Advertisements

Daily Archives: மார்ச் 25th, 2010

முப்பரிமாண டெலிவிஷன்

பொழுதுபோக்கு அம்சங்களில் அதிக ஆர்வம் காட்டும் வகையில் இன்றைய தலைமுறையினர் வளர்ந்து வருகிறார்கள். அவர்களின் மாலைப்பொழுதுகள் பெரும்பாலும் டெலிவிஷன் பெட்டிகளின் முன்பு தான் கழிகிறது.

மக்களின் தேவைகளுக்கு தீனி போடும் வகையில் நூற்றுக்கணக்கான டெலிவிஷன் சேனல்கள், கேபிள் நெட்ஒர்க்குகள் என்று பல்வேறு வசதிகள் வீட்டுக்குள் வந்துவிட்டது. இதற்கு ஏற்ப சாதாரண டெலிவிஷன் பெட்டியிலும் நிறைய மாற்றங்கள் வந்துவிட்டன.

வண்ண டெலிவிஷன் பெட்டி, தட்டையான திரை கொண்ட அழகிய டெலிவிஷன் பெட்டி…. என அதிலும் நவீனம் புகுந்துவிட்டது. இதற்கு அடுத்தபடியாக எல்.சி.டி., எச்.டி. டி.வி. என நவீன தயாரிப்புகளும் சந்தைக்கு வந்துவிட்டன.

இப்போது முப்பரிமாண (3 டி- திரீ டைமன்சன்) டெலிவிஷன் பெட்டிகள் தயாரிப்பில் முன்னணி நிறுவனங்கள் ஆர்வம் காட்டியுள்ளன. குறிப்பாக சோனி நிறுவனம் இந்த முப்பரிமாண டெலிவிஷன்களை தயாரித்துள்ளது. ஐரோப்பிய நாடுகளில் நடந்த கண்காட்சி களில் இந்த ரக டெலிவிஷன்கள் காட்சிக்கு வைக்கப்பட்டுள்ளன. வரும் ஜூன் மாதம் முதல் விற்பனைக்கு வர இருக்கும் இந்த டெலிவிஷன்களை பார்க்க விசேஷ கண்ணாடி தேவை. இந்த ரக டெலிவிஷன் பெட்டிகளில் காட்சிகளின் ஒலி-ஒளி அமைப்பு மிகத்துல்லியமாக இருக்கும் என்பதோடு இதன் விலையும் லட்சத்தை தாண்டும் என்பது குறிப்பிடத்தக்கது.

Advertisements

டென்ஷனும்… ரத்த அழுத்தமும்..!

சிலர் எப்போதும் சிரிக்கவே மாட்டார்கள்… சிடுசிடுவென இருப்பார்கள். சிலர் எப்போதும் பரபரப்பாக… படபடப்பாக காணப்படுவார்கள். இதற்கு காரணம் ரத்தக் கொதிப்பு அல்லது ரத்த அழுத்தம் என்கிறார்கள் மருத்துவர்கள்.

ஒருவருக்கு ரத்த அழுத்தமானது தொடர்ச்சியாக 120/80 மி.மீ. பாதரச அளவிற்கு மேல் இருந்தால், அந்த உயர் அழுத்தங்களினால் உடலில் விரும்பத்தகாத விளைவுகளும் ஏற்படும்.

முதுமைக்கேற்ப ரத்த அழுத்தம் உயரும் என்பது தவறு. குழந்தைப் பருவத்திலிருந்து சுமார் 18 வயது வரை, வளர்ச்சிக்கேற்ப ரத்த அழுத்தமும் உயரும். குழந்தைகளுக்கும் சிறுவர்களுக்கும் அவர்களது வயதிற்கேற்ப அல்லாமல் உயர்ந்து இருந்தால், அந்த ரத்த அழுத்தங்களும், ரத்தக் கொதிப்பிற்கான அழுத்தங்களாக கருதப்படும்.

ரத்தக் கொதிப்பிற்கு எந்த வயதினரும் ஆட்படலாம். இதற்கு வயது விதிவிலக்கே கிடையாது. கடுமையான உடல் உழைப்பை தொடர்ந்து செய்து வரும் ஆசிய, ஆப்பிரிக்க நாட்டு மக்களிடமும், அங்குள்ள முதியவர்களிடமும் ரத்தக் கொதிப்பு என்பது குறைவு! ஆனால் இன்றைக்கு மிதமிஞ்சிய உணவு, கொழுப்பு சத்து மற்றும் உப்புச் சத்து நிறைந்த உணவுகளை பெருமளவில் சாப்பிடுவோருக்கு ரத்தக் கொதிப்பு அதிகமாக ஏற்படுகிறது.

அதோடு மட்டுமின்றி, உடல் உழைப்பு குறைந்தவர்களுக்கும் மன உளைச்சலோடு வாழ்கின்ற சூழ்நிலையில் உள்ளவர்களிடமும் ரத்தக்கொதிப்பு பெரும்பாலும் காணப்படுகிறது.

சீரான அழுத்தத்தோடு இதயத்திலிருந்து ரத்தம் வெளிப்படுவதால் உடலின் அனைத்துப் பகுதிகளுக்கும் திசுக்களுக்கும் ரத்தம் பரவலாக கிடைக்க ஏதுவாகிறது. அப்படி சீரான அழுத்தத்தோடு தொடர்ச்சியாக ரத்தம் பாய்ந்தால்தான் திசுக்கள் சீராக இயங்க முடியும். உடலில் ஏற்படும் மாற்றங்களின் அடிப்படையில் ரத்த அழுத்த அளவுகளும் மாறுபடக் கூடியது. மிகவும் குறைந்த அளவு ரத்த அழுத்தமும், உயர்ந்த ரத்த அழுத்தமும் உடலின் நலத்திற்கு ஏற்புடையதல்ல.

ஆரம்பக் காலக்கட்டங்களில் மாறுபட்ட அளவுகளைக் காட்டிடும் ரத்த அழுத்தமானது, மன உளைச்சல், பதற்றம், பீதி, அச்சம், கோபம், திடீரென செய்யும் கடுமையான உடற்பயிற்சி, கடும் உடல் உழைப்பு, கடும் குளிர் போன்ற நிலைகளின் போது எதிர்பார்ப்பை விட, உயர்ந்தே காணப்படும்.

இப்படி உயர்ந்தும், தாழ்ந்தும் காணப்படும் ரத்த அழுத்தமானது, நாளடைவில் நிலையானதாகி உயர் ரத்த அழுத்த அளவுகளிலேயே நிலைத்து விடும்.

ரத்த அழுத்த நிலைகளில் மாறுபட்ட அளவுகள், உயர்ந்தும், தாழ்ந்தும் இருப்பினும் உரிய பரிசோதனைகளையும் சிகிச்சைகளையும் முறையாகவும், தொடர்ச்சியாகவும் மேற்கொள்வது நல்லது.

பெரும்பாலும் உயர் ரத்த அழுத்தத்திற்கான, ரத்தக் கொதிப்பிற்கான காரணம் எளிதில் புலப்படுவதில்லை. இந்த வகையில் 95 சதவீத அளவு வரையில் ரத்தக் கொதிப்பு உடையவர்கள் அடங்குவர்.

காரணத்தை கண்டறிய முடியாத ரத்த அழுத்தம் உடையவர்களின் பெற்றோர் மற்றும் முன்னோர் பெரும்பாலும் உயர் ரத்த அழுத்தத்திற்கு ஆளாகியிருப்பார்கள். அதிலும், அவர்களில் பெரும்பாலானவர்களிடம், உயர் ரத்த அழுத்தம் உண்டாவதற்கான மனநிலையில் உடல் செயல்பாடுகளும், மன வளமும் இயற்கையில் அமைந்திருப்பதை பெரும்பாலும் காணமுடியும்.

இப்படிப்பட்டவர்களிடம் மன உளைச்சல் அதிகமாக இருக்கும். அடிக்கடி கோபம் முட்டிக் கொண்டு வரும்.

இவர்களால் அமைதியான வாழ்க்கை வாழமுடியாது. நாம் சாப்பிடும் உணவில் அதிகளவில் உப்பைச் சேர்த்துக் கொள்வதால், ரத்த நாளங்களை முறுக்கேறச் செய்து ரத்த அழுத்தம் உயரும் என்பது அறிவியல் ரீதியாகக் கண்டறியப்பட்டுள்ளது.

மேலும் ரத்தத்தில் கொழுப்புச் சத்தினை அதிகமாக உடையவர்களுக்கும், உயர் ரத்த அழுத்தம் ஏற்படுகிறது என அறியப்பட்டுள்ளது. அதோடு மட்டுமின்றி, சர்க்கரை நோய்க்கும், ரத்த அழுத்தத்திற்கும் தொடர்புள்ளது என்பது குறிப்பிடத்தக்கது.

எப்1 அழுத்தாதே! ஆபத்து!!

மைக்ரோசாப்ட் நிறுவனம் அண்மையில் ஓர் எச்சரிக்கையை விடுத்துள்ளது. மைக்ரோசாப்ட் விண்டோஸ் 2000, எக்ஸ்பி சிஸ்டங்களில் ஒன்றை இன்டர்நெட் எக்ஸ்புளோரர் பதிப்பு 7 அல்லது 8 சேர்த்துப்பயன்படுத்துபவர்கள் எப்1 கீ எனப்படும் ஹெல்ப் கீயை அழுத்தினால், ஹேக்கர்கள் எளிதாக கம்ப்யூட்டர்களில் புகும் வாய்ப்பு உண்டு என்று அறிவித்துள்ளது.
இந்த ஆப்பரேட்டிங் சிஸ்டங்களில் உள்ள, விசுவல் பேசிக் கோடில் அமைந்த வரிகளில் உள்ள சிறு பிழையை ஹேக்கர்கள் பயன்படுத்த முடியும். ஏதேனும் ஒரு பாப் அப் விண்டோவினைத் திறந்து, உதவிக்கு எப்1 கீயினை அழுத்துமாறு ஹேக்கர்கள் வடிவமைத்திருப்பார்கள். அவ்வாறு அழுத்துகையில், அவர்கள் வேறு ஒரு இணையப் பக்கத்திற்கு எடுத்துச் செல்லப்பட்டு அங்கிருந்து மோசமான புரோகிராம் வரிகள் வழியாக, கம்ப்யூட்டரின் கட்டுப்பாடு ஹேக்கர்களின் கைகளுக்குச் சென்றுவிடும். இவ்வளவும் ஆப்பரேட்டிங் சிஸ்டம் மற்றும் இன்டர்நெட் எக்ஸ்புளோரர் தொகுப்புகளில் உள்ள பிழைஉள்ள தொகுப்பு வரிகளே காரணமாகும். இது குறித்த எச்சரிக்கையை மைக்ரோசாப்ட் வழங்கியுள்ளது. யாரும் இது போல பாப் அப் விண்டோ எச்சரிக்கையைத் தொடர்ந்து எப்1 கீயை அழுத்த வேண்டாம் என்று கேட்டுக் கொண்டுள்ளது. இதற்கான பேட்ச் பைல் ஒன்றைத் தரும் முயற்சியிலும் இறங்கியுள்ளது. அநேகமாக இந்த செய்தியை எழுதும் நாளை அடுத்து வரும் செவ்வாய்க்கிழமை அன்று வெளியாகும் பேட்ச் பைலில் இது கிடைக்கலாம். இந்த எச்சரிக்கையைப் படித்த பலர், நமக்கு எதுக்கு வம்பு, பிரவுசரையே மாற்றிவிடுவோம் என இன்டர்நெட் எக்ஸ்புளோரரை விடுத்து மற்றவற்றிற்கு மாறி வருகின்றனர்.

மல்டி மீடியா தேவைகளுக்கு

கம்ப்யூட்டரில் இன்று ஆடியோ, வீடியோ பைல்களைப் பயன்படுத்தாதவர்கள் இல்லை என்றே சொல்லலாம். அந்த அளவிற்கு நாள்தோறும் ஏதேனும் ஒரு ஆடியோ, வீடியோ பைலைப் பயன்படுத்தி வருகிறோம். பெரும்பாலானவர்கள் பயன்படுத்துவது விண்டோஸ் ஆப்பரேட்டிங் சிஸ்டத்துடன் கிடைக்கும் விண்டோஸ் மீடியா பிளேயர் தொகுப்பாகும். ஆனல் ஒரு நிலையில் நம் தேவைகள் அதிகமாகி,வேறு மீடியா பிளேயர் உள்ளதா என்று தேட ஆரம்பிப்போம். குறிப்பாக ஆடியோ, வீடியோ பைல்களை எடிட் செய்திடவும், கட் செய்திடவும் நமக்கு புரோகிராம்கள் தேவைப்படும். இந்த செயல்பாடுகளுக்கு நாம் வேறு தர்ட் பார்ட்டி புரோகிராம்களைத்தான் நாட வேண்டியுள்ளது.
அண்மையில் மேலே குறிப்பிட்ட அனைத்து வசதிகளையும் தரக்கூடிய புரோகிராம் ஒன்று இலவசமாகக் கிடைப்பது தெரியவந்தது. அதன் பெயர் மீடியா கோப் (Media Cope). இந்த புரோகிராமினை http://www.media cope.com என்ற முகவரியில் உள்ள இணைய தளத்திலிருந்து டவுண்லோட் செய்து இன்ஸ்டால் செய்து கொள்ளலாம்.
இந்த புரோகிராமில் மீடியா பைல்கள் குறித்த நம் அனைத்து தேவைகளையும் நிறைவேற்றிக் கொள்ளலாம். இதில் ஆடியோ/வீடியோ பிளேயர், ஆடியோ/வீடியோ கட்டர் மற்றும் ஆடியோ/வீடியோ கன்வர்டர் ஆகியவை தரப்பட்டுள்ளன. இவற்றுடன் போட்டோக்களை தேவையான பகுதியை கட் செய்து அமைக்கவும், பார்மட் மாற்றவும் மற்றும் அளவினை மாற்றவும் போட்டோ கட்டர் என்ற புரோகிராம் தரப்பட்டுள்ளது. இது மிகவும் பயனுள்ள புரோகிராமாக உள்ளது. இதனைக் கொண்டு நூறு இமேஜ் பைல்களைக் கூட சில நிமிடங்களில் கையாளலாம்.
மேலும் படங்களுடன் இசையை இணைத்து ஒரு மூவி போல அமைத்திட Movie Like Real Time Slide Show Viewer என்னும் புரோகிராம் பிரிவு உதவுகிறது.
மீடியா கோப் புரோகிராம் mp3, wav, aac, wma, flac, m4a, ac3, rmvb, mp4, 3gp, wmv, mov, avi, divx, mpg, flv, mkv மற்றும் vob என அனைத்து பார்மட்களில் உள்ள வீடியோ மற்றும் ஆடியோ பைல்களைக் கையாளும் திறன் கொண்டதாக அமைக்கப்பட்டுள்ளது. அது மட்டுமின்றி jpg, bmp, gif, tiff, png, emf and wmf ஆகிய இமேஜ் பார்மட் பைல்களையும் கையாள்கிறது.
இன்னும் போனஸாக, சில இன்டர்நெட் டூல்ஸ்களும் தரப்பட்டுள்ளன. இணைய இமேஜ்களை முழுத் திரையில் காண்பதற்கு Web Image Full Screen Viewer தரப்பட்டுள்ளது. இதன் மூலம் இணைய தளத்தில் காட்டப்படும் எந்த ஒரு இமேஜையும் விரித்து காணலாம்.
Speak Text என்னும் டூல் மூலம் இணைய தளத்தில் உள்ள டெக்ஸ்ட் ஒன்றைப் பேச்சுக் குரலில் கேட்கலாம்.
இதனை இன்ஸ்டால் செய்தவுடன் மிக எளிதாகப் பயன்படுத்தலாம். தொடக்கத்திலிருந்தே ஒரு எக்ஸ்பர்ட் போல இதனைக் கையாளலாம். பிரச்னைகள் இருந்தால் அல்லது தெளிவு தேவைப்பட்டால், ஹெல்ப் பட்டனை அழுத்தினால் பல தலைப்புகளில் தெளிவுரைகள் வழிகாட்டிகளாகத் தரப்பட்டுள்ளன. முழுமையான இது போன்ற ஹெல்ப் பைல்கள் ஒரு சில புரோகிராம்களில் மட்டுமே கிடைக்கும்.
இத்தனை பாராட்டுக்கும் இது உரியதுதானா என்ற சந்தேகம் உங்களுக்கு வரலாம். புரோகிரமினை இறக்கி, இன்ஸ்டால் செய்து பயன்படுத்திப் பார்த்தால் இது உண்மை எனத் தெரியும்.

திருமணத்தடை நீக்கும் நந்தீஸ்வரர்

மாதக்கணக்கில், வருடக்கணக்கில் அலைந்து திரிந்தும் உங்கள் மகளுக்கோ, மகனுக்கோ சரியான வரன் அமைய வில்லையா? அப்படியென்றால், நீங்கள் வந்து வழிபட வேண்டிய ஆலயம் ஆதம்பாக்கம் நந்தீஸ்வரர் ஆலயம்.

சென்னை பரங்கிமலை ரெயில் நிலையம் அருகில் ஆதம்பாக்கத்தில் அமைந்துள்ள இந்த கோவிலில் சிவபெருமானே நந்தீஸ்வரராக அருள்பாலிக்கிறார். பிருங்கி முனிவருக்கு அவர் நந்தி உருவத்தில் காட்சித் தந்ததால் அவ்வாறு அழைக்கப்படுகிறார். இங்குள்ள மலையில் இந்த பிருங்கி முனிவர் தவமிருந்து வந்ததாகவும் வரலாறு கூறுகிறது.

அதனாலேயே இந்த பகுதி `பிருங்கிமலை’ என்று அழைக்கப்பட்டு, அதுவே நாளடைவில் இன்றைய `பரங்கிமலை’யாக மாறிவிட்டது.

இந்த பகுதி ஆதம்பாக்கம் என்று அழைக்கப்படுவதற்கும் காரணம் சொல்கிறார்கள்.

ஆதம்பாக்கம் நந்தீஸ்வரர் கோவிலை கட்டிய சோழ மன்னர்களில் ஒருவனான `ஆதணி’ என்பவனின் பெயராலேயே இந்த ஊர் `ஆதணி’ என்று அழைக்கப்பட்டது. அதுவே, நாளடைவில் இன்றைய `ஆதம்பாக்கமாக’ மாறிவிட்டது என்கிறார்கள்.

இத்தலத்து இறைவன் நந்தீஸ்வரர் லிங்க வடிவில் கிழக்கு திசை பார்த்தவாறு பக்தர்களுக்கு அருள்பாலிக்க… இறைவி ஆவுடைநாயகி தென்திசை நோக்கியவாறு அருள்கிறார்.

சுந்தர விநாயகர், நாகதேவதை, விஷ்ணு, பைரவர், சந்திரன், தட்சிணா ர்த்தி, பிரம்மா, துர்க்கை, சண்டிகேசுவரர், நவக்கிரகங்கள் ஆகிய தெய்வங்களும் இங்கு தனித்தனி சன்னதிகளில் எழுந்தருளி அருள் பாலிக்கின்றனர்.

இந்த கோவிலுக்கும், புகழ்பெற்ற திருவொற்றிர் வடிவுடையம்மன் கோவிலுக்கும் பண்டைய காலத்தில் நெருங்கியத் தொடர்பு இருந்துள்ளது. சுமார் 800 ஆண்டுகளுக்கு முன்பு, திருவொற்றிர் ஆலய நித்திய பூஜைக்கு தேவையான புஷ்பங்களை பெறவும், அதற்காக பூச்செடிகள் சாகுபடி செய்யவும் ஆதம்பாக்கம் நந்தீஸ்வரர் கோவில் சார்பில் மானியமாக நிலம் கொடுக்கப்பட்ட தகவல் கல்வெட்டு வாயிலாக தெரிய வருகிறது.

ரோஜாப்பூ வழிபாடு

திருமணத்தடை நீங்க வைக்கும் விசேஷ தலமாக இந்த கோவில் அமைந்துள்ளதால், திருமணத்தடை உள்ளவர்கள் அதிக அளவில் இங்கு வந்து செல்வதை காண முடிகிறது.

திருமணத்தடை உள்ளவர்கள் இந்த கோவிலுக்கு தொடர்ந்து 5 பிரதோஷங்கள் வந்து 2 ரோஜாப்பூ மாலையை சிவன், நந்திக்கு சாற்றி வழிபட்டால் போதும். திருமணத்தடை நீங்கி, அவர்களது திருமணம் விரைவில் சிறப்பாக நடந்து முடிந்துவிடும் என்கிறார்கள்.

மேலும், கல்வி, திறமைக்கு ஏற்ற வேலை உள்ளிட்ட பக்தர்களின் எல்லா வேண்டுதல்களும் இங்கே வந்து வழிபடுவதன் மூலம்

நிறைவேறுகின்றன.வள்ளி-தெய்வானையுடன் இங்கு எழுந்தருளியுள்ள முருகப்பெருமானை வழிபட்டால், குழந்தை பாக்கியம் தாமதமாகும் தம்பதியருக்கு அந்த பாக்கியம் கிடைக்கும் என்கிறார்கள்.

சிவபெருமானுக்கு உரிய எல்லா விசேஷ தினங்களும் இங்கு சிறப்பாக கொண்டாடப்படுகின்றன. கோவிலுக்கு வந்து செல்ல சென்னையின் அனைத்துப் பகுதிகளில் இருந்தும் போக்குவரத்து வசதி உள்ளது.