எளிய தர்மம் செய்யுங்க! (ஆன்மிகம்)

ஜன.,7 மதுரையில் படியருளும் லீலை!
தர்மம் தலைகாக்கும் என்பர். மிகப்பெரிய அளவில் தான் தர்மம் செய்ய வேண்டும் என்பதில்லை; எளிய முறையில் தர்மம் செய்தாலே போதும் என்பதை உணர்த்த, மதுரையில், மார்கழி மாதம் தேய்பிறை அஷ்டமியன்று, மீனாட்சி-சுந்தரேஸ்வரர் படியருந்தருளிய லீலை என்ற பெயரில் நடக்கும் விழா மிகவும் சிறப்புமிக்கது.
பசி ஒரு கொடிய வியாதி. பாவிகளுக்கு கூட இது வந்துவிடக்கூடாது என்பதில் நம்மவர்கள் அக்கறையாக இருந்துள்ளனர். கேரளாவில் செருக்குன்னம் அன்னபூரணி கோவிலில் தினமும் அன்னதானம் நடக்கும். இரவானதும், ஒரு துணியில் அன்னத்தை வைத்து மரத்தில் கட்டி தொங்க விடுவர். இரவில், அந்தப் பக்கம் நடமாடும் பாவத்தொழில் செய்யும் திருடர்களுக்கு கூட, அந்தச் சோறு பசியாற்றட்டுமே என்பது இதற்கு காரணமாம்.
பெற்றவர்கள் சிரமப்பட்டு, பாடுபட்டு குழந்தைகளுக்கு உணவளிக்கின்றனர். அந்த உணவு தட்டுப்பாடின்றி கிடைக்க, சிறந்த நிலம், மழை, பிற வசதிகளெல்லாம் வேண்டும். எத்தனை அணைகள் இருந்து என்ன பயன்! மழை பெய்தால் தானே அது நிரம்பும்! அது யார் கையில் இருக்கிறது? பரமேஸ்வரான தந்தையிடமும், பார்வதியான அன்னையிடமுமே இருக்கிறது. இவர்களின் அம்சமான சுந்தரேஸ்வரரும், மீனாட்சியும் உலக மக்களுக்கு உணவளிப்பதற்காக ஆண்டில் ஒருநாள் பவனி வருகின்றனர். இதற்காக அவர்கள் தேர்ந்தெடுத்த திதி அஷ்டமி. நாம் எந்த சுபநிகழ்ச்சியையும் அஷ்டமியில் நடத்துவதில்லை. நாம் எதை வேண்டாம் என்று ஒதுக்குகிறோமோ, அதை எடுத்துக் கொள்கிறான் ஆண்டவன். அதாவது, அவனுக்கு எந்த தேவையு மில்லை. அவன் தன்னிடமுள்ளதை, தன்னால் படைக்கப்பட்ட ஜீவன்களுக்கு கொடுப்பதையே விரும்புகிறான். இதற்காக, உலக மக்களைச் சந்திக்க வருகிறான்.
ஒருமுறை, செப்பு ஒன்றில் ஒரு எறும்பை அடைத்து வைத்தாள் அம்பாள். “இறைவா! எல்லாருக்கும் படியளப்பதாகச் சொல்கிறீர்களே… செப்புக்குள் கிடக்கும் இந்த எறும்பிற்கு எப்படி படியளக்கிறீர்கள், பார்க்கலாம்?’ என்றாளாம். சற்றுநேரத்தில், செப்பைத் திறந்து பார்க்கச் சொன்னார் சுவாமி. அந்தச் செப்புக்குள் பாதி துண்டு அரிசி கிடந்தது. அதை அந்த எறும்பு எடுத்துச் செல்ல முயற்சி செய்து கொண்டிருந்ததாம்.
எல்லா ஜீவராசிகளுக்கும் ஏதோ ஒரு வழியில் படியளந்து விடுகிறார் இறைவன். மார்கழி அஷ்டமியன்று மீனாட்சியம்மன் கோவில் ஆடிவீதியில், மாவுக்கோலம் போடும் வழக்கம் இருக்கிறது. இதை நேர்ச்சையாகவே பலர் செய்கின்றனர். மிகுந்த வறுமையிலுள்ளவர்கள் இந்த நேர்த்திக்கடனை செய்வது வழக்கம். இந்த மாவை அங்குள்ள எறும்பு உள்ளிட்ட ஜீவராசிகள் உண்ணும். இந்த எளிய தர்மத்திற்கு மகிழும் இறைவன், அவர்களது பசியைப் போக்குவதாக ஐதீகம்.
மதுரையில் நடக்கும் விழாக்களில் சப்பர பவனி ஆடிவீதி, சித்திரை வீதி, மாசிவீதிகளில் நடப்பதே வழக்கம்; ஆனால், படியளக்கும் விழா சப்பரம் மட்டும், மக்கள் நடமாட்டம் அதிகமுள்ள வெளிவீதியில் உலா வரும். அதிகளவு மக்களுக்கும், குறிப்பாக, அடித்தட்டு மக்களுக்கும் உணவளிக்க வேண்டும் என்ற அடிப்படையில் இவ்வாறு செய்கின்றனர். மார்கழி அஷ்டமியை தர்மத் திருநாளாகக் கொண்டு, நம்மால் முடிந்த உதவியைப் பிறருக்குச் செய்து இறையருள் பெறுவோம்.

%d bloggers like this: