ளது.
இதில், “சந்ததி விருத்தி’ என்பதும் முக்கியமானதாகச் சொல்லப்பட்டுள்ளது. கணவன்- மனைவி என்றால், அவர்களுக்குக் குழந்தை பிறக்க வேண்டும். அதிலும், ஒரு புத்திரன் உண்டாக வேண்டும். “புத்திர பாக்கியம்’ என்று உயர்வாகச் சொல்வர். அப்படிப் பிறக்கும் புத்திரனால் பித்ருக்கள், பித்ருலோகம் போவதாக நம்பிக்கை. வாழை யடி, வாழையாக வம்சம் விருத்தியாகிக் கொண்டே போனால் தான் பித்ருக்களுக்குப் புண்ணியலோகம் கிடைக்கும்.
அதனால், புத்திரனில்லாதவர்கள், புண்ணிய தீர்த்தங்களில் நீராடுவதும், பிரசித்தி பெற்ற ஆலயங்களுக்கு சென்று வருவதும், விரதங்கள் அனுஷ்டிப்பதும் வழக்கம். எவ்வளவு செல்வமிருந்தாலும், எவ்வளவு போகமிருந்தாலும் ஒரு மழ லைச் செல்வத்துக்காக ஏங்கு பவர்கள், கடவுள் அருளால் ஒரு குழந்தை பிறந்து விட்டால் மகிழ்ச்சிக் கடலில் மூழ்குவர். இதில், மற்றொரு விஷயமும் உள்ளது. அப்படி பிறக்கும் புத்திரன், “சத்புத்திர’னாக இருக்க வேண்டும். இது ரொம்பவும் முக்கியம். அதற்கும் புண்ணியம் செய்திருக்க வேண்டும். பஞ்ச பாண்டவர்களைப் போன்ற சத்புத்திரர்களும் உண்டு; துரியோதனாதியர்களைப் போன்ற துஷ்ட பிள்ளைகளும் உண்டு. சத்புத்திரர்களை அடைந்தால் அதுவே பெரிய பாக்கியம்.
புத்திரனை வேண்டி பரமேஸ்வரனைக் குறித்து தவம் செய்தார் மிருகண்டு முனிவர். அவர் முன் தோன்றி, “பதினாறு வயதுடைய சத்புத்திரன் வேண்டுமா, நூறு வயதுடைய துஷ்ட புத்திரன் வேண்டுமா?’ என்று கேட்டார் பரமேஸ்வரன். முனிவர், “நூறு வயதுடைய துஷ்ட புத்திரன் வேண்டாம்; பதினாறு வயதுள்ள சத்புத்திரனை அனுக்கிரகம் செய்யுங்கள்…’ என்று வேண்டினார். அதன்படி மார்க்கண்டேயன் என்ற சத்புத்திரன் உண்டானான்.
அவன், பதினாறு வயது வந்ததும், தன் பெற்றோர் கவலையுடன் இருப்பதைப் பார்த்து, கவலைக்கான காரணத்தை அறிந்து, பரமேஸ்வரனை ஆராதித்து, அவனருளால் காலனை வென்று, என்றும் பதினாறு வயதுடையவனாக விளங்கும்படி வரம் பெற்றான். பிறகு, மார்க்கண்டேய மகரிஷி என்று பிரகாசித்தான்.

புத்திரன் என்றால், சத்புத் திரனாக இருக்க வேண்டும். இப்படிப்பட்டவர்களால் தனக்கும், பெற்றோருக்கும், குடும்பத்துக்கும், கீர்த்தியும், கவுரவமும் ஏற்படும். குடிகாரப் பிள்ளையையும், திருட்டுப் பிள்ளையையும் பெற்று வாழ்நாள் முழுவதும் வேதனைப் படும் பெற்றோருக்கு அவனால் என்ன பயன்? தாயாரின் மண்டையை உடைக்கிறவனையும், தந்தை மீது வழக்கு போடுகிறவனையும் நாம் பார்க்கிறோமல்லவா!
இவர்களெல்லாம் பிள்ளையாகப் பிறந்த கடன்காரர்கள். கடனை வசூல் செய்து கொண்டு போக வந்தவர்கள் என்று தான் விவரித்துள்ளனர் பெரியோர்.

இல்லறம் நடத்த வேண்டும். நற்பண்புகள் வாய்ந்த மனைவி கிடைக்க வேண்டும். சத்புத்திரன் உண்டாக வேண்டும் இதுதான் ஒருவனுக்கு கிடைக்க வேண்டிய பெரிய பாக்கியம். இப்படி கிடைத்தவன் புண்ணியவான்; கிடைக்காதவன் பாவம் செய்தவன்!

ஒரே பிரசவத்தில் நான்கு குவா… குவா!

ஒரே பிரசவத்தில் நான்கு குவா… குவா!

செயற்கை கருத்தரிப்பில் இரட்டை குழந்தை பிறப்பதே அபூர்வம். அதிலும் , ஒருவருக்கு ஒரே பிரசவத்தில் மூன்று குழந்தைகள் பிறப்பது மிக, மிக அரிது; ஆனால், குழந்தையில்லா அமெரிக்க தம்பதிக்கு ஒரே பிரசவத்தில் ஒரே மாதிரி நான்கு குழந்தைகள் பிறந்துள்ளன.அமெரிக்காவில் பால்டிமோர் பகுதியில் வசிப்பவர் ஜோஷ்வா; அவர் மனைவி அமண்டா; இருவரும் ரேடியேஷன்

டெக்னாலஜி நிபுணர்களாக ஒரு மருத்துவமனையில் பணியாற்றுகின்றனர். திருமணமாகி இரண்டரை ஆண்டு ஆகியும் குழந்தை பிறக்காததால், செயற்கை கருத்தரிப்பு முறையில் , குழந்தை பெற்றுக்கொள்ள முடிவு செய்தனர்.

கணவரின் விந்து மூலம் தயாரான இரு கருமுட்டைகளை அமண்டா கருப்பையில் பொருத்தினர் டாக்டர்கள். அது வளர்ந்தபோது பரிசோதித்ததில், இரட்டைக் குழந்தையாக இருக்கலாம் என்று டாக்டர்கள் கூறினர். பிரசவம் நெருங்கும் போது, ஒரே பிரசவத்தில் மூன்று குழந்தைகள் பிறக்கலாம் என்று தெரிவித்தனர். ஆனால், பிரசவத்தின் போது, முதலில் மூன்று குழந்தைகள் ஒரே மாதிரி பிறந்தன. அடுத்த ஒன்றரை நிமிடத்தில் நான்காவது குழந்தை பிறந்தது. நான்கும் ஆண் குழந்தைகள் தான். நான்கு குட்டீஸ்களும் ஆரோக்கியமான எடையுடன் பிறந்துள்ளன.

இப்படி ஒரே பிரசவத்தில் நான்கு குழந்தைகள் பிறந்தது டாக்டர்களுக்கே பெரும் வியப்பு. “பல நூறு பேரில் ஒருவருக்கு தான் இப்படி நடக்கும்…’ என்று தெரிவித்தனர்.

“எங்களுக்கு குழந்தையே இல்லை என்று பெரும் வருத்தம் இருந்தது. ஆனால், இறைவன் இப்படி ஒரு உச்சகட்ட இன்ப அதிர்ச்சியை தருவார் என்று எதிர்பார்க்கவே இல்லை. போதும்…போதுமென்ற அளவுக்கு எங்களுக்கு குழந்தை செல்வத்தை தந்துவிட்டார்…’ என்று கூறினார் அமண்டா.

“என் கண்களை என்னாலேயே நம்ப முடியவில்லை. அமண்டாவுக்கு பிரசவம் மிக வேகமாக நடந்தது. ஒரு நிமிடத்தில் நான்கு குழந்தைகளும் பிறந்து விட்டன. இப்போதும் இதை என்னால் நம்ப முடியவில்லை…’ என்று சந்தோஷத்தில் கூறினார் ஜோஷ்வா.

தலையிலேயே விடிந்த சாபம்! (ஆன்மிகம்)

தலையிலேயே விடிந்த சாபம்! (ஆன்மிகம்)

பகவானிடம் பக்தி வைத்து வழிபட்டு, அவனருள் பெறுவது தான் பக்தர்களின் நோக்கமாக இருக்க வேண்டும். “அதைக் கொடு, இதைக் கொடு’ என்று கேட்பதில்லை பகவான். “பகவானே… எனக்கு உயர்ந்ததென எதைக் கொடுக்க விரும்புகிறாயோ, அதையே கொடு…’ என்று கூறினாலே போதும்; கிடைக்கும். கீதோபதேசம் முடிந்ததும், “கிருஷ்ணா… நீ சொன்னதையெல் லாம் கேட்டேன். இப்போது நான் எதைச் செய்தால் கீர்த்தியும், மேன்மையும் ஏற்படுமோ, அதைச் சொல்; செய்கிறேன்…’ என்று, முடிவை பகவானிடமே விட்டு விட்டான் அர்ஜுனன்.

மகாபாரதத்தில் யுத்தம் நடந்த போது, ஜயத்ரதன் என்பவனை, சூர்யஸ்தமனத்துக்குள் கொன்று விடுகிறேன் அல்லது தீக்குளிப்பேன் என்று சபதம் செய்தான் அர்ஜுனன். அன்று காலையிலிருந்து ஜயத்ரதன், மறைவாகவே இருந்தான். துரியோதனன், கர்ணன் போன்றவர்கள், அவனுக்குப் பாதுகாவலர்களாக இருந்தனர்.
அர்ஜுனனால் ஜயத்ரதனை நெருங்கவும் முடியவில்லை; அவன் இருக்கும் இடமும் தெரியவில்லை. மாலை நேரமும் வந்துவிட்டது. “என்ன கிருஷ்ணா… சூரியன் அஸ்தமிக்கும் நேரமாகிறதே… ஜயத்ரதனை எப்படிக் கொல்வது?’ என்று கேட்டான்.
சக்ராயுதத்தால் சூரியனை மறைத்தார் பகவான்; இருள் சூழ ஆரம்பித்தது. இதைப் பார்த்த ஜயத்ரதன் குதூகலித்தான். “சூரியன் அஸ்தமித்து விட்டான். இனி, அர்ஜுனன் தீக்குளித்து விடுவான்…’ என்ற எண்ணத்தில் தலையை வெளியே நீட்டினான். உடன், அர்ஜுனனைப் பார்த்து, “அதோ, ஜயத்ரதன் தலை தெரிகிறது…

ஒரே அம்பால் அவன் தலையைக் கொய்து, தலை கீழே விழாமல், அருகில் சமந்த பஞ்சகத்தில் உள்ள விருத்தட்சரன் என்பவருடைய மடியில் தள்ளு…’ என்றார் கிருஷ்ணன்.
இந்த ஜயத்ரதனுடைய தகப்பனார் தான் விருத்தட்சரன். அவர் கோரமான தவம் செய்ததன் பலனாக, இந்த பிள்ளையைப் பெற்றார். அந்த பிள்ளை பிறந்ததும் ஒரு அசரீரி, “உன் புத்திரன் எல்லாராலும் கொண்டாடப்பட்டு, மகாவீரனாக இருப்பான். மிக்க கோபமும், பராக்ரமும் உள்ள ஒரு வீரனால் இவன் தலை அறுபட்டு மாள்வான்…’ என்றது.
இதைக் கேட்ட விருத்தட்சரன், “தன் தவ வலிமையால், யுத்த களத்தில் எவன் என் பிள்ளையின் தலையை கீழே தள்ளுகிறானோ, அவனது தலை நூறு சுக்கல்களாக சிதறிப் போகட்டும்…’ என்று சாபம் விட்டார்.
இந்த விபரத்தை அர்ஜுனனுக்கு சொல்லி, “உன்னால் அறுபட்டு இந்தத் தலை கீழே விழுந்தால் உன் தலை நூறு சுக்கல்களாக வெடித்து விடும். அதனால், அருகிலுள்ள அவனது தகப்பனார் விருத்தட்சரனுடைய மடியில் அந்தத் தலையைத் தள்ளு…’ என்றார் கிருஷ்ணன்.

அர்ஜுனனும் அப்படியே செய்தான். அந்த சமயம், பூமியில் அமர்ந்து விருத்தட்சரன் சந்தியோ பாசனம் செய்து கொண்டிருந்ததால், மடியில் தலை விழுந்ததை கவனிக்கவில்லை.
பிறகு, அர்க்யம் கொடுப்பதற்காக எழுந்த போது, அவரது மடியில் கனமாக ஏதோ இருப்பதைக் கண்டு அதை கீழே தள்ளினார். அது பூமியில் விழுந்தது. தன் பிள் ளையின் தலையை எவன் பூமியில் தள்ளுகிறானோ, அவன் தலை நூறு சுக்கல்களாகும் என்று இவரே சொல்லியிருந்தபடி இவரது தலையே சுக்கல்களாகியது.

இங்கு கவனிக்க வேண்டிய விஷயம் என்னவென்றால், நம்முடைய எண்ணம் எப்படியெல்லாமோ இருக்கும்; ஆனால், பகவானுடைய சித்தம் வேறு விதமாக இருக்கும். மனிதனை மனிதன் ஏமாற்றி விடலாம்; தெய்வத்தை ஏமாற்ற முடியாது.

நாம் என்ன தான் தந்திரமான சூழ்ச்சி செய்தாலும், சாமர்த்தியமாக நடந்து கொண்டாலும், என்ன நடக்க வேண்டுமென்பதையும், அதை எப்படி நடத்தி வைக்க வேண்டுமென்பதையும் தீர்மானம் செய்வதும், நடத்தி வைப்பதும் பகவான் தான்.
அதனால், எல்லாப் பொறுப்புகளையும் அவனிடம் ஒப்புவித்து விட்டு, “பகவானே… எல்லாம் உன் சித்தம்! எது நல்லதோ, அதைச் செய்!’ என்று சொல்லி, அவனையே சரணடைந்து விட்டால் போதும்… காப்பாற்ற வேண்டியது அவன் கடமை, அவன் செய்வான்!

– வைரம் ராஜகோபால்

இயற்கை தரும் பாடம்! (ஆன்மிகம்)

இயற்கை தரும் பாடம்! (ஆன்மிகம்)

“மரத்தையும், கல்லையும், விஷம் கக்கும் பாம்பையும் மனி தன் வணங்குகிறானே… மிருகங்களை இறைவனுக்கு வாகனமாக்கி யுள்ளானே… இதெல்லாம் மூடநம்பிக்கை இல்லையா?’ என்று கேட்பவர்கள் இருக்கின்றனர்.

தத்தாத்ரேயர் இவர்களுக்கெல் லாம் பதில் சொல்லி உள்ளார். இவர், அத்திரி முனிவர்- அனுசூயா தம்பதியின் புதல்வர். பெரிய ரிஷியாக விளங்கினார்.
தத்தாத்ரேயர் காட்டில் சுற்றிக் கொண்டிருந்த போது, யது என்ற மன்னனைச் சந்தித்தார். தத்தாத்ரேயர் மிக மகிழ்ச்சியாக இருந்ததைக்கண்ட அவன், அவரது மகிழ்ச்சிக்கான காரணத்தையும், அவரது குரு யார் என்பதையும் கேட்டான்.

“எனக்கு 24 குருமார்கள் இருக்கின்றனர்…’ என்றார்.
இந்தப் பதிலைக் கேட்டு ஆச்சரியப்பட்ட மன்னன், “சுவாமி! ஒரு வருக்கு ஒரு குரு தானே இருக்க முடியும்? தங்கள் பதில் வித்தியாசமாக உள்ளதே…’ என்றான்.
அவனிடம், “பஞ்சபூதங்களான ஆகாயம், நீர், நிலம், நெருப்பு, காற்று, சந்திரன், புறா, மலைப்பாம்பு, கடல், விட்டில்பூச்சி, வண்டு, தேனீ, குளவி, சிலந்தி, யானை, மான், மீன், பருந்து, பாம்பு ஆகியவையும், நாட்டியக் காரி பிங்களா, ஒரு குழந்தை, ஒரு பணிப்பெண், அம்பு தயாரிப் பவன், சூரியன் ஆகியோரும் என் குருக்கள் ஆவர்…’ என்றார் தத்தாத்ரேயர். மன்னன் ஏதும் புரியாமல் நின்றதைக் கண்ட தத்தாத்ரேயர் இதற்கு விளக்கமளித்தார்…
“மன்னா! பொறுமையை பூமியிடம் கற்றேன்; தூய்மையை தண்ணீரிடம் தெரிந்து கொண்டேன். பலருடன் பழகினாலும், பட்டும், படாமல் இருக்க வேண்டும் என்பதைக் காற்றிடம் படித்தேன். எதிலும் பிரகாசிக்க வேண்டும் என்பதை தீ உணர்த்தியது; பரந்து விரிந்த எல்லையற்ற மனம் வேண்டும் என்பதை ஆகாயம் தெரிவித்தது.
“ஒரே சூரியன் இருந்தாலும் பல குடங்களில் உள்ள தண்ணீரில் பிரதிபலிப்பது போல மனம் ஒன்றாக இருந்தாலும் பலவாறாக சிந்திப்பதை உணர்ந்தேன்.

“வேடன் ஒருவன் புறாக்குஞ்சு களைப் பிடித்தான். அவற்றின் மீது அன்பு கொண்ட தாய்ப்புறா தானும் வலியச் சென்று வலையில் சிக்கியது. இதில் இருந்து பாசமே துன்பத்திற்கு காரணம் என்பதை உணர்ந்தேன்.
“எங்கும் அலையாமல் தன்னைத் தேடி வரும் உணவைப் பிடித்துக் கொள்வது போல, கிடைப்பதை உண்டு பிழைக்க வேண்டும் என்பதை மலைப்பாம்பிடம் கற்றேன். பல்லாயிரம் நதிகளை ஏற்றுக்கொள்ளும் கடல் போல, எவ்வளவு துன்பம் வந்தாலும் ஏற்கும் பக்குவத்தை கடலிடம் படித்தேன். பார்வையை சிதற விடாமல் ஒரே இடத்தில் மனதை செலுத்துவதை விட்டில் பூச்சி கற்றுத் தந்தது.
“எல்லாவற்றையும் மறந்து மகிழ்ச்சியாயிருப்பதை தாயிடம் பால் குடிக்கும் குழந்தையிடம் கற்றேன். பணிப்பெண் ஒருத்தி அரிசி புடைக்கும்போது வளையல்கள் உரசி ஒலி எழுப்பின; இரண்டு வளையல்களில் ஒன்றை அவள் கழற்றியதும், ஒலி அடங்கியது. இதில் இருந்து இரண்டு பேர் இருந்தாலும் தேவையற்ற விவாதம் ஏற்படும் என்பதைப் புரிந்து கொண்டு, தனிமையே சிறந்ததென்ற முடிவுக்கு வந்தேன்.

“பிங்களா என்ற நாட்டியக்காரி ஏற்கனவே பலரிடம் வருமானம் பார்த்தபின், இன்னும் யாராவது வரமாட்டார்களா எனக் காத்திருந்தாள். யாரும் வராததால், கிடைத்தது போதும் என்று உறங்கி விட்டாள். இதில் இருந்து ஆசையை விட்டால் எல்லாமே திருப்தியாகும் என்பதை புரிந்து கொண்டேன்.

“புற்களால் குழிக்குள் மாட்டிக்கொண்ட பெண் யானையை பார்த்த ஆண் யானை, அதன் மேல் ஆசை கொண்டு அதுவும் வீழ்ந்தது. இதில் இருந்து, பெண்ணாசையும் துன்பத்துக்கு காரணம் என்பதை உணர்ந்தேன்…’ என்று ஒவ்வொரு பொருளுக்கும் விளக்கமளித்தார்.
இதைக் கேட்ட அரசன், தன் பதவியையே உதறித் தள்ளி விட்டு, ஆன்மிகத்தில் ஈடுபட்டான்.
தத்தாத்ரேயர் இயற்கையிடம் கற்ற இந்த உயர்ந்த பாடம் நம் எல்லாருக்குமே பொருந்தும் தானே!
சென்னை கந்தாஸ்ரமத்தில், தத்தாத்ரேயருக்கு தனி சன்னதி உள்ளது. ஆண்டுதோறும் இவரது ஜெயந்தி விழா சிறப் பாக நடத்தப்படுகிறது. இது தவிர, ஒவ்வொரு பவுர்ணமி அன்றும், தத்தாத்ரேயருக்கு சிறப்பு அபிஷேகமும் நடை பெறுகிறது.
படம்: எம். ஹரிஹர செல்வன்

அலுவலகத்தில் பணியாற்றும் நீங்கள் ஜோவியல் பேர்வழியா?

அலுவலகத்தில் பணியாற்றும் நீங்கள் ஜோவியல் பேர்வழியா?

ஹாய் பிரண்ட்ஸ், சில நாட்களுக்கு முன் வெளியூர் செல்ல பேருந் தில் பயணம் செய்து கொண்டிருந்தேன். எனது இருக்கைக்கு பின் இருக்கையில் அமர்ந்திருந்த இளம் வயது பெண்கள் இரண்டு பேர் எதைப் பற்றியோ தீவிரமாக பேசிக் கொண்டிருந்தனர். அப்படி என்ன தான் பேசுகிறார்கள் என்பதை தெரிந்துகொள்ளும் ஆவலில், அவர் கள் பேசுவதைக் கவனிக்க காதுகளை கூர்மைப்படுத்தினேன். அதில் ஒரு பெண் “எங்க ஆபீஸ்ல ஜோக் அடிக்கிறேன் அப்படிங்கிற பேர்ல, அவன் படுத்துறப் பாடு தாங்கல…’ என்று யாரோ ஒருவரை அர்ச்சனை செய்து கொண்டிருந்தார்.

தொடர்ந்து கவனித்ததில் அவர் திட்டியது, தன்னுடன் பணிபுரியும் ஆண் நபர் என்பதையும், அவரால் பாலியல் ரீதியான தொந்தரவை இப்பெண் சந்தித்துக் கொண்டிருக்கிறார் என்பதையும் அறியமுடிந்தது. அவர் மட்டுமல்ல உங்களுள் சிலரும் கூட இப்படி சில அனுபவங்களைப் பெற்றிருக்கலாம்; சிலர் சமாளித்துக் கொண்டிருக்கலாம். ஆனால், இதற்காக எல்லாம் வேலை யை விட்டுவிட்டு வீட்டிலிருக்கும் நிலையில் இன் றைய பெண் களும் இல்லை. பொருளாதார சூழ்நிலையும் இல்லை. சரி இப்படிப்பட்ட சூழ்நிலையை சமாளிப் பது எப்படி?

* ஆபாசமாக பேசுவது, பாட்டு பாடுவது, அருவருக்கத்தக்க அல்லது விரும்பத்தகாத புத்தகம் அல்லது படங்களை கொடுப்பது போன்றவையும் பாலியல் தொந்தரவுகளே. எனவே, இதுகுறித்து கவனமாக இருங்கள். உங்களிடம் இப்படி யாராவது நடந்து கொள்வதாக தெரிந்தால், அவர்களிடம் இருந்து எச்சரிக்கையுடன் விலகி இருங்கள்.

* சக ஆண் ஊழியர்கள் <உங்கள்< உடைகள், உடல், அழகு பற்றிப் பேசினால், முதல் பேச்சிலேயே அதற்கு முற்றுப்புள்ளி வைத்து விடுங்கள். அதை நீங்கள் ஏற்கும் பட்சத்தில், ஒருவேளை, பேச்சு மேலும் மேலும் தொடர்ந் து, ஒரு நாள் <உங்களுக்கு சங்கடத்தை ஏற் படுத்தலாம். அல்லது அவற்றை நீங்கள் ஏற்கும் போது, சம்பந்தப் பட்ட நபரே அதற்கு நீண்ட நாக்கு, மூக்கு முளைத்து பூதமாக்கிவிடலாம். எனவே, இவற்றை ஜஸ்ட் லைக் தட் என்று எடுத்துக் கொள் ளாமல் சற்று உஷாராக இருங்கள்.

* சில பெண்கள் தாங்களாகவே, சில சங்கடங்களை உருவாக்கிக் கொள்வர். <உதாரணமாக, ஜோவியல் பேர்வழி என்று கூறிக் கொண்டு வரையறை இன்றி, பல விஷயங்களைப் பற்றி சக ஆண் ஊழியர்களிடம் பேசும் போது, அவர்களும் அதற் கேற்றவாறு தங்கள் எல்லை களை விரித் துக் கொள்ளலாம். அப்படி நீங்கள் பேசிவிட்டு அவர்களைக் குறை கூறுவதில் நியாயமில்லை. எனவே, நீங்கள் சக ஆண் அலுவலர்களிடம் பேசும் போது,அதற்கான வரையறையை சரியாக வகுத்துக் கொள்ளுங்கள்.

* ஆண்களை எதிரியாக பாவித்தால், சக ஆண் பணியாளர் சாதரணமாக பேசினாலோ அல்லது நகைச்சுவையாக பேசினாலோ கூட அது தவறாக அர்த்தப்படுத்திக் கொள்ளத் தான் தோன் றும். எனவே, ஆண் களை எதிரியாகவோ அல்லது ஆண்கள் அனைவருமே தவறானவர்கள் என்ற எண்ணம் கொண்டவராகவோ நீங்கள் இருந்தால், அந்த எண்ணத்தை மாற்றிக் கொள்ளுங்கள்.

* இப்படியெல்லாம் நீங் கள் கவனமாக இருந்தும் பிரச்னை உங்களை தொடர்ந்தால், சம்பந்தப் பட்ட நபரிடம், அவரது செய்கை <உங்களுக்குப் பிடிக்கவில்லை என் பதை தெரியப்படுத்த தயங்காதீர்கள். அப்படியும் பிரச் னை தொடந் தால், உங்கள் உயரதிகாரியிடம் புகார் அளிக்க தயங்காதீர்கள்.

தோள் மூட்டு தேய்மானம்…! புது சிகிச்சை முறை வந்தாச்சு

தோள் மூட்டு தேய்மானம்…! புது சிகிச்சை முறை வந்தாச்சு

மூட்டு வலி என்பது, முழங்கால் மூட்டு வலி மட்டும் தான் என்று நினைக்கக்கூடாது; உடலில் ஒவ்வொரு எலும்பு இணைப்பிலும் ஏற்படும் தேய்மானங்களும் மூட்டு பாதிப்பு தான். முழங்கால், முழங் கை, கணுக்கால், இடுப்பு மட்டுமில்லாமல், தோள் பட்டையிலும் மூட்டு தேய்மானம் ஏற்படும். வயதானவர்களுக்கு, சில நோய்களால் பாதிக்கப்படுவோருக்கு இது நிச்சயம் ஏற்படும். விபத்து பாதிப்பாலும் ஏற்படும்.

தோள் பட்டை பாதிப்பு பல வகையில், பல வயதினருக்கு ஏற்படுவதுண்டு. இதில் முக்கியமானது உறைந்த தோள் பட்டை மற்றும் தோள் பட்டை தேய்மானம்.

தோள்பட்டை தேய்மானத்துக்கு நவீன சிகிச்சை முறையில், “மெட்டல் கப்’ பொருத்தி செய்துள் ளார் எலும்பியல் நிபுணர் ஏ.கே. வெங்கடாச்சலம். “தோள்பட்டை மாற்று அறுவை சிகிச்சையே தேவையில்லை; சுலபமாக , ரத்தமின்றி, கத்தியின்றி சிகிச்சை செய்யலாம்’ என்கிறார் இவர்.

வயதானவர்களுக்கு

தோள்பட்டை மூட்டு தேய்மானம், பெரும்பாலும் வயதானவர்களுக்கு தான் ஏற்படும். ஆனால், முழங்கால் மூட்டு, இடுப்பு மூட்டு தேய்மானம் போல, இதுவும் அவர்களுக்கு சாதாரணமாக வரக்கூடியது தான். விபத்து போன்ற சூழ்நிலையால் இளம் வயதினருக்கு ஏற்படும். இதை சரி செய்ய, தோள்பட்டை மாற்று அறுவை சிகிச்சை செய் வது தான் இப்போது பழக்கத்தில் உள்ளது. வழக்கமாக செய்யப்படும் தோள்பட்டை மாற்று அறுவை சிகிச்சையில் பாதிப்பு இருக்கும். தோள் குருத்தெலும்புகளை மீண்டும் வளரச் செய்வதை புதிய முறை மூலம் எளிதில் செய்யலாம்.

இது இளம் தலைமுறையினருக்கு பெரிதும் பயனளிக்கக்கூடியது. வெளிநாடுகளில் செய்யப்படும் இந்த நவீன அறுவை சிகிச்சை இப்போது இந்தியாவில் அறிமுகமாகி வருகிறது. வெளிநாடுகளில் இருந்தும் நோயாளிகள் வந்து சிகிச்சை செய்து திரும்புகின்றனர். சமீபத்தில், தென் ஆப்ரிக்காவில் இருந்து சலேகா காடூம் என்ற பெண், நாலைந்து ஆண்டு பாதிப்புக்கு பின், சென்னை வந்து அறுவை சிகிச்சை செய்து கொண்டு சொந்த நாடு திரும்பினார்.

குருத்தெலும்பு வளரும்

தோள் பட்டை தேய் மானத்தை சரி செய்ய நவீன முறையில், “மெட் டல் கப்’ பொருத்தப்படுகிறது. தோள்பட்டையில் அது நீண்ட நாள் பாதுகாப்பு அளிப்பது மட்டுமல்ல, குருத்தெலுபுகள் வளரவும் வழி வகுக்கிறது. குருத்தெலும்புகள் வளர்ந்து தோள் பட்டை பழைய படி ஆகி விட்டால், “மெட்டல் கப்’பை நீக்கி விடலாம்.

இந்த “மெட்டல் கப்’ எந்தவகையில் பக்க விளைவுகளை ஏற்படுத் தாது. மாறாக, எலும்புகளையும், தசைநார்களையும் வளர அனுமதிக்கிறது. இதன் மூலம், சில மாதங்களுக்கு பின், இயல்பான தோள் பட்டை மீண்டும் உயிர் பெற்று விடுகிறது’ என்றார் டாக்டர் வெங்கடாசலம்.

உறைந்த தோள்

தோள் பாதிப்பு என் றாலே, பல பேருக்கு “உறைந்த தோள்பட்டை’ பாதிப்பு தான் வரும். தோள்பட்டை உறைவது என்றால், ஏதோ உறைந்து போய்விடும் என்று எண்ண வேண் டாம். தோள்பட்டை இறுக்கமாகி, எந்த வகையிலும் தூக்க முடியாமல், பயன்படுத்த முடியாமல் போகும். அதற்கு பெயர் தான் “உறைந்த தோள் பட்டை’ என்பது.

விபத்து போன்ற காரணங்களாலும் ஏற்படும்; சிலருக்கு ஓசைப்படாமல் படிப்படியாக கூட ஏற்படும். நாற்பது வயதில் இருந்து 65 வயதுள்ளவர்களுக்கு வரும். வீக்கத்தில் ஆரம்பித்து, கையை தூக்க முடியாமல் போகும்.

சர்க்கரை நோயாளிகளுக்கு

சர்க்கரை நோயாளிகளுக்கு கண் பார்வை பாதிப்பு போன்றவை தான் ஏற்படும் என் றில்லை. தோள்பட்டை உறைவதும் ஏற்படும். எனினும், மிகவும் மோசமாக உள்ள நோயாளிகளில் 20 சதவீதம் பேருக்கு இந்த நிலை ஏற்படும்.

மாதக்கணக்கில் “உறைந்த தோள்’ பாதிப்பு இருக்கும். வலியில் ஆரம்பித்து, போகப் போக தோளை நகர்த்த முடியாமல் போகும். எக்ஸ்ரேயில் தெரிந்துவிடும் என்றாலும், பலருக்கும் முற்றிய நிலையில் தான் அது உணர முடிகிறது.

இந்த பாதிப்பு எட்டு மாதம் வரை தொடரும். அப்போது அதிக வலி தெரியும். சாதாரண பாதிப்பு தான் என்று நினைத்து, அதையும் உணராமல் இருந்து விட்டால், பாதிப்பு அதிகமாக இருக்கும்.

சிகிச்சை எப்படி

சாதாரணமாக பாதிப்பு உள்ளவர்களுக்கு மருந்து சாப்பிட்டு வந்தால் போதும். அத்துடன், பிசியோதெரபி செய்ய வேண்டும். அப்படி செய்து வந்தால், நிச்சயமாக பாதிப்பு நீங்கும். பல மாதங்களுக்கு இப் படி சிகிச்சை முறை தொடர வேண்டும். இல்லாவிட்டால், மீண் டும் மீண்டும் பாதிப்பு வரத்தான் செய்யும். அதிக பாதிப்பு இருந்தால், அறுவை சிகிச்சை செய்ய வெண்டி வரும். அப்போது, பாதிக்கப்பட்ட குருத்தெலும்பு பகுதி நீக்கப்பட்டு சரி செய்யப்படும். இதற்கு “ஆர்த்ரோஸ்கோபிக்’ அறுவை சிகிச்சை முறையில் ஆப்பரேஷன் செய்யப்படும். சிறிய துளையிட்டு, குழாய் செருகப்படும். அதில் பொருத்தப்பட்ட கேமராவில் பார்த்தபடி சிகிச்சை செய்யப்படும்.

இருபது வயதினருக்கும்… கிட்னி ஸ்டோன் பிரச்னை- உணவை மாற்றினால் தப்பலாம்

இருபது வயதினருக்கும்… கிட்னி ஸ்டோன் பிரச்னை உணவை மாற்றினால் தப்பலாம்

அறுபது வயதினருக்கு ஏற்படும் பல உடல் கோளாறுகள் இப்போது, இருபது வயதினருக்கு கூட வருகிறது. காரணம், உணவுப்பழக்கத்தில் ஏற்பட்ட நவீன மாற்றங்கள் தான். பிட்சா, பர்கர் போன்ற ஜங்க் புட் பழக்கம் தான் இதற்கு காரணம்.

இந்த வகையில், நாற்பது வயதில் இருந்து அறுபது வயது வரை உள்ளவர்களுக்கு வந்து கொண்டிருந்த “கிட்னி ஸ்டோன்’பிரச்னை, இருபது வயதினருக்கு சகஜமாக வருகிறது. ஒபிசிட்டி, அதிக உப்பு, காரமுள்ள உணவு வகைகள், கால்சியம் மாத்திரைகள் ஆகியவை தான் காரணம் என்று டாக்டர்கள் கூறுகின்றனர்.

கிட்னி ஸ்டோன் என்பது, ஆண்களுக்கு தான் வரும்; பெண் களுக்கு மிக அரிது; ஆனால், சமீப காலத்தில், 20 -30 வயதுகளில் உள்ள ஆண்களுக்கும் பெண்களுக்கும் சமமான எண்ணிக்கையில் இந்த பாதிப்பு ஏற்படுகிறது.

வருவது ஏன்

கிட்னியில் கற்கள் சேர்ந்து தொந்தரவு செய்ய காரணம் பல இருந்தாலும், அது ஏற்படுவதற்கு காரணம், சிறுநீர் போகும் போது, அதில் உள்ள துகள்கள், திடமாகி கற்களாக மாறுகிறது. இதில் 75 சதவீத கற்கள், கால்சியம் மற்றும் ஆக் சலேட் தொடர்பான கற்கள் தான். உப்பு சார்ந்த உணவுகளால் சிறுநீரில் உள்ள உப்புச்சத்துக்கள், கற் களாகின்றன. அதுபோல உணவுகளில் உள்ள கழிவுகளில் ஆக்சலேட் என்ற கழிவு பிரிகிறது. அதுவும் கால்சியத்துடன் சேர்ந்து கற்களை உருவாக்குகிறது. இரண்டும் சிறுநீருடன் வெளியேறாமல் திடமாகி விடுகின்றன. இது தவிர, கால்சியம் பாஸ் பேட் கற்களும் சேர்கின்றன. சில சமயம், சிறுநீரில் உள்ள அமிலச்சத்து, திடமாகி கற்களாகின்றன. இப்படி பலவகையில் கற்கள் ஏற்படுகின்றன.

ஆரம்பம் எப்படி

சிறுநீரக கற்கள் உருவாவதற்கு காரணம், போதுமான தண்ணீர் குடிக்காமல் இருப்பது தான் என்று முன்பு சொல்வதுண்டு. உடலுக்கு போதுமான தண்ணீர் தேவை. அது வறண்டுபோகக்கூடாது. அதனால், நாளுக்கு மூன்று லிட்டர் தண்ணீர் குடிக்க வேண்டும் என்று டாக்டர்கள் சொல்வர்.

தண்ணீராகவோ, பழ ரசமாகவோ , திரவ உணவாகவோ உடலுக்குள் போக வேண்டும். அப் போது தான் இப்படிப்பட்ட சிறுநீரக கற்கள் சேராது. உப்பு சார்ந்த பிஸ்கட், உணவுகள் சாப்பிடுவோருக்கு இந்த பிரச்னை எளிதில் ஏற்படும்.அதனால், உணவிலும் உப்பைக் குறைப்பது மிக நல்லது. இதுபோல, அதிக சர்க்கரையும் ருசிக்கக்கூடாது.

என்ன சாப்பிடலாம்

கிட்னி ஸ்டோன் வராமல் தடுக்க மட்டுமல்ல, உடல் ஆரோக்கியத்துக்கும் தண்ணீரும், ஜூஸ் களும் அடிக்கடி சாப்பிடுவது நல்லது. உடல் வற்றிப் போகக் கூடாது என்பதற்கு இந்த இரண்டும் முக்கியம். ஆனால், இளம் வயதினருக்கு இரண்டுமே எதிரிகள்.

டப்பாவிலும், பாட்டிலிலும் அடைக்கப்பட்ட கோலா ஜூஸ்கள் தான் பிடித்தமானது; அதுபோல, பிட்சா, பர்கர் போன்ற ஜங்க் உணவுகள் சாப்பிடுவதில் தான் அதிக அக்கறை டீன் ஏஜினருக்கு.அதை மாற்றி, காய்கறி மற்றும் புரூட் சாலட்களை சாப்பிடலாம்; தினமும் மூன்று லிட்டர் தண்ணீர் குடித்தால், தோலிலும் பளபளப்பு அதிகரிக்கும்.

கால்சியம் குறைக்கலாமா

கிட்னி ஸ்டோனில் கால்சியம் கற்கள் தானே இருக்கிறது; அதனால், கால்சியம் இல்லாத உணவுகளை சாப்பிடலாம்; பால் போன்ற பொருட்களை விட்டுவிடலாம் என்று சிலர் தவறான யோசனை சொல்வர். அது தவறு. கால்சியம் கற்கள் என்பதால், அது தொடர் பான உணவுகளை கைவிட்டுவிட்டால் வேறு வகையில் பாதிப்பு வரும். கால்சியம் மாத்திரைகளை விழுங்குவோர் மட்டும், அதை தவிர்க்கலாம். இதற்கு டாக்டரின் யோசனை கேட்க வேண்டும்.

சிகிச்சை என்ன

சிறுநீரக கற்கள் என்பது சிலருக்கு சிறிய அளவில் இருக்கும். அவற்றை சில பயிற்சிகள், மருந் தால் சரி செய்து விட முடியும். சிலருக்கு பெரிதாக இருக்கும். அதை அகற்ற அறுவை சிகிச் சை தான் ஒரே வழி. இப் போது இந்த வகை கோளாறுகளை சரி செய்ய நவீன சிகிச்சைகளும் வந்துவிட்டன. ஒலியை கிளப்பிக்கூட கற்களை கரையச்செய்யும் “லித் தோட்ரிப்சி’ முறையும் உள்ளது. லேசர் கருவி மூலமும் கற்களை கரைக்கலாம். ஆனால், இவற்றால், சிறுநீரக திசுக்கள் பாதிக்கப்படாமல் பார்த் துக்கொள்ள வேண்டும். சிலருக்கு “கோல்ப்’ பந்து அளவுக்கு கூட சிறுநீரக கல் இருக்கலாம். அதற்கு அறுவை சிகிச்சை தவிர வேறு வழியில்லை.

ஒபிசிட்டி உள்ளவர்கள்…

சிறுநீரக கற்கள் யாருக்கு வரும் என்றெல்லாம் சரியாக சொல்ல முடியாது; இருபது வயதை தாண்டியவர்களுக்கும் வருவதால், அவர்கள் உஷாராக இருக்க வேண்டும். குண்டாக (ஒபிசிட்டி) இருப்பவர்கள் எச்சரிக்கையாக இருக்க வேண்டும். சரியாக சிறுநீர் போகாமல் இருந்தால், டாக்டரிடம் காட்டலாம். சிறுநீரக கற்கள் உள்ளவர்களுக்கு உயர் ரத்த அழுத்தம், சர்க்கரை நோய் போன்ற பிரச்னைகளும் ஏற்பட வாய்ப்புண்டு. அதனால், இதெல் லாம் வராமல் பார்த்துக்கொள்ள உணவு முறையில் இளம் வயதினர் மாற்றத்தை கொண்டு வந்தால் நல்லது.

மூலத்தை துரத்தும் துவரை வேர்

மூலத்தை துரத்தும் துவரை வேர்

நாம் உண்ணும் உணவு உணவுப்பாதையில் சீரணிக்கப்பட்டு திடக்கழிவாக மலவாசலில் வெளியேறாவிட்டால் பல உபாதைகள் தோன்ற ஆரம்பித்துவிடும். இதற்காக மிகவும் பிரயத்தனம் செய்து மலம் கழிக்க முயற்சிக்கும்போது மலவாயிலில் வலி மற்றும் புண்கள் தோன்றலாம். இதே நிலை நீடிக்கும்பொழுது மலப்பாதையில் ஏதேனும் அடைப்பு ஏற்பட்டு மலம் கழிக்க சிரமம் உண்டாவதுடன் ஆசனவாயின் வெளிப்புறம் அல்லது உட்புறத்தில் சிறுசிறு கட்டிகளோ அல்லது வீக்கமோ தோன்றி மூலநோயாக மாறிவிடுகிறது.

குறைந்தளவே தண்ணீர் அருந்துபவர்கள், அதிக உடல் உஷ்ணம் உள்ளவர்கள், நீண்ட நேரம் அமர்ந்தே வேலை செய்பவர்கள், வாயுவை பெருக்கக்கூடிய பதார்த்தங்களை அதிகம் உட்கொள்பவர்கள், கடுமையான மலச்சிக்கல் உள்ளவர்கள் மற்றும் உடல் பருமன் உள்ளவர்கள் மூலநோய்க்கு ஆட்படுகிறார்கள். பரம்பரையாகவும் மூலநோய் ஏற்படுகிறது. இவர்களுக்கு ஆசனவாய் பகுதியில் கிருமிகள் தங்கி வளருவதால் ஆசனவாயில் அரிப்பு உண்டாகி, சில நேரங்களில் மூலம் முற்றிப்போய் ரத்தமும், சீழும் மலத்துடன் கலந்து வெளியேற ஆரம்பிக்கிறது. பலருக்கு இதன் ஆரம்ப அறிகுறி தெரியாமல், நோய் அதிகரித்த பின்பே பலவித உபாதைகள் தோன்றுகின்றன.

மூலநோய் உள்ளவர்கள் வாயுவை பெருக்கக்கூடிய கிழங்கு வகைகள், பயறு வகைகள், கொழுப்பு சத்துள்ள உணவுகள், அசைவம், காரம், பூண்டு ஆகியவற்றை தவிர்ப்பதுடன், நீண்ட நேரம் அமர்ந்திருப்பதையும், அதிக எடை தூக்குவதையும், வாகன பிரயாணம் செய்வதையும் குறைத்துக்கொள்ள வேண்டும். எளிதில் செரிக்கக்கூடிய நார்ச்சத்துள்ள உணவுகள், பச்சை காய்கறிகள், கீரைகள், பழங்களை அதிகம் சாப்பிட வேண்டும். சாதாரண மூலம்தானே என்று அலட்சியம் காட்டினால் அது பவுத்திரமாகவும், ஆசனவாய் அடித்தள்ளலாகவும் மாறிவிடுகிறது.

நாம் அன்றாடம் பயன்படுத்தும் துவரையின் வேரில் ஏராளமான மருத்துவகுணங்கள் அடங்கியுள்ளன. கஜானஸ் கஜன் என்ற தாவரவியல் பெயர் கொண்ட பேபேசியே குடும்பத்தைச் சார்ந்த துவரைப் பயிர்கள் உணவுப்பயிராக சாகுபடி செய்யப்படுகின்றன. சாணபுஷ்பிகம் என்ற சமஸ்கிருத பெயர் கொண்ட துவரையின் வேரில் பெனில் அலனின், ஐசோபுளோவின், ஐசோபுளோவோன், ஸ்டீரால், ஆன்த்ரோகுயினோன், டிரைடெர்பினாய்டு மற்றும் கஜானால் போன்ற வேதிப்பொருட்கள் அடங்கியுள்ளன. இவை மெல்லிய சதைப்பகுதிகளில் ஏற்படும் வீக்கம், கொப்பளம், கட்டி போன்றவற்றை கரைத்து அங்கு தேங்கிய ரத்த ஓட்டத்தை சீராக்குகின்றன.

துவரை வேரை நிழலில் உலர்த்தி முடிந்தளவு பட்டையை உரித்து, நன்கு பொடித்து, சலித்து 1 முதல் 2 கிராம் அளவு தினமும் இரண்டு வேளை தேன் அல்லது வெண்ணெயுடன் கலந்து சாப்பிட, ஆசனவாய் பகுதியில் தோன்றிய வீக்கம் மற்றும் சதை வளர்ச்சி நீங்கும். துவரம் பருப்பிலும் இந்த வேதிச்சத்துக்கள் நிறைந்துள்ளதால் அன்றாட உணவில் நன்கு வேகவைத்து உட்கொண்டு வந்தால் மலவாய் பகுதியில் தோன்றிய வீக்கம் நீங்கும்.துவரை வேரிலிருந்து மருந்து செய்ய இயலாதவர்கள் துவரை வேர் சேர்த்து செய்யப்பட்ட கன்கனியாதிவடி என்னும் ஆயுர்வேத மாத்திரையை காலை-1, இரவு-1 உணவுக்குப் பின்பு சாப்பிட்டுவரலாம். அத்துடன் விளக்கெண்ணெயை கஸ்தூரி மஞ்சளுடன் சேர்த்து ஆசனவாயில் தடவலாம்.

விஸ்டாவில் எக்ஸ்பி பதிப்பது எப்படி?

விஸ்டாவில் எக்ஸ்பி பதிப்பது எப்படி?

லேப்டாப் மற்றும் டெஸ்க்டாப் கம்ப்யூட்டர் தயாரிக்கும் நிறுவனங்கள் பல தாங்கள் வழங்கும் கம்ப்யூட்டர்களில் விண்டோஸ் விஸ்டா தொகுப்பினைப் பதித்தே வழங்குகின்றன. விண்டோஸ் எக்ஸ்பி தொகுப்பில் பழக்கப்பட்டவர்கள், தங்களிடம் உள்ள தனிப்பட்ட சாப்ட்வேர் தொகுப்புகள் விஸ்டாவில் சரியாக வருவதில்லை என உணர்ந்த பலர் எக்ஸ்பி கேட்டால் அந்த நிறுவனங்கள் தற்போது விஸ்டா தான் பதிந்து தர முடியும். அதற்கான உரிமம் தான் தற்போது அமலில் உள்ளது என்று கூறி மறுத்துவிடுகிறார்கள்.

நாம் ஏற்கனவே விண்டோஸ் எக்ஸ்பி சிஸ்டத்தினை கட்டணம் செலுத்தி பழைய கம்ப்யூட்டருக்கென வாங்கி இருந்தாலும் அதனைப் புதிய கம்ப்யூட்டரில் பதிந்து செயல்படுத்த முடியவில்லை. மேலும் புதிய கம்ப்யூட்டருக்கான வாரண்டியின் பலன்களை அனுபவிக்க வேண்டும் என்றால் அதில் இருக்கும் விஸ்டாவினை நீக்கிவிட்டால் நாங்கள் பொறுப்பேற்க மாட்டோம் என்றும் கம்ப்யூட்டரை வழங்கிய நிறுவனங்கள் கூறி விடுகின்றன. இந்நிலையில் விஸ்டா இருக்கும் கம்ப்யூட்டர்களிலேயே எக்ஸ்பி ஆப்பரேட்டிங் சிஸ்டத்தினையும் பதிந்து இயக்க முடியுமா என்று பல வாசகர்கள் மேற்கூறிய காரணங்களைக் காட்டி கேட்டுள்ளனர். அந்த நோக்கில் செயல்படுவதற்கான வழிகளை இங்கு காண்போம்.

விஸ்டா ஆப்பரேட்டிங் சிஸ்டம் மீதே எக்ஸ்பி சிஸ்டத்தினையும் பதிய முயற்சித்தால் பின் விஸ்டா இயங்காமல் போய்விடும். அதன் bootloader மீது தான் புதிய இயக்கம் அமர்ந்துவிடுவதால் சிக்கல்கள் ஏற்படுகின்றன. மேலும் விஸ்டாவின் பூட் பைலை எக்ஸ்பி பூட் பைலை எடிட் செய்வது போல அவ்வளவு எளிதாக இயக்க முடிவதில்லை. எனவே ஒரே கம்ப்யூட்டரில் இரண்டு ஆப்பரேட்டிங் சிஸ்டங்கள் இயங்கும் வகையில் டூயல் பூட் என்ற அடிப்படையில் விஸ்டா இருக்கும்போதே எக்ஸ்பியையும் பதிக்க என்ன செய்யலாம் என்று யோசிக்கும்போதுதான் இதற்கு உதவிடும் புரோகிராம் ஒன்று இணையத்தில் இருப்பது தெரிய வந்தது. அந்த புரோகிராமின் பெயர் VistaBootPro. இந்த புரோகிராமினை www.vistabootpro.org என்ற முகவரியில் உள்ள வெப்சைட்டில் இருந்து இலவசமாக டவுண்லோட் செய்திடலாம்.

இந்த புரோகிராமினை டவுண்லோட் செய்து அதன் மூலம் எக்ஸ்பியை விஸ்டா இருக்கும் கம்ப்யூட்டரில் பதிந்திடும் முன் ஏற்கனவே உங்கள் முக்கிய பைல்களை பேக்கப் எடுத்து அவை சரியாகப் பதியப்பட்டிருக்கின்றனவா என்பதனைச் சோதித்து அறிந்த பின் பத்திரமாக அவற்றை வைத்திடுங்கள். பின் கீழே குறித்துள்ளபடி செயல்படவும்.

1. பார்ட்டிஷன் செய்த ஹார்ட் டிஸ்க்கை மீண்டும் பிரித்தல்: My Computer ஐகானில் கிளிக் செய்து அதில் ‘Manage’ என்னும் பிரிவைத் தேர்ந்தெடுக்கவும். பின் கிடைக்கும் மெனுவில் ‘Disk Management’ என்பதில் கிளிக் செய்திடவும். இங்கு எந்த டிரைவில் எக்ஸ்பியை இன்ஸ்டால் செய்திட விருப்பமோ அதனைத் தேர்ந்தெடுக்கவும். பின் அதன் மீது ரைட் கிளிக் செய்திடவும். இதில் உள்ள காண்டெக்ஸ்ட் மெனுவில் ‘Shrink Volume’ என்பதைத் தேர்ந்தெடுக்கவும்.

2. விண்டோஸ் எக்ஸ்பிக்கு இடம் ஒதுக்குதல்: அடுத்து தேர்ந்தெடுத்த டிரைவில் விண்டோஸ் எக்ஸ்பி சிஸ்டத்தினை நிறுவ இடம் ஒதுக்க வேண்டும். பொதுவாக 10 ஜிபி இடம் அதற்குப் போதும். உங்கள் டிரைவின் மொத்த இடத்தைப் பொறுத்து விஸ்டா இயக்கம் இதற்கென இடம் ஒதுக்கும். அது 10 ஜிபிக்கும் குறைவாக இருந்தால் நீங்களாக 10 ஜிபி இடம் தேர்ந்தெடுக்க வேண்டும்.

3. புது வால்யூம் உருவாக்குதல்: டிஸ்க்கை (Shrunk) ஷ்ரங்க் அல்லது மறு பார்ட்டிஷன் செய்த பின்னர் எதற்கும் இடம் ஒதுக்காத ஏரியா ஒன்று டிஸ்க்கில் தென்படும். இது கிரே கலரில் ஷேட் அடித்துக் காட்டப்படும். இந்த ஏரியாவில் ரைட் கிளிக் செய்து கிடைக்கும் மெனுவில் New Simple Volume என்பதில் கிளிக் செய்திடவும். அதன்பின் கீழ்க்காணும் செயல்பாட்டினைச் சரியாக மேற்கொள்ளவும்.

4. புது வால்யூம் இடத்திற்கு பெயர் சூட்டலும் பார்மட் செய்தலும்: இனி இந்த புதிய இடத்தினை பார்மட் செய்திட வேண்டும். இதில் NTFS பைல் சிஸ்டம் பயன்படுத்தி அதனை விண்டோஸ் எக்ஸ்பி எனப் புதுப் பெயர் கொடுக்கவும். Quick Format என்பதில் டிக் அடையாளம் ஏற்படுத்தி பின் Next என்பதில் கிளிக் செய்திடவும். அதன் பின் கம்ப்யூட்டரை விண்டோஸ் எக்ஸ்பி சிடி கொண்டு பூட் செய்து இந்த இடத்தில் விண்டோஸ் எக்ஸ்பி சிஸ்டத்தினை பதியவும்.

Dual Booting: (டூயல் பூட்டிங்):

1. விஸ்டாவின் BCD புரபைலை பேக் அப் செய்திட: இனி டவுண்லோட் செய்த விஸ்டா பூட் புரோ புரோகிராமினை இன்ஸ்டால் செய்திடவும். பின் இதனை இயக்கத் தொடங்கியவுடன் Backup / Restore சென்டருக்கு நீங்கள் அழைத்துச் செல்லப்படுவீர்கள். அங்கு Browse என்பதில் கிளிக் செய்து உங்களுடைய விஸ்டா சிஸடத்தின் தற்போதைய BCD புரபைல் பைல்களை பேக் அப் செய்திடவும்.

2. பி.சி.டி. பைல்களைப் பார்த்தல்: உங்களுடைய பி.சி.டி. ரெஜிஸ்ட்ரி உங்களுக்குக் காட்டப்படும். இதில் எதுவும் எடிட் செய்திட முடியாது.

3.விஸ்டா பூட் லோடரை ரீ – இன்ஸ்டால் செய்தல்: அடுத்து System Boot loader ஆப்ஷனில் கிளிக் செய்திடவும். இங்கு System Boot loader Install Options (சிஸ்டம் பூட் லோடர் இன்ஸ்டால் ஆப்ஷன்ஸ்) என்ற பிரிவின் கீழ் உள்ள Windows Vista Bootloader என்னும் பகுதியைத் தேர்ந்தெடுக்கவும். இங்கு கிடைக்கும் மெனுவில் All Drives என்பதைத் தேர்ந்தெடுக்கவும். பின்னர் Install Bootloader (இன்ஸ்டால் பூட்லோடர்) என்பதில் கிளிக் செய்தால் விஸ்டா ஆக்டிவேட் ஆகும்.

4. பழைய விண்டோஸ் ஸ்கேன்: Diagnostics என்ற பிரிவில் Run Diagnostics என்பதில் கிளிக் செய்தால் பழைய விண்டோஸ் சிஸ்டத்திற்கான பதிவுகளை சிஸ்டமே செய்துவிடும்.

5. இரண்டு சிஸ்டங்களை நிர்வகித்தல்: Manage BCD OS Entries (மேனேஜ் பிசிடி ஓ.எஸ். என்ட்ரீஸ்) என்பதில் கிளிக் செய்திடவும். Rename OS entry என்பதில் செக் செய்து ஆப்பரேட்டிங் சிஸ்டத்திற்கு புதுப் பெயர் கொடுக்கவும். இறுதியாக Apply Updates அப்ளை அப்டேட்ஸ் என்பதில் கிளிக் செய்து ரீஸ்டார்ட் செய்திடவும்.

மேலே சொன்ன அனைத்தும் சரியாக மேற்கொள்ளப்பட்டால் Windows Boot Manager மெனு விஸ்டா மற்றும் எக்ஸ்பி ஆகிய இரண்டு சிஸ்டங்களிலும் பூட் செய்திட ஆப்ஷன்களைக் காட்டும்.

சில குறிப்புகள்: உங்களுடைய முக்கியமான டாகுமெண்ட் பைல்களை (இமெயில், மியூசிக், வீடியோஸ் மற்றும் முக்கிய ஆவணங்கள்) ஆப்பரேட்டிங் சிஸ்டம் பதியப்பட்டுள்ள டிரைவில் பதியப்படுவதனைத் தவிர்க்கவும். இதன் மூலம் முக்கிய ஆப்பரேட்டிங் சிஸ்டம் பைல்கள் தற்செயலாக நம்மையும் அறியாமல் அழிக்கப்படும் சந்தர்ப்பங்களைத் தவிர்க்கலாம். விஸ்டா மூலம் டிரைவ் பார்ட்டிஷனை மீண்டும் புதுப்பிக்கும் பணியினை மேற்கொள்ளலாம். ஆனாலும் அதில் சில வரையறைகள் உள்ளன. இந்த வகையில் EASEUS Partition Manager என்னும் இலவச புரோகிராம் நமக்கு நம் தேவைக்கேற்றபடி உதவும் வகையில் உள்ளது. இதனை சர்ச் இஞ்சின் மூலம் தேடி டவுண்லோட் செய்து பதிந்து பயன்படுத்தலாம்.