Advertisements

Daily Archives: ஓகஸ்ட் 5th, 2009

வாழ்க்கையை புரட்டிப்போடும் சர்க்கரை நோய்!

வாழ்க்கையை புரட்டிப்போடும் சர்க்கரை நோய்!

மனிதன், காலையில் எழுந்து, காலைக் கடன்களை முடித்து, குளித்து, உடையணிந்து உணவருந்தி, சம்பாதிக்கச் செல்கிறான். வேலை, வீடு, மனைவி, மக்கள், எதிர்காலம், தொழில் என்று தொல்லையில்லா வாழ்க்கையை நடத்தவே விரும்புகிறான். அவன் வாழ்க்கையை புரட்டிப் போட்டு, சந்தோஷத்தை கெடுக்க வந்த நோய் தான் சர்க்கரை நோய்.

சர்க்கரை நோயைக் கண்டுபிடித்தவுடன் தெரிந்து கொள்ள வேண்டிய விஷயங்கள்.

1. சர்க்கரை நோய் நிலை, சமீபத்தில் கண்டுபிடிக்கப்பட்டதா? அல்லது நீண்ட நாட்கள் கண்டுப்பிடிக்கப்படாமல் இருந்திருந்ததா?

2. சர்க்கரை நோய் உடலில் இருப்பது சில, பல வருடங்களா?

3. சில ஆண்டுகளாக இருக்கிறது என்றால் அதன் விளைவுகளை அறிய வேண்டும்.

4. பல ஆண்டுகளாக இருந்தால் இதனால் பலவிதமான கோளாறுகளை கண்டறிதல் வேண்டும்.

முதல் மூன்று வகைகளில் அவ்வளவு பாதிப்பு தெரியாது. கடைசி நான்காவது வகையில் பல உறுப்புகளின் தாக்கம், செயலிழப்புகளைப் பார்க்க முடியும்.

சர்க்கரை நோய் எப்படி வருகிறது?

நாம் உண்ணும் உணவு, உணவுக் குழாய் மூலம் இரப்பையை அடைந்தவுடன் செரித்து இரப்பையிலிருந்து சிறுகுடலுக்கு செல்கிறது. அந்நேரத்தில் இரப்பை, சிறு குடலிலிருந்து இன்கிரிடின் என்ற குளுகோசை கட்டுப்படுத்தும் சுரப்பிகள் பீட்டா செல்களை தூண்டி இன்சுலின் சுரக்கப்பட்டு குளோஸ் என்ற சர்க்கரையை உடலுக்கு ஏற்ற சக்தியாக மாற்றி உடலுக்கு புத்துணர்வு கொடுக்கிறது.

சர்க்கரை நோய்: நாம் சாப்பிடும் அதிக சர்க்கரையினால் மட்டுமல் லாது ஆல்பாசெல், பீட்டா செல் இந்த செல்களில் சுரக்கும் குளுகோகான் ஆல் பருத்து வருகிறது. இன்சுலின் என்ற ஹார்மோன் பீட்டாவிலிருந்து வருகிறது.

(ஏ) ஆல்பா செல் குளுகோனை சுரக்கிறது. இது சர்க்கரை ரத்தத்தில் அதிகமாகிறது.

(பி) பீட்டா செல் (இன்சுலினை சுரக்கிறது) இது சர்க்கரையை சக்தியாக மாற்றுகிறது.

“ஏ’யும் “பி’யும் தராசுத் தட்டுகள் போல சரியாக இயங்க வேண்டும். இதில் கோளாறு (ஏ) அதிகமாகி (பி) குறைந்தால் சர்க்கரை நோய் உண்டாகும்.

சர்க்கரை நாம் உண்ணும் உணவிலிருந்து மட்டுமல்லாது இந்த குளுகான் கல்லீரலில் இருந்து சர்க்கரையை அதிகமாக்குகிறது. மற்றும் கொழுப்பு, புரதம் முதலியவற்றில் இருந்தும் சர்க்கரையை உருவாக்கி ரத்தத்தில் குளுகோஸை அதிகமாக்கி விடுகிறது.

சர்க்கரை நோய் கண்டவர்கள் தினமும் நரகமாக, சந்தோஷத்தை தொலைத்து நோயை வேண்டா வெறுப்புடன் சரியாக கவனிக்கத் தவறினால் ஏற்படும் விளைவுகள் பல முக்கியமாக நாம் பயப்பட வேண்டிய உறுப்புகளில் உயிர் காக்கும் உறுப்புகளான இதயம், மூளை, சிறுநீரகம், கண் இவைகளை கண்ணும் கருத்துமாக கண்காணிக்க வேண்டும்.

கேசம் முதல் நகம் வரை: சர்க்கரை நோய் உச்சந்தலை கேசம் முதல் காலில் உள்ள நகம் வரை தாக்குகிறது. சர்க்கரை நோயை கண்ணுக் குத் தெரியாத மைக்ராக்ஸ் கோப்ரத்த நாளங்களின் வியாதி எனப்படும். இதை ஆஞ்சியோபதி என்பர்.

மைக்ரோ ஆஞ்சியோபதி டயாபடிக் ரெட்டினோபதி கண்களுக்கு தெரியாத ரத்தக் குழாய்களின் உட்சுவர் கொலஸ்டிரால் தாக்கப்பட்டு நடுச்சுவரில் உள்ள தசைகள் செயலிழந்து விடுகிறது. இதனால் கண்ணின் உட்திரையில் கோளாறு ஏற்பட்டு, கண்ணில் உள்ள ரத்த நாளங்கள் பழுதடைந்து ரத்தக் கசிவு ஏற்பட்டு கண் பார்வையை பாதித்து நாளடைவில் பார்வை இழக்க நேரிடும்.

டயாபடிக் நெப்ரோபதி என்ற சிறுநீரகக் கோளாறு: சிறுநீரகம், உடலிலுள்ள கழிவுகள் இது நாம் உண்ணும் உணவில் உள்ள செரிமானத்திற்கு பிறகு ரத்தத்திலுள்ள வேண்டாத வேதியியல் பொருட்களை உடல் உறுப்புக்களால் ஏற்கப்பட்டு மீதி தேவை இல்லாத கழிவுப் பொருட்களான யூரியா போன்றவற்றை வடிகட்டி வெளியேற்றுவது நெப்ரான் என்ற சிறுநீரகத்தின் உயிர்நாடி. இது கெட்டு விடாமல் பாதுகாக்க வேண்டும். இது கெட்டுவிட்டால் யூரியா, கிரியாட்டின் மேலும் பொட்டாசியம் அதிகமாகி சிறுநீரகம் செயலிழக்கிறது.மூன்று மாதம் ஒரு முறை: பொதுவாக மூன்று மாதங்களுக்கு ஒரு முறை சர்க்கரையின் அளவு துல்லியமாக சீராக பராமரிக்கப்படுகிறதா என்பதை அறிய கிளைக்கேர் சுலேட்டு நிமோக்குளான் அளவு பார்த்து சர்க்கரை கட்டுப்பாட்டில் இருப்பதை தெரிந்து கொள்ள வேண்டும். இந்த நெப்ரான் என்ற சிறுநீரக உறுப்பு மிகவும் முக்கியமானது. சர்க்கரை நோயினால் இது பாதிக்காதவாறு கண்காணிக்க வேண்டும்.

இதற்கு முக்கிய பரிசோதனைகளான எச்.பி.ஏ.சி., என்ற கிளைகோ சிலேட் ஹிமோகுளோபின் ரத்தத்தின் சிவப்பு அணுக்களில் உள்ள குளுகோஸ் அளவை துல்லியமாக மூன்று மாதமாக எப்படி சர்க்கரை வியாதி இருந்திருந்தது என்பதைக் காட்டும். இது முக்கிய பரிசோதனை. இரண்டாவது பரிசோதனை மைக்ரோ ஆல்பர்னியூரியா. இது சிறுநீரகத்தின் உயிர்நாடியான நெப்ரானின் செயல்பாட்டைக் குறிக்கும்.

கை, கால்களை முடக்கும்: மூளையைத் தாக்கி, உடலில் உள்ள கை, கால்களை செயல் இழக்கச் செய்து தற்காலிக ஸ்டிரோக் அல்லது நிரந்தர ஸ்டிரோக்கை உண்டாக்கி உடலின் பகுதியை செயலிழக்கச் செய்து வாழ்க்கையையே முடக்கி விடுகிறது. சர்க்கரை இதய நோய் பாதிப்பு உயிரைப் பறிக்கும். மற்ற உறுப்பு பாதிப்புகளினால் உயிர் உடனே போகாது. வாழ்க்கை பாதிக்கும். சர்க்கரை நோய் எத்தனை காலம், ஓராண்டாகி, ஐந்து, பத்து, இருபது ஆண்டா என்பதைப் பொறுத்து இதய தாக்கத்தை சொல்லலாம். முப்பது ஆண்டுகளில் பல நூறு கட்டுரை, பல புத்தகங்கள் சர்க்கரை நோயினால் வரும் இதய நோய்கள் பல உள்ளன. இதற்கு இந்த கட்டுரை போதாது. முக்கியமா இதய நோயைப் பற்றி தெரிந்து கொள்ளலாம்.

மைக்ரோ ஆஞ்சியோபதி, பெரிய ரத்தக் குழாய்களை தாக்கி, கரோனரி ரத்தக் குழாய் அடைப்பை உண்டாக்குகிறது. கண்ணுக்குப் புலப்படாத ரத்த நாளங்கள் பாதிப்பால் இதய தசைகள் பாதிக்கப்பட்டு இதய வீக்கம் ஏற்பட்டு மையோபதி என்ற வியாதி டயபடிக் கார்டியோ மையோபதி என்ற இதய வீக்க நோய் ஏற்படுகிறது. இதை சர்க்கரை நோய் கண்டுபிடித்த நேரத்தில் இருந்து இதயத்தை பாதுகாக்க வேண்டும்.

இதய நோயாளி சர்க்கரையை கட்டுப்பாட்டில் வைத்துக் கொள்ள வேண்டும். இதய நோயாளிகள் ஆஞ்சியோ பிளாஸ்டி ஸ்டென்ட் வைத்த வர்களும் சரி, பைபாஸ் செய்தவர்களும் சரி, ஸ்டென்ட், பைபாஸ் கிராப்ட் இவைகளை பாதுகாத்து வர வேண்டும்.

ஏன்?

சர்க்கரை வியாதி கண்டவர்களுக்கு கரோனரி ஸ்டென்ட்டும், பைபாஸ் கிராப்ட்டும் எளிதில் அடைக்க வாய்ப்புகள் அதிகம். இதற்கு தாறுமாறாக ஏறும் இறங்கும் சர்க்கரை அளவும் கெட்டக் கொழுப்புகளான டி.எச்.எப்., எல்.டி.எல்., தான் காரணம்.

புது பரிசோதனை: சர்க்கரை நோயைக் கண்டுபிடிக்க இன்று வரை வெறும் வயிற்று சர்க்கரை அளவு பரிசோதனையும், சாப்பிட்டு 2 மணி நேரம் கழித்து சர்க்கரை அளவு பரிசோதனையும் உடலில் குளுகோஸ் தாங்கும் திறனைக் கண்டுபிடிப்பது என்ற நிலை மாறி இப்போது சர்க்கரை நோய் உள்ளதா இல்லையா என்பதை துல்லியமாக தெரிய புதிய முறை கண்டுபிடிக்கப்பட்டுள்ளது.

மேற்கண்ட பரிசோதனை எந்நேரமும் செய்யலாம். 6 முதல் 6.5 சதவீதம் இருந்தால் சர்க்கரை நோய் வரும் வாய்ப்பு. 6 சதவீதம் சர்க்கரை நோய் இல்லை 6.5 சதவீதத்துக்கு மேல் நோய் உள்ளது. இது எப்படி கரோனரி நோய்க்கு ஆஞ்சியோகிராம் கோல்டு ஸ்டென்டோ அதுபோல சர்க்கரைக்கு இது முக்கிய டெஸ்ட்

ரத்தக்குழாய் அடைப்பு: சர்க்கரை நோய் உள்ளவர்கள் கட்டுப் பாட்டில் இருந்தால் கரோனரி ரத்தக் குழாய் அடைப்பு எப்படி இருக்கும் என்பதை தெரிய வேண்டும். (ஏ) ஐந்து ஆண்டுகள் உள்ளவர்களும் 20 முதல் 30 சதவீதம் வரை அடைப்பு இருக்கலாம் (பி) பத்து ஆண்டுகள் சர்க்கரை நோய் இருந்தால் 90 சதவீத அடைப்பு. ஒரு இடத்தில் அல்லது பல இடத்தில் அடைப்பு இருக்கலாம்.

(சி) 10 ஆண்டு முதல் 20க்குள் இருந்தால் அடைப்பு ஒரு இடத்தில் மட்டுமல்லாது ரத்தக் குழாய் முழுவதும் அடைப்பு இருக்கும். ஒரு குழாய் மட்டுமல்லாது பல குழாய் அடைப்பு இருக்கும். (டி) சர்க்கரை நோயினால் ரத்தக் குழாய் சிறுத்துப் போய் கரோனரி ரத்தக் குழாய் விட்டம் 2 மில்லி மீட்டர் அதற்கு குறைவாக இருக்கும். இது பரிதாபமான நிலை.

பைபாஸ் கிராப்ட் உள்ளவர்கள் மிகவும் கவனமாக இருக்க வேண்டும். வீனஸ் கிராப்ட்டுக்கு சில காலம் வரை நன்றாக இருக்கும். அதற்கு மேல் வீனஸ் கிராப்ட் மூட வாய்ப்புள்ளது. பல ஆண்டுகள் வரை கிராப்ட் மூடாமல் இருப்பதைப் பார்த்து இருக்கிறேன்.

வீனஸ் கிராப்ட் இது இணைப்பு தான். லீமா, ரிமா என்ற ஆர்ட்டியல் கிராப்ட் கரோனரி ரத்தக் குழாய் போல் இயங்கும். வீனஸ் கிராப்ட் இணைப்பில் ரத்தம் உறைந்து மூடிவிடும். வீனஸ் கிராப்ட் நாளாவட்டத்தில் செயலிழக்கும். இந்த வீனஸ் கிராப்ட்டுக்கு ஆஞ்சியோ பிளாஸ் டிக்கு ஸ்டென்ட் வைக்கப்படுகிறது. இந்த ஸ்டென்ட் எளிதில் மூடிவிடும். மறு பைபாஸ் சிறந்தது. ஸ்டென்ட் அடைக்காமல், ஸ்டென்ட்டையும் மிகவும் பாதுகாக்க வேண்டும். இதில் கவனமாக இருக்க வேண்டும். தனி மனித ஒழுக்கம், வாழ்க்கை முறை மாற்ற வேண்டும்.

நண்பனாக்கி கொள்ளுங்கள்: சர்க்கரை வியாதியுள்ளவர்கள் பல விளைவுகளோடு வாழ கற்றுக் கொள்ள வேண்டும். வாழ்வில் வியாதி வந்தது என்று கவலைப்பட்டு சோம்பேறியாய் மூலையில் இருப்பது நல்லதல்ல. சலிப்பு, வெறுப்பு இவைகள் அதிகமாக தாழ்வு உணர்ச்சி மேலோங்கி தற்கொலைக்கு தூண்டும். பல் தேய்த்து, குளிப்பது போல சர்க்கரையை கட்டுப்பாட்டில் வைக்க தினமும் ஒரு தடவை நினைத்து சந்தோஷமாக வாழ கற்றுக் கொள்ளுங்கள்.

பேராசிரியர் சு.அர்த்தநாரி, 044-24890185.

Advertisements

தாயுமானாவர்! (ஆன்மிகம்)


“அம்மா…’ என்ற சொல் தான், ஒவ்வொரு குழந்தையின் வாயில் இருந்து வெளிப்படும் முதல் வார்த்தை. தாயில்லாத குழந்தைகள் அன்புக்காக ஏங்குகின்றனர்; அவர்களுக்கெல்லாம் தாயாக விளங்குகிறார் தாயுமானசுவாமி. இவர், திருச்சி, காவிரிக்கரையிலுள்ள மலை மீது அருள் செய்கிறார்.

ஆடிப்பெருக்கு திருவிழா காண வருபவர்கள், தாயுமான சுவாமியை அவசியம் வணங்கி வர வேண்டும். குறிப்பாக, புதிதாக திருமணமானவர்களும், குழந்தை இல்லாதவர்களும் இத்தலத்து இறைவனை வழிபட்டு வந்தால், புத்திசாலித்தனமான குழந்தைகள் பிறக்கும் என்பது நம்பிக்கை. பிரசவம் எளிதாக அமையவும், வீடு கட்டும் பணிகள் சிறப்பாக முடியவும் இவரை வணங்குகின்றனர். செவ்வந்திநாதர் என்று பெயர் பெற்றிருந்த இவர், தாயுமானவராக மாறு வதற்கு காரணம் இருக்கிறது.

திருச்சியில் வசித்த தனதத்தன் என்பவரின் மனைவி ரத்தினாவதி, மலைக்கோட்டையில் இருந்த செவ்வந்திநாதரை வழிபட்டு வந்தாள். தனக்கு மகப்பேறு வேண்டுமென பிரார்த் தித்தவள், இறையருளால் கர்ப்பமடைந்தாள். பிரசவ காலம் நெருங்கியது. தனதத்தன் வெளியூர் சென்றுவிட்டார்.

பிரசவ வலி ஏற்படவே, தன் தாய்க்கு தகவல் சொல்லி அனுப்பினாள். காவிரியின் மறுகரையிலிருந்த அவள், மகள் வீட்டுக்கு வேகமாக வந்து கொண்டிருந்தாள். அப்போது, ஆற்றில் வெள்ளம் பெருக்கெடுத்து ஓடியது. பரிசல்காரர்கள், சுழல்மிக்க ஆற்றில் தங்களால் பரிசல் ஓட்ட முடியாது என சொல்லிவிட்டனர். அவள் தவித்துக் கொண்டிருந்தாள்.

தாயைக் காணாத மகளுக்கு பிரசவ வலி அதிகமாகவே, அவள் துடித்துக் கொண்டிருந்தாள். “செவ்வந்திநாதரே… நீயே துணை…’ என்று கதறினாள். அப்போது கதவு திறக்கும் சப்தம் கேட்டது. அந்தப் பெண்ணின் தாய் உள்ளே வந்தாள். அம்மா வந்ததால் அந்தப் பெண் மகிழ்ச்சியடைந்தாள். சுகப்பிரசவத்தில், அழகான குழந்தை பிறந்தது.

கடைத்தெருவுக்கு சென்று பொருட்கள் வாங்கி வருவதாக மகளிடம் சொல்லி, கிளம்பினாள் அந்தத் தாய் . சற்றுநேரம் கழித்து பதைபதைப்புடன் திரும்பினாள். “மகளே! குழந்தை பிறந்து விட்டதா? நேற்று முழுவதும் தனியாக இருந்தாயே! யார் பிரசவம் பார்த்தார்கள்?’ எனக் கேட்டாள். ஒன்றும் புரியாத அந்த மகள், “அம்மா, நீ தானே என்னருகில் இருந்து பிரசவம் பார்த்தாய், உனக்கு என்னாயிற்று?’ என்றாள்.

“நேற்றிரவு காவிரியில் கடும் வெள்ளம்; காலை யில் தான் குறைந்தது. அவசரமாக, இப்போது தானே வருகிறேன்…’ என அவள் சொல்ல, அதிசயித்த அவள், செவ்வந்திநாதரே தனக்கு தயை செய்து, பிரசவம் பார்த்ததை உணர்ந்தாள்.

“எனக்கு தாயும் ஆகி, பிரசவம் பார்த்த தயாபரனே…’ என்று அவரைப் புகழ்ந்தாள். இதனால், செவ்வந்திநாதருக்கு “தாயுமான சுவாமி’ என்ற பெயர் ஏற்பட்டு, அதுவே நிலைத்து விட்டது. 82 மீட்டர் உயரமுள்ள மலையில், 417 படிகள் ஏறி இவரைத் தரிசிக்கலாம். இவருடன் மட்டுவார் குழலம்மை அருள் செய்கிறாள். இங்குள்ள உச்சிப்பிள்ளையார் மிகவும் பிரசித்தி பெற்றவர். தாயுமானவரின் அருள்பெற்ற ரத்தினாவதிக்கும் சிலை இருக்கிறது.

“மந்தம் முழவம் மழலை ததும்ப வரை நீழல்

செந்தண் புனலும் சுனையும் சூழ்ந்த சிராப்பள்ளி சந்தம் மலர்கள் சடைமேல் உடையார், விடை ஊரும் எம்தம் அடிகள், அடியார்க்கு அல்லல் இல்லையே…’ என்ற பாடலைத் தாயுமானவரை மனதில் எண்ணி, கர்ப்பகாலத்தில் பாடி வர, எளிதாக பிரசவம் ஆகும் என்பது நம்பிக்கை.

பாவம் எது, புண்ணியம் எது? (ஆன்மிகம்)

எது பாவம், எது புண்ணியம் என்பதையே புரிந்து கொள்ளாமல் நாட்களைக் கழிக்கின்றனர் மக்கள். நாட்கள் செல்லச் செல்ல ஆயுள் குறைகிறதே! பார்த்துக் கொண்டே இருக்கும்போதே வெள்ளி விழா என்கிறான், பொன் விழா என்கிறான், மணி விழா என்கிறான், வைர விழா என்கிறான். மாலை, மாலையாக போட்டு, போட்டோ எடுத்து, அதைப் பார்த்து மகிழ்ந்து போகிறான். இத்தனை காலத்தில் செய்த பாவம் எத்தனை, புண்ணியம் எத்தனை என்று யோசிப்பதில்லை!

ஆனால், மேலே ஒருத்தன் இருக்கிறான்; அவனிடம் ஒரு கம்ப்யூட்டரே உள்ளது. இவனது பாவ, புண்ணியங்கள் விநாடிக்கு விநாடி அங்கே பதிவாகி விடுகிறது. அங்கு போனதும்தான் அதைப் பார்க்கிறான். “அடேயப்பா! இவ்வளவு பாவமா செய்திருக்கிறேன்? எனக்குத் தெரியவே இல்லையே! ஹி… ஹி…ஹி…’ என்று இளிக்கிறான்.

“டேய், இளிக்காதே! இதற்கெல்லாம் தண்டனை உண்டு; அனுபவித்து விட்டுப் போ…’ என்று, கழுத்தைப் பிடித்து, நரகத்தில் தள்ளுவர். புண்ணியம் செய்தவன் பாடு பரவாயில்லை; நல்ல உலகத்துக்குப் போய் விடுவான்.

அதனால், வாழ்நாளில் சிந்திக்க வேண்டும். பெரியோர் என்ன சொல்லியிருக்கின்றனர், அறநூல்கள் என்ன சொல்கின்றன, யாரை அண்டினால், நற்கதி கிடைக்கும், என்ன செய்தால், தீவினைகள் தொலையும் என்று சிந்தித்து செயல்பட வேண்டும். நம்மை நல்வழிப்படுத்தி, கரை சேர்க்க பல சாதனங்கள் உள்ளன; அவற்றை பயன்படுத்திக் கொள்ள வேண்டும். “மூத்தோர் சொல் அமுதம்’ என்றனர்; அதைக் கேட்க வேண்டும்.

மனிதனுக்கு உதவுவதற்காக மூன்றை சொல்லியுள்ளனர். ஏணி, தோணி, புராணி! ஏணி, மனிதன் மேலே போக உதவுகிறது; ஆனால், தான் மட்டும் இருந்த இடத்திலேயே இருந்து விடுகிறது. தோணி, தண்ணீரைத் தாண்டி அக்கரையில் மனிதனை சேர்த்து விடுகிறது; தான் மட்டும் தண்ணீரிலேயே கிடக்கிறது. புராணி, பகவத் குணங்களைச் சொல்லி, பக்தர்களை பகவானிடம் சேர வழிகாட்டுகிறார்; ஆனால், அவர் மட்டும் இங்கேயே புராணம் சொல்லிக் கொண்டிருக்கிறார்.

“அட, சரிதான் போய்யா! உன் வேதாந்தமும், நீயும்!’ என்று சிலர் சொல்லலாம். வேதமும், வேதாந்தமும், சாஸ்திரமும் சொல்கிறதே… அதை கேட்டு, அதன்படி நடக்கலாமே! நல்லவர்கள் காட்டும் வழி நடப்பது நல்லது தானே!

அக்செஸ் டிப்ஸ்

டேட்டா எனப்படும் தகவல்களைப் பிரித்து வகைப்படுத்தி, நம் எதிர்பார்ப்புக்கேற்ப ஒழுங்குபடுத்தி அவற்றின் முக்கியத்துவத்தின் அடிப்படையில் ரிப்போர்ட் மோடில் தருவதே அக்செஸ். அத்தோடு நின்றுவிடாமல் அதனைத் தேடி அறிவதிலும் நமக்கு பல உதவிகளை அக்செஸ் தந்து வருகிறது. பல வாசகர்கள் அக்செஸ் குறித்து தங்களுக்கு உள்ள சந்தேகங்களை எழுதி வந்தனர். பொதுவான சந்தேகங்கள் அடங்கிய கேள்விகளுக்கான பதில்கள் பொதுவான டிப்ஸ்களாக இங்கு தரப்படுகின்றன.

1. அவுட்லுக்கில் இருந்து டேட்டா பெற: உங்களிடம் அக்செஸ் 2000 அல்லது அதற்குப் பின் வந்த தொகுப்பு இருந்தால் நீங்கள் அவுட்லுக் தொகுப்பில் இருந்து டேட்டாக்களை இதற்கு File மெனு சென்று அதில் Obtain External Data என்பதனைத் தேர்ந்தெடுத்து பின் Access Data Sheet வியூவில் Link Table என்பதனைத் தேர்ந்தெடுக்கவும். அங்கு கிடைக்கும் பைல் டைப் என்ற பட்டியலில் Outlook என்பதனைத் தேர்ந்தெடுக்கவும்.

பின் கிடைக்கும் விஸார்ட் கூறுகிறபடி இயங்கவும். ஒன்றை நினைவில் வைத்துக் கொள்ள வேண்டும். இரண்டிலும் உள்ள டேட்டாக்கள் தொடர்புடையனவாக மாற்றப்பட்டுவிட்டதால் இதில் எந்த புரோகிராமில் டேட்டாவினை மாற்றினாலும் அது இரண்டிலும் எதிரொலிக்கும்.

2. எக்ஸெல் தொகுப்பிலிருந்து டேட்டா: எக்ஸெல் தொகுப்பிலிருந்து டேபிள் ஒன்றை முழுவதுமாகவோ அல்லது பகுதியாகவோ இரண்டு புரோகிராம்களையும் திறக்கவும். அக்செஸ் புரோகிராமில் டேட்டா ஷீட்டில் டேபிள் ஒன்றை உருவாக்கவும். இந்த டேபிள் முழுவதையும் செலக்ட் செய்திடவும். இதற்கு கோடும் பீல்ட் தலைப்பும் குறுக்கிடும் இடத்தில் உள்ள கோட்டில் கிளிக் செய்திடவும். டேபிள் முழுவதும் தேர்ந்தெடுக்கப் பட்டவுடன் எடிட் மெனு செல்லவும். இதில் பேஸ்ட் என்பதனைத் தேர்ந்தெடுக்கவும். பின் இறுதியாக மேற்கொள்ள வேண்டிய அட்ஜஸ்ட்மெண்ட் அனைத்தையும் மேற்கொள்ளவும். பீல்டின் அளவை மாற்றி அமைக்கலாம். பீல்டுக்கான பெயர்களை மாற்றலாம்.

3. அக்செஸ் டேபிளை வேர்டுக்கு மாற்ற: இது மிகவும் எளிதான ஒன்றாகும். இரண்டு புரோகிராம்களையும் திறக்கவும். பைல்களை இயக்கத்திற்குக் கொண்டுவரவும். பின்னர் டேட்டா பேஸ் விண்டோவிலிருந்து அக்செஸ் டேபிளை அப்படியே இழுத்து வந்து வேர்டில் போடவும்.

4. அக்செஸ் ஷார்ட்கட்ஸ்: அக்செஸ் மற்ற ஆபீஸ் புரோகிராம்களைப் போல மிக எளிமையான புரோகிராம் அல்ல. ஏனென்றால் இது டேட்டா பேஸ் தரும் டேட்டாக்களையும் சார்ந்த அப்ளிகேஷன்களையும் முதன்மையாகக் கொண்டு இயங்கும் புரோகிராம். இதனாலேயே கம்ப்யூட்டர் பயன்படுத்துபவர்கள் இந்த தொகுப்பின் பக்கம் வரச் சிறிது தயங்குவார்கள். இருப்பினும் இதனையும் பயன்படுத்த எண்ணுபவர்கள் கீழ்க்காணும் குறைந்த பட்ச ஷார்ட் கட் கீ தொகுப்புகளையும் அவற்றின் செயல் பாடுகளையும் அறிந்து கொள்வது நல்லது.

எப்2 – தேர்ந்தெடுக்கப்பட்ட ஹைப்பர் லிங்க்கில் முழு முகவரியையும் காட்டும்.

எப்4 – காம்போ பாக்ஸ் ஒன்றைத் திறக்கிறது.

எப்5 – பார்ம் மற்றும் டிசைன் என்ற வியூக்களுக்கு நடுவே மாற்றி மாற்றி செல்கிறது.

எப் 9 – காலம் ஒன்றின் அல்லது காம்போ பாக்ஸ் ஒன்றின் பீல்டுகளை அப்டேட் செய்திடும்.

5. விண்டோ ஸூம்: அக்செஸ் தொகுப்பில் பொதுவாக பலரும் ஒரு பிரச்சினையைக் கூறுவதுண்டு. ஒரு பார்ம், க்வெரி அல்லது டேபிள் ஒன்றைப் பார்த்துக் கொண்டிருக்கையில் பீல்டு ஒன்றின் டேட்டா வியூவின் ஏரியாவில் அடங்காமல் இருக்கும். இந்த பிரச்சினையைப் போக்க ஷிப்ட் + எப்2 கீகளை அழுத்தவும். அக்செஸ் ஸூம் என்று ஒரு விண்டோவினைத் திறக்கும். இதில் டெக்ஸ்ட்டை மிகத் தெளிவாகப் படிக்கலாம். இது அக்செஸ் புரோகிராமின் அனைத்து பதிப்புகளிலும் செயல்படும்.

6. குறிப்பிட்ட தகவல் எழுத்தின் அடிப்படையில்: டேபிள் ஒன்றில் பல தகவல்கள் உள்ளன. அதில் ஒரு குறிப்பிட்ட எழுத்தில் தொடங்கும் டேட்டா மட்டும் பெறுவது எப்படி? எடுத்துக் காட்டாக மாணவர்களின் பெயர் பட்டியலில் இருந்து “A”என்று தொடங்கும் மாணவர்களின் பெயர்கள் மட்டும் வேண்டும் என்றால் Name of the Student என்ற க்வெரி பீல்டில் Like A*என்று தர வேண்டும்.

7. பெரிய எழுத்தாக மாற்ற: ஏதேனும் டேட்டா சிறிய மற்றும் பெரிய எழுத்துக்களில் அமைத்த பின் முதல் எழுத்தை மட்டும் பெரிய எழுத்துக்களாக மாற்றக் கீழ்க்காணும் பங்சனைப் பயன்படுத்த வேண்டும். StrConv (string, 3) இதில் string என்பது எந்த சொல்லாகவும் இருக்கலாம்; அல்லது சொற்கள் கலந்த தொடராகவும் இருக்கலாம்.

8. எச்.டி.எம்.எல். பார்ம்: அக்செஸ் பார்ம்களை எச்.டி.எம்.எல். ஆக மாற்றலாம்.இதனால் அக்செஸ் தங்கள் சிஸ்டத்தில் இல்லாதவர்களும் இவற்றைப் பார்வையிடலாம். இதற்கு டேட்டா பேஸ் விண்டோவில் Tools என்ற பட்டனில் கிளிக் செய்திடவும். பின் எந்த பார்மை மாற்ற வேண்டுமோ அதனைத் தேர்ந்தெடுக்கவும். பின் File மெனு செல்லவும். இதில் Export என்பதில் கிளிக் செய்திடவும். இங்கு கிடைக்கும் டயலாக் பாக்ஸில் Save As கிளிக் செய்து பைல் பெயர் மற்றும் அதன் எக்ஸ்டென்ஸன் ஆகியவற்றைக் கொடுக்கவும். இதனை முடித்த பின் Export என்பதில் கிளிக் செய்து பைலை சேவ் செய்திடவும்.

9. பிரிண்ட் ஷார்ட் கட்: டேட்டா பேஸ் ஆப்ஜெக்ட் (ரிப்போர்ட், பார்ம், டேபிள் போன்ற அனைத்தும்) ஒன்றுக்கு ஷார்ட்கட் ஒன்றை உருவாக்கியபின் அதனை ஷார்ட் கட் ஐகானிலிருந்தே பிரிண்ட் செய்திடலாம். இதை நிறைவேற்ற ஐகான் மீது ரைட் கிளிக் செய்து கிடைக்கும் மெனுவில் பிரிண்ட் என்பதில் கிளிக் செய்தால் தேர்ந்தெடுக்கப்பட்ட ஆப்ஜெக்ட் பிரிண்ட் ஆகும். இன்னொரு வழியும் உண்டு. குறிப்பிட்ட ஆப்ஜெக்டை டெஸ்க் டாப்பில் உள்ள பிரிண்டர் ஐகானுக்கு இழுத்து வந்து பிரிண்ட் செய்திடலாம்.

செப்டம்பர் 30ல் கூகுள் வேவ்

கூகுள் வேவ் குறித்து கம்ப்யூட்டர் மலரில் வந்த தகவல்கள் உங்கள் மனதில் இன்னும் இருக்கும் என எண்ணுகிறேன். சென்ற மே மாதம் நடைபெற்ற உலகளாவிய கருத்தரங்கில் இது குறித்த அறிவிப்பினை கூகுள் முதல் முதலில் வெளியிட்டது. ஆனால் அதனை அடுத்து மைக்ரோசாப்ட் தன் பிங் (Bing) சேவை குறித்து செய்திகள் வெளியிட்டு டிஜிட்டல் மீடியா கவனத்தைத் தன் பக்கம் திருப்பிக் கொண்டது.

கூகுள் மே மாதம் அறிவித்த போது இது கூகுள் நிறுவனத்தின் அடுத்த அதிரடி சாதனையாய் இருக்கும் என்று எதிர்பார்க்கப் பட்டது. தற்போதைய ஜிமெயிலின் ஒரு எக்ஸ்டென்ஷனாகத்தான் இது இருக்கும் என அனைவரும் எண்ணினார்கள். இதன் மூலம் பயனாளர்கள் இமேஜஸ், வீடியோ மற்றும் செய்திகளைப் பரிமாறிக் கொள்ளலாம் என்றும் பலர் ஒரே நேரத்தில் எளிதாகத் தங்களுக்குள் உரையாடலை நடத்திக் கொள்ள முடியும் என்று அறிவிக்கப்பட்டது.

செப்டம்பர் 30ல் இந்த சேவை பொதுமக்களுக்கு வழங்கப்படும் எனத் தெரிகிறது. ஏற்கனவே 6000 டெவலப்பர்கள் இந்த திட்டத்தில் இணைக்கப்பட்டு அவர்கள் இந்த சேவையைப் பயன்படுத்தி இதனை மேம்படுத்துவதற்கான வழிகளைத் தந்து வருகின்றனர். அடுத்து பொது மக்களில் ஒரு லட்சம் பேரைத் தேர்ந்தெடுத்து சிக்கள்கள் மற்றும் பிரச்சினைகளைக் கேட்க கூகுள் முடிவு எடுத்துள்ளது. இவர்கள் எப்படித் தேர்ந்தெடுக்கப்படுவார்கள் என்று இன்னும் கூகுள் அறிவிக்கவில்லை. இது குறித்து தொடர்ந்து தகவல் பெற http://wave.google.com என்ற முகவரியில் உள்ள தளத்தினை அணுகவும்.

பி.எஸ்.என்.எல். புதுத்திட்டம்

கடந்த ஆறு மாதங்களில் தன் 3ஜி சேவைக்கு பத்தாயிரம் சந்தாதாரர்களையே பிடிக்க முடிந்த பி.எஸ்.என்.எல்., இந்த சேவையை வழங்க பன்னாட்டளவிலான நிறுவனங்களின் உதவியை நாடுகிறது. அதிவேக இன்டர்நெட், மொபைல் டிவி, வீடியோ கான்பரன்சிங், வேகமான பைல் டவுண்லோட் எனப் பல வசதிகளை மொபைல் போனில் தரக்கூடிய 3ஜி சேவையினைச் சிறப்பான முறையில் வழங்க பி.எஸ்.என்.எல். மற்றும் எம்.டி.என்.எல். ஆகிய பொதுத் துறை நிறுவனங்கள் இந்த முடிவினை எடுத்துள்ளன. வரும் டிசம்பர் மாதம் இதற்கான ஏலத்தை மைய அரசு நடத்தி முடித்தால் அடுத்த ஆண்டு முதல் உலக அளவில் இயங்கும் பல நிறுவனங்கள் தனியா கவோ அல்லது இந்திய தனியார் நிறுவனங்களுடன் இணைந்தோ இந்த சேவையை வேகமாகவும் மக்களை எளிதில் அடையும் வகையிலும் தரத் தொடங்கிவிடுவார்கள். எனவே அதற்குள் தாங்களும் முந்திக் கொள்ள வேண்டும் என இந்த இரண்டு பொதுத்துறை நிறுவனங்களும் முயற்சிக்கின்றன. சென்ற வாரம் எம்.டி.என்.எல். இதற்கான டெண்டரைக் கொண்டு வந்தது. பி.எஸ்.என்.எல். விரைவில் அதே பாணியைப் பின்பற்றும் எனத் தெரிகிறது. வரும் செப்டம்பரில் தன் 3ஜி வாடிக்கையாளர்களின் எண்ணிக்கைய ஒரு லட்சமாக உயர்த்த இலக்கு நிர்ணயித்துள்ளது. தற்போது 100 நகரங்களில் இந்த சேவையை வழங்குவதற்கானக் கட்டமைப்பினைக் கொண்டுள்ள பி.எஸ்.என்.எல். விரைவில் இதனை 1000 நகரங்களுக்கு விரிவடையச் செய்திடும் திட்டத்தினையும் மேற்கொள்ளும்.

இந்த சேவை மூலம் வீடியோ, பாட்டு, கேம்ஸ் ஆகியவற்றை வாடிக்கையாளர்கள் கேட்டு வாங்கும் அளவில் தன் டேட்டா பேஸ் அமைப்பையும் தொழில் நுட்ப வசதியையும் உயர்த்த இருக்கிறது. தற்போது இந்தியாவின் 22 தொலைதொடர்பு மண்டலங்களில் 20ல் பி.எஸ்.என்.எல். மொபைல் சேவையினை வழங்கி வருகிறது. இதன் மொபைல் வாடிக்கையாளர்களின் எண்ணிக்கை 5கோடி.

லேப்டாப் கம்ப்யூட்டருக்கான துணை சாதனங்கள்

பெர்சனல் கம்ப்யூட்டரைக் காட்டிலும் தற்போது லேப் டாப் கம்ப்யூட்டர்கள் விற்பனை உயர்ந்து வருகிறது. பட்ட மேற்படிப்பு படிக்கும் மாணவர்கள், பொறியியல் மற்றும் மருத்துவம் படிக்கும் மாணவர்கள் அனைவரும் லேப்டாப் கம்ப்யூட்டர் ஒன்று தங்களுக்கென இருப்பது மிகவும் முக்கியம் என்பதனை உணரத் தொடங்கி உள்ளனர். பொறியியல் கல்லூரிகளின் நிர்வாகங்களே மாணவர்களுக்கு லேப் டாப் கம்ப்யூட்டர் நிறுவனங்களுடன் பேசி சலுகை விலையில் இவற்றை வாங்கித் தரும் பணியில் தற்போது ஈடுபட்டு வருகின்றன.

லேப் டாப் கம்ப்யூட்டர் மட்டும் வாங்கிவிட்டால் போதாது. இது ஒன்றும் டெஸ்க் டாப் கம்ப்யூட்டர் அல்ல. பல இடங்களுக்கு எடுத்துச் சென்று பயன்படுத்தும் ஒரு சாதனம். செல்லும் இடங்களில் உங்கள் லேப் டாப் கம்ப்யூட்டரின் இயக்கத்திற்கு துணை சாதனங்கள் தேவைப்படலாம். அதனைப் பத்திரமாகப் பாதுகாக்க வேறு சில கருவிகளும் தேவைப்படலாம். எனவே லேப் டாப் வாங்கிய கையோடு அவற்றையும் வாங்கிப் பயன்படுத்துவது அவசியம்.

1. சர்ஜ் புரடக்டர் (Surge Protector): பயணம் செல்லும் இடங்களிலெல்லாம் நமக்குச் சரியான பாதுகாப்பான வழிகளில் மின்சாரம் கிடைக்கும் என எதிர்பார்க்க முடியாது. கிடைக்கும் வோல்டேஜில் திடீரென அழுத்தம் அதிகமானால் அது லேப்டாப்பின் நுண்ணிய பாகங்களை வறுத்தெடுப்பதோடு உங்களின் உழைப்பில் உருவான டேட்டாவையும் காலி செய்துவிடும். எனவே ஒரு நல்ல சர்ஜ் புரடக்டரை வாங்கி வைத்துக் கொண்டு அதனைப் பயன்படுத்துவது நல்லது. இங்கு நல்ல சர்ஜ் புரடக்டர் என்று சொல்லக் காரணம் இது மின்சக்தியை சரி செய்திடும் சாதனம். ரூ.350க்கு சர்ஜ் புரடக்டர் கிடைக்கின்றன.ஆனால் அவை சரியாக இயங்குவதில்லை. ரூ.750 என்ற அளவில் நல்ல நிறுவனங்களால் தயாரிக்கப்பட்டு தரமான சர்ஜ் புரடக்டர்கள் கிடைக்கின்றன. அவற்றை வாங்கிப் பயன்படுத்துவதே நல்லது.

நீங்கள் அடிக்கடி வெளிநாடு செல்பவராக இருந்தால் அங்கு என்ன அளவில் மின்சக்தி விநியோகம் செய்யப்படுகிறது என்பதனை அந்த இணைப்புக்கும் சேர்த்து வடிவமைக்கப்பட்டுள்ள சர்ஜ் புரடக்டரை வாங்குவது நல்லது. லேப் டாப் மட்டுமின்றி வேறு சில டிஜிட்டல் சாதனங்களையும் நீங்கள் உங்களுடன் எடுத்துச் செல்வதால் அதிக அவுட்லெட்கள் உள்ள சர்ஜ் புரடக்டரை வாங்கவும்.

2. செக்யூரிட்டி கேபிள் (Security Cable): செக்யூரிட்டி கேபிள் என்பது நீளமான ஒரு கனமான ஸ்டீல் சங்கிலி. இதன் ஒரு நுனியில் சரியான பூட்டு, பெரும்பாலும் எண்கள் கொண்டு பூட்டும் பூட்டு இருக்கும். அதிக நீளம் இருக்கும் கேபிளைத் தேர்ந்தெடுத்து அதன் பூட்டினையும் சரி பார்த்து வாங்கவும். இதனைப் பயன்படுத்தி நாம் லேப்டாப்பினை எதனுடனாவது இணைத்துப் பூட்டி வைக்கலாம்.

3. யுனிவர்சல் அடாப்டர் (Universal Adapter): வெளியூர்களில் மின்சாரம் பெறக்கூடிய ப்ளக் சாக்கெட்டுகள் வேறு விதமாக இருக்கலாம். இதனால் அருகிலிருந்தும் தொடப் பயந்தேனே என்ற கலைவாணர் ரீதியில் பாட வேண்டியதுதான். லேப்டாப், மின்சாரம், ப்ளக் இருந்தும் பொருந்தாத சாக்கெட் இருப்பதால் இந்த பிரச்சினை ஏற்படும். இந்த பிரச்சினையைத் தீர்க்க கடைகளில் யுனிவர்சல் அடாப்டர் என்று ஒரு சாதனம் விற்பனை செய்யப்படுகிறது. இது எந்த வகை சாக்கெட்டிலும் இணையும் வண்ணம் வடிவமைக்கப்பட்டிருக்கும். இதில் நான்கு வகை ஸ்லைடிங் செட் பின்களும் பலவகை சாக்கெட்டுகளும் இருக்கும். உங்களுக்குத் தேவையான ப்ளக் மற்றும் சாக்கெட்டுகளைப் பயன்படுத்தலாம்.

4. கூலிங் பேட் (Cooling Pad): லேப் டாப் கம்ப்யூட்டரை ஒரு சிலர் மடிக் கணினி என்று கூறுவார்கள். மடித்து வைத்துப் பயன்படுத்தும் கம்ப்யூட்டர் மற்றும் மடிமீது வைத்துப் பயன்படுத்தும் கம்ப்யூட்டர் என இரு வகைகளில் பொருள் கொள்ளலாம். எது எப்படி இருந்தாலும் மடிமீது வெகு நேரம் வைத்துப் பயன்படுத்தினால் லேப் டாப் உள்ளே உருவாகும் வெப்பம் கால் மேல் பகுதியினை சூடு பட வைக்கும். இதனைத் தவிர்க்கப் பல அளவுகளில் கூலிங் பேட்கள் கிடைக்கின்றன. இவை வெப்பத்தினை வெளியேற்றுகின்றன. நம் வீடுகளில் காற்றோட்டமான சூழ்நிலையிலும் கூட இதனைப் பயன்படுத்தலாம்.

5. டிவிடி ரைட்டர் (DVD Writer): பல லேப் டாப் கம்ப்யூட்டர்கள் டிவிடி ரைட்டர் இல்லாமலும் வருகின்றன. ஆனால் நமக்கோ எங்கு சென்றாலும் டிவிடி ரைட்டர் தேவையாய் உள்ளது.இத்தகைய லேப்டாப் வைத்திருப்பவர்கள் தனியே யு.எஸ்.பி. போர்ட்டில் இணைத்துப் பயன்படுத்தக் கூடிய டிவிடி ரைட்டர் ஒன்றை வாங்கித் தேவைப்படும் போது இணைத்துப் பயன்படுத்தலாம். மிகச் சிறிய ஸ்லிம்மான பல போர்ட்டபிள் டிவிடி ரைட்டர்கள் மார்க்கட்டில் கிடைக்கின்றன. கிடைத்தால் புளு ரே டிஸ்க்குகளையும் பிளே செய்திடும் ரைட்டரை வாங்கவும்.

6. யு.எஸ்.பி. ஸ்பீக்கர்கள் (USB Speaker):லேப்டாப் கம்ப்யூட்டரில் உள்ள ஸ்பீக்கர்களில் எதனையும் தெளிவாகக் கேட்டு புரிந்து கொள்ள முடியாது. எனவே இவற்றில் இணைத்துப் பயன்படுத்த பல நிலைகளில்,பல அளவுகளில் யு.எஸ்.பி. ஸ்பீக்கர்கள் கிடைக்கின்றன. மொபைல் போனுக்குக் கூட இத்தகைய ஸ்பீக்கர்கள் இருப்பதைப் பார்த்திருக்கலாம்.

7. போர்ட்டபிள் ஹார்ட் டிரைவ் (Portable Hard Drive): லேப்டாப் கம்ப்யூட்டர்களின் ஹார்ட் டிஸ்க் பெர்சனல் கம்ப்யூட்டர்களோடு ஒப்பிடுகையில் சற்று குறைவான கொள்ளளவு கொண்டவையாகத்தான் இருக்கும். பல லேப்டாப்பில் 80 ஜிபிக்கும் குறைவாக ஹார்ட் டிஸ்க் இருப்பதனைப் பார்க்கலாம். இதற்கு ஒரே வழி எக்ஸ்டெர்னல் ஹார்ட் டிஸ்க் ஒன்றைப் பயன்படுத்துவதுதான். பவர் சப்ளை இல்லாத ஹார்ட் டிஸ்க்குகளை வாங்கிப் பயன்படுத்துவது இந்த வகையில் நல்லது.

8. வயர்லெஸ் மவுஸ் (Wireless Mouse): லேப்டாப்பில் உள்ள ட்ரேக் பேட் நம் அவசரத்திற்கு நேவிகேட் செய்வதற்கு வசதிப்படாது. எனவே கூடுதலாக மவுஸ் ஒன்றை வாங்கிப் பயன்படுத்துவது நல்லது. இந்த மவுஸும் வயர்லெஸ் மவுஸ் ஆக இருந்தால் இன்னும் நல்லது. இதில் மவுஸ், உள்ளே இருக்கும் பேட்டரியில் தான் இயங்கும். எனவே அந்த வகை பேட்டரிகள் சிலவற்றை உபரியாக வைத்துக் கொள்வதும் நல்லது.

9. யு.எஸ்.பி. ஹப் (USB Hub): எப்படி நமக்கு எவ்வளவு அளவில் ராம் மெமரி இருந்தாலும் பற்றவில்லையோ அதே போல யு.எஸ்.பி. போர்ட் எத்தனை இருந்தாலும் நமக்குப் போதுமானதாக இருக்காது. மேலும் சில லேப் டாப் கம்ப்யூட்டர்களில் யு.எஸ்.பி.போர்ட்களை அடுத்தடுத்து அமைத்திருப்பார்கள். இதில் இன்டர்நெட் இணைப்பு தரும் சிறிய சாதனம் போன்றவற்றை ஒன்றில் பயன்படுத்தினால் இன்னொன்றில் எதனையும் இணைக்க முடியாது. எனவே இப்படிப்பட்ட சூழ்நிலையில் உதவ ஒரு இணைப்பில் எடுத்து ஒன்றுக்கு மேற் பட்ட யு.எஸ்.பி. இணைப்பினைத் தரும் யு.எஸ்.பி. ஹப் ஒன்றை வாங்கி வைத்துக் கொள்வது நல்லது.

10.லேப்டாப் கீ போர்டு விளக்கு (Keyboard Light): சிலர் ட்ரெயின்களில் செல்கையில் இரவில் தூக்கம் வராத போது அல்லது அவசரமாக சில மெயில்களை அனுப்ப எண்ணுகையில் லேப் டாப் கம்ப்யூட்டரைப் பயன்படுத்துவார்கள். இவர்கள் பயன்படுத்த கம்பார்ட்மெண்ட்டில் இருக்கும் விளக்கினை ஆன் செய்வது மற்றவர்களின் தூக்கத்தினைக் கெடுக்கும். இவர்களுக்காகவே யு.எஸ்.பி. போர்ட்டில் இணைத்தால் எரியும் சிறு விளக்குகள் மார்க்கட்டில் கிடைக்கின்றன. இதற்குத் தனியே பேட்டரி தேவை இல்லை. இவை லேப்டாப்பின் பேட்டரியிலிருந்தே மின்சாரம் பெற்று மிதமான ஒளியைக் கொடுக்கும். கீ போர்டைக் காண இது போதும். பெரும்பாலும் வளைந்து கொடுக்கும் தன்மை கொண்ட குழாயில் தான் இவை இணைக் கப்பட்டிருக்கும். இதனால் நாம் மற்றவர் மீது ஒளி விழாமல் வைத்துப் பயன்படுத்தலாம்.

11. மல்ட்டிபிள் ஹெட் போன் ஜாக் (Multiple Head Phone Jack): நீங்கள் லேப் டாப் கம்ப்யூட்டரில் ஆடியோ மற்றும் வீடியோ பயன்படுத்துபவராக இருந்தால் அதிக வால்யூம் வைத்துத் தான் கேட்க வேண் டியதிருக்கும். ஹெட் செட் இணைப்பதாக இருந்தால் ஒருவர் மட்டுமே கேட்க முடியும். எனவே நண்பர்களுடன், குடும்ப உறுப்பினர்களுடன் அனைவரும் ரசிக்கத் திட்ட மிட்டால் பல ஹெட்செட் ஜாக்குகள் உள்ள மல்ட்டிபிள் ஹெட் போன் ஜாக் ஒன்றை வாங்கி, முடிந்தால் நீளமான இணைப்பு வயருடன், பயன்படுத் துங்கள். இதனால் ஒரே நேரத்தில் பலரும் ரசிக்கலாம்; மற்றவர்களுக்கும் தொந்தரவு இருக்காது.

ஜேம்ஸ்பாண்ட் கண்ணாடி

அந்தக் காலத்து ஜெய்சங்கர் ஜேம்ஸ் பாண்ட் திரைப்படங்களைப் பார்த்திருக் கிறீர்களா! அதில் வரும் ஜேம்ஸ் பாண்ட் தான் அணிந்திருக்கும் கண்ணாடியை ஒரு ஓரத்தில் தட்டுவார். பின் அடுத்த காட்சியில் அதில் இருந்து எடுக்கப்பட்ட போட்டோவை வைத்து வில்லனை மிரட்டுவார். ஆஹா! அப்படி ஒன்று இருந்தால் நல்லது என்று எண்ணுகிறீர்களா. கேமராவோடு பாட்டு கேட்பதற்கு எம்பி3 பிளேயரையும் இணைத்து ஒரு அழகான சன் கிளாஸ் (கூலிங் கிளாஸ் கண்ணாடி) ஒன்று அண்மையில் மார்க்கட்டில் வந்துள்ளது. இதன் பெயர் NU Spy Sunglasses ஆகும். அது குறித்து இங்கு காணலாம். கவர்ந்திழுக்கும் வடிவம், உள்ளாக அமைந்த கேமரா மற்றும் எம்பி3 பிளேயர் மற்றும் ரிமோட் மூலம் கண்ட்ரோல் செய்து போட்டோ எடுக்கும் வசதி என அசத்துகிறது இந்த கூலிங் கிளாஸ். என்ன ஆடியோவும் போட்டோவும் இன்னும் கொஞ்சம் நன்றாக வரும்படி செய்திருக்கலாம். இருந்தாலும் கொடுக்கும் காசுக்கு பஞ்சம் இல்லாமல் இது இயங்குகிறது.

இதன் வழியே நீங்கள் என்ன பார்க்கிறீர்களோ அதனை அப்படியே போட்டோவாக எடுக்கலாம். அதற்காக கண்ணாடியில் இருக்கும் பட்டனை யெல்லாம் அழுத்தினால் எதிரே உள்ளவர்களுக்குத் தெரிந்துவிடுமே. அதனால் மறைத்து வைத்து இயக்க ஒரு ரிமோட் தரப்பட்டுள்ளது. இதனுடன் இயர் போன் இணைத்து ஒரு எம்பி3 பிளேயர் இயங்குகிறது. இதனுடன் கிடைக்கும் பொருட்களைப் பார்க்கலாம்:

கேமரா சன்கிளாஸ் யு.வி.400 போலரைஸ்டு பிளிப் அப் லென்ஸ் (பிரவுன் மற்றும் வெள்ளை)

யு.எஸ்.பி. எக்ஸ்டென்ஷன் கேபிள்

ரிமோட் கண்ட்ரோல்,

சுத்தம் செய்திட துணி,

எப்படி இயக்க வேண்டும் என்பதற்கான விளக்க உரை நூல்,

இன்ஸ்டால் செய்திட சிடி.

வழக்கமான கூலிங் கிளாஸ் போலத்தான் இதுவும் உள்ளது. பக்கவாட்டில் இருக்கும் பிரேம் மட்டும் சற்று தடிமனாக அமைக்கப்பட்டுள்ளது. இதில் உள்ள லென்ஸ்களை கழட்டி மாட்டலாம். இரண்டு கலர் லென்ஸ் தரப்படுகிறது. இதில் அல்ட்ரா வயலர் கதிர் பாதுகாப்பு உள்ளது. ஸ்கிராட்ச் ஏற்படாது. மேலும் போலரைஸ்டு என்பதால் எதிர் வரும் ஒளிச் சிதறல் கண்களைப் பாதிக்காது. இடது பக்கம் ஒரு சிறிய பட்டன் உள்ளது. கண்ணாடியை அணிந்த பின் இதனை இயக்கினால் பிளேயர் இயங்கும்; அணையும். வலது பக்கம் இரண்டு பட்டன்கள் உள்ளன. கண்ணை ஒட்டி உள்ள பட்டனை அழுத்தினால் போட்டோ எடுக்கப்படுகிறது. அதற்கு முன் பிளேயரை அணைத்துவிட வேண்டும். மியூசிக் இசைக்கையில் பட்டனை அழுத்தினால் அடுத்த பாடலுக்குச் செல்லும். அழுத்தியபடியே இருந்தால் வால்யூம் அதிகரிக்கும். வலது காதுக்கு அருகே உள்ள பட்டனை அழுத்தினால் பாடலின் தொடக்கத்திற்குச் சென்று இசைக்கும். அப்படியே அழுத்தினால் வால்யூம் குறையும். இதில் உள்ள சிறிய எல்.இ.டி.விளக்கு பிளேயர் என்ன நிலையில் உள்ளது என்று காட்டுகிறது. கண்ணாடியை பெர்சனல் கம்ப்யூட்டருடன் இணைக்க ஒரு சிறிய யு.எஸ்.பி. போர்ட் உள்ளது.

இத்துடன் வரும் ஒரு சிறிய சார்ந்த சாதனம் இதன் ரிமோட் கண்ட்ரோல். கண்ணாடியில் உள்ள பட்டனைக் காட்டிலும் இதனை இயக்கினால் போட்டோ மிக அழகாக எடுக்கப்படுகிறது. இதனை அழுத்தி போட்டோ எடுக்கையில் மியூசிக்கை நிறுத்த வேண்டியதில்லை.மியூசிக் இசைக்கவும் தற்காலிகமாக நிறுத்தவும் பட்டன்கள் தரப்பட்டுள்ளன. இவ்வளவு இணைப்புகள் இருந்தும் கண்ணாடியின் எடை ஒன்றும் கூடுதலாக இல்லை. மற்ற கண்ணாடிகள் போலத்தான் இருக்கின்றன.

இதன் கேமரா 1.3 மெகா பிக்ஸெல் திறன் கொண்டது. இதன் லென்ஸ் இருக்கும் இடத்தைக் கண்டறியவே முடியாது. கேமராவின் போகஸ் நிலையானது. ஆட்டோ போகஸ் கொடுத்திருக்கலாம். உங்கள் எதிரே உள்ள பொருளைத்தான் இது போட்டோ எடுக்க முடியும். ஒன்றிரண்டு போட்டோ எடுத்து கம்ப்யூட்டரில் பார்த்தால் உங்களுக்கு எந்த அளவில் இது போட்டோ எடுக்கிறது என்று தெரிந்துவிடும்.இதனை உளவு பார்க்கும் பணி மற்றும் பிறருக்குத் தெரியாமல் போட்டோ எடுக்கும் பணிக்கு மட்டுமே பயன்படுத்தலாம். ஒளி குறைந்த இடங்களில் கூட நன்றாக போட்டோ எடுத்துத் தருகிறது.

சன்கிளாஸ் செயல்பாடும் நன்றாக உள்ளது. குளிர்ச்சியாக உள்ளது. அல்ட்ரா வயலட் கதிர் பாதுகாப்பும் போலரைஸ்டு வசதியும் இதனைச் சிறப்பாக்குகின்றன. இதனைத் தனியாகப் பாட வைத்து கேட்க முடியாது. கண்களில் அணிந்துதான் கேட்க முடியும்.இதன் பேட்டரி ஐந்து மணி நேரம் தொடர்ந்து பாடல்களைக் கேட்க உதவுகிறது. தனியே ஐபாட், பின் கூலிங் கிளாஸ் என இருக்கும் இளைஞர்களுக்கு இது உகந்தது. 1 ஜிபி திறன் கொண்ட இதன் விலை ரூ.4,000.

மைக்ரோசாப்ட் வழங்கும் புதிய ஆன்லைன் சேவைகள்

சிறிய மற்றும் நடுத்தர நிலையில் இயங்கும் நிறுவனங்களின் தகவல் தொழில் நுட்பம் மற்றும் தொலைதொடர்புக்கான செலவினப் பாதியாகக் குறைத்திடும் வகையில் பல்வேறு ஆன்லைன் வசதிகளை மைக்ரோசாப்ட் நிறுவனம் அண்மையில் அறிமுகப்படுத் தியுள்ளது. இந்த சேவைகளை இரண்டு மாதத்திற்கு இலவசமாகப் பெற்றுப் பயன்படுத்திப் பார்த்துப் பின் தேவை எனில் கட்டணம் செலுத்திப் பெறலாம். வர்த்தக ரீதியில் இவை வரும் அக்டோபர் மாதம் முதல் கிடைக்கும். வர்த்தக நிறுவனங்கள் தங்கள் வாடிக்கையாளர்கள், அலுவலர்கள், தனி உரிமம் பெற்று இயங்குபவர்கள் ஆகியோரை 24 மணி நேரமும் தொடர்பு கொண்டு தங்கள் வர்த்தக தொடர்பான அலுவல்களை குறைந்த செலவில் மேற்கொள்ளும் வகையில் இந்த வசதிகள் தரப்படுகின்றன. இதனால் நிர்வாக மற்றும் உற்பத்தி செலவுகள் குறைந்து நிறுவனத்தின் செயல்திறன் கூடும். இமெயில் போக்குவரத்து, டிஜிட்டல் நெட்வொர்க், எக்சேஞ் ஆன்லைன், ஆபீஸ் ஷேர் பாய்ண்ட் ஆன்லைன், வீடியோ கான்பரன்சிங், ஆபீஸ் லைவ் மீட்டிங், எம்.எஸ். ஆபீஸ் கம்யூனிகேஷன்ஸ் ஆன்லைன் எனப் பல வசதிகள் தரப்படுகின்றன. ஒரு நிறுவனம் இவை அனைத்தையும் மொத்தமாகக் கேட்டு கட்டணம் செலுத்தி வாங்க வேண்டும் என்பதில்லை. தேவைப்படும் வசதிகளை மட்டும் பெறலாம். பயன்படுத்தும் வசதிகளுக்கு மட்டும் கட்டணம் செலுத்தும் வசதியும் உண்டு. தேர்ந்தெடுக்கப்பட்ட சாப்ட்வேர் அப்ளிகேஷன்களை எப்போதும் வேண்டுமானாலும் மாற்றிக் கொள்ளலாம். இவற்றைப் பெற்றுப் பயன்படுத்துகையில் தேவைப்படும் ஆலோசனைகளையும் உதவியையும் மைக்ரோசாப்ட் எந்நேரமும் வழங்குகிறது. இந்த திட்டத்தினைத் தற்காலிகமாக இலவசமாகப் பெற நீங்கள் அணுக வேண்டிய தள முகவரி: http://www.microsoft.com/india/onlineservices.

இந்த முகவரிக்குள் முதலில் லாக் இன் செய்திடவும். பின் உங்கள் நாடு என்ற பட்டியலில் இந்தியா என்பதைட்தேர்ந் தெடுத்துப் பின் உங்கள் லைவ் மெயில் ஐ.டி.யைத் தரவும். அடுத்து எந்த எந்த சேவைகள் வேண்டும் என்பதனைத் தேர்ந்தெடுக்கவும். பின் உங்களுக்கு எந்த எந்த சர்வீஸ் தரப்படுகிறது என்று அறிவிப்பு கிடைக்கும். அதன் பின் அவற்றைப் பயன்படுத்தலாம்.

இனிமேல் ஆண்ட்ராய்ட்

கூகுளின் ஸ்மார்ட் போனுக்கான ஆப்பரேட்டிங் சிஸ்டத்தினைத் தங்கள் போன்களில் கொண்டுவர முன்னணி மொபைல் தயாரிப்பாளர்கள் முன்வந்துள் ளனர். எச்.டி.சி., சாம்சங், எல்.ஜி., மற்றும் மோட்டாரோலா ஆகிய நிறுவனங்கள் நகரங்களில் வாழும் இளைஞர்களை முன்னிறுத்தி ஆண்ட்ராய்ட் ஆப்பரேட்டிங் சிஸ்டத்துடன் போன்களைக் கொண்டு வர இருக்கின்றன. மத்திய மற்றும் உயர் ரக போன் வரிசையில் இவை கிடைக்கும். எச்.டி.சி. நிறுவனம் தன் முதல் ஆண்ட்ராய்ட் போனை இந்தியாவிற்குக் கொண்டு வந்துள்ளது. சாம்சங் கேலக்ஸி என்ற பெயரில் முதல் ஆண்ட்ராய்ட் போனை அடுத்த மாதம் கொண்டு வர இருக்கிறது. எல்.ஜி. மற்றும் மோட்டாரோலா நிறுவனங்களின் போன்கள் டிசம்பரில் இங்கு கிடைக்கும்.

இது குறித்து கூகுள் இந்தியா இயக்குநர் கூறுகையில் உலக அளவில் 47 நிறுவனங்கள் ஆண்ட்ராய்ட் ஆப்பரேட்டிங் சிஸ்டத்துடன் போன்களைத் தயாரிக்க ஒப்பந்தம் மேற்கொண்டுள்ளன என்று கூறினார். வரும் டிசம்பரில் பன்னாட்டளவில் 15 முதல் 20 மாடல்கள் ஆண்ட்ராய்ட் சிஸ்டத்துடன் வரும். ஆண்ட்ராய் இன்டர்நெட் பிரவுசிங் மற்றும் டச் ஸ்கிரீன் பிரிவில் பல புதுமையான வசதிகளைத் தரும் சிஸ்டமாகும். தற்போது சிம்பியன் மற்றும் விண்டோஸ் மொபைல் சிஸ்டங்கள் மார்க்கட்டில் பயன்படுத்தப்படும் மொபைல் போன்களில் இயங்குகின்றன.

அடுத்ததாக ஆண்ட்ராய்ட் பெரிய அளவில் இடம் பிடிக்கும் என்று எதிர்பார்க்கப்படுகிறது. பொதுவாக மொபைல் பயன்படுத்துபவர்கள் தங்கள் போன்களில் எந்த ஆப்பரேட்டிங் சிஸ்டம் இயங்குகிறது என்று பார்ப்பதில்லை. அவர்களுக்கு நவீன புதிய ஆச்சரியப்படத்தக்க வகையில் வசதிகள் தரப்பட வேண்டும்; அவ்வளவுதான். இதனை ஆண்ட்ராயட் அவர்களின் எதிர்பார்ப்புக்கும் மேலாக நிறைவேற்றும் என்று அனைவரும் எதிர்பார்க்கின்றனர். மேலும் ஆண்ட்ராய்ட் ஆப்பரேட்டிங் சிஸ்டத்தினைப் பயன்படுத்த எந்த உரிமைத் தொகையையும் செலுத்த வேண்டியதில்லை என்பதால் மொபைல் போன்களின் விலை குறைய அதிக வாய்ப்புகள் உள்ளன. தற்போது எச்.டி.சியின் ஆண்ட்ராய்ட் ஸ்மார்ட் போன் ரூ.30,000க்கும் சாம்சங் ரூ. 29,000க்கும் விற்பனையாகின்றன. இன்னும் குறைவாக ரூ.10,000 முதல் ரூ.15,000 வரைக்குள்ளாக போன்கள் வெளியானால் தான் மார்க்கட்டைப் பிடிக்க முடியும்.

விண்டோஸ் 7ல் எக்ஸ்பி மோட்

விண்டோஸ் எக்ஸ்பியின் தீவிர ரசிகர்களை இணைத்தால் ஒரு நாடே உருவாக்கலாம். அந்த அளவிற்கு எக்ஸ்பி ஆப்பரேட்டிங் சிஸ்டம் ஒன்றே போதும் என இருப்பவர்கள் கோடிக்கணக்கானோர். அதனாலேயே விண்டோஸ் விஸ்டா, எக்ஸ்பி பிரபலமான அளவிற்கு உயரவில்லை. இப்போது விண்டோஸ் 7 வர இருக்கிறது. மைக்ரோசாப்ட் அண்மையில் விண்டோஸ் எக்ஸ்பி ரசிகர்களுக்கு ஒரு நல்ல செய்தியைச் சொல்லி உள்ளது.விண்டோஸ் 7 தொகுப்பில் விண்டோஸ் எக்ஸ்பி மோட் வசதி தரப்படும். இதன் மூலம் விண்டோஸ் எக்ஸ்பியில் இயங்கி விண்டோஸ் 7ல் இயங்க மறுக்கும் புரோகிராம் ஒன்றினை விண்டோஸ் எக்ஸ்பி மோட் பெற்று இயக்க முடியும். இதன் மூலம் மக்களை விண்டோஸ் எக்ஸ்பியிலிருந்து விலகி விண்டோஸ் 7 தொகுப்பிற்கு வரச்சொல்கிறது மைக்ரோசாப்ட்.

ஆனால் இதில் ஒரு கெட்ட செய்தியையும் தந்துள்ளது. இந்த விண்டோஸ் எக்ஸ்பி மோட் விண்டோஸ் 7 ஆப்பரேட்டிங் சிஸ்டத்தின் அனைத்து பதிப்புகளிலும் கிடைக்காது. புரபஷனல் மற்றும் அல்டிமேட் பதிப்புகளில் மட்டுமே கிடைக்கும். எனவே அதிகமானோர் வழக்கமாகப் பயன்படுத்தும் ஹோம் எடிஷன்களில் இது இருக்காது. மைக்ரோசாப்ட் இதனைக் கருத்தில் கொண்டு அனைத்து பதிப்புகளிலும் தரும் என்று எதிர்பார்க்கலாம்.