Advertisements

Daily Archives: நவம்பர் 14th, 2009

இனிய எதிரி :இன்று சர்வதேச சர்க்கரை நோய் தினம்

Patient-and-physician-view---blood-sugar-tool

இப்போது எல்லோரும் பயப்படும் ஒரு விஷயமாக “சர்க்கரை நோய்’ உருவாகிவிட்டது. நம் உடலில் கணையம் சுரக்கும் இன்சுலின்தான், ரத்தத்தில் குளுகோஸ் (சர்க்கரை) அளவை சீராக பராமரிக்கிறது. உடலுக்குத் தேவைப்படும் இன்சுலின் உற்பத்தி செய்யப்படாவிட்டாலோ அல்லது உற்பத்தி செய்த இன்சுலினை நம் உடல் சரியாக பயன்படுத்திக் கொள்ளாவிட்டாலோ “சர்க்கரை’ நோய் ஏற்படுகிறது.”டைப்-1’சர்க்கரை நோய் வகையால் பாதிக்கப்பட்டுள்ள நோயாளிகள் “இன்சுலின்’ போட்டுக் கொள்ள வேண்டியிருக்கும்.

இது குழந்தைகள் மற்றும் இளம் வயதினருக்கே அதிகமாக ஏற்படும். “டைப்-2′ வகை நோயாளிகளுக்கு பொதுவாக இன்சுலின் தேவைப்படாது. வயதானவர்களுக்கு ஏற்படும் நோய் இது. என்றாலும் தற்போது 30 வயதிலேயே இவ்வகை நோய் வந்துவிடுகிறது. உணவுக்கட்டுப்பாடு, உடற்பயிற்சி, மருந்துகள் வழியாகவே அவர்கள் இவ்வகை நோயை சமாளிக்கலாம். “டைப்-2′ வகை நோயாளிகளில் சிலருக்கு இன்சுலின் தேவைப்படும். இந்தியாவில் “டைப்-2′ வகை சர்க்கரைநோயால்தான் பெரும்பாலானோர் பாதிக்கப்பட்டுள்ளனர்.தண்ணீர் தாகம், தொண்டை வறட்சி, அடிக்கடி சிறுநீர் கழித்தல், உடல் சோர்வு, பசி, உடல் எடை குறைதல், ஆறாத புண்கள், பார்வை மங்குதல் ஆகியன சர்க்கரை நோயாளிகளுக்கு வரும் அறிகுறிகள்.

சர்க்கரை நோய் இருக்கிறது என்று டாக்டர் சொன்ன உடனே பலர் அதிர்ச்சியை வெளிப்படுத்துகின்றனர். தான் ஓர் வாழ்நாள் நோயாளி என்ற எண்ணம் அவர்களிடம் ஏற்படுகிறது. சர்க்கரை நோய் வந்தவுடன் மனதில் கொள்ள வேண்டிய ஒரே விஷயம் நம் வாழ்க்கை முறை மாற்றிக் கொள்ள வேண்டியதுதான். எண்ணெய், தேங்காய், உள்ளிட்ட கொழுப்புப் பொருட்களை அதிகம் சேர்த்துக் கொள்வதை தவிர்க்கலாம். இனிப்பு, அதிக காரம்,வறுவல் உணவுகளை தவிர்த்துவிட்டு அவித்த பொருட்களுக்கு மாறலாம். ஆட்டுக்கறியிலிருந்து மீன் மற்றும் கோழி சேர்த்துக் கொள்ளலாம். உடற்பயிற்சி செய்யாதவராக இருந்தால் அதற்கு நேரம் ஒதுக்கலாம். நேரம் தவறாமல் மாத்திரைகளை எடுத்துக்கொள்வது, முறையான இடைவெளியில் மருத்துவ பரிசோதனை செய்வது அவசியம். கிழங்கு வகைகள் தவிர, கீரை, காய்கறிகளை சேர்த்துக்கொள்ளலாம். இவ் விஷயங்களை கட்டாயம் கடைபிடிக்க வேண்டும். சர்க்கரை நோய் இருக்கிறது என்று டாக்டர் கூறிய உடன், மனம் உடைந்து போகக் கூடாது. 30 – 40 ஆண்டுகளுக்கு முன்பிருந்து கூட, சர்க்கரை நோயுடன் வாழ்ந்து கொண்டிருப்பவர்கள் இன்றும் இருக்கிறார்கள்.

புகைபிடிப்பவரா நீங்கள்?நீங்கள் புகைப்பிடிப் பவராக இருந்தால், இன்றே நிறுத்திவிடுங்கள். சர்க்கரை நோய் இருப்பவர்கள் புகை பிடித்தால் அது இதயத்துக்கு ஆபத்தானது. சர்க்கரை நோய் இல்லாதவர்களுக்கே புகைபிடித்தல் கேன்சர், இதய நோய்கள், பக்கவாதம் உள்ளிட்ட நோய்கள் வருவதற்கு அதிக வாய்ப்புள்ளது. ஆண்டுதோறும் ஒரு கோடியே 70 லட்சம் பேர் இதயம் தொடர்பான பிரச்னைகளால் மரணமடைகின்றனர். 2020ம் ஆண்டில் இதயம் தொடர்பான பிரச்னைகளால் அவதிப்படுவோர் எண்ணிக்கை மிகவும் அதிகமாக இருக்கும். இந்தியர்கள் அதிகம் பாதிக்கப்படும் வாய்ப்புள்ளது. சர்க்கரை நோய் உள்ளவர்களுக்கு கேட்கவே வேண்டாம். வெந்த புண்ணில் வேல் பாய்ச்சிய கதைதான்.

எச்.பி..ஏ.1.சி.,பரிசோதனை தெரியுமா?உடலில் சரியான விகிதத்தில் குளுகோஸ் அளவு இல்லாவிட்டால், பிரச்னைதான். சர்க்கரை இருப்பதால் குறைத்து சாப்பிடும் வழக்கம் உள்ளவர்கள் தங்கள் உடலுக்குத் தேவையான சக்தியை (குளுகோஸ்) அளிக்கத் தவறிவிடுகிறார்கள். ஒரு மணிநேரத்துக்கு 5 கிராம் குளுகோசை நம் மூளை பயன்படுத்திக் கொள்கிறது. ஒரு நிமிடத்தில் ஒரு லிட்டர் ரத்தம் மூளைக்கு பாய்கிறது. ஆகவே சரியான விகித்ததில் சாப்பிடாவிட்டால் மூளைக்கு செல்லும் குளுகோஸ் அளவு பாதிக்கப்பட்டு மூளை செயல் இழக்கலாம். நாம் எவ்வளவு சாப்பிடுகிறோம். சாப்பிட்ட அந்த சக்தியை எப்பஐ எரிக்கிறோம் (அதாவது, வேலை செய்து சக்தியை செலவழிக்கிறோம்) என்பது முக்கியமானது. இரவில் நேரம் கடந்து குடித்துவிட்டு, அதிகமான அளவில் சாப்பிட்டு தூங்குவோருக்கு ரத்தத்தில் அதிக சர்க்கரை ஏற்படும். அதே போல் ஓட்டலில் “பஃபே’யில் சாப்பிடுவதையும் கொஞ்சம் குறைத்துக் கொள்ளலாம்.சர்க்கரை நோய் இருந்தும், முறையாக சாப்பிடாதவர்களுக்கு, திடீர் பசி, வியர்வை, தலைச்சுற்றல், தலைவலி, பார்வை மங்குதல் உள்ளிட்டவை அறிகுறிகள் ஏற்படும்.உணவு வேளைகளில் சாப்பிடாமல் தவிர்த்தல், அதிகளவில் சர்க்கரை மருந்துகளை சாப்பிடுதல், உடற்பயிற்சி செய்வதற்கு தகுந்து உணவு எடுத்துக் கொ ள்ளாமை ஆகியவற்றால் மேற்கூறிய அறிகுறிகள் வரலாம்.

இதுபோன்ற நேரங்களில் பழச்சாறுகள், டீ, காபி உள்ளிட்டவற்றை சேர்த்துக் கொள்ளலாம்.எச்.பி.ஏ.1.சி., (கிளைகாசிலேட்டட் ஹீமோகுளோபின்) எனும் ரத்த பரிசோதனை தற்போது பிரபலம் அடைந்து வருகிறது. இதில் கடந்த 3 மாத காலத்தில் நம் உடலில் இருந்த சர்க்கரை அளவையும் எதிர்காலத்தில் உடல் உறுப்புகள் ஏதும் பாதிக்கப்படுமா என்ற கேள்விக்கான பதிலையும் தெரிந்து கொள்ளலாம். ரத்த நாளங்களும் சிறுநீரகங்களும் சர்க்கரை நோயால் பாதிக்கப்படுகின்றன. சிறுநீரில் ஆல்பமின் அதிகமாக இருந்தால் சர்க்கரை நோய் சிறுநீரகங்களை பாதிக்கத் தொடங்குகிறது என்று அர்த்தம். கிரியேடினைன் யூரியா நிலையையும் தெரிந்து கொள்ள வேண்டும் எச்.பி.ஏ.1.சி., பரிசோதனையில் இது தெரிய வரும்.நமக்கு நாமே ரத்தத்தை அவ்வப்போது பரிசோதனை செய்து கொள்வது எளிது. தற்போது இதற்கான எளிய சாதனங்கள் கிடைக்கின்றன.

எதற்கெடுத்தாலும் டென்ஷன் : மன அழுத்தம் தான் இன்று சர்க்கரை நோய் வருவதற்கான முக்கிய காரணங்களில் ஒன்றாக கூறப்படுகிறது. எந்த ஒரு பிரச்னையையும் ஒரு தனிநபர் எப்படி சமாளிக்கிறார் அல்லது எப்படி கையாள்கிறார் என்பதைப் பொறுத்தே மன இறுக்கம் ஒருவொருக்கொருவர் மாறுபடுகிறது.தீமை விளைவிக்கக்கூடிய, அச்சுறுத்துதல் ஏற்படுத்தக் கூடிய, சவால் தரக்கூடிய சூழ்நிலைகளில் மன அழுத்தம் ஒருவருக்கு ஏற்படுகிறது. சிலர் எந்நேரமும் எதற்கெடுத்தாலும் “நெகடிவாகவே’ சிந்தித்துக் கொண்டிருப்பார்கள். இதற்கு பதிலாக, பிரச்னையை சமாளிக்கவோ அல்லது ஒரு விஷயத்தை வெற்றிகரமாக செய்து முடிக்கவோ திட்டமிட்டு செயல்படலாம். எப்போதும் மிகவும் “சீரியசாக’ இருக்கக்கூடாது. இப்படித்தான் இருக்க வேண்டும், என்ற கட்டாயத் திணிப்புகளையே மனதில் கொண்டு செயல்படாமல் விஷயங்களை எளிமையான அணுகுமுறையுடன் கடைபிடியுங்கள்.

சர்க்கரை வந்தால் “சிறுநீரகம்’ பாதிக்கப்படும், இதயம் பிரச்னைக்குள்ளாகும்… அவர் சொன்னார்… இவர் சொன்னார் என்று பயப்படக்கூடாது. எல்லாவற்றுக்கும் காரணம் நானே என்று எல்லாவற்றுக்கும் தன்னையே நொந்து கொள்ளக்கூடாது. அதற்கு பதிலாக, “சர்க்கரை நோய் வந்ததால்தான் நான் இப்போது இந்த கட்டுப்பாடுகளையெல்லாம் கடைபிடிக்கிறேன்’ என்று நம்பிக்கையை வளர்த்துக் கொள்ள வேண்டும். குடும்பத்தினருடன் வெளியில் செல்வது, நண்பர் மற்றும் உறவினர்கள் வீடுகளுக்கு செல்வது என்று நல்ல பழக்க வழக்கங்களை கற்றுக் கொள்ளுங்கள்.இளம் வயதினரிடையே அடுத்தவரை குறை கூறுவதும், தன்னையே பழித்துக் கொள்ளும் பழக்கமும் குறைவாகக் காணப்படுகிறது. ஆகவே அவர்கள் “பாஸிடிவாக’ சிந்திக்கிறார்கள். இவ்விஷயத்தில் இளம் வயதினரிடம் கற்றுக் கொள்ளலாமே.

இளம் வயதில் : இளம் வயதில் சர்க்கரை நோய்ஏற்படுவது இந்தியாவில் பொதுவாக காணப்படுகிறது. இது குடும்பத்தினரிடையே மிகப்பெரிய மனக்குழப்பத்துக்கு ஆளாக்குகிறது. திருமண வயதை எட்டியுள்ளவர்களுக்கு சர்க்கரை இருப்பதை, சம்பந்தியிடம் சொல்வதா… வேண்டாமா… என்று வீட்டில் குழம்புகின்றனர்.இன்று வளர்ந்துள்ள மருத்துவ முறைகளால், சர்க்கரை நோய் எளிதில் பராமரித்துக் கொள்ளக் கூடிய ஒரு நோயாக உள்ளது. பெற்றோர்களுக்கு அந்நோய் இருந்திருக்கும் பட்சத்தில், மரபணு வழியாக இந்நோய் இளம் தலைமுறைகளுக்கு வந்துவிடுகிறது.இவர்கள் தொடர்ச்சியாக இந்நோயை கண்காணித்து வருவதும், உரிய மருந்துகளையும் எடுத்துக் கொள்வதும், உடற்பயிற்சி மற்றும் திட்டமிட்ட வாழ்க்கையை நடத்துவதும் முக்கியம்.இளம் வயதில் சர்க்கரை வந்தவர்களைப் பற்றி சமுதாயத்தில் வேறு விதமாக பார்க்கப்படுகிறது. ஆனால் அது தேவையற்றது. அவர்கள் வாழ்நாள் முழுவதும் நோயாளியாகவே இருப்பார்கள் என்ற கோணத்திலும் பார்க்கப்படுகிறார்கள். ஆனால் அது உண்மையல்ல. மற்றவர்களை விட நோய்க்காக கொஞ்சம் கூடுதல் கவனம் எடுக்க வேண்டியவர்கள் என்பது மட்டுமே உண்மை.

உடற்பயிற்சி, நடைப்பயிற்சி உடலுக்கு மட்டுமல்ல மனதுக்கும் தைரியத்தை அளிக்கக்கூடியது. மனதையும் உடலையும் ஆரோக்கியமாகவைத்துக் கொள்ள ஆழ்ந்த, நிம்மதியான 7 மணி நேர தூக்கம் அவசியம்

பெண்கள் கவனிக்க… : குடும்பத்தில் பெண்களின் பங்கு முக்கியமானது. பெண்ணாகப் பிறப்பதற்கு பெரும் தவம் செய்திருக்க வேண்டும் என பாரதி கூறியிருக்கிறார். பெண்களிடம் காணப்படும் சர்க்கரை நோய் அறிகுறிகள் கொஞ்சம் வித்தியாசமானவை. அதை அவர்கள் முன்னதாக கண்டறிந்தால் நல்லது. சர்க்கரை நோய்க்கான வழக்கமான அறிகுறிகள் அவர்களுக்கு காணப்படும். அத்துடன், இளம்பெண்களாக இருந்தால் பூப்பெய்தல் தள்ளிப் போகலாம், மாதவிடாய் கோளாறுகள் ஏற்படலாம். குழந்தையின்மை பிரச்னைகளும் வரலாம். “டைப்-1′ நோயாளிகள் மெலிந்தும், “டைப்-2′ நோயாளிகள் குண்டாகவும் காணப்படுவார்கள். பெண்கள் கருத்தடை மாத்திரைகளை பயன்படுத்தக்கூடாது. கர்ப்பமடைந்துள்ள பெண்களில் 18 சதவீதம் பேருக்கு சர்க்கரை நோய் உள்ளது.

இவர்கள் எந்நிலையிலும் இன்சுலின் எடுத்துக் கொள்ள வேண்டிய நிலையில் உள்ளனர். குறைந்தபட்சம் வாரம் ஒரு முறையாவது அவர்கள் ரத்த பரிசோதனை செய்து சர்க்கரை அளவை தெரிந்து கொள்ள வேண்டும். மார்பக வலி உள்ளவர்கள் அதற்கான பயாப்சி பரிசோதனை செய்து கொள்ள வேண்டும். டாக்டரிடம் முறையாக ஆலோசனை பெறாவிட்டால், மகப்பேறுக்குப் பின்னர் சர்க்கரை நோய் நிரந்தரமாகும் வாய்ப்புள்ளது.மாவுச்சத்து 40 சதவீதம், கொழுப்பு சத்து 35 சதவீதம் மற்றும் புரத சத்து 25 சதவீதம் இருக்கும் படி கர்ப்பிணிகளின் உணவு அமைய வேண்டும். சர்க்கரை நோய் கட்டுப்பாட்டில் இல்லாவிட்டால், இதயம் மற்றும் நரம்பு தொடர்பான நோய்கள் குழந்தைகளுக்கு வரும் வாய்ப்புள்ளது.கர்ப்பிணிகள் தினமும் 10 நிமிடம் நடைப்பயிற்சி செய்யலாம். நாற்காலியில் உட்கார்ந்து கொண்டு கை தூக்கி பயிற்சி செய்யலாம். வயதானவர்களுக்கு சர்க்கரை நோய் இருக்கும் பட்சத்தில், மாரடைப்பு நோய் 3 அல்லது 4 மடங்கு அதிகமாக வரும். வலியே தெரியாமல் மாரடைப்பு ஏற்படலாம். எலும்பு தேய்மானம் ஏற்பட வாய்ப்புள்ளது. இதைத் தடுக்க எலும்பு தாது அடர்த்தி பரிசோதனை எடுக்கலாம். கட்டுப்பாட்டில் உள்ள சர்க்கரை நோய், ஒரு நோயே அல்ல. உங்கள் வாழ்க்கை பயணம் கவலையின்றி அமையட்டும். வாழ்த்துக்கள்.

பொன்னான பாதங்கள் புண்ணாகலாமா : உலகில் சர்க்கரை நோய் பாதிக்காத குடும்பங்கள் கொஞ்சம்தான். 18 கோடி மக்களை பாதித்துள்ள இந்நோய், 2030ல் 37 கோடிப் பேருக்கு ஏற்படும்.இந்தியாவில் தற்பொழுது 4.2 கோடிப் பேர் 2030ல் 8 கோடிப் பேராக உள்ளனர். இந்நோய் ஏற்படும் வயதும் குறைந்து கொண்டே வருகின்றது. இன்று 20 வயதிற்கு கீழள்ள இளைஞர் சமுதாயத்தில் இரண்டாம் வகை சர்க்கரை நோயின் பாதிப்பு அதிகரித்துள்ளது. உலகில் கால் இழப்பிற்கு தலையாய காரணம் விபத்தல்ல சர்க்கரை நோயே. உலகில் ஒவ்வொரு 30 நொடிக்கு ஒருவர் இந்நோயால் தன் காலை இழக்க நேரிடுகின்றது. சர்க்கரை உள்ளவர்களுக்கு, நரம்பு பாதிப்பால் கால்களில் உணர்ச்சியின்மை, கால்களில் ரத்த ஓட்ட பாதிப்பினால் புண் குணமாகும் தன்மை குறைதல், சிறுநீரக பாதிப்பினால் புரதசத்து வெளியேறும்போது புண் ஆறும் தன்மை குறைதல் மற்றும்சர்க்கரை நோயினால் கண் பாதிப்பு உண்டாகுமாயின் காயங்கள் ஏற்படும் வாய்ப்பு அதிகமாகும்.

*சர்க்கரை நோயால் பாத பாதிப்புகள்: கால் ஆணி, பாத வெடிப்புகள்
*தொற்று நோய், ரத்த ஓட்டம், நரம்பு பாதிப்பால் ஏற்படும் புண்கள்
*கால் விரல்கள் அழுகுதல், விரல்கள், பாதங்களை இழத்தல்

இவற்றிலிருந்து தப்பிக்க…செய்யக்கூடாதவை: *கத்தி, பிளேடு கொண்டு நகம் வெட்டுதல்
*வெறும் காலில் நடத்தல்
*நீரின் சூட்டை அறியாமல் பாதங்களை கழுவுவது
*இருசக்கர வாகனங்களில் பயணிக்கும் பொழுது சைலன்சரில் பாதம் படுதல்
*புகை பிடித்தல்

சர்க்கரை நோயிலிருந்தும் அதனால் ஏற்படக்கூடிய கால் பாதிப்புகளிலிருந்தும் பாதுகாக்க வருமுன் காப்பதே நலம்.

Advertisements

ஆட்டய போடுவதில் உலகின் நெம்பர் -1 இந்தியா தானாம்

வரிசையாக அடுக்கப்பட்டிருக்கும் “சென்ட்’களில் ஒவ்வொன்றாய் திறந்து, சட்டையில் அடித்து வாசனை பார்ப்பதில் சிலருக்கு அலாதி பிரியம்.குண்டூசி டப்பா, பிளேடுகள், பென்சில், பேனா, ரப்பர் போன்றவற்றை “அமுக்கி’ விடுவதில் சிலர் மகா கில்லாடிகள்.

தண்ணீர், குளிர்பான பாட்டிலை திறந்து குடித்துவிட்டு, அங்கேயே போட்டு விட்டு நடையை கட்டுவோரும் உண்டு. சுயசேவை வசதி உள்ள அங்காடிகளில் (மால்) இது போல தினமும் நடக்கத்தான் செய்கிறது. இப்படி “ஆட்டய’ போடுவதால் இந்தியாவுக்கு பெரும் “பெருமை’ கிடைத்துள்ளது தெரியுமா? ஆம், உலகில், 41 நாடுகளில் தான் கடைகளில் “லபக்’குவது அதிகமாக நடக்கிறது; அந்த பட்டியலில் இந்தியா தான் நெம்பர் 1.”குளோபல் ரீடெய்ல் தெப்ட் பாரோமீட்டர்’ என்ற சர்வே ஒவ்வொரு ஆண்டும் பல நாடுகளில் நடக்கிறது. தனியார் அமைப்புகள் சேர்ந்து நடந்தும் இந்த சர்வேயில் தான் இந்தியாவின் “சாதனை’ அம்பலமாகி உள்ளது.சர்வேயில், இந்தியா பற்றி கிடைத்த சில தகவல்கள்: கடைகளில் குண்டூசி முதல் நகைகள் வரை “லபக்’கப்படுகின்றன.

மொபைல் போன், ஐபாட், எம்.பி.,3, உட்பட கையடக்க எலக்ட்ரானிக் சாதனங்கள், சென்ட், லிப்ஸ்டிக் போன்ற அழகு சாதனங்கள், ஜட்டி, பிரா, பனியன், உள்ளாடைகள், டீ ஷர்ட், சுரிதார் போன்ற துணிவகைகள், நகைகள் ஆகியவை தான் அதிக அளவில் “எடுக்கப்’படுகின்றன. இல்லாதவர்கள் தான் திருடுகின்றனர் என்ற எண்ணவேண்டாம்; வசதி படைத்தவர்களும் “ஜாலி’க்காக இப்படி செய்கின்றனர். இளம் வயதினர் தான் இதில் கணிசமான பேர்.”சென்ட்’ அடித்துப்பார்ப்பது, குளிர் பானம் பருகுவது போன்ற செயல்களை இளம் வயதினர் தான் செய்கின்றனர்.இப்படிப்பட்ட “லபக்’குகள் எல்லாம் “மால்’களில் தான் அதிகம் நடக்கின்றன. இந்தியா முழுவதும் இந்த “லபக்’குகளால் ஒரு நாளைக்கு 33 கோடி ரூபாய்க்கு சில்லரை வர்த்தக இழப்பு ஏற்படுகிறது. ஒரு ஆண்டுக்கு 12 ஆயிரம் கோடி ரூபாய்.”ஆட்டய’ போடுவதில் 41 நாடுகள் உள்ளன. அதில் , இந்தியாவில் மொத்த சில்லரை வர்த்தகத்தில் 3.2 சதவீதம் இதனால் இழப்பு ஏற்படுகிறது.

இளமையில் உழைப்போம்- கிருபானந்த வாரியார்

* எதனையும் பலமுறை மனதில் சிந்தனை செய்யுங்கள். ஒருவர் போன வழியில் சிந்திக்காமலேயே பின்பற்றிச் செல்வது மூடத்தனம்.
* எங்கும் நிறைந்த இறைவனை எளிதாகக் கிடைக்கும் பூவினாலும், நீராலும் நாம் வழிபாடு செய்ய வேண்டும். அன்பும், ஆசாரமும் இரண்டு கண்கள் போன்றவை.
* சுகமாக வாழும் காலத்திலேயே துக்கத்தையும் பழகிக் கொள்ள வேண்டும். ஏனென்றால் வாழ்வும் தாழ்வும் மனிதனுக்கு மாறி மாறி வரும்.
* நாவின் சுவைக்காக நல்லுணவைத் தேடி அலையாதீர்கள். இறையருளால் அன்றாடம் கிடைக்கும் எளிய உணவையும் உண்டு திருப்தி கொள்ளுங்கள்.
* தேனீயைப் போலவும், எறும்பைப் போலவும் உழைத்து உண்ணுங்கள். அது உங்களுக்கு அமைதியையும், அன்பையும் தரும்.
* இளமையில் வளையா விட்டால் முதுமையில் அல்லல்படவேண்டி வரும். இளமைப்பருவம் <உழைப்பதற்கு ஏற்றது. அதன் அருமையை உணர்ந்து பணியாற்றுங்கள்.
* உடம்பில் எத்தனையோ உறுப்புக்கள் இருந்தாலும் கண் மிக முக்கியமானது. கண்ணுக்கு அணிகலன் தாட்சண்யம். கண்ணைப் பார்த்தாலே ஒருவனின் குணத்தை அறிந்து கொள்ளலாம்.
வாரியார்

மனித நேயம்…?

வாடிய பயிரைக் கண்டபோதெல்லாம் வாடினேன் என்றார் வள்ளலார். அவர் எல்லா உயிர்களிடத்தும் அன்பைச் செலுத்தியவர். அதுபோல் திருவள்ளுவர்

அன்பின் வழியது உயர்நிலை அஃதிலார்க்கு

என்புதோல் போர்த்த உடம்பு

என்று அன்புணர்வின் உன்னதத்தை சித்தரிக்கிறார்.

உயிரோடு கூடிய உடம்பு அன்பு வழியில் இயங்குவதாகும். அவ்வன்பில்லாதவர்களுக்கு உள்ள உடம்பானது எலும்பைத் தோலால் போர்த்திய வெற்றுடம்பாகும்.

மேலும், கனியன் பூங்குன்றனார்

யாதும் ஊரே யாவரும் கேளீர் என்று உலகளாவிய அறைக்கூவலை விடுக்கிறார்.

மதங்கள் அனைத்தும் அன்பையே முதன்மைப் படுத்தி போதிக்கின்றன. அன்பே கடவுள் என்கின்றன. ஆனால் மனிதன் நாகரிகம் வளர வளர புற உலக வாழ்க்கையில் ஈடுபட்டு தன்னை மறந்தான். பொருளாதார போராட்டத்தில் மனித நேயம் பறந்து போயிற்று.

எதிலும் ஒரு எதிர்பார்ப்பு கொண்டு வாழ்கிறான். இதனால் பரிசுத்தமான அன்பைக் கூட பாசாங்கு போலவே நினைக்கத் தோன்றுகிறது.

அனைத்து உயிர்களிடத்தும் அன்பு செலுத்தும் பெரியோர்கள், ஞானிகள், சித்தர்கள் வாழ்ந்த நம் தேசத்தின் இன்றைய நிலையோ பரிதாபமாக உள்ளது.

மனித நேயத்துடன் செயல்படுபவர்கள் போல் செயல்பட்டு சிலர் மக்களை ஏமாற்றுகின்றனர். இப்படிப்பட்டவர்களுக்கு அண்டை வீட்டாரின் தொடர்புகள் சொல்லும் அளவுக்குக்கூட இல்லை. யாரோ வேற்றுக் கிரக மனிதனைப் பார்ப்பதுபோல் பார்க்கின்றனர். வீட்டிலுள்ள பெரியவர்களை சுமையாகக் கருதுகின்றனர். பெரியோர்களை மதிக்கும் தன்மை அறவே இல்லை. மனித வாழ்க்கையின் பாதி நேரம் கம்ப்யூட்டர், தொலைக்காட்சி முன்னே கரைந்து போய்க்கொண்டிருக்கிறது.

பொருளாதார ஏற்றத்தாழ்வு மனித நேயத்தை அழிக்கும் கிருமியாக வளர்ந்து வருகிறது.

இந்த நிலைக்குக் காரணம் பெரியோர்கள், வீட்டிலிருக்கும் மூத்தவர்களின் வழிகாட்டுதல் இல்லாமையே.

பழங்காலத்தில் கூட்டுக் குடும்பமாக வாழ்ந்தனர். பெரியோர்கள் தங்களின் அனுபவ உண்மைகளை ஆராய்ந்து சொல்லும் அறிவுரைகள் எல்லாம் நலம் பயப்பதாகவே இருந்து வந்தது. இதனால் வீட்டிலும் சரி, வெளியிலும் சரி அனைவரிடமும் அனுசரித்து நட்பு பாராட்டி சிறந்த பண்புடன் வாழ்ந்து வந்தனர். ஆனால் இன்றோ குழந்தை பிறந்தவுடன் கிரச் (குழந்தைகள் காப்பகம்) சுக்கு அனுப்பிவிடுகின்றனர். அந்த குழந்தைகள் பெரியோர்களின் அன்பில் அரவணைப்பில் வாழவில்லை. பெரியோர்கள் குழந்தைக்குத் தேவையான பொருட்களை வாங்கிக் கொடுக்கின்றனர். அனால் அவர்களுடன் அன்பு பாராட்ட நேரமில்லாமல் இருக்கின்றனர்.

மனிதனை மனிதனாக மதிப்பதில்லை. ஒருவரை ஒருவர் நம்பும் சூழ்நிலை இல்லை. அன்பு, பாசம் போன்ற உணர்வுகள் மறக்கப் பட்டும் மறுக்கப்பட்டும் வருகின்றன. மனித மனமானது அதிக வருமானம், கட்டுக்கட்டாய்ப் பணம், பேராசை, முறைகேடான உறவுமுறைகள், பதவி மோகம், கேளிக்கை விளையாட்டுகள் என ஒரு ஆடம்பரமான வாழ்க்கையைத் தேடி ஒரு வேட்டை நாயைப்போல அலைகிறது. ஆரறிவு படைத்த மனிதர்கள் உறவுகளை மறந்து, அன்பை மறந்து அரக்கத்தனமான வாழ்க்கைக்கு ஆயத்தமாகி விட்டனர்.

இதுபோல் இன்று நாளிதழ்களை புரட்டினாலே கொலைச்சம்பவங்கள் பற்றிதான் அதிகம் இருக்கின்றன. போதிய அன்பு கிடைக்காமலும், மனிதத் தன்மை இல்லாமலும் இருப்பதால் ஏற்படும் விபத்துக்கள்தான் இவை. இந்நிலை மாற, எதிர்கால சமுதாயத்தை வலுவாக உருவாக்க பள்ளிகளிலேயே குழந்தைகளுக்கு அன்பு, நேசம், பிறருக்கு உதவும் தன்மை போன்றவற்றை எடுத்துக் கூறிவரவேண்டும். பெரியோர்களை மதிக்கச் செய்யவேண்டும். பள்ளிகள் வெறும் பாடங்களைப் போதிக்கும் கூடங்களாக அல்லாமல் பாடத்துடன் மனித நேயத்தையும் போதிக்கும் ஒரு கல்விச் சோலையாக மாறவேண்டும். நமது புராணங்களில் வரும் கதாபாத்திரங்களையும், குட்டிக் கதைகளையும் சொல்லி அதிலுள்ள நல்ல விஷயங்களை அவர்களுக்கு புரிய வைத்தால் எதிர்கால சமுதாயம் மனித நேயம் மிக்க சமுதாயமாக மாறும்.

பக்கத்துவீட்டுக் காரர்கள், அண்டைவீட்டுக் காரர்களுடன் உறவு பாராட்ட வேண்டும். இன்றும் கிராமங்களில் மக்கள் ஒருவருக்கொருவர் உதவுவதைப் பார்த்திருக்கலாம். படித்த நகர மக்களிடையே மனித நேயம் வளரவேண்டும். குழந்தைகள் அதிக நேரம் தொலைக்காட்சி நிகழ்ச்சிகள் பார்ப்பதை குறைக்க வேண்டும். இயற்கையின் அற்புதங்களைப் பற்றி எடுத்துச் சொல்லி குழந்தைகளை வளர்த்தால் மனித நேயத்துடன் இயற்கையையும் காக்கும் காவலர்களாக எதிர்கால சமுதாயம் விளங்கும் என்பது நிதர்சனமான உண்மை.

கூடி வாழ்ந்தால் கோடி நன்மை என்ற தத்துவக் கோட்பாட்டின்படி மக்கள் வாழ்ந்தால் மனித நேயம் தழைத்தோங்கும்.

தெரிந்து கொள்ளுங்கள்- ரத்த அழுத்தம்…


வளர்ந்த நாடுகள் மற்றும் வளரும் நாடுகளில், இறப்பு விகிதம் அதிகரிப்பதற்கு, ரத்த அழுத்த நோய் முக்கியமான காரணமாக உருவெடுத்துள்ளது.

அமெரிக்க மருத்துவத்துறையால் வெளியிடப்படும் ஹைப்பர் டென்சன் என்ற மருத்துவ இதழ் இரத்த அழுத்தம் குறித்த கடந்த 1976ம் ஆண்டு முதல் அவ்வப்போது விரிவான அறிக்கையினை வெளியிட்டு வருகிறது. கடந்த 2003ம் ஆண்டு கடைசியாக இந்த இதழில் வெளியிட்டுள்ள உயர் ரத்த அழுத்த நோய் தடுப்பு, ஆய்வு, பரிணாமம் மற்றும் சிகிச்சை குறித்து வெளியிடப்பட்ட 7 வது அறிக்கையில் (The seventh report of the joint national committee on prevention, detection, evaluation and treatment of high blood pressure – JNC)  மருந்தை விட, அன்றாட வாழ்க்கை முறையில் சில மாற்றங்களைக் கடைப்பிடிப்பதன் மூலம் இந்த நோயைக் கட்டுப்படுத்த முடியும் என்று அறிவுறுத்தப் பட்டுள்ளது.

உடல் எடையைக் குறைப்பது, உணவுக் கட்டுப்பாடு, தேவையான கலோரிகளை உட் கொள்வது போன்ற நடைமுறைகளையே, ரத்த அழுத்த நோயைக் கட்டுப்படுத்துவதற்கான முக்கிய வழி முறைகளாக இந்த அறிக்கை பரிந்துரை செய்கிறது.

இவற்றுடன் சீரான உடல் இயக்கத்தையும் அந்த அறிக்கை வலியுறுத்துகிறது. அதாவது ஒரே இடத்தில நீண்ட நேரம் அமர்ந்திருக்காமல் உடலுக்கு அவ்வப்போது அசைவும், வேலையும் கொடுத்து வந்தால், ரத்த அழுத்தம் வருவதற்கான வாய்ப்பு மிகவும் குறைவு என்பதை இந்த அறிக்கை சுட்டிக் காட்டுகிறது. இதேபோன்று பிரிட்டிஷ் உயர்ரத்த அழுத்த கழகமும், சில ஆலோசனைகளை வழங்கி உள்ளது. ரத்த அழுத்த நோயைக் கட்டுப்படுத்துவதற்கான சர்வதேச முக்கியத்துவம் வாய்ந்த இந்த அறிக்கைகள் தெரிவிக்கும் வழிமுறைகள் குறித்து இங்கே பார்ப்போம். ரத்த அழுத்த நோயால் பாதிக்கப் பட்டவர்களும், தங்களது முன்னோர்களுக்கு ரத்த அழுத்த நோய் உள்வர்களும் இந்த பரிந்துரைகளைக் கவனத்தில் கொள்வது நல்லது.

அவ்வப்போது குறித்த கால இடைவெளியில் ரத்த அழுத்தத்தின் நிலையை அறிந்து கொள்வது மிக முக்கியம். இதன் மூலம் உடலில் ரத்த அழுத்தத்தின் நிலையை அறிந்துகொள்ள இயலும்.

உடல் எடைக்கும், ரத்த அழுத்த நோய்க்கும் நெருங்கிய தொடர்புண்டு. எனவே உடல் எடையை கட்டுப்பாட்டுக்குள் வைத்துக்கொள்ள வேண்டும். அதிகமான உடல் எடையைக் குறைப்பதில் கவனம் தேவை. தேவையான எடையைக் குறைத்துவிடக் கூடாது.

சோடியம் மற்றும் பொட்டாசியம் சத்துக்கள் அடங்கிய உப்புக்கும், உடல் பருமனடைவதற்கும் நெருங்கிய தொடர்பு ள்ளது. உடல் பருமனடைந்தால் ரத்த அழுத்தம் ஏற்படுவதற்கான வாய்ப்பு அதிகம் உள்ளது. எனவே உணவில் உப்பின் அளவைக் குறைத்துக்கொள்வது நல்லது. ஒரு நாளைக்கு 6 கிராம் அளவுக்கும் குறைவாக சேர்த்துக்கொள்ளலாம்.

ரத்த அழுத்த நோயைக் கட்டுப்படுத்த உணவுக் கட்டுப்பாடு அவசியம் என்று ரத்த அழுத்தத்தைக் கட்டுப்படுத்துவதற்கான உணவுக்கட்டுப்பாடு ஆய்வில் (Dietary approach to stop hypertension study – DASH)  கண்டறியப்பட்டுள்ளது. வழக்கமாக உட் கொள்ளும் கொழுப்புச் சத்தைவிட 35 சதவீதம் குறைவாக இருக்கும்படி பார்த்துக்கொள்ள வேண்டும். வேகவைக்கப்படாத காய்கறிகளும், பழங்களும் உணவில் அதிகம் இடம்பெற வேண்டும். ரத்த அழுத்த நோய் உள்ளவர்கள் பால், நெய், தயிர், மோரைக் குறைத்தல் அல்லது தவிர்த்தல் நல்லது. முன்பே தயாரித்து, குளிர்சாதன பெட்டிகளில் வைத்திருந்து பின்னர் எடுத்துச் சாப்பிடுவது போன்ற பழக்கங்களை அறவே தவிர்க்க வேண்டும்.

பொருத்தமான, தொடர்ச்சியான உடற் பயிற்சியை செய்துவர வேண்டியது அவசியம். பிராணயாமம் என்று சொல்லப்படுகின்ற மூச்சுப்பயிற்சி, ரத்த அழுத்த நோயை முழுமையாக கட்டுப்படுத்தும் சிறப்பு வாய்ந்தது. இந்த எளிய பயிற்சியைச் செய்து வந்தாலே ரத்த அழுத்தம் உள்ளிட்ட பல நோய்கள் நம்மை அணுகாது.

மது, புகையிலை, கோகெய்ன் போன்ற புகையிலைப் பொருட்களை அறவே ஒதுக்க வேண்டும். ரத்த அழுத்த நோய்க்கான முழு முதல் காரணிகள் மது உள்ளிட்ட போதைப் பொருட்கள்தான். எனவே போதைப் பழக்கத்தை வைத்துக்கொண்டு, ரத்த அழுத்த நோயை நிச்சயமாக குணப்படுத்த முடியாது.

பெண்களைப் பொறுத்தவரையில் கால்சியம் மற்றும் மக்னீசியம் சத்துக்கள் உணவில் அதிகம் இருக்கும் வகையில் பார்த்துக்கொண்டாலே ரத்த அழுத்த நோயைத் தவிர்க்க முடியும் என்று பெல்ஜியத்தில் நடைபெற்ற ஓர் ஆய்வில் கண்டறியப்பட்டுள்ளது. இவர்களை இரண்டு பிரிவாகப் பிரித்து, ஒரு பிரிவினர் மக்னீசியம், மற்றும் கால்சியம் சத்துள்ள உணவுகளையும், மற்ற பிரிவினர் அது இல்லாத உணவினையும் இரண்டு வாரங்கள் உண்ணவைக்கப்பட்டுள்ளனர். இரண்டு வாரங்கள் கழித்து பரிசோதனை செய்து பார்க்கும்போது கால்சியம், மக்னீசியம் சத்துள்ள உணவை உட்கொண்ட பெண்களின் ரத்தழுத்த அளவு மிகவும் சீராக இருந்தது கண்டறியப் பட்டுள்ளது.

ரத்த அழுத்தத்தைக் கட்டுப்படுத்துவதில் மற்றவற்றை விட ஆலிவ் எண்ணெயே சிறந்தது என்று பல்வேறு ஆய்வுகள் தெரிவிக்கின்றன. கூடுதலாக மீன் எண்ணெயையும் சமையலில் அதிகம் சேர்த்துக் கொள்ளலாம் என்றும் ரத்த அழுத்த நோய் தொடர்பான ஆய்வுகள் கூறுகின்றன. இவை இரண்டும் அறவே கொழுப்புச் சத்து இல்லாதவை என்பதே இதற்குக் காரணம்.

சி வைட்டமின் சத்துள்ள பொருட்களை உணவில் அதிகம் சேர்த்துக்கொள்வதன் மூலம் ரத்த அழுத்த நோயைக் கட்டுப்படுத்தலாம். ஏ மற்றும் ஈ வைட்டமின்களுக்கு ரத்த அழுத்தத்தைக் கட்டுப் படுத்தும் குணம் இல்லை.

ரத்த அழுத்த நோய்க்கு மருத்துவ சிகிச்சைகளை விட, மனதை இலகுவாக்க உதவும் தியானப் பயிற்சியே சிறந்த மருந்து என்பதை சர்வதேச மருத்துவ ஆய்வுகள் உறுதியாகக் கூறுகின்றன.

ரத்த அழுத்த நோயைக் கட்டுப்படுத்த அல்லது குணப்படுத்த மருந்துகளைவிட அன்றாட வாழ்க்கை முறையில் சில மாற்றங்களை செய்துகொள்வதும் உணவுக் கட்டுப்பாடும், உடல் மன பயிற்சியும் அவசியம் என்பதை, மேலே உள்ள பரிந்துரைகள் நமக்கு உணர்த்துகின்றன.

எனவே, ரத்த அழுத்தம் உள்ளவர்கள் மருந்துகளைத் தேடி ஓடாமல், தங்கள் மனதையும் உடலையும் செம்மைப்படுத்தும் முயற்சியை முதலில் தொடங்கலாமே.

ரத்த வித்திக்கு… எள்

எள்ளில் வெள்ளை, கருமை, செம்மை என மூன்று பிரிவுகள் உள்ளன. இது இந்தியா முழுதும் பயிரிடப்படும் சிறிய செடி வகையாகும். இதனை திலம் என்றும் அழைக்கின்றனர்.

எள் விதைகளில் இருந்து எடுக்கப்படுவது தான் நல்லெண்ணெய். இதை எள்நெய் என்றும் அழைக்கின்றனர்.

இதன் இலை, பூ, காய், விதை அனைத்தும் மருத்துவப் பயன் கொண்டது. இந்த எள் வறட்சிப் பகுதியிலும் வளரக் கூடியது. இதை பயிரிடும்போது ஒருமுறை தண்ணீர்விட்டால் போதும். பிறகு தண்ணீர் விடத் தேவையில்லை. அந்த அளவுக்கு வறட்சி தாங்கிக்கொள்ளும் தன்மை கொண்டது.

இதன் இலைகளை எடுத்து நீரில் போட்டு கசக்கினால் வழுவழுவென்று பசை இறங்கும். இந்த நீரைக் கொண்டு முகம் கழுவினால் கண்கள் நன்கு ஒளிபெறும். கண் நரம்புகள் பலப்படும். இதன் இலைகளை நன்கு மசிய அரைத்து கட்டிகள் மேல் பூசி வந்தால் கட்டிகள் மறையும்.

Tamil – Ellu

English – Gingeli Oil plant, sesame

Telugu – Nuvvulu

Sanskrit – Tila

Malayalam – Karuthellu

Botanical name – Sesamum indicum

இதன் பூ கண்நோய்களை குணப்படுத்தும் தன்மை கொண்டது. இதன் காயையும், தோலையும் உலர்த்திச் சுட்டு சாம்பலாக்கி ஆறாத புண்கள் மீது தடவினால் புண்கள் ஆறும்.

விதை

எள்ளுமருத் தைக்கெடுக்கும் எறனலாந் திண்மைதரும்

உள்ளிலையைச் சேர்க்கும் உதிரத்தைத் – தள்ளுமிரு

கண்ணுக் கொளிகொடுக்குங் காசமுண்டாம் பித்தமுமாம்

பண்ணுக் கிடர்புரியும் பார்

இது மருந்தின் செயல்பாட்டை முறிக்கும் தன்மை கொண்டது. அதனால் நோய்க்கு மருந்து சாப்பிடுபவர்கள் நல்லெண்ணெயைப் பயன் படுத்துவதைத் தவிர்க்க வேண்டும்.

எள்ளின் விதையில் உடலுக்குத் தேவையான கால்சியம், இரும்பு, வைட்டமின் பி1, வைட்டமின் சி உள்ளது. ஆக்ஸாலிக் அமிலம் நிறைந்துள்ளது. உடலுக்கு வன்மையும், குருதி பெருக்கையும் உண்டாக்கும்.

எள்ளில் கருப்பு எள் அதிக மருத்துவத் தன்மை கொண்டது. அதில் அதிகளவு சுண்ணாம்பு சத்து நிறைந்துள்ளது.

வெள்ளை மற்றும் சிவப்பு எள்ளுவில் இரும்புச்சத்து நிறைந்துள்ளது.

மூல நோயின் தாக்கம் குறைய

மூல நோய் அஜீரணக் கோளாறால் வாயுக்கள் சீற்றமாகி மலச்சிக்கல் உண்டாகி மூலநோய் ஏற்படுகிறது. இந்த மூல நோயின் தாக்கம் உள்ளவர்கள் ஒரு இடத்தில் அமர்ந்திருக்க முடியாமல் தவிப்பார்கள். இவர்கள் எள்ளின் விதையை வெல்லப் பாகுவில் கலந்து தேங்காய் சேர்த்து சாப்பிடலாம். அல்லது எள்ளு விதையை லேசாக வறுத்து பொடி செய்து நெய்யுடன் சேர்த்து சாப்பிட்டால் மூல நோய் குறையும்.

சரும நோய்கள் அகல

சருமத்தில் சொறி, சிறங்கு புண்கள் உள்ளவர்கள் எள்ளு விதையை அரைத்து மேல் பூச்சாக பூசினால் சரும நோய்கள் அகலும். அல்லது நல்லெண்ணெயுடன் சம அளவு எலுமிச்சை சாறு கலந்து உடலில் பூசி குளித்து வந்தால் சரும நோய்கள் ஏதும் அணுகாது.

இரத்த சோகை நீங்க

கருப்பு எள்ளில் அதிகளவு இரும்புச்சத்து நிறைந்துள்ளதால் இரத்தச் சோகையை குணப் படுத்தும். எள்ளுவை நன்கு காயவைத்து லேசாக வறுத்து பொடி செய்து அதனை நல்ல சூடான நீரில் போட்டு 2 மணி நேரம் ஊறவைத்து அதனுடன் தேவையான அளவு பால் மற்றும் பனைவெல்லம் சேர்த்து காலையும் மாலையும் அருந்தி வந்தால் இரத்தச் சோகை விரைவில் மாறி உடல் வலுப்பெறும்.

வயிற்றுப் போக்கு மாற

வயிற்றுப் போக்கு உள்ளவர்கள் எள்ளை வறுத்து பொடியாக்கி ஒரு ஸ்பூன் அளவு எடுத்து நெய் கலந்து தினமும் மூன்று வேளை என ஆறு நாட்கள் சாப்பிட்டு வந்தால் காலரா மற்றும் தொற்றுநோயால் உண்டாகும் வயிற்றுப்போக்கு நீங்கும்.

பெண்களுக்கு

பூப்பெய்திய சில பெண்களுக்கு முறையாக உதிரப்போக்கு இருக்காது. மேலும் அடிவயிற்றுவலி போன்ற உபாதைகள் இருக்கும். இவர்கள் எள்ளை பொடி செய்து அதனை நன்கு நீரில் கொதிக்க வைத்து அருந்தினால் மாத விலக்கு சீராகும். மேலும் பெண்களுக்கு உண்டாகும் இரத்தச்சோகை மாறும். இதை மாதவிலக்குக் காலங்களில் அருந்தக் கூடாது.

முடி உதிர்வது குறைய

எள்ளுவின் இலையையும் வேரையும் அரைத்து தலையில் தடவி அரை மணி நேரம் ஊறவைத்து தலை குளித்து வந்தால் முடி உதிர்தல் குணமாகும்.

எள்ளிலிருந்து எடுக்கப்படும் நல்லெண்ணெய் உணவுப் பொருளாக பயன்படுகிறது. இதன் பயன்கள் அளப்பறியது. அது பற்றி ஒரு புத்தகமே எழுதலாம்.

கருவுற்ற பெண்கள் எள் சாப்பிட்டால் கரு கலைந்துவிடும். எனவே எள்ளை கண்டிப்பாக தவிர்க்க வேண்டும். இந்த எள் கருக்கலைப்பு மருந்துகளில் அதிகம் சேர்க்கப்படுகிறது. சுவாசக் கோளாறுகளை நீக்கும்.

(வெட்டுக் காயங்களில் நல்லெண்ணெய் பட்டால் தேவையற்ற சதை வளரும். அதனால் காயங்களில் நல்லெண்ணெய் படாமல் பார்த்துக்கொள்ள வேண்டும்)