Advertisements

Daily Archives: திசெம்பர் 5th, 2009

குழந்தைகளைத் தூங்கவைக்க…………

பத்துமாதம் சுமந்து பெறுவது கூட பெண்களுக்குப் பெரிய விஷயமல்ல. குழந்தை பிறந்து ஒரு வருடம் வரை அதனுடைய ஒவ்வொரு செயலுமே தாய்மார்களுக்குக் போராட்டம்தான். குறிப்பாகக் குழந்தைகளின் தூக்கம். குழந்தையின் தூங்கும் நேரம் பழக்கமாகும்வரை தாய்மார்களுக்குத் தூக்கமில்லாத பகல்களும், இரவுகளுமே மிஞ்சும். குழந்தைகளைத் தூங்க வைக்க தாய்மார்களுக்கு சில யோசனைகள்……..! குழந்தை பிறந்த முதல் சில மாதங்கள் வரை, அதற்கு இரவு, பகல் வித்தியாசம் தெரியாது.
எப்போது தூங்கும், எப்போது விழிக்கும் எனச் சொல்ல முடியாது. மாதங்கள் போகப் போகத்தான் இது சரியாகும். ஆறாவது மாதத்திலிருந்து சில குழந்தைகள் இரவு வேளைகளில் தூக்கமில்லாமல் அழலாம். பசி மற்றும் படுக்கையை நனைக்கும் நேரம் தவிர, மற்ற நேரங்களிலும் அடிக்கடி எழுந்திருக்கலாம். இந்தச் சந்தர்ப்பங்களில்தான் குழந்தை தூங்கும் நேரத்தைத் தாய்மார்கள் முறைப்படுத்த வேண்டும். தூக்கம் என்பது இரவு நேரச் செயல், அதாவது எந்தவித விளையாட்டும் இல்லாத நேரம் என அதற்கு உணர்த்த வேண்டும்.

குழந்தை விழித்துக் கொண்டிருக்கும் பகல் வேளைகளில் நிறைய வேடிக்கைகள் காட்டவும் இரவில் அதைத் தவிர்க்கவும் உங்களுக்கு வசதியான நேரத்ததில் குழந்தையைத் தூங்க வைத்துப் பழகுங்கள்.

சாப்பாடு ஊட்டியபிறகு சிறிது நேரம் குழந்தையை ஓய்வெடுக்க விடுங்கள். பிறகு பவுடர் போட்டு தளர்வான ஆடைகளை மாற்றிவிடவும். இது தூங்குவதற்கான இரவு நேரம் என்ற எண்ணத்தை குழந்தையின் மனத்தில் ஏற்படுத்தும்.

குழந்தையை அணைத்தபடியோ தொட்டிலில் விட்டபடியோ தாலாட்டு பாடிக்கொண்டு அல்லது இதமான இசையை ஒலிக்க விட்டுத் தூங்கச் செய்யவும். குழந்தை தூங்கும் அறை அதிக வெளிச்சமில்லாததாக இருக்க வேண்டும்.

சில குழந்தைகள் சாப்பாட்டு நேரத்தில் தூங்கிவிடும். பாதி தூக்கத்தில் எழுப்ப மனமின்றி தாய்மார்களும் அப்படியே விட்டு விடுவதுண்டு, பிறகு பசியெடுத்து விழித்துக் கொள்ளும். குழந்தைக்கு உணவூட்டி, உடனடியாக மறுபடியும் தூங்க வைத்து விடவும். பாதி தூக்கத்தில் எழுந்திருக்கும்போது விளையாட்டு காட்ட வேண்டாம்.

தூக்கமே இல்லாமல் அழும் பட்சத்தில் குழந்தையின் உடல் நலம் பாதிக்கப்பட்டுள்ளதா எனவும் பார்க்கவும். தூக்கத்தில் குழந்தை சிணுங்கினாலோ, அசைந்தாலோ ஓடிப் போய்த் தூக்க வேண்டாம். சில நிமிடங்களில் அது தானாகவே தூங்கிவிடும். அப்படித் தூங்காவிட்டால் அதனருகில் உட்கார்ந்து மென்மையாகத் தடவிக் கொடுத்து, நெற்றி கழுத்துப் பகுதியில் வருடினால் தூங்கிவிடும்.

குழந்தை பிறந்த அடுத்த மாதத்திலிருந்தே அதன் தூக்கப் பழக்கத்தை முறைப்படுத்தலாம். தினம் ஒரே நேரம் தூங்கும் பழக்கத்தை அதற்கு ஏற்படுத்தவும். எப்படியோ தூங்கினால் போதுமென ஒவ்வொரு நேரம் தூங்க வைக்க வேண்டாம்.
குழந்தை தானாகத் தூங்கட்டும் என்று விட வேண்டாம். சாப்பாடு கொடுத்த சில நிமிடங்களில் தூங்க வைப்பதே சிறந்தது. தூங்குமிடம் காற்றோட்டமாக, அமைதியானதாக இருக்க வேண்டும். பாதித் தூக்கத்தில் குழந்தையை அணைக்க வேண்டாம். குழந்தையின் தூக்கம் கெடும்.

Advertisements

மதுரை ஸ்பெஷல் மட்டன் பிரியாணி

தேவையானப் பொருட்கள்:
மட்டன்- 3/4 கிலோ, பிரியாணி அரிசி – 1 கிலோ, பெரிய வெங்காயம் – 1/4 கிலோ, தக்காளி – 1/2 கிலோ (நறுக்கவும்), பச்சை மிளகாய் – 8 , புதினா, கொத்தமல்லி இலை – ஒரு கப் (பொடியாக நறுக்கவும்), எலுமிச்சம்பழம் – 2 , தயிர் – 1   கப், இஞ்சி – 100 கிராம், பூண்டு – 100 கிராம், எண்ணெய் – 400 மி.லி., கறி மசாலா – 5 டீஸ்பூன், மிளகாய் தூள் – 3 டீஸ்பூன் ,தனியாதூள் – 2 டீஸ்பூன், மஞ்சள்தூள் – 1 டீஸ்பூன், டால்டா – 100 கிராம், உப்பு – தேவைக்கேற்ப, கேசரிப்பவுடர்-சிறிதளவு, ஏலக்காய் – 4 ,கிராம்பு -6 ,  பட்டை  சிறுதுண்டு

செய்முறை:
வெங்காயம், பச்சைமிளகாய் நீளவாக்கில் நறுக்கிக் கொள்ளவும். இஞ்சி, பூண்டு விழுதாக்கிக் கொள்ளவு-ம். மட்டனை சுத்தம் செய்து, தேவைக்கேற்ற அளவில் வெட்டிக் கொள்ளவும். குக்கரில் மட்டனுடன் இஞ்சி, பூண்டு விழுதையும் உப்பையும் சேர்த்து வேகவிடவும். அரிசியை சுத்தம் செய்து நீர் ஊற்றி ஊற விடவும். அகலமான வாணலியில் எண்ணெய் ஊற்றி காய்ந்ததும் ஏலக்காய், பட்டை, கிராம்பு சேர்த்து வதக்கவும். அதனுடன் நறுக்கிய வெங்காயம், பச்சை மிளகாய், புதினா, கொத்தமல்லி இலை சேர்த்து வதக்கவும். இத்துடன் மிளகாய் தூள், தனியாதூள், கறி மசாலா, தயிர் சேர்த்து வேக வைத்த கறியைக் கொட்டிக் கிளறவும். இத்துடன் ஒரு கப் தண்ணீர் ஊற்றி அடுப்பை மிதமாக எரிய விடவும். ஒரு கிலோ அரிசி வேகும் அகலமான பாத்திரத்தில் பாதி அளவிற்கு தண்ணீர் ஊற்றி கொதிக்க வைக்கவும். சாதம் முக்கால் வேக்காடு வெந்தபின் வடித்து விடவும். இத்துடன் வேக வைத்துக் கிளறிய கறி மசால் கலவையைச் சேர்க்கவும். கடைசியில் எலுமிச்சம் பழச்சாறு, டால்டா ஊற்றி, பாத்திரத்திலிருந்து ஆவி வெளியேறா வண்ணம் இறுக்கமாக மூடி சிறிது நேரம் குறைந்த தீயில் வைத்திருந்து அடுப்பை அணைக்கவும். சிறிது நேரம் கழித்து மட்டன் பிரியாணியை கிளறி எடுத்தால் சுவையான பிரியாணி தயார்

பனீர் தோசை

தேவையானப் பொருட்கள்:
பச்சரிசி & ஒரு கப், புழுங்கலரிசி & ஒரு கப், துருவிய பனீர் & ஒரு கப், பச்சை மிளகாய் & 2, உப்பு & தேவைக்கேற்ப, பொடியாக அரிந்த கொத்தமல்லி & ஒரு டீஸ்பூன், எண்ணெய் & தேவையான அளவு.

செய்முறை:
பச்சரிசி, புழுங்கலரிசி இரண்டையும் சேர்த்து இரண்டு மணி நேரம் ஊறவைக்கவும். பனீரை துருவி வைத்துக்கொள்ளவும். பச்சை மிளகாயையும் கொத்துமல்லியையும் பொடியாக அரிந்து வைத்துக்கொள்ளவும். ஊறிய அரிசியை உப்பு சேர்த்து நைஸாக அரைக்கவும். பின்னர் அதனுடன் துருவிய பனீர், பச்சைமிளகாய், கொத்துமல்லி இவற்றைச் சேர்த்து, மாவை சிறிது தளர கலந்து, சிறிது கனமான தோசைகளாக வார்த்து எடுக்கவும். சோயாபனீர் சேர்த்தும் செய்யலாம். உடம்புக்கு மிகவும் நல்லது. புளிப்பு வேண்டியவர்கள் மாவை 5 மணி நேரம் புளிக்கவைத்து, பிறகு பனீர் சேர்த்துச் செய்யலாம். சூடாக சாப்பிட்டால் சுவை அதிகம்.

நோபல்பரிசு 2009


உலகில் வழங்கப்படும் எத்தனையோ உயரிய விருதுகளில் மிக உன்னதமானதும் மனித மற்றும் சுற்றுப்புறச் சூழல் மேம்பாட்டிற்காக அறிவியல் ஆராய்ச்சிகளை விஞ்ஞானத்தின் அடுத்தபடிகளுக்கு கொண்டு செல்லும் விஞ்ஞானிகளையும், சுற்றுபுற சூழல் மற்றும் மனிதநேய அமைதிக்காக பாடுபடும் மாமனிதர்களையும் கௌரவிக்கும் வகையில் நோபல் பரிசு வழங்கப்படுகிறது. சர்வதேச அளவில் வழங்கப்படும் இவ்விருதை ஆல்பிரட் நோபல் எனும் விஞ்ஞானியின் பெயரால் ஒவ்வொரு ஆண்டும் அந்தந்த துறையில் சாதனை படைத்தோருக்கு வழங்கப்பட்டு வருகிறது.

நோபல் பரிசு உருவாக்கம்

சிறந்த விஞ்ஞானியான ஆல்பிரட் நோபல் டைனமைட் என்னும் வெடிபொருளை கண்டு பிடித்தார். இதன் பயனாக மிகுந்த செல்வமும் பெயரையும் சம்பாதித்தார். ஆக்கப்பூர்வமான வேலைகளுக்கு தன் கண்டுபிடிப்பை பயன்படுத்த நினைத்த ஆல்பிரட் அழிவு செயல்களுக்கு பயன் படுவதை எண்ணி வருந்தினார். சமூக சிந்தனை யாளரான நோபலுக்கு மனிதகுல ஆக்கத்திற்கு பயன்படும் கண்டுபிடிப்புகளை செய்யும் விஞ்ஞானிகளை ஊக்குவிப்பதில் உண்டான எண்ணமே மன ஆறுதல் தந்தது. அதனால் முதன் முறையாக 1895- ஆம் வருடம் நோபல் பரிசை உருவாக்கினார். அவர் மறைவிற்குப் பின்னர் நோபல் கமிட்டி உருவாக்கப்பட்டு அதன்மூலம் இயற்பியல், வேதியியல், மருத்துவம் ஆகியவற்றில் சாதனை புரியும் விஞ்ஞானிகளுக்கும், இலக்கியம், பொருளாதாரம் போன்றவற்றில் சாதனை படைக்கும் நிபுணர்களுக்கும் உலக அமைதிக்காக பாடுபடும் தலைவர்களுக்கும் நோபல் பரிசு வழங்கப்பட்டு வருகிறது.

நோபல் கமிட்டி

நோபல் கமிட்டி என்பது நார்வே நோபல் கமிட்டி, கரோலின்ஸ்கா ராயல் ஸ்விஸ் அகாடமி மற்றும் நோபல் சபை ஆகிய நான்கு அமைப்பு களை கொண்டது. ராயல் ஸ்விடிஸ் அகாடமி, ஸ்டாக் ஹோம் ஆகியவை இயற்பியல், வேதியியல் மற்றும் பொருளாதாரம் ஆகிய துறைகளில் நோபல் பரிசிற்கு தகுதியானவர்களை தேர்ந்தெடுக் கின்றன.

கரோலின்ஸ்கா நிறுவனத்திலுள்ள நோபல் அசெம்பிளி, ஸ்டாக் ஹோம் ஆகியவை மருத்து வத்திற்கும், ஸ்வீடிஸ் அகாடமி ஆகியவை இலக்கியத்திற்கும் நார்வீஜியன் நோபல் கமிட்டி, ஓஸ்கோ அமைதிக்கும் பரிசுக்குரியவர்களை தேர்ந்தெடுக்கிறது.

தேர்வு செய்யும் முறை

உலக அளவில் உள்ள விஞ்ஞான அமைப்பு கள் ஆராய்ச்சிகள் மேற்கொள்ளும் பல்கலைக் கழகங்கள் மற்றும் ஆராய்ச்சி நிறுவனங்கள் தங்களின் பிரதிநிதிகளையும் ஆராய்ச்சி கட்டுரைகளையும் அனுப்பி வைத்து அதனுள் தகுதியானவர்களின் கட்டுரைகளையும் ஆய்வு களையும் சிறந்த நிபுணர்களைக் கொண்டு விவாதிக்கப்பட்டு இறுதி செய்யப்படுகிறது.

தேர்ந்தெடுக்கப்படும் நபர்களுக்கு சுமார் 6 கோடி ரூபாய் ரொக்கமாகவும், 23 காரட் தங்கத்திலான சுமார் அரை பவுண்ட் எடையிலான தங்கப்பதக்க மும் சான்றிதழும் வழங்கப்படுகிறது.

இயற்பியல் துறை

சார்லஸ் கேகாவ்

சீனாவின் ‘ஷாங்காயில் 1933-ஆம் ஆண்டு பிறந்தவர். பிரிட்டனில் வசித்து வருகிறார். இவர் அமெரிக்கக் குடியுரிமையும் பெற்றுள்ளார். லண்டனில் உள்ள இம்பீரியல் கல்லூரியில் 1966- ஆம் ஆண்டு மின் பொறியியலில் டாக்டர் பட்டம் பெற்றவர். ‘ஷாங்காய் பல்கலைகழகத்தில் துணை வேந்தராக பணியாற்றி 1999-ல் ஓய்வு பெற்றவர்.

ஜார்ஜ் இ ஸ்மித்

அமெரிக்காவில் 1930- ஆம் ஆண்டு பிறந்தவர். இவர் சிகாகோ பல்கலைகழகத்தில் இயற்பியல் துறையில் டாக்டர் பட்டம் பெற்றவர். அமெரிக் காவின் நியூ ஜெர்ஸியில் உள்ள பெல் ஆய்வுக் கூடத்தில் பணியாற்றி 1986-ல் ஓய்வு பெற்றவர்.

வில்லார்ட் எஸ் பாய்லே

கனடாவில் 1924-ஆம் ஆண்டு பிறந்தவர். அமெரிக்க குடியுரிமை பெற்றுள்ளார். கனடாவில் உள்ள மேக்கில் பல்கலைகழகத்தில் இயற்பியல் துறையில் டாக்டர் பட்டம் பெற்றவர். அமெரிக்கா வின் நியூ ஜெர்ஸியில் உள்ள பெல் ஆய்வுக் கூடத்தில் பணியாற்றி 1974-ல் ஓய்வு பெற்றவர்.

கண்டுபிடிப்புகள்

சார்லஸ் கே காவ் கண்ணாடி இழையில் ஓளியை பயணம் செய்ய வைத்து சாதனை நிகழ்த்தினார்.

வில்லார்ட் எஸ் பாய்லே, ஜார்ஜ் இ ஸ்மித் ஆகிய இருவரும் இமேஜிங் செமி கண்டக்டர் சர்க்யூட்டை (சிசிடி சென்சார்) வடிவமைத்து சாதனை நிகழ்த்தியுள்ளனர். இதன்மூலம் உலகின் எந்த மூலையில் உள்ளவரையும் தொலைபேசி மூலம் தொடர்பு கொள்வதும், தகவல்களை இணைய தளம் மூலம் மிகத் துரிதமாக பரிமாறிக் கொள்வதும் சாத்தியமாகும்.

வேதியியல் துறை

இம்முறை வேதியியல் துறையில் நம் இந்தியரான வெங்கட்ராமகிருஷ்ணன் யெடா.இ. யோனத் தாமஸ் “ஸ்டீட்ஸ் என்னும் சக விஞ்ஞானிகளுடன் நோபல் பரிசை பகிர்ந்து கொள்கிறார்.

வெங்கட்ராமன் ராமகிருஷ்ணன்

கடலூர் மாவட்டம் சிதம்பரத்தை சேர்ந்தவர். சிதம்பரத்தில் 1952-ஆம் ஆண்டு பிறந்தவர். 1971-ல் குஜராத்தில் உள்ள பரோடா பல்கலைகழகத்தில் இயற்பியலில் பி.எஸ்.சி பட்டம் பெற்று அமெரிக் காவில் உள்ள ஓஹையோ பல்கலைகழகத்தில் முனைவர் பட்டம் பெற்றவர். அதன்பின் உயிரியல் ஆய்வில் ஈடுபட்டார். இப்பரிசை பெறும் 3-வது தமிழர், ஏழாவது வெளிநாடு வாழ் இந்தியர் ஆவார்.

யெடோ இ. யோனத்

இஸ்ரேலைச் சேர்ந்த யோனத், ஜெருச லேமில் 1939-ல் பிறந்தவர். வைஸ்மான் அறிவியல் கல்லூரியிலிருந்து 1968-ல் எக்ஸ்ரே கிரிஸ்ட லோகிராபி பிரிவில் முனைவர் பட்டம் பெற்றவர்.

தாமஸ் ஸ்டீட்ஸ்

அமெரிக்காவைச் சேர்ந்த தாமஸ் ஸ்டீட்ஸ் விஸ்கான்சின் மாகாணம் மில்வாகியில் 1940-ஆம் ஆண்டு பிறந்தார். ஹார்வார்டு பல்கலைகழகத்திலிருந்து 1966-ல் உயிரி வேதியியல் மற்றும் மூலக்கூறு உயிரியலில் முனைவர் பட்டம் பெற்றவர்.v கண்டுபிடிப்பு

செல்களில் ரிபோசோம்கள் புரதத்தைத் தயாரிக்கின்றன. இந்தப் புரதங்கள்தான் உடல்கூறு வேதியல் பணியை கட்டுப்படுத்துகின்றன. ரிபோசோம்களை உருவாக்கும் ஆயிரக்கணக்கான அணுக்கள் ஒவ்வொன்றின் இட அமைப்பையும் படம் பிடிக்க இம்மூவரும் எக்ஸ்ரே கிரிஸ்டலோ கிராபி முறையை பயன்படுத்தியுள்ளார்.

மேலும் அணு நிலையில் அதன் அமைப்பு, செயல்படும் விதம், எவ்வாறு ரிபோ சோம்களில் ஆண்டிபயோட்டிக்குகள் ஒட்டிக் கொள்கின்றன என்பதை 3-டி. மாதிரிகள் மூலம் விளக்கியுள்ளனர். இதன்மூலம் பல்வேறு நோய்களைக் குணப்படுத்த தேவையான ஆண்டிபயோடிக் மருந்துகளைத் தயாரிக்க முடியும்.

மருத்துவம்

எலிசபெத் பிளாக்பர்ன்

ஆஸ்திரேலியாவில் 1948-ல் பிறந்தவர். பிரிட்டனில் கேம்பி ரிட்ஜ் பல்கலைகழகத்தில் 1975-ல் டாக்டர் பட்டம் பெற்றவர்.

ஜேக் சோஸ்டாக்

லண்டனில் 1952-ல் பிறந்தவர். இவர் நியூயார்க்கின் கார்னெல் பல்கலை கழகத்தில் 1975-ல் டாக்டர் பட்டம் பெற்றவர். 1979 முதல் ஹார்வார்டு மருத்துவ பல்கலைகழகத்தில் பணியாற்றி வருகிறார்.

கரோல் கிரெய்டர்

அமெரிக்கரான கரோல் கிரெய்டர் 1961-ல் பிறந்தவர். 1987-ல் கலிஃபோர்னியா பல்கலைகழகத்தில் டாக்டர் பட்டம் பெற்றவர்.

கண்டுபிடிப்பு

வயோதிகத்திற்கு காரணமான செல் மற்றும் செல் பிரிதலின் போது குரோமோ சோம்கள் எவ்வாறு பிரதி எடுக்கின்றன என்பதை இவர்கள் கண்டறிந்துள்ளனர். இது புற்று நோய் தொடர்பான ஆராய்ச்சிக்கு பெரிதும் உதவும்.

இலக்கியம்

ஹெர்தா முல்லர்

ருமேனியாவில் பிறந்தவர் ஹெர்தா முல்லர். 1982-ல் தாழ்ந்த பூமி என்ற பெயரில் எழுதிய சிறுகதைகள் மூலம் எழுத்துலகிற்கு அறிமுக மானவர். இவருடைய லேண்ட்ஸ்கேப் ஆப்தி டிஸ்பொசஸ்ட் (வறியவர் பூமி) என்ற படைப்புக்காக இவ்விருது கொடுக்கப்படுகிறது. ருமேனியாவில் வசித்த முல்லரின் பெற்றோர் சிறுபான்மை ஜெர்மனி சமூகத்தைச் சார்ந்தவர்கள். ருமேனியாவில் சிறுபான்மை ஜெர்மனியர் வாழும் கிராமம் ஒன்றில் இழைக்கப்படும் கொடுமைகளை விவரிக்கின்றது இச்சிறுகதை நூல். இதனை ருமேனிய அரசு தடை செய்தது. 1984-ல் இக்கதைகள் ஜெர்மனி கொண்டு செல்லப்பட்டு, அங்கு வெளியிடப்பட்டது. ருமேனிய அரசின் ஊழல் அடக்குமுறை, சர்வாதிகார ஆட்சியை விமர்சித்த இந்நூல் ருமேனிய சர்வாதிகாரி நிகோனு செசேஸ்கு பதவி நீக்கம் செய்யப்பட்டு மரண தண்டனை கொடுக்கப்பட காரணமாயிற்று.

அமைதி

பராக் ஒபாமா

கென்யா நாட்டை சேர்ந்தவருக்கும், அமெரிக்க பெண்மணிக்கும் பிறந்த ஒபாமா, அமெரிக்காவின் முதல் ஆப்ரிக்க- அமெரிக்க அதிபர் ஆவார்.

சர்வதேச அளவில் தீவிரவாதத்தைக் கட்டுப் படுத்தியது, அணு ஆயுத குறைப்பு நடவடிக்கை, நாடுகளுக்கிடையேயான உறவை மேம்படுத்தியது, பருவநிலை மாற்றம் தொடர்புடைய நடவடிக்கை களுக்கு முக்கியத்துவம் கொடுத்தது ஆகியவையும், இஸ்ரேல் மற்றும் பாலஸ்தீன தலைவர்களை சந்திக்க வைத்து அமைதியை ஏற்படுத்தி யது, ஒபாமாவின் ஐரோப்பிய நாடு களுக்கான புதிய ஏவுகணை பாதுகாப்பு கொள்கைக்கு ரஷ்யா ஆதரவளித்ததன் மூலம் இரு வல்லரசுகளுக்கிடையே பனிப்போரை முடிவுக்கு கொண்டு வந்தது போன்றவை ஒபாமாவை நோபல் பரிசு பெற வைத்தது.

பொருளாதாரம்

பொருளாதாரத்திற்கான நோபல் பரிசை அமெரிக்காவைச் சேர்ந்த எலினோர் ஆஸ்ட்ரோம் மற்றும் ஆலிவர் இ. வில்லியம்சன் ஆகியோர் கூட்டாகப் பெற்றுள்ள னர். பொருளாதார நிர்வாகம் குறித்த அவர் களின் ஆய்வுக்கு இப்பரிசு வழங்கப்படு கிறது. பொருளாதாரத்திற்கான நோபல் பரிசைப் பெறும் முதலாவது பெண்மணி என்ற பெருமையை ஆஸ்ட்ரோம் பெற்றுள்ளார். மேலும் இந்த ஆண்டு நோபல் பரிசுக்குத் தேர்வு செய்யப்பட்ட பெண்களில் ஐந்தாமவர் என்ற பெருமையும் இவரையே சாரும். ஒரே ஆண்டில் ஐந்து பெண்கள் நோபல் பரிசுக்குத் தேர்வு செய்யப்பட்டிருப்பது இதுவே முதல்முறை. ஆஸ்ட்ரோமின் ஆய்வு அறிக்கையானது பொருளாதார நிர்வாகம் சார்ந்தது. இதில் பொது சொத்தை ஒரு குழுவினர் வெற்றிகரமாக நிர்வகிப்பது எப்படி? என்பதை விவரிக்கிறது.

எலினோர் ஆஸ்ட்ரோம்

1933-ம் ஆண்டு ஆகஸ்ட் 7-ம் தேதி பிறந்த இவர் பொருளாதாரத்தில் மிகுந்த நாட்டமுடையவர். இண்டியானா பல்கலைக்கழகத்தில் கணவர் வின்சென்ட் ஆஸ்ரோமுடன் இணைந்து தனி ஆய்வுப் பிரிவைத் தொடங்கியவர். கூட்டுச் செயல்பாடு, அறக்கட்டளை மற்றும் பொது விவகாரங்களில் நிபுணத்துவம் உடையவர். அரிசோனா மாகாண பல்கலைக்கழகத்தில் பகுப்பாய்வு குறித்த ஆய்வு மையத்தின் நிறுவன இயக்குநராகவும் இவர் உள்ளார்.

ஆலிவர் இ. வில்லியம்சன்

1932-ம் ஆண்டு செப்டம்பர் 27-ம் தேதி பிறந்த ஆலிவர் இ. வில்லியம்சன் பொருளாதாரத்தில் பரிமாற்றச் செலவு குறித்த ஆய்வை மேற் கொண்டார். ஸ்டான்ஃபோர்டு பல்கலையில் முதுகலை நிர்வாகவியல் பட்டமும் கார்னீகி மெலோன் பல்கலையில் டாக்டர் பட்டமும் பெற்றார். நிர்வாகவியல், பொருளாதாரம் ஆகிய துறைகளின் பேராசிரியராகப் பணியாற்றிய இவர், பெர்க்ளி பல்கலைக்கழகத்தில் சட்டமும் பயின்றுள்ளார். பொருளாதாரம் சார்ந்த ஆய்வுக் கட்டுரைகள் மற்றும் நூல்களை எழுதியுள்ள இவர் வெரிஜஸ் ரிக்ஸ்பேங்க் விருது, ஹார்ஸ்ட் கிளாஸ் விருது உள்ளிட்ட பல விருதுகளையும் பெற்றுள்ளார்.