Advertisements

Daily Archives: ஏப்ரல் 6th, 2010

வேர்ட் டிப்ஸ்-6.4.2010

டாகுமெண்ட் இணைக்க:
வேர்ட் தொகுப்பில் டாகுமெண்ட்களைத் தயாரிக்கையில், சில நேரங்களில் ஒரு டாகுமெண்ட் உள்ளாக, இன்னொரு டாகுமெண்ட்டை இணைக்க விரும்புவீர்கள். முழுவதுமாக கட் அண்ட் பேஸ்ட் அல்லது காப்பி அண்ட் பேஸ்ட் செய்யலாம் என்கிறீர்களா? இதில் எங்கேனும் சிறிய தவறு ஏற்பட்டால் டெக்ஸ்ட் சின்னபின்னமாகிவிடும். பின் எப்படி இணைப்பீர்கள்? இதற்கெனவே வேர்ட் ஒரு வழி தருகிறது. டாகுமெண்ட்டில் INCLUDETEXT என்ற பீல்டை உருவாக்கி விட்டால் போதும். அதற்கான வழியை இங்கு பார்க்கலாம்.
1. முதலாவதாக, டாகுமெண்ட்டை இணைக்க வேண்டிய இடத்தில் field braces உருவாக்கும் அடைப்புக் குறிகளை அமைக்கவும். இதற்கு மிகவும் கஷ்டப்பட வேண்டாம். ஜஸ்ட், கண்ட்ரோல் + எப்9 (Ctrl+F9) அழுத்தினால் போதும்.
2. இந்த பீல்டு அடைப்புக் குறிகளுக்குள்ளாக INCLUDETEXT என்ற சொல்லை அமைத்து, பின் அதனை அடுத்து ஒரு ஸ்பேஸ் விட்டு, இணைக்க வேண்டிய டாகுமெண்ட் பெயரை அமைக்கவும். எடுத்துக்காட்டாக நீங்கள் Myfile.doc என்ற டாகுமெண்ட் பைலை இணைக்க வேண்டும் என்றால், உங்களுடைய மூல டாகுமெண்ட்டில் அமைக்கப்படும் அடைப்புக்குறிகளும், உள்ளே அமைக்கப்படும் டெக்ஸ்ட்டும் – {INCLUDETEXT ‘MyFile.Doc’} – என்றவாறு அமையும்.
உடன் F9 அழுத்தி பீல்டை அப்டேட் செய்திட்டால், டாகுமெண்ட் இணைக்கப் படும். இந்நிலையில் நீங்கள் விரும்பிய டாகுமெண்ட் இணையாமல், ஏதேனும் ஓர் எர்ரர் மெசேஜ் கிடைக்கிறதா? உடனே சரி பாருங்கள். நீங்கள் உங்கள் டாகுமெண்ட் பைலுக்கான பெயரைச் சரியாக, அதன் டைரக்டரி வழிகளுடன் அமைத்திருக்கிறீர்களா என்பதனை செக் செய்திடவும். நீங்கள் அமைக்கும் டாகுமெண்ட்டும், இணைக்கப்படும் டாகுமெண்ட்டும் ஒரே போல்டரில் இருந்தால் பைலுக்கான டைரக்டரி பெயர் அமைக்க வேண்டியதில்லை. வேறு வேறு போல்டர் அல்லது டைரக்டரிகளில் இருந்தால், அதற்கான பாத் சரியாக அமைக்க வேண்டும். எனவே தவறு இருந்தால், சரி செய்திடவும். புள்ளிவிபரமும் நேரமும்
வேர்ட் டாகுமெண்ட் ஒன்றை உருவாக்கி, அதனைப் பலமுறை எடிட் செய்திருக்கிறீர்கள். சில நேரம் மற்றவர்களிடம் அலுத்துக் கொள்வீர்கள். இந்த டெக்ஸ்ட்டை எத்தனை தடவை தான் திருத்துவது! என்று. அல்லது எவ்வளவு நேரம் இதை சரி செய்திட செலவு செய்திருப்பேன் தெரியுமா என்று மற்றவர்களிடம் சொல்வீர்கள். யாராவது ஒருவர் எவ்வளவு நேரமப்பா? என்று கேட்டால் என்ன சொல்வீர்கள்? முறைத்துப் பார்ப்பீர்களா?
தேவையே இல்லை. வேர்ட் டாகுமெண்ட் பைல் இது மட்டுமின்றி இன்னும் பல தகவல்களை தொடர்ந்து கண்காணித்து, கணக்கிட்டு பதிந்து வைக்கிறது. டாகுமெண்ட் பைல் எந்த நாளில் உருவானது, என்று எடிட் செய்யப்பட்டது, மொத்தம் எத்தனை நிமிடங்கள் எடிட் செய்யப்பட்டது என்ற புள்ளிவிபரங்களை உடனுடக்குடன் அமைத்துக் கொள்கிறது. இந்த விபரங்களைக் காண வேண்டுமென்றால், டாகுமெண்ட் திறந்திருக்கும்போதே, பைல் மெனு கிளிக் செய்து, அதில் திறக்கப்பட்ட பைல் பட்டியல் மேலாக ப்ராப்பர்ட்டீஸ் என்று ஒரு பிரிவு இருக்கும். அதில் கிளிக் செய்திடவும். உடன் பைல் பெயர் இணைந்த ப்ராப்பர்ட்டீஸ் விண்டோ கிடைக்கும். இந்த சிறிய விண்டோவில் ஐந்து டேப்கள் காட்டப்படும். அதில் ஸ்டேட்டிஸ்டிக்ஸ் என்ற டேப்பில் கிளிக் செய்தால், எப்போது பைல் உருவாக்கப்பட்டது, எப்போது கடைசியாக திறக்கப்பட்டது, எடிட் செய்யபட்டது என்ற விபரங்கள் காட்டப்படும். அதன் கீழாக யார் அதனை சேவ் செய்தது என்று யூசர் நேம் காட்டப்படும். மொத்தம் பைலை எடிட் செய்த நேரம் எவ்வளவு என்று நிமிடங்களில் காட்டப்படும். அத்துடன் பக்கங்கள் எத்தனை, பாராக்கள் எவ்வளவு, வரிகளின் எண்ணிக்கை, சொற்கள், அவற்றை உருவாக்கிய எழுத்துக்கள், ஸ்பேஸ் இணைந்த கேரக்டர்கள் என அக்கு வேறு ஆணி வேறாக என்று சொல்லும் வகையில் புள்ளி விபரங்கள் கிடைக்கும்.
சில வெளிநாட்டு நிறுவனங்கள் நீங்கள் எவ்வளவு நேரம் ஒரு பைலை உருவாக்க எடுக்கிறீர்கள் என்று கணக்கு போட்டு அதற்கான கட்டணம் தருவார்கள். அவர்களுக்கு இந்த புள்ளி விபரங்கள் தான் அடிப்படையாக அமையும்.
எவ்வளவு நேரம் மொத்தம் ஒரு பைலை எடிட் செய்தீர்கள் என்று அறிய ப்ராப்பர்ட்டீஸ் சென்று தான் அறிய வேண்டும் என்பதில்லை. உங்கள் வேர்ட் டாகுமெண்ட்டிலேயே அதனை இணைக்கும் வசதியையும் வேர்ட் தருகிறது. இதற்குக் கீழ்க்கண்டபடி செட் செய்திடவும்.
1. டாகுமெண்ட்டில் எங்கு இந்த எடிட்டிங் டைம் (Editing time) காட்டப்பட வேண்டுமோ, அங்கு கர்சரை நிறுத்தவும்.
2. Insert மெனுவில் Field என்பதைத் தேர்ந்தெடுக்கவும்.
3.பீல்டு டயலாக் பாக்ஸ் (Field dialog box) காட்டப்படும். இதில் காட்டப்படும் Categories என்ற பட்டியலில் Date and Time என்பதனைத் தேர்ந்தெடுக்கவும். அங்கு கிடைக்கும் பீல்டுகளில் EditTime என்பதனையும் தேர்ந்தெடுக்கவும்.OK கிளிக் செய்து மூடவும். இனி நீங்கள் குறிப்பிட்ட இடத்தில் எடிட் செய்த நேரம் நிமிடங்களில் காட்டப்படும்.

Advertisements

நின்ற இதயம் மீண்டும் இயங்குமா?

பொதுவாக மாரடைப்பால் பாதிக்கப்படுபவர்களின் உடல் குளிர்ந்து விடும். அதன்பிறகு அவர்களின் இதயத்துடிப்பு அடங்கி உயிர் இழந்து விடுவார்கள். தற்போது அப்படி நின்ற இதயத்தையும் மீண்டும் இயக்க வைக்க முடியும், அதனால் ஒருவரை உயிர் பிழைக்க வைக்க முடியும் என்று நி பித்துள்ளனர்.

மாரடைப்பு ஏற்பட்டவுடன், பாதிக்கப்பட்ட நபரின் மூக்கின் வழியாக `ரினோசில்'(இது பேட்டரியால் இயங்கக் கூடியது) என்ற புதிய கருவியின் மூலம் மூளையில் சிறிய அளவில் குளிர்ச்சியை ஏற்படுத்தி நின்ற இதயத்தை மீண்டும் இயக்க வைத்தனர்.

இந்த மருத்துவ ஆராய்ச்சியை ஸ்டாக்ஹோமை சேர்ந்த மருத்துவ பேராசிரியர் மாரட்கேஸ்டிரன் மற்றும் அவரது குழுவினர் மேற்கொண்டனர். ஐரோப்பாவில் உள்ள 14 ஆஸ்பத்திரிகளில் மாரடைப்பால் பாதிக்கப்பட்டு அனுமதிப்பட்டிருந்த 200 பேரிடம் ஆராய்ச்சி நடத்தப்பட்டது. இவர்களில் 182பேர் உயிர் பிழைத்தனர். அப்படி உயிர் பிழைத்தவர்களில் 83பேர் 66 வயது முதல் 71வயது உடையவர்கள்!

கோடை விடுமுறை தொடங்கியாச்சு! சுற்றுலா பிளான்

கோடை விடுமுறை தொடங்கியாச்சு! கிட்டத்தட்ட அனைவருமே எங்கேயாவது சுற்றுலா அல்லது சொந்த ஊர் என்று வெளியூர் செல்ல திட்டமிடுவார்கள். விடுமுறை கொண்டாட்டம் என்பதில் பயணம் தான் பிரதானம். அப்படி பயணம் செய்யும் போது கவனமாக இருந்தால்… பயணம் கலக்கமின்றி கலகலப்பாக அமையும் என்பதில் சந்தேகமில்லை! அதற்காக ரொம்பவும் மெனக்கெட வேண்டிய அவசியமில்லை. முன்னெச்சரிக்கையாக திட்டமிட்டால் போதும்.   எத்தனை பேர், எங்கெங்கு போகி றீர்கள்? என்பதை எல்லோரும் சேர்ந்து முடிவெடுங்கள். அந்த இடங்களுக்கு போய், வரும் செலவு பட்ஜெட்டுக்குள் வருகிறதா? என்பது மிக முக்கியம். பயணம் செய்யும் நாட்களில் வீட்டு பெண்களுக்கு `பர்சனல்’ பிரச்சினைகள் உள்ளதா? என்பதை தெரிந்து அதற்கேற்ப சுற்றுலாவை திட்டமிடுவது நல்லது. பஸ், ரெயில், விமானம் எதில் பயணம் என்று முடிவெடுத்த பின்னர், உடனடியாக பயண ஏற்பாடுகளை தொடங்கி விடவும்.   வாகனத்தில் ஏறும்போதும், இறங்கும்போதும் உங்களோடு கொண்டு வந்த பொருட்கள் அனைத்தும் சரியாக இருக்கிறதா என்பதை ஒருவர் பொறுப்பாக கவனித்து வந்தால் பதட்டம் இருக்காது. இதனால் எந்த பொருளும் `மிஸ்’ ஆகாது. பயணத்தில் நேரம் தவறாமை மிகவும் முக்கியம். குடும்பத்துடன் செல்லும்போது உங்களுக்காக… மற்ற அனைவருமே காத்திருக்கும் சூழல் கசப்பை ஏற்படுத்தும். நெருங்கிய உறவுகளுடன் செல்லும்போது செலவுகளை பகிர்ந்து கொள்வது நல்லது.   சுற்றுலாத் தலங்களில் கூடுமான வரைக்கும் பணத்தை அதிகமாகக் கையில் வைத்திருக்காமல், டெபிட் கார்டு மற்றும் கிரெடிட் கார்டில் தேவையானதை எடுத்துக் கொள்ளலாம். திருட்டு மற்றும் தொலைந்து போவதால் ஏற்படும் சிரமத்தை தவிர்க்கலாம். பணம் தொலைந்தால், தேவையில்லாத அலைச்சலையும் பிரச்சினையைம் எதிர் கொள்ள வேண்டியிருக்கும். உடைமைகள், குழந்தைகள் மீது எப்போதும் கவனம் தேவை.   பஸ், ரெயில் நிறுத்தங்களில் கிடைக் கும் பொருட்கள் பெரும்பாலும் மிகச் சிறந்த உணவாக இருக்கும் என்று சொல்ல முடியாது. இதனால் வயிற்றுக் கோளாறு போன்ற சிக்கல் ஏற்படலாம். இதனால் சளி, காய்ச்சல் போன்ற பிரச்சினைகளும் வரலாம். அப்படி உடல் நலக் குறைவால் சுற்றுலா சந்தோஷமும் குறையக்கூடும். குழந்தை முதல் வயதானவர் வரை அனைவரும் எண்ணை பதார்த்தங்களை தவிர்த்தால் பயணம் ஜாலியாக இருக்கும்.   வீடு கட்ட, கல்யாணம் நடத்த… கல்விக்கு என வங்கிக் கடன் தருவதை அறிவீர்கள். அதேபோல் சுற்றுலாவுக்கு லோன் தருகிறார்கள் தெரிமா? இது `டிராவல் லோன்’ என்ற பெயரில் வழங்கபடுகிறது. கூடுமானவரையில் லோன்களை தவிர்க்கலாம். பணம் அவசியம் என்ற பட்சத்தில் கிரெடிட் கார்டில் லோன் எடுப்பதை விட, பர்சனல் லோன் எடுப்பது நல்லது. ஏனென்றால், பர்சனல் லோனுக்கு வட்டி குறைவு. அதேபோல் டிராவல் இன்சூரன்ஸ் எடுப்பதும் நல்லது.   சுற்றுலா மற்றும் வெளியூர் செல்லும்போது நகைகள், விலை உயர்ந்த பொருட்கள், பத்திரங்கள் போன்றவற்றை வங்கி லாக்கரில் வைத்து விட்டுச் செல்லுங்கள். பட்டுபுடவை, வெள்ளி பாத்திரங்களை நெருங்கிய உறவினர் வீட்டில் கொடுத்து விட்டு செல்லலாம். அதேபோல் நீங்கள் வெளியூர் செல்லும்போது உங்கள் ஏரியா கூர்க்காவிடம் வீட்டை அடிக்கடி நோட்டம் பார்க்கச் சொல்லுங்கள். மேலும் காவல் நிலையத்திலும் பெட்டிஷனாக எழுதிக் கொடுப்பது நல்லது.   சுற்றுலாவில் முக்கியமாக கவனிக்க வேண்டியது குடிநீர். தண்ணீர் முலம் நிறைய வியாதிகள் பரவ வாய்ப்புள்ளதால், கொதிக்க வைத்த நீரை எடுத்துச் செல்வது நல்லது. இல்லாவிட்டால் `வாட்டர் கேன்களில்’ தண்ணீரை கொண்டு செல்லலாம். பயணத்தில் வயிறு சரியில்லை என்றால் சோடா குடிக்காமல், இளம்சூட்டில் நீர் அல்லது பால் குடிப்பது நல்லது. முடிந்தவரை அசைவ உணவை தவிர்த்து சைவ உணவை அளவோடு சாபிட்டால் பயணத்தில் பிரச்சினை தலை காட்டாது.   சுற்றுலா தலங்களில் `இது சூப்பர்… அது அப்படி..’ என்று சொல்வதை நம்ப வேண்டாம். எந்த ஊருக்கு சென்றாலும் அங்கே என்ன ஸ்பெஷல்? என்பதை முன்பே அறிந்து கொள்ளவும். ஊட்டி சாக்லேட், ஏற்காடு அன்னாசி என ஒவ்வொரு ஊரிலும் கிடைக்கும் உணவு பொருட்களை அங்கேயே சாப்பிட்டால்தான் நல்ல ருசியோடு இருக்கும். நம்ம ஊரில் மலிவாக கிடைக்கும் பொருளை, பெருமைக்காக சுற்றுலா தலத்தில் அதிக விலைக்கு வாங்க வேண்டாம்.

கனவே… கலைந்துவிடு!

கனவுதான் உலகிலேயே அழகான பொய் என்கிறார்கள் உளவியல் நிபுணர்கள். சிலர் கனவை கனவென்று உணராமலேயே இருப்பார்கள். இது வெறும் கனவு தான் என்று நீங்கள் உணர்ந்தால் அதற்கு பெயர் `லூசிட் ட்ரீம்’.

`லூசிட்’ என்றால் தெளிவான என்று அர்த்தம். 1968-ம் ஆண்டில் செலியா க்ரீன் எழுதிய லூசியா ட்ரீம்ஸ் என்ற புத்தகத்தில் இது குறித்து முழுமையாக எழுதப்பட்டுள்ளது. உதாரணமாக நீங்கள் கனவு காணும்போது உங்கள் உடலில் இருந்து ஓர் ஔ கிளம்பி மேலே செல்லும்.

ஆனால் `நாம் இறக்கவில்லை’ என்று நீங்கள் உணர்ந்தால் போதும், உடனே ஔ வந்து உங்கள் உடலில் ஒட்டிக் கொள்ளும். நீங்கள் கண் விழித்து விடுவீர்கள். இப்படிப்பட்ட கனவு பெரும்பாலானவர்களுக்கு வருவதுண்டு.

கனவைப் பற்றி ஆளாளுக்கு ஒரு கருத்து உண்டு. மனதில் ஆழ்ந்து போன விஷயங்களும், சம்பவங்களுமே கனவுகளாக வருகின்றன என்பதே இதுவரை உளவியல் ஆய்வாளர்களின் கருத்து. ஆன்மிகத்திலும் கனவும், அதற்கான பலனும் கூறப்பட்டுள்ளது.

கனவுகளுக்கான பலன்கள் பழமையான சாஸ்திரங்களில் மட்டுமே உள்ளது. நள்ளிரவில் ஒரு மணிக்கு கனவு கண்டால் ஒரு வருடம் கழித்து பலன் கிடைக்கும். இரண்டு மணிக்கு கனவு கண்டால் முன்று மாதத்தில் பலன் கிடைக்கும், அதிகாலை கனவு பலிக்கும் என்று கனவு சாஸ்திரம் கூறுகிறது.

மனதில் ஆழ்ந்து போன விஷயங்களும், சம்பவங்களுமே கனவுகளாக வருகின்றன. ஆனால் அதையும் தாண்டி நாம் காணும் கனவின் பலன்களை அறிய ஆர்வப்படுகிறோம். நாம் கண்ட கனவுகள் அனைத்துமே அதற்கேற்ற பலன்களைத் தருகிறதா? என்றால் இல்லை என்பதே நிதர்சன உண்மை!

நம்முடைய ஆன்மிகத்திலும் கனவையும், அது எதிர்காலத்தை சொல்லும் என்று கூறப்படுகிறது. பொதுவாக எல்லாருக்குமே கனவு வருவதால், கனவைப் பற்றிய விஷயங்களில் அதிக ஆர்வமாக இருக்கிறோம். மருத்துவ உலகில் கனவைப் பற்றிய ஆய்வு எப்போதும், இப்போதும் நடந்து கொண்டுதான் இருக்கிறது.

கண்களை மூடுங்க; வெயிட் குறையும்!

* குண்டை குறைப்பதில் லேட்டஸ்ட்; சென்னை வரை பரவி விட்டது
கண்களை மூடுங்க; வெயிட் தானாகவே குறைந்து விடும்; கண்களை மூடினால் எப்படி உடல் எடை குறையும் என்று நீங்கள் கேட்கலாம். ஆனால், இப்படி ஒரு புது மருத்துவ தெரபி, மும்பை, டில்லி, பெங்களூரு என்று வலம் வந்து, இப்போது சென்னையிலும் கால் பதிக்க ஆரம்பித்துவிட்டது.
கண்களை மூடினால் மட்டும் வெயிட் குறைந்து விடாது; அதன் பின், மனோதத்துவ ரீதியான பயிற்சியினால் உள்ளத்தில் மாற்றம் வரும்; அதுவே உடலில் வெளிக்காட்டும்; அப்புறம் என்ன, எடை தானாகவே குறைந்து விடும். இது தான் இந்த தெரபி பற்றிய சுருக்கமான விளக்கம்.
ஹிப்னோசிஸ்
ஹிப்னோசிஸ் – மனதின் இயல்பான நிலை. விழித்திருக்கும் போது ஒரு மாதிரியாகவும், தூங்கும் போது வேறு மாதிரியாகவும் இருக்கும் மனது, ஆழ்நிலையில் அதன் இயல்பில் இருக்கும். நம்மை அறியாமலேயே ஆயிரக்கணக்கான முறை, ஆழ்நிலையில் ஆழ்ந்திருக்கிறோம். ஆனால், அந்த நிலையை சாதாரணமாக உணர முடியாது. மெய்மறந்த நிலைக்கும், ஹிப்னோவுக்கும் ஏகப்பட்ட வித்தியாசம் உண்டு.
காதலிப்பவர்களுக்கும், மிகவும் அழுத்தமான கருத்துக்களை, சம்பவங்களை கொண்ட புத்தகத்தை படிப்போருக்கும், அதுபோன்ற திரைப்படங்களை பார்ப்போருக்கும் மெய் மறந்த நிலை வரும். சில வினாடிகளில் தன்னிலைக்கு வந்து விடுவர். ஹிப்போனில், அடிமனதில் உள்ள இயல்பான குணம் வெளிப்படும். அப்போது தான் ஆழ்மனதில் உள்ளவற்றை மனது கொட்டும்; கண் விழித்ததும் சம்பந்தப்பட்டவரால், மனோதத்துவ நிபுணரால் சொல்லாமல், அதை அறியவே முடியாது.
கண்கட்டி வித்தையா
மேடைகளில் மேஜிக் நிபுணரால் செய் யப்படும் கண்கட்டி வித்தையும் அல்ல இது; குழப்பிக் கொள்ள வேண்டாம். கண்கட்டி வித்தையும் ஒரு சில நொடிகள் கண்கள் மறைக்கப்படுகின்றன. அப்போது மேஜிக் நிபுணர் நிகழ்த்தும் நிகழ்வுகளை பார்த்து ஆச்சரியப்படுகிறோம். மருத்துவ ரீதியாக செய்யப்படும் இந்த ஹிப்னோ தெரபியில், மனிதனின் இயல்பான மனம் விசுவரூபம் எடுக்கிறது; அதன் விளைவுகளால், உடலில் பல கோளாறுகள் குணமாகின்றன.
வெயிட் போயே போச்சு
மனோ வியாதிகளுக்கு மட்டும் பயன்பட்டு வந்த ஹிப்னோ தெரபி முறை, இப்போது பல பரிமாணங் களை பெற்று வளர்ந்து விட்டது. உடலில் வெயிட் போடுவதை தடுக்கவும் இது பயன்படுத் தப்பட்டு வருகிறது. வெளிநாடுகளில் இருந்து தான் இதுவும் இறக்குமதி; பல சாதனங்களை வைத்து, ஒலி, ஒளி காட்சிகளை வைத்து தெரபி தரப்படுகிறது. மனதை ஒரு நிலைப்படுத்தி, ஆழ்நிலையில் போய் ஆராய்ந்து, கெட்ட குணங்களை நீக்குவதே இதன் நோக்கம்; அந்த கெட்ட குணங்கள் போய் விட்டாலே, உடலில் மாற்றம் வந்து விடுகிறது.
வெறும் 10 சதவீதம் தான்
மூளையில் உள்ள செல்களில் இருந்து கட்டளை கிடைத்தால் தான் எதுவும் செய்ய முடியும். கை, கால் நீட்டுவது, பார்ப்பது, எண்ணுவது போன்ற இயக்கங்கள் எல்லாம் மூளையின் செல்களின் கட்டளைகள் தான் காரணம். அந்த செல் களில் 10 சதவீதம் தான் நாம் எண்ணுவது, திட்டமிடுவது, நினைவாற்றல் பெறுவதற்கு பயன்படுத்துகிறோம். 90 சதவீத செல் கள், அடிமனது விஷயங் களுக்கு பயன் படுகிறது. இதனால், இவற்றை பயன் படுத்தி, உடல் கோளாறுகளை குறைக்கவோ, நீக்கவோ முடியும் என்று நிபுணர்கள் கூறுகின்றனர்.
எவ்வளவு நாளாகும்
மனோதத்துவ முறையில் அளிக்கப்படும் இந்த ஹிப்னோ தெரபி, நான்கு முதல் ஆறு வாரம் வரை செய்வது நல்லது. நிபுணர் பரிந்துரை படி, ஒவ்வொரு பயிற்சி வகுப்பும் 10 நிமிடம் முதல் 2 மணி நேரம் வரை நீட்டிக்க, கோளாறின் தீவிரத்தை பொறுத்து வாய்ப்புள்ளது.
இந்த ஹிப்னோ தெரபியை முடித்துவிட்டால், மனம் லேசாகும்; பழைய குணங்கள் நீங்கி விடும். அதற்கு நோயாளி தான் ஒத்துழைக்க வேண்டும். அவர் முதலில் இந்த தெரபி மீது நம்பிக்கை வைக்க வேண்டும்.
இந்த தெரபி முடித்து விட்டால், புது மனிதனாகி விடுகிறார்; அப்புறம் பழைய பாதிப்புகள் எதுவும் வராது. டாக்டர் பரிந்துரை படி, அன்றாட வாழ்க்கையை நடத்தி வந்தால், எந்த கெட்ட குணங்களும் நெருங்கவே செய்யாது.
அரைகுறை வேண்டாம்
இப்படி ஒரு புது தெரபி இருக்கிறது என்று தெரிந்தவுடன், பணத்தை கொட்டி யாரிடமாவது ஏமாந்து விடுவது வழக்கமாகி விட்டது. தேவைப்படுவோருக்கு தான் இந்த ஹிப்னோ தெரபி அளிக்கப்படும். அதை நிபுணர்கள் தான் முடிவு செய்வர்; வெயிட் குறைய வேண்டும் என்று நீங்களாக முடிவு செய்து, யாரிடமாவது சிக்கி பணத்தை தொலைக்காதீர்கள்.

எதுக்கெல்லாம் கைகொடுக்கும்
பல ஆண்டாகவே மனோதத்துவ முறையை மருத்துவர்கள் கையாண்டுள்ளனர். ஆனால், மருத்துவ ரீதியாக நோயாளிகளுக்கு இந்த தெரபியை பயன்படுத்தலாம் என்று அமெரிக்க சுகாதார அமைப்பு அங்கீகரித்தது 1958ல் தான். அது முதல், பல் கோளாறு முதல் மனோதத்துவ கோளாறு வரை நோய்களுக்கு இந்த சிகிச்சை செய்யப்படுகிறது.
போபியா, பதட்டம்
கரப்பான் பூச்சியை பார்த்தால் பயம்; இரவில் நாய் குரைத்தால் பயம்; காலை 8.30 மணிக்கு சாப்பாடு தயாராகா விட்டால் டென்ஷன்; அதனால் கோபம். வீண் பிரச்னைகள். இப்படி தான் சிலர்; அடிக்கடி பயப்படுவர்; சாதா விஷயமானாலும் பதட்டப்படுவர். இவர்களை என்ன சொன்னாலும், மாறவே மாட்டார்கள்; இவர்களுக்கு, மனோதத்துவ நிபுணர்கள் ஹிப்னோ தெரபி சிகிச்சை தந்து தான் குணப்படுத்த முடியும்.
உணர்ச்சிப்பூர்வமா
சிலர் எதற்கெடுத்தாலும் உணர்ச்சிவயப்படுவர். சாதாரண தலைவலியை வர்ணித்தால்,’தலையில ஆயிரம் பூச்சி நெளிவதை போல இருக்குதப்பா’ என்பர்; நமக்கே அப்படி ஒரு கற்பனை வந்து விடும். இப்படிப்பட்ட ஆசாமிகளுக்கு ஹிப்னோ தான் கைகொடுக்கும். இவர்களை உடனே மாற்ற வேண்டும்; இல்லாவிட்டால், இந்த மன நோய் முற்றி விடும்.
போதைக்கு அடிமை
எதையாவது வாயில் போட்டு அடக்கிக்கொண்டே இருக்க வேண்டும்; பான் பராக்கில் ஆரம்பித்து போதை மருந்து வரை போய் விடுவோரும் உண்டு. இவர்களால் இந்த வஸ்துக்கள் இல்லாமல் நாள் நகராது; மண்டை காய்ந்துவிடும். இவர்கள் நிச்சயம் ஹிப்னோ தெரபி செய்து கொள்ள வேண்டும். இல்லாவிட்டால், நிலைமை மோசமாகி விடும்.
சிகரெட், மது
சிகரெட், மதுவுக்கு அடிமையாவது என்பது பலருக்கும் நேர்வது தான். கட்டுப்பாட்டில் வைத்திருப்பவர்களுக்கு இந்த தொல்லை இருக்காது; ஆனால், எந்த பிராண்டாக இருந்தாலும், கடைசியில் காசில்லாவிட்டால், ‘கட்டிங்’ வரை போகும் சிலரும் உண்டு. அதுபோல, காசிருந்தால் சூப்பர் சிகரெட் ; இல்லாவிட்டால், பீடி வரை கூட போய் விடுவோர் இருக்கின்றனர். சரியாக சாப்பிடவும் மாட்டார்கள்; இவர்கள் ஐம்பதை தாண்டும் போது பெரும் தொல்லை தான். ஹிப்னோ தெரபி இவர்களுக்கும் பலன் தரும்.
சைகோ சொமேட்டிக்
சைகோ என்பது மனம் சம்பந்தப்பட்டது; சொமேட்டிக் என்பது உடல் தொடர்பானது. இரண்டும் சேரும் போது, கோளாறு என்று வந்தால் மனதை சரி செய்தால் போதும்; உடல் கோளாறு குறைந்து விடும். இந்த வகை பிரச்னைகளுக்கும் ஹிப்னோ சிகிச்சை தான்.
மூட நம்பிக்கை
சிலர் மூட நம்பிக்கைகளின் உச்சிக்கே சென்று விடுவர்; அவர்களுக்கு நிலைமை மோசமாகி விட்டால், ஏமாற்றங்கள் அதிகரிக்கும். அவர் களை ஏமாற்றுவோரும் அதிகமாக இருப்பர். இவர்களுக்கு சிறந்த சிகிச்சை ஹிப்னோ தெரபி தான்.
எடை குறைய
கொழுப்பு சார்ந்த, சாட் உணவுகளை கண்டபடி சாப்பிடுவது, வாழ்க் கை முறையில் மாற்றம் போன்றவை தான் சிலர் குண்டாக காரணம். இவர்கள் எடையை குறைக்க வாக் கிங், யோகா போன்றவை செய்தால் நல்லது.
வாழ்க்கை முறை, உணவு முறையை மாற்றிக்கொள்ள ஹிப் னோ சிகிச்சை உதவுகிறது. எட்டு வார பயிற்சியை செய்தால், புது மனிதராகி விடுவர். அப்புறம் குணம் மாறி, எடை தானாக குறைந்து விடும்.
புலம்பல் வியாதி
சிலர் முயற்சியே செய்யாமல், பழையதை பேசிப் பேசி, புலம்பியபடி இருப்பர். உலகமே இருண்டு விட்டது போல ‘பீல்’ பண்ணுவர். யாரை பார்த்தாலும் இவர்களின் புலம்பல் தான் பெரிதாக இருக்கும்.இப்படிப்பட்டவர்கள் கண்டிப்பாக ஹிப்னோ தெரபி மேற்கொள்ளலாம். சில மாதங்களில் மாறி விட முடியும்.
மன அழுத்தம்
மன அழுத்தத்துக்கும் இந்த தெரபி பயன்படுகிறது. மனம் ஒருமைப்பட்டு, பலப்படும். அப்போது, அழுத்தத்துக்கு இடமே இருக்காது.
இதுபோல, விரும்பத்தகாத பழக்க – வழக்கங்கள் இருந்தால், அதை இந்த தெரபி மூலம் தீர்த்துக்கொள்ளலாம்.
சுயபுராணம்
சிலர் சுயபுராணம் ‘பாடுவதில்’ தான் காலத்தை கழிப்பர். இவர்களை பார்த்தால், நண்பர்கள் ஓட்டம் பிடிப்பர். இப்படி சுயபுராணம் பாடுவதும் ஒரு வகையில் வியாதி; அதுபோல, பக்தி என்ற பெயரில் அன்றாட வாழ்க்கையை மறுக்கும் பழக்கமும் மோசமானது. இவர் களுக்கு இந்த தெரபியில் பலன் உண்டு.

பெண்களை பயமுறுத்தும் 5 ‘டாப்’ நோய்கள்!

வேலைக்கு போகும் பெண்ணாக இருந்தாலும், வீட்டில் இருக்கும் பெண்ணாக இருந்தாலும், ஒரு வீட்டில் கணவனை விட, அதிகம் வேலை செய்வது பெண்கள் தான்.
அதுபோல, ஆண்களை விட, அதிக நோய்களுக்கு ஆட்படுவதும் பெண்கள்தான். இதனால், ஆண்களை விட, பெண்கள் மிகவும் விழிப்புணர்வுடன், முன்னெச்சரிக்கையுடன் இருக்க வேண்டியது முக்கியம்.
பெண்களைத் தாக்கும் நோய்களில், முக்கியமாக ஐந்து நோய்கள் தான் பெரும்பாலோரை பயமுறுத்துகின்றன. அவை:
1. இதய நோய்.
2. மார்பக புற்றுநோய்.
3. ஆஸ்டோபோரோசிஸ் என்ற எலும்புகள் அப்பளமாக நொறுங்கும் நோய்.
4. டிப்ரஷன் என்ற சோர்வு நிலை.
5. ஆட்டோ இம்யூன் நோய்கள் என்ற நூற்றுக்கும் மேற்பட்ட துணை நோய்கள்.

1. இதய நோய்!
மாரடைப்புக்கு இலக்காவதில் ஆண்கள் தான் அதிகம் என்கிற தோற்றம் சமூகத்தில் உள்ளது. உண்மை யில், ஆண்களை விட, மாரடைப்பு, இதய நோய்க்கு ஆளாவதிலும், இறப் பதிலும் பெண்கள் தான் அதிகம். பெண்களில் இறப்பதற்கு காரணமாக இருக்கும் நோய்களில், 29 சதவீதத்தை இதய நோய்கள் ஆக்ரமிக்கின்றன.
இதற்கு காரணம், ஆண்களை போல பெண்களின் வாழ்க்கை முறையிலும் பெரும் மாற்றங்கள் ஏற்பட்டுள்ளது தான். ஆண்களை போலவே, சிகரட் பிடிப்பது மட்டுமின்றி, பான் பராக் போன்ற புகையிலை பொருட்கள் பயன்படுத்தும் பெண்கள் எண்ணிக்கை அதிகமாகி வருகிறது.
பெண்களுக்கு சுரப்பிகளின் செயல்பாடுகள் மிக முக்கியம். இப்படிப்பட்ட பழக்க வழக்க மாற்றங்களால், பெண்களின் சுரப்பிகளின் செயல் பாடும் மாறுகிறது. இதய நோய் வர இவையெல்லாம் முக்கிய காரணங்கள்.

2. மார்பக புற்றுநோய்!
பெண்களுக்கு பொதுவாக வரும் நோய்களில் முக்கியமான இரண்டாவது நோய் மார்பக புற்று நோய்; பெண்களை அதிகம் பலி வாங்கும் புற்றுநோய்களின் பட்டியலில் இது இரண்டாவதாக உள்ளது. இறுதி மாதவிடாய்க்கு பின், பெண்கள் பலரும் குண்டாகி விடுகின்றனர்; அவர்களின் சுரப்பிகள் செயல்பாடு அதிகரிப்பதாலும், போது மான உடற்பயிற்சி இல்லாமல் இருப்பதாலும் மார்பக புற்றுநோய் வருகிறது.
இதெல்லாம், பத்தாண்டுக்கு முன் இருந்த பெண்களின் நிலையை வைத்து நிர்ணயிக் கப்பட்டது. இப்போது, பெண்கள் சிலர் சிகரட், மதுவால் ஈர்க்கப்பட்டு, உணவு, வாழ்க்கை முறையை மாற்றிக்கொண்டு வருகின்றனர். இவர்களுக்கு மார்பக புற்றுநோய் வரும் வாய்ப்பு அதிகம். எனவே, முப்பது வயதிற்கு பின், ‘மெமோகிராம்’ பரிசோதனை செய்து, மார்பக புற்றுநோய் இருக்கிறதா என்று அறிந்து கொள்வது நல்லது. அதன் பின், ஆண்டுக்கு ஒரு முறை பரிசோதனை செய்வது நல்லது. முப்பது வயதை நெருங்கும் போதே, மார்பகத்தை அழுத்திப் பார்த்தால் வலி தெரியும். அப்படி வலி இருந்தால் அதுவே முதல் அறிகுறி; டாக்டரிடம் செல்ல வேண்டிய எச்சரிக்கை.

3. ஆஸ்டோபோரோசிஸ்!
பெண்களில் 68 சதவீதம் பேரை பாதிக்கும் எலும்பு பாதிப்பு நோய் இது; எலும்புகள் பலவீனம் அடைவதால், இவர்கள் தடுக்கி விழுந்தால் கூட, எலும்பு முறிவு சுலபமாக ஏற்படும்.
பெண்களுக்கு முப்பது வயது வரை தான் எலும்புகள் வளரும். அதன் பின், சாப்பிடும் உணவு வகைகளால் தான் எலும்புகள் திடத்தன்மையை காக்க முடியும்.
பெண்களின் வேலை, மனஅழுத்தம், சோர்வு உட்பட பல காரணங்களால் எலும்பு தேய்மானம் அதிகம் ஏற்பட வாய்ப்புள்ளதால், குழந்தை பருவத்தில் இருந்தே எலும்பு பாதுகாப்புக்கு பெண்கள் தனி கவனம் செலுத்த வேண்டியுள்ளது.
வைட்டமின் ‘டி’ சத்துள்ள உணவுகளை சாப்பிடுவது நல்லது. 65 வயதான பின், தடுக்கினாலும், எலும்பு முறிவு அடிக்கடி ஏற்படும்.

4. டிப்ரஷன்!
பல்வேறு, சூழ்நிலை காரணமாக, ஆணை விட, பெண்ணுக்கு தான் அதிக அளவில் சோர்வு, மன அழுத்தம் வருகிறது. ‘எட்டில் ஒரு பெண் வீதம் மன அழுத்தம், சோர்வு இருக்கிறது’ என்று, தேசிய மன சுகாதார ஆராய்ச்சி மையம் கூறுகிறது.
எதற்கெடுத்தாலும் பதட்டம், கவலை, படபடப்பு போன்றவை தான் இதற்கு அறிகுறிகள். அதை தடுத்துக்கொள்ள வேண்டியது பெண்ணிடம் தான் உள்ளது. டிப்ரஷனை வர விடாமல், மனதை சீராக வைத்துக் கொண்டால், இதய நோய் உட்பட மன அழுத்த நோய்களை வர விடாமல் தவிர்க்கலாம்.
5. ஆட்டோ இம்யூன் நோய்கள்!
உடலில் எதிர்ப்பு சக்திகள் குறைந்துவிட்டால், உடல் உறுப்புகளின் செயல்பாடுகள் குறையும்; சுரப்பிகள் செயல்படுவதிலும் மாற்றம் ஏற்படும். பலவீனம் ஏற்படும்; உடலில் பலவீனம் வந்துவிட்டாலே போதும், தொற்று நோய்கள் உட்பட பல நோய்கள் பெண்களை பாதிக்க வைக்ககாத் திருக்கின்றன. இப் படிப்பட்ட நோய்கள் நூற்றுக்கும் மேற்பட்டவை உள்ளன; இவற்றில், ஆண்களை விட, பெண்களை தான் அதிகம் பாதிக்கின்றன என்கிறது உலக சுகாதார மையம்.

கால்களில் மனசு தெரியும்

நமது உடல் பாகங்களில் நமது முகத்திற்கு அடுத்தபடியாக இருபது கைகள். இவை என்ன செய்து கொண்டிருக்கிறது என்று நாம் உணர்கிறோம். ஆனால், கால்கள் என்ன செய்கிறது என்பதை நாம் உணர மறந்து விடுகிறோம். நம் உடலின் பாகம் முளையை விட்டு எவ்வளவு தள்ளி இருக்கிறதோ, அந்த அளவிற்கு நாம் அவற்றின் செயல்களை பற்றி அறியாமல் இருந்து விடுகிறோம்.

சிலர் `அகத்தின் அழகு முகத்தில் தெரியும்’ என்பார்கள். அதற்காக சோகமான நேரங்களில் கூட, வேண்டா வெறுப்புடன் மகிழ்ச்சியாக இருப்பதை போல முகத்தை மாற்றி வைப்பார்கள். ஆனால், அப்படிபட்ட நேரங்களில் அவர்களின் கால்கள் அதைக் காட்டிக் கொடுத்துவிடும். கால்கள் தொடர்ந்து தாளமிட்டுக் கொண்டு அந்த இடத்திலிருந்து ஓடுவதற்கு தயாராக உள்ள மனோபாவத்தைக் காட்டிக் கொடுத்துவிடும். முகத்தை மட்டும் நடிக்க பழக்கியவர்கள், கால்கள் என்ன செய்கிறது என்பதை கவனிப்பதில்லை.
நடக்கும் விதம்

இளமையாக ஆரோக்கியமாக நடப்பவர்கள் வேகமாக நடக்கிறார்கள். இதனால் அவர்களது கைகள் முன்னும், பின்னும் அசைகின்றன. தாங்கள் இளமையானவர்கள், துடிப்பானவர்கள் என்பதைக் காட்டவே இப்படி நடக்கிறார்கள். ராணுவ வீரர்கள், அரசியல்வாதிகள், தலைவர்கள் தங்களது செயல்திறனின் வேகத்தைக் காட்ட இவ்வாறு நடக்கிறார்கள்.
கால்கள் சொல்லும் உண்மைகள்

பால் எல்க்மேன் என்ற உளவியல் அறிஞர் ஒருவர் பொய் பேசும்போது ஒருவரது கால்கள் எவ்வாறு காட்டிக் கொடுக்கின்றன என்பது பற்றி ஆராய்ச்சி செய்தார். இதற்காக சில நிர்வாகிகளை அழைத்து அவர்களை பொய் பேச வைத்தார். அவர்கள் பொய் சொல்லும்போது, பாதங்களை உணர்வின்றி வேகமாக அசைத்தனர். இன்னும் பலர் முகபாவங்களை பொய்யாக மாற்றி, கை அசைவுகளையும் கட்டுபடுத்தி நடித்தனர். ஆனால், அவர்கள் அனைவருமே தங்கள் பாதங்கள் என்ன செய்கின்றன என்பதை அறியாமல் இருந்தனர். பொய் பேசுபவர்களின் முழுஉடலையும் பார்த்தோமானால், அவர் பொய் சொல்வதைக் கண்டுபிடித்து விடலாம்.
கால்களை ஒன்று சேர்த்தல்

ஒரு இடத்தில் தங்கலாமா அல்லது வேண்டாமா என்று எந்த நோக்கத்தையும் வெளிப்படுத்தாமல் நடுநிலையான மனநிலையை வெளிபடுத்தும் இந்த நிலையில், சம்பந்தபட்டவருக்கு எந்த நோக்கமும் இல்லை என்பதை தெரியபடுத்துகிறது. ஆண்-பெண் சந்திப்புகளில் ஆண்களை விட பெண்கள் அதிகமாக இந்த நிலையில் நிற்பார்கள். மேலதிகாரிகள் முன்னால் இளம் அதிகாரிகளும், ஆசிரியர்கள் முன்னால் மாணவர்களும் இவ்வாறு நிற்பார்கள்.
கால்களை விரித்து நிற்பது

சிலர் ஆங்கில எழுத்தான `வி’ வடிவில் கால்களை விரித்து நிற்பார்கள். இவர்கள் தரையில் கால்களை வலுவாக ஊன்றி தாங்கள் எண்ணத்திலிருந்து எப்போதும் விலகிச் செல்வதில்லை என்பதை வெளிபடுத்துவர். ஆண்மையை வெளிபடுத்திக் காட்டுவதால், விளையாட்டு வீரர்களும், திரைபடத்தில் கதாநாயகர்களும் இதுபோன்ற நிலைகளில் நிற்பதைக் காணலாம்.
பாதத்தை முன் வைப்பது

ஒருவர் உடனடியாக என்ன செய்யபோகிறார் என்பதை இது வெளிபடுத்துகிறது. நாம் எந்தத் திசையில் செல்ல போகிறோம் என்பதை முன்னிருக்கும் காலின் திசை தான் காட்டுகிறது. இது நம் மனம் எந்த பக்கம் செல்ல விரும்புகிறது என்பதைக் காட்டுகிறது

லட்சுமி வாசம் செய்ய…

புதுமனை கட்டியாகிவிட்டது. காம்பவுண்டு சுவர் எடுத்து வாசல் பக்கத்து சுவற்றில் சலவைக் கல்லில், ‘லட்சுமி நிவாஸ்’ என்று எழுதி பதிக்கப்பட்டு விட்டது. அதாவது, அந்த வீட்டில் மகாலட்சுமி வாசம் செய்கிறாள் என்று அதற்கு அர்த்தமாம். மகாலட்சுமி நான் வசிக்கும் இடங்களையும், வசிக்காத இடங்களையும் பற்றி ருக்மணியிடம் விபரமாக சொன்னதாக உள்ளது. அந்த விபரத்தை நாமும் தெரிந்து கொள்வோமா?
லட்சுமி தேவி கூறுகிறாள்: அழகும், தைரியமும், வேலைத் திறமையுள்ளவனும், வேலை செய்து கொண்டிருப்பவனும், கோபமில்லாதவனும், தெய்வ பக்தியுள்ளவனும், நன்றி மறவாதவனும், புலன்களை அடக்கியவனும் போன்ற சத்வ குணமுள்ளவர்களிடம் நான் எப்போதும் வசிக்கிறேன்.
மனதில் பயனைக் கருதாமல் தர்மத்தை அனுஷ்டிப்பவனிடமும் தர்மம் தெரிந்து, அதன்படி நடப்பவர்களிடமும், காலத்தை வீணாக்காதவர்களிடமும், தியானம் செய்வதையும், தத்துவ ஞானத்தை விரும்புபவர்களிடமும், பசுக்கள், வயோதிகர்களிடம், அன்பும், ஆதரவுமாக உள்ளவர்களிடமும் நான் வசிக்கிறேன்.
பக்தியுள்ளவர்கள் வீடுகளிலும், வீட்டையும், வீட்டிலுள்ள பாத்திரங்களையும் சுத்தமாக வைத்து, தானியங்களை சிதறாமல் வைத்துக் கொள்ளும் வீடுகளில் நான் வசிக்கிறேன்.
அடக்கமும், பொறுமையும், கடமை உணர்வும், பெரியோருக்கு பணிவிடை செய்தும், தர்மத்தின் சிரத்தையும் உள்ள பெண்களிடம் நான் வசிக்கிறேன். பண்டங்களைக் காப்பாற்றாமல் வீணடிப்பவர்களும், கோபமுள்ளவர்களும், தேவதைகள், பெரியோர் இவர்களை பூஜிக்காமலும், மரியாதை செய்யாமலும் உள்ள பெண்களிடம் நான் வசிப்பதில்லை. கணவனுக்கு எதிராகவோ, விரோதமாகவோ இருக்கும் பெண்களிடம் நான் வசிப்பதில்லை.
சதா அழுகையும், துக்கமும், தூக்கமும் உள்ள பெண்களிடமும் நான் வசிப்பதில்லை. எப்போதும் படுத்திருப்பவளும், வாசற்படியில் தலை வைத்து தூங்குகிற வீடுகளிலும், நடக்கும்போது தொம், தொம்மென்று அவல் இடிக்கிற மாதிரி ஓசை வரும்படி பெண்கள் நடக்கும் வீடுகளிலும் நான் வசிப்பதில்லை.
வாகனங்களிடத்தும், ஆபரணங்களிடத்தும், மேகங்களிடத்தும், தாமரை, அதன் கொடிகளிடத்தும், அரசர்களின் சிம்மாசனத்திலும், அன்னங்களும் அன்றில் கூடுதலினுள்ள தடாகங்களிலும், சித்தர்கள், சாதுக்களால் அடையப்பட்ட ஜலம் நிரம்பிய, சிம்மம், யானைகளால் கலக்கப்பட்ட நதிகளில் நான் வசிக்கிறேன்.
யானை, சிறந்த ரிஷபம், அரசன், சாதுக்கள் இவர்களிடம் வசிக்கிறேன்.
தினமும் காலத்தில் அக்னிஹோத்ரம் செய்யப்பட்டு, தேவதா பூஜை, அதிதி பூஜை வேதாத்யானம் செய்யப்படும் வீடுகளில் நான் வசிக்கிறேன். நீதி தவறாத சத்ரியர், விவசாயத்தில் கருத்துள்ளவர்கள் ஆகியோரிடமும் வசிக்கிறேன். ஸ்ரீமத் நாராயணனிடத்தில் முழு அன்பு செலுத்துபவர்களுடன் நான் வசிக்கிறேன்.
என்னிடத்தில், எவர் பக்தியுடன் இருக்கிறாரோ, அவர் புண்ணியம், பொருள், இன்பம் எல்லாவற்றையும் பெறுகிறார் என்று சொல்லி முடித்தாள்.
இதையெல்லாம் கவனமாக படித்துப் பார்த்து, லட்சுமி தேவியின் அருள் பெறவும், நம் வீடுகளில் அவள் வாசம் செய்யவும் முயற்சிக்கலாமே! வெறும் போர்டு போட்டு விட்டால், அவள் வந்து விடுவாளா?