Advertisements

Daily Archives: ஜூன் 8th, 2010

ஸோன் அலார்ம் பயர்வால்

இணைய இணைப்பில் இருக்கையில், நம் கம்ப்யூட்டருக்குள் அடுத்தவர்கள் ஊடுறுவி, பெர்சனல் தகவல்களைத் திருடுவது கம்ப்யூட்டர் உலகில், மிக சகஜமாகிப் போன ஒரு விஷயமாக மாறிவிட்டது. இதனைத் தடுக்கும் வகையில் செயல்படுவது நாம் இன்ஸ்டால் செய்திடும் பயர்வால் தொகுப்புதான். கட்டணம் செலுத்தி அமைத்திடும் பயர்வால் புரோகிராம்கள் பல இருக்கின்றன. ஆனால் பலரும் தொடர்ந்து பல காலமாகப் பயன்படுத்துவது இலவசமாக இணையத்தில் கிடைக்கும் ஸோன் அலார்ம் பயர்வால் (Zone Alarm Firewall) ஆகும். அண்மையில் இது பல புது வசதிகளுடன் மேம்படுத்தப்பட்டுள்ளது.
இதுவரை பயர்வால் எதனையும் பயன்படுத்தாதவர்களுக்கு ஒரு பயர்வால் நம் கம்ப்யூட்டரில் மேற்கொள்ளும் பாதுகாப்பு பணிகள் என்னவென்று பார்ப்போம்.
ஒரு பயர்வால், நம் கம்ப்யூட்டருக்குள் இணையத் தொடர்பின் வழியாக நுழைபவர்களைத்(Intruders) தடுக்கும். கம்ப்யூட்டர்களைக் கைப்பற்ற வருபவர்களுக்கு (Hackers) உங்களை மறைக்கும். நாம் பயன்படுத்தும் ஆண்ட்டி வைரஸ் மற்றும் விண்டோஸ் செக்யூரிட்டி எசன்சியல்ஸ் கட்டுப்படுத்த இயலாத வைரஸ் புரோகிராம்களைத் தடுக்கும். ஆண்ட்டி வைரஸ் புரோகிராம்கள் புதியதாக வரும் வைரஸ்புரோகிராம்களில் 3ல் ஒன்றைத் தப்பவிடுகின்றன என்பது அனைவரும் ஒத்துக் கொள்ளும் ஒரு முடிவாகும். எனவே தான் நமக்குக் கூடுதல் பாதுகாப்பு தேவையாய் உள்ளது. வஞ்சகமாக ஏமாற்றும் (Spoofers) புரோகிராம்களைத் தடுக்கும். நெட்வொர்க் வழியே சமர்த்தாய், நல்ல புரோகிராம் போல மாற்று தோற்றத்தில் வரும் புரோகிராம்களை நிறுத்தும். ஆண்ட்டி வைரஸ் புரோகிராம்களுடன் இணைந்து செயல்படும். தானாகவே இயங்கிக் கம்ப்யூட்டரைப் பாதுகாக்கும் அனைத்து பணிகளையும் மேற்கொள்ளும். பெரிய அளவில் செட்டிங்ஸ் தேவையில்லை. நம் இணைய தேடலுக்கு பாதுகாப்பு அரணாக அமையும்.
ஸோன் அலார்ம் பயர்வால் தொகுப்பின் பதிப்பு 9.2 அண்மையில் வெளிவந்துள்ளது. பழைய பதிப்புகள் இயங்குகையில் அடிக்கடி நமக்கு எச்சரிக்கை தரும் பாப் அப் விண்டோக்கள் இதில் குறைக்கப்பட்டு, ஸோன் அலார்ம் அமைதியாக இயங்கும் வகையில் மாற்றப்பட்டுள்ளது. கெடுதல் புரோகிராம் இயங்கும் தன்மையை அறியும் வகை மேம்படுத்தப்பட்டுள்ளது. தானாகவே வை–பி இணைப்புக்கான பாதுகாப்பு தரப்படுகிறது. பிஷ்ஷிங் புரோகிராம்களுக்கு எதிரான பாதுகாப்பு பலப்படுத்தப்பட்டுள்ளது. ஸோன் அலார்ம் டூல்பார் முற்றிலும் மாற்றப்பட்டு அமைக்கப்பட்டுள்ளது. ஆன்லைனில் இது குறித்த தகவல்களை ஸ்டோர் செய்வதற்கு 2 ஜிபி இடம் தரப்படுகிறது.
இந்த புதிய பதிப்பினை ஐந்து நிமிடங்களில் இன்ஸ்டால் செய்துவிடலாம். இன்ஸ்டால் செய்தவுடன், இது செயல்படத் தொடங்க, கம்ப்யூட்டரை ரீபூட் செய்திட வேண்டும்.
இந்த புதிய பதிப்பில், கம்ப்யூட்டரிலிருந்து வெளிச் செல்வதனைத் தடுக்கும் வெளித்தடுப்பு (Outbound Firewall)  பலமாக்கப்பட்டுள்ளது. உள்தடுப்பு சுவர் (Inbound Firewall) வெளியிலிருந்து வரும் வேண்டாத புரோகிராம்களைத் தடுக்கும். வெளித்தடுப்பு சுவர், கம்ப்யூட்டரிலிருந்து வெளியே நெட்வொர்க்கிற்குச் செல்லும் வேண்டாத புரோகிராம்களைத் தடுக்கும். இதன் மூலம் நம் கம்ப்யூட்டரிலிருந்து செல்லும் வைரஸ் மற்றும் மால்வேர் புரோகிராம்கள் தடுக்கப்படுகின்றன. இதனால், நம் தடுப்பு சுவர் மற்றும் ஆண்ட்டி வைரஸ் புரோகிராம்களையும் ஏமாற்றிவிட்டு வரும் பாட்நெட் போன்ற வைரஸ்கள் நம் கம்ப்யூட்டரிலிருந்து மற்றவற்றிற்குச் செல்வது தடுக்கப்படுகிறது.
புதிய பதிப்பில் DefenseNet என்ற பாதுகாப்பு கவசம் மேம்படுத்தப் பட்டுள்ளது. யாரிடமிருந்து வருகிறது என்பதனை மறைத்து, வழக்கத்திற்கு மாறாகச் செயல்படும் புரோகிராம்களின் தன்மையை இந்த பாதுகாப்பு டூல் அறிந்து தடுக்கிறது.
இந்த பதிப்பில் site check option என்ற ஒரு பட்டன் தரப்படுகிறது. இதன் மூலம் நாம் வழக்கமாகச் செல்லும் தளங்களைக் குறித்து வைத்து அவற்றை அனுமதிக்கலாம். ஓர் இணையதளம் பதிவான நாள், பழக்கப்படுத்தப்பட்ட நாள் இவற்றை எல்லாம் சோதனை செய்து, பின் அவற்றை நம் செட்டிங்ஸ் அடிப்படையில், சோதனை இன்றி, வழக்கமாக அனுமதிக்கிறது. இந்த டூல்பாரில் இணைந்து அமைக்கப்பட்டுள்ள இமெயில் செக்கர், ஹாட்மெயில், ஜிமெயில், யாஹூ மற்றும் பிற பி.ஓ.பி.3 மெயில் அக்கவுண்ட்களுடன் இணைந்து செயலாற்றுகிறது. ஆனால் ஐமேப் மெயில்களை சப்போர்ட் செய்திடவில்லை. இது ஏன் விலக்கப்பட்டுள்ளது என்று தெரியவில்லை.
ஐ ட்ரைவ் (IDrive) மூலம் இலவசமாக தகவல்களைப் பதிந்து வைக்க 2 ஜிபி இடம் ஆன்லைனில் தரப்படுவது இந்த பதிப்பு தரும் நல்ல அம்சமாகும்.
இதுவரை ஸோன் அலார்ம் பயர்வால் பயன்படுத்தா தவர்களும், பயன்படுத்தி வருபவர்களும், இந்த புதிய பதிப்பினை டவுண்லோட் செய்து பயன்படுத்தத் தொடங்கலாம். புதியவர்களுக்கு, முதலில் சற்று சிரமமாக இருக்கலாம். பின் போகப்போகச் சரியாகிவிடும். நமக்கு நம் பாதுகாப்புதானே முக்கியம்.


Advertisements

ஆனந்தம் தரும் அரோமாதெரபி

வாட்டி வதைக்கும் இந்த வெயிலில் வெளியில் சென்று வந்தாலே முகம் கறுத்துவிடும். உடலில் வெளியேறும் வியர்வைகளால் துர்நாற்றம். கண்ட முகப்பூச்சுகளை பூசி முகத்தை கெடுத்து கொண்டதாக அலுத்து கொள்ள வேண்டும். அதற்காகவே வந்துள்ளது அரோமாதெரபி.
அரோமா என்பது நறுமணத்தையும், தெரபி என்பது சிகிச்சையையும் குறிக்கும். இந்த வாசனை மருத்துவம் மூலம் அழகுகலை என்பது பல்லாயிரம் ஆண்டுகளுக்கு முன்னரே இந்தியா, எகிப்து, சீனா போன்ற நாடுகளில் காணப்பட்டுள்ளது. முக்கிய சில தாவரங்கள், பூக்கள், வாசனை மற்றும் மூலிகை பொருட்களை காய்ச்சி வடிகட்டி அதலிருந்து கிடைக்கும் ஆயிலை எடுத்து பயன்படுத்துவதாகும். இந்த ஆயிலை நமது தோலில் மேற்புறம் தேய்க்கும் போது, தோலின் மூன்று அடுக்குகளில் உறிஞ்சப்பட்டு அதை காக்கிறது. அதன் மணம் மூளையை அடைத்து புத்துணர்ச்சியை கொடுக்கும். தோல், கூந்தல், உடல் மற்றும் மணத்திற்கு புதிய பரிணாமத்தை தருவதாக கூறுகிறார் அரோமாதெரபிஸ்ட் ஷானாவாஸ். மதுரை நரிமேட்டில் ஹைடெக் என்ற பெயரில் நிறுவனத்தையும் நடத்தி வருகிறார். அவர் கூறியதாவது:
பூக்கள், மூலிகைகள், மரப்பட்டைகள், பழங்கள், வாசனை பொருட்களை காய்ச்சி வடித்து நீர்மமான அந்த கரைப்பான்களில் இருந்து ஆயில் பெறப்படுகிறது. அந்த ஆயில் சரும பிரச்னைகளை குணப்படுத்தும். அறிவியல் வல்லுனர்களும் இதை விஞ்ஞான ரீதியாக நிரூபித்துள்ளனர். இந்த ஆயில் கிருமிநாசினியாகவும், வாசனை
திரவியமாக, நுண்கிருமிகளை அழித்து சரும அழகை பாதுகாப்பதாக பயன்படுத்தப் படுகிறது. நன்கு பயிற்சி பெற்ற அரோமாதெரபிஸ்ட் சிபாரிசுபடி, சில ஆயில்களை உட்கொள்ளலாம்.
அரோமாதெரபி ஆயில்களை சருமம், உடல், கேசம், மனநிலை பாதுகாப்புக்கு பயன்படுத்தப்படுகிறது. இதன் சாதாரண, ஆயில், டிரை சரும பேஷியல், பிக்மென்ட் நீக்குதல், பொடுகு மற்றும் கேசப்பராமரிப்பு, பரு நீக்குதல், கண்களை சுற்றிய கருவளையம் நீக்குதல் போன்றவைகளை எந்த பக்கவிளைவுகளும் இல்லாமல் குணப்படுத்த முடியும், “சன் அலர்ஜிக்கு’, வெயிலில் போய் வந்த பின் “கிரேப்வாஷ்’ 2 துளி எடுத்து, முகத்தில் தடவி, 2 நிமிடங்களுக்கு பின் தண்ணீரில் முகம் கழுவினால், வெயிலால் கறுப்பாக ஆன முகம் பளபளபாகும், இது திராட்சை பழ கொட்டையிலிருந்து எடுக்கப்படுவது. திராட்சை பழத்தில் முகம் கழுவவும் செய்யலாம் என்கிறார். மேலும் விவரங்கள் அறிய இவரை 98650 95818, 98946 78392 என்ற எண்களுக்கு ஒரு “ஹலோ’ சொல்லலாம்.

பழகுவதில் `உஷார்’ வேண்டும்

வஞ்சகம் செய்பவர்கள் எந்தக் காலத்திலும் உண்டு. அவர்களுடைய அறியாமையால் தான் அதைச் செய்து வருகிறார்கள். ஏசுநாதரை சிலுவையில் அறைய காரணமாக இருந்தவர்களுக்காக அவர் பிதாவிடம் பரிதபித்தார். “பிதாவே இவர்களை மன்னியும். அவர்கள் தாங்கள் செய்வது இன்னதென்று அறியாமல் செய்கிறார்கள்.” என்று அன்று அவர்சொன்ன வார்த்தைகள், இன்றும் பகைவர்களை மன்னிக்கும் தெய்வக்குரலாக இருந்து வருகிறது.

பெரிய புராணத்தில் நடந்த ஒரு முக்கியமான சம்பவம்.

மெய்பொருள் நாயனார் எல்லோருக்கும் நல்லவர் தான். ஆனால், அவரை முத்திநாதன் எதிரியாக கருதினான். அவரை வென்று விட பல முறை முயன்றான். முடியவில்லை. இறுதியில் வஞ்சகமாக அவரை கொலை செய்ய எண்ணினான். உடல் முழுவதும் திருநீறு அணிந்து அடியவர் போல வேடம் போட்டான். ஒரு நீண்ட வாளை ஓலைச்சுவடியினுள் வைத்து சுற்றி மறைத்து வைத்துக் கொண்டு அவரை சந்திக்கச் சென்றான்.

“உங்களிடம் ஒரு நுலின் உண்மை பொருளை பற்றி கூற வந்துள்ளேன். அதனால், நாம் இருவரும் தனியான இடத்தில் அமர்ந்து பேசலாம்” என்று அவரை நயவஞ்சகமாக அழைத்தான்.

அவனது நயவஞ்சக பேச்சை உண்மையென்று நம்பி, நாயனாரும் அவனை தனியிடத்திற்கு அழைத்துச் சென்றார். அங்கே அவன் ஓலைச்சுவடியை அவிழ்ப்பது போல பாவனை செய்து, அதனுள் மறைத்து வைத்திருந்த வாளை உருவி அவரை வெட்டி வீழ்த்தினான்.

உயிர் ஊசலாடிக் கொண்டிருந்த நாயனாரின் நிலையைக் கண்டு, ஆத்திரமடைந்த அவரது மெய்க்காப்பாளன் தத்தன் ஓடிவந்தான். அவன் முத்திநாதனைக் கொல்ல வாளை உருவும்போது, நாயனார் அந்த மரணத்தறுவாயிலும், “தத்தா, அவர் நமது உறவினர் தான். அவரைக் கொல்லாதே. அவருக்கு எந்த விதமான தீங்கும் நேராதவாறு பாதுகாப்பாக வெளியே கொண்டு போய் விட்டு விடு” என்று கூறி, தன் இன்னுயிரை நீத்தார்.

மன்னிக்கும் பக்குவம் எல்லாருக்கும் இருந்து விடுவதில்லை. தெய்வரீதியிலோ, மகான்கள் ரீதியிலோ தான் இப்படியான பக்குவநிலையை பார்க்கமுடிகிறது.

மனிதன் `கூடி வாழும் ஒரு சமுக விலங்கு’ என்று உளவியல் நிபுணர்கள் கூறுவதுண்டு. நாம் தினமும் தொழில்ரீதியாகவோ நட்பு ரீதியாகவோ எத்தனையோ மனிதர்களை சந்திக்க வேண்டியதாகிறது. ஒவ்வொவாருவரும் ஒவ்வொருவிதமான மனநிலையில் இருப்பவர்கள். இவர்களின் எண்ணங்களுக்கேற்ப நாம் அனுசரித்து நடக்கமுடியாத சூழ்நிலை பலநேரங்களில் நமக்கு ஏற்படும். ஆனாலும் வேறுவழியின்றி அவர்களை சகித்துக் கொள்கிறோம். ஆனாலும் இப்படிபட்டவர்களுடன் நம்மால் தொடர்ந்து சகிப்புத்தன்மைடன் இருக்க முடிவதில்லை. நமக்கென்று உள்ள நம் தனித்தன்மை இவர்களால் மறைந்தே போகும் என்கிற எச்சரிக்கை மணி தான் இவர்களிடம் இருந்து நம்மை பிரித்து விடுகிறது.

ஒருவிதத்தில் இந்த புரிதல்…அதனால் பிரிதல் நல்லது தான். பழக நேர்ந்தவர்களின் பாவ முட்டைகளையெல்லாம் நாம் சுமக்க நாமென்ன தேவ அவதாரமா?

பயர்பாக்ஸ் மேக் அப்

வெகு வேகமாக இணைய விரும்பிகள் மாறிக் கொண்டு பயன்படுத்தும் புரோகிராமாக பயர்பாக்ஸ் உள்ளது. பலர் அண்மையில் வெளியான பயர்பாக்ஸ் பதிப்பு 3க்கு மாறிய பின்னர், அதன் ஆட் ஆன் தொகுப்பு மற்றும் இந்த பிரவுசரிலேயே தரப்படும் வசதிகளில் எதனை விடுத்து எதனை மேற்கொள்வது என்று குழப்பமடைகின்றனர். ஏனென்றால் ஆயிரக்கணக்கில் ஆட் ஆன் தொகுப்புகளும், பிரவுசர் உள்ளாகப் பல வகையான வசதிகளும் உள்ளன. இவற்றில் நீங்கள் மேற்கொள்ள வேண்டிய சில மாற்றங்களையும், இணைக்க வேண்டிய ஆட் ஆன் தொகுப்புகளையும், தயார் செய்து வைக்க வேண்டிய வசதிகளையும் இங்கு காணலாம்.
பயர்பாக்ஸ் பதிப்பு 3 ஐப் பதிந்து இயக்கத் தொடங்கிவிட்டீர்கள். இதனைச் சற்று ட்யூன் செய்வது குறித்து இங்கு காணலாம். கீழே தரப்பட்டுள்ளவை உங்களுடைய சிந்தனைக்கே. இவற்றை மேற்கொள்ள வேண்டும் என எண்ணினால், அவை தேவைப்படும் என முடிவு செய்தால், இவற்றை மேற்கொள்ளலாம்.
பிரவுசரை இன்ஸ்டால் செய்தவுடன், முதலில் Edit – Preferences –– Privacy tab–– history எனச் செல்லவும். இதில் Saved history page என்று இருப்பதன் எதிரே இருப்பதனைச் சிறிய எண்ணாக மாற்றவும். ஒரு சிலர் இதனை 7 நாட்கள் எனவும், மற்றும் சிலர் இதனை 10 நாட்கள் எனவும் மாற்றி வைத்துக் கொள்வார்கள். இதன் மூலம் பயர்பாக்ஸ் பயன்படுத்தும் டிஸ்க் இடத்தை மிச்சப்படுத்தலாம்.
இதே முறையில் “Remember what I’ve downloaded” என்று இருப்பதனை Disable செய்து வைக்கவும். இதனாலும் டிஸ்க் ஸ்பேஸ் மிச்சப்படும்.
அடுத்து என்ன ப்ளக் இன் புரோகிராம்களை இன்ஸ்டால் செய்வது என்று பார்க்கலாம். சிலருக்கு ப்ளக் இன் என்றால் என்னவென்று தெரியாமல் இருக்கலாம். இதெல்லாம் பயர்பாக்ஸ் பிரவுசருக்கு எக்ஸ்ட்ரா வசதிகள் தருபவை. இவை சாதாரண புக்மார்க் ப்ளக் இன் முதல், வெப் உருவாக்குபவர்கள் பயன்படுத்தும் சற்று கடினமான ப்ளக் இன் வரை உள்ளன. இவற்றில் ஒரு சில முக்கியமானவற்றைக் காணலாம்.

முதலாவதாக Foxmarks. இந்த ப்ளக் இன் புரோகிராம் உங்கள் புக்மார்க் அடையாளங்களைப் பல கம்ப்யூட்டருக்கிடையே, சேதமின்றி இணைக்க உதவுகிறது. மற்ற கம்ப்யூட்டர்களிலும் இந்த Foxmarks ஐப் பதிய வேண்டும். எந்த கம்ப்யூட்டரில், நீங்கள் விருப்பப்படும் இணைய தளத்திற்கான புக் மார்க் பதிந்தாலும், Foxmarks மூலம் செல்கையில், அவை மற்ற கம்ப்யூட்டர்களிலும் அப்டேட் செய்யப்படும். இப்போது இது துட்ச்ணூடுண் என அழைக்கப்படுகிறது. இந்த ஆட் ஆன் பெற http://www.foxmarks.com/ என்ற தளம் செல்லவும்
அடுத்த ப்ளக் Down Them All.  இதனை https://addons.mozilla.org/enUS/firefox/ addon/201 என்ற முகவரியில் உள்ள தளத்தில் பெறலாம். ஓர் இணையப் பக்கத்தில் குவியலாக சில ஆப்ஜெக்ட் மற்றும் டெக்ஸ்ட்களைக் காப்பி செய்து பேஸ்ட் செய்திட முயற்சிக்கையில், இந்த ப்ளக் இன் உதவும். எடுத்துக் காட்டாக, உங்களுக்குப் பிடித்தமான இசைக் கலைஞர் ஒருவர் குறித்த இணைய தளம் ஒன்றுக்குச் செல்கிறீர்கள். அந்த தளத்தில் தரப்பட்டுள்ள அவரின் 25 படங்களை டவுண்லோட் செய்திட எண்ணுகிறீர்கள். ஒவ்வொரு படமாகச் சென்று, ரைட் கிளிக் செய்து, கிடைக்கும் மெனு மூலம் ஒவ்வொன்றாக காப்பி செய்திடத் தேவையில்லை. இந்த ப்ளக் இன் பதிந்தவுடன், நீங்கள் ஏதேனும் ஒரு படத்தினை ரைட் கிளிக் செய்து கிடைக்கும் மெனுவில் Down Them All என்பதைத் தேர்ந்தெடுங்கள். பின்னர் நீங்கள் பைல் எக்ஸ்டன்ஷன் பெயர் மூலம் அவற்றை பில்டர் செய்து டவுண்லோட் செய்திடலாம்.

அடுத்ததாக Download Status Bar என்ற ப்ளக் இன். பயர்பாக்ஸ் பிரவுசரில் ஒரு டவுண்லோட் மேனேஜர் ஒன்று தரப்பட்டுள்ளது. நீங்கள் டவுண்லோட் செய்திடுகையில் விண்டோ ஒன்றைத் திறக்கிறது. எவ்வளவு டவுண்லோட் ஆகிறது என்று தெளிவாகக் காட்டும். ஆனால் ஒன்றுக்கு மேற்பட்ட பைல்களை டவுண்லோட் செய்கையில், ஒவ்வொரு பைலும் எத்தனை சதவிகிதம் டவுண்லோட் செய்யப்பட்டுள்ளது என்று காட்டாது. ஆனால் இதனை செய்கிறது. இது ஸ்டேட்டஸ் பாரில் அமர்ந்து கொண்டு, உங்களுடைய டவுண்லோட் எவ்வளவு ஆகி உள்ளது என்று கிராபிக் மூலம் காட்டும். இதனால் நமக்கு பாப் அப் டவுண்லோட் விண்டோ தேவைப்படாது. இதற்கும் மேலாக, நீங்கள் பயர்பாக்ஸ் பிரவுசரை மூடுகையில், உங்களுடைய டவுண்லோட் பைல்களைத் தானாக, பாப் அப் விண்டோவுக்கு மாற்றிவிடும். இதனால் புரோகிராம்களை டவுண்லோட் செய்வது ரத்தாகாது.
இதனைப் பெற https://addons.mozilla.org/enUS/firefox/addon/26 என்ற முகவரியில் உள்ள தளத்திற்குச் செல்லவும்.
அடுத்து இங்கு குறிப்பிட விரும்பும் ப்ளக் இன் பெயர் ஆர்பிட் டவுண்லோடர் (Orbit Downloader) இது முழுக்க உங்கள் விருப்பத்தின் அடிப்படையில் அமைக்கப்பட வேண்டியதாகும். சொல்லப்போனால், இது பயர்பாக்ஸ் பிரவுசருக்கான ப்ளக் இன் புரோகிராம் அல்ல. ஆனால் அதனுடன் இணைந்து செயலாற்றும். இதனை யு–ட்யூப் போன்ற வீடியோ தளங்களிலிருந்து,  flv மூவிப் படங்களை டவுண்லோட் செய்திடப் பயன்படுத்தலாம். மேலும் பிளாஷ் அடிப்படையிலான கேம்ஸ் டவுண்லோட் செய்திடவும் பயன்படுத்தலாம்.
மேலே சொல்லப்பட்டி ருப்பவற்றை, நீங்கள் விருப்பப்பட்டால், பயர்பாக்ஸ் பிரவுசரை உங்கள் கம்ப்யூட்டரில் இன்ஸ்டால் செய்தவுடன் மேற்கொள்ளலாம். இத்துடன் சில ஷார்ட் கட் கீ தொகுப்புகளையும் தருகிறேன். இவை, பயர்பாக்ஸ் பிரவுசரில் நீங்கள் வேகமாகச் செயல்பட உதவும்.


Ctrl – T: புதிய டேப் ஒன்றைத் திறக்கும். பல தளங்களைத் திறந்து வைத்து, இணையத்தில் உலா வருகையில் இது உதவும். அதற்காக கணக்கற்ற எண்ணிக்கையில் டேப்களைத் திறக்க வேண்டும். உங்களால் அவற்றை நிர்வகிக்க முடியாது.
Ctrl – W: தேர்ந்தெடுத்த டேப்பினை மூடும். அல்லது எந்த டேப்பில் உள்ள தளத்தினைப் பார்த்துக் கொண்டிருக் கிறீர்களோ, அதனை மூடும்.
Ctrl – Shift – T: இறுதியாக மூடிய டேப்பில் இருந்த, இணைய தளத்தினைத் திறக்கும். எனவே மறதியாகவோ அல்லது தவறாகவோ, ஒரு டேப்பில் கிளிக் செய்து, அதில் இருந்த இணைய தளத்தினை மூடிவிட்டால், இந்த ஷார்ட் கட் கீயினைப் பயன்படுத்தலாம்.
Ctrl – F: “Search on this page” என்ற படிவத்தினைத் திறக்கும். இதனைப் பயன்படுத்தி ஓர் இணைய தளப் பக்கத்தில் ஏதேனும் ஒன்று அல்லது ஒன்றுக்கு மேற்பட்ட சொல் கொடுத்து, அது இடம் பெறும் இடத்திற்கு நேரடியாகச் செல்லலம்.
Ctrl – Tab: திறக்கப்பட்டுள்ள டேப்களில் உள்ள தளங்களுக்கிடையே செல்ல.
Ctrl – Left Click on a link: இதனை ஒரு லிங்க் மேலாகக் கொடுத்தால்,பயர்பாக்ஸ், அந்த புதிய டேப்பில் உள்ள தளத்தினை புதிய டேப்பில் திறக்கும்.
மேலே சொன்ன ஷார்ட் கட் கீ தொகுப்புகள் தான் பெரும்பாலும் அனைவரும் பயன்படுத்துவது.
மேலே சொன்னவை, பயர்பாக்ஸ் பிரவுசரைப் புதியதாகப் பயன்படுத்தப் போகிறவர்களுக்கு மட்டுமல்ல. வெகு நாட்களாக இந்த பிரவுசரைப் பயன்படுத்துபவர்களும், மேலே தந்துள்ளவற்றைப் பயன்படுத்தலாம்.
என்னிடம் பயர்பாக்ஸ் பதிப்பு 3 இல்லை. பழைய பிரவுசரே எனக்குப் போதும் என்று சொல்பவர்கள், சற்றுப் பொறுமையாக, இந்த புதிய பதிப்பினை, அதற்கான இணைய தளம் சென்று, டவுண்லோட் செய்து பயன்படுத்தத் தொடங்கவும். பயர்பாக்ஸ் பதிப்பு 3, பல புதிய வசதிகளைக் கொண்டுள்ளது.
பயர்பாக்ஸ் பிரவுசரைப் பயன்படுத்தத் தொடங்கியவுடன், தொடர்ந்து அதனையே உங்கள் மாறா பிரவுசராக வைத்துக் கொள்வீர்கள். அடிக்கடி இதனைப் பயன்படுத்துபவர்கள், பயர்பாக்ஸ் எப்போதும் மற்ற விண்டோக்களால் மறைக்கப் படாமல் டெஸ்க்டாப்பில் தெரிய வேண்டும் என எண்ணுவார்கள். அப்போதுதான் அதனை விரைவாகப் பயன்படுத்த முடியும் என விரும்பு வார்கள். இதற்கான ஒரு ஆட் ஆன் தொகுப்பு பயர்பாக்ஸ் பிரவுசருக்குத் தரப்பட்டுள்ளது. இதனுடைய பெயர் Always On Top. இந்த ஆட் ஆன் தொகுப்பைப் பதிந்தவுடன், பயர்பாக்ஸ் பிரவுசரின் நேவிகேஷன் டூல்பாரில் பட்டன் ஒன்று காணப்படும். இந்த பட்டனை அழுத்தினால், பயர்பாக்ஸ் பிரவுசர் விண்டோ எப்போதும் டெஸ்க்டாப் திரையின் மேலாக இருக்கும். இந்த பட்டனை அழுத்தினால், இந்நிலை மாறும். இந்த பட்டன் மூலம், பயர்பாக்ஸ் பிரவுசர் எப்போதும் மேலாக உள்ளதா என்று நாம் அறிந்து கொள்ளலாம். இந்த பட்டனை வேறு ஒரு இடத்திலும் வைத்துக் கொள்ளலாம். எந்த டூல்பாரிலும் காலியாக உள்ள இடத்தில் கிளிக் செய்து, பின் மெனுவில் என்பதைத் தேர்ந்தெடுத்து இடம் மாற்றிக் கொள்ளலாம். இந்த ஆட் ஆன் தொகுப்பினை https://addons.mozilla.org /enUS/firefox/addon/142877/ என்ற முகவரியில் உள்ள தளத்தில் பெற்றுக் கொள்ளவும்.

வெப்பம் நல்லது

உடம்பில் உயிர் நிலைத்திருக்க இன்றியமையாதவையாக இருப்பவை நீரும், நெருப்பும். இவை இரண்டும் இல்லையென்றால், உடம்பில் உயிர்

தங்காது. உடம்பு பிணமாகிப் போகும்.
உடம்பில் நெருப்பு என்று குறிப்பிடுவது, சூடாகும். சூடு இல்லாமல் போனால், ரத்தம் உறைந்துவிடும். பனிமலைகளில் ஆடையோ தகுந்த

பாதுகாப்போ இல்லாமற் போனால், ரத்தம் உறைந்து இறக்க நேரிடும். ஆகவே, உடம்பிலுள்ள சூடு, உடலெங்கும் பரவியிருக்குமாறு

பார்த்துக்கொள்ள வேண்டும்.
உடம்பில் சூடு இல்லாத இடமோ, அல்லது உறுப்புகளோ இல்லை. உடம்பிலுள்ள அனைத்து உறுப்புகளிலும் சூடு பரவி நிறைந்துள்ளது. அதனால்,

அவை இயங்கிக் கொண்டு இருக்கின்றன.
உடம்பை இயக்குவதற்குச் சூடு தேவைப்படுவதைப்போல், உடம்பிலுள்ள அசுத்தங்களையும், அழுக்கங்களையும் நீக்கவும் அழிவுக்கவும் சூடு

தேவைப்படுகிறது.
சூடு, உடம்பிலுள்ள நச்சுப் பொருள்களை எரிக்கும்போது ஏற்படுகின்ற வெப்பத்தையே ஜுரம் என்று காய்ச்சல் என்று கூறுகிறோம்.
உடம்பில் உச்சுப்பொருள்கள் அதிகமாக இருந்தால் காய்ச்சலும் அதிகமாக இருக்கும்.
காய்ச்சல் வருவது உடல் நலத்துக்காகவே என்பதை உணர்ந்து கொள்ள வேண்டும். நன்றாகக் காய்ச்சல் வந்தால், உடம்பிலுள்ள நச்சுப்பொருள்கள்

முற்றிலும் அழிந்துபோகும்.
உடம்பில் ஏற்படுகின்ற சூடு அதிகமாகாமலும் குறைந்து போகாமலும் பார்த்துக் கொள்ள வேண்டும். சூடு மிகுதியானால் உள்ளுறுப்புகள்

சீர்குலைந்து போகும். அதனால், வெப்பமான இடங்களில் பணியாற்றுவதும், வெப்பமான நேரத்தில் வெளியில் செல்வதும் கூடாது. அப்படிச் செல்ல

நேர்ந்தால் மூளையில் பித்தம் ஏறி மயக்கம் வரும்.
ரத்தக் கொதிப்புண்டாகி இறக்க நேரிடும். வெயிலில் வெளியில் செல்ல வேண்டிய தேவை ஏற்படுகிறபோது, தலைக்கும் உடம்புக்கும்

பாதுகாப்பைத் தருகின்ற ஆடைகளை அணிந்து செல்ல வேண்டும்.
வெயிலில் செல்லும்போது கறுப்பு நிறத்திலான குடையையோ துணியையோ போர்த்திக் கொண்டு செல்லக் கூடாது. ஏனென்றால், கறுப்பு நிறம்

வெயிலின் வெப்பத்தை இழுத்து உடம்பில் செலுத்தும் தன்மை கொண்டது. வெண்மை வெப்பத்தைத் தடுக்கும் ஆற்றல் வாய்ந்தது என்பதால்,

கோடைக்காலத்தில் வெண்ணிற ஆடைகளை அணிந்தால் வெப்பத்தின் பாதிப்பிலிருந்து உடம்பைப் பாதுகாத்துக் கொள்ளலாம்.
விலங்குகளும் பறைவகளும் வெயில், மழை, குளிர் போன்றவற்றினால் பாதிக்கப்படாமலிருக்கின்றன என்றால், அவற்றின் உடலமைப்பு, அவ்வாறு

அமைந்துள்ள. ஆனால், மனிதர்களின் உடம்பு மென்மையானது வெப்பமோ, குளிரோ சிறிதளவே இருந்தாலும் பாதிக்கப்படக்கூடியது.
மனித உடம்பின் தன்மையை அறிந்து அதற்கு ஏற்றவாறு, பருத்தி, கம்பளி, தோலாடை போன்றவற்றை அணிந்து, பாதுகாத்துக் கொள்ள

வேண்டும்.
சூரியக் குளியல்
இயற்கை வாழ்வுக்குத் தடையாக இருப்பவை நச்சுப்பொருள்கள். நச்சுப்பொருட்களை அகற்றிக் கொண்டே இருந்தால், உடலுக்கு நல்லது. உடல்

நலமாக இருந்தால் வாக்கும் மனமும் நலமாக இருக்கும்.
வாக்கு, மனம், காயம் ஆகிய மூன்று தூய்மையாக இருக்க வேண்டுமானால், நச்சுப்பொருள்கள் உடம்பில் தேங்கிவிடாதவாறு பார்த்துக்கொள்ள

வேண்டும்.
வாக்கு, மனம், காயம் ஆகிய இம்மூன்றுக்கும் ஒவ்வாத நச்சுப்பொருள்களை அகற்றிக் கொண்டு வந்தால், நீண்ட நாள் வாழலாம்.
புறத்தூய்மைக்கு அதாவது, உடல் தூய்மைக்கு நீர் அமைவது போல், சூரிய ஒளியும் புறத்தை, உடலைத் தூய்மை செய்கிறது. சூரிய ஒளி,

நச்சுப்பொருள்களை அகற்றவும் அழிக்கவும் பயன்படுகிறது.
மாலை வேளையில் வெற்றுடம்புடன் சூரிய ஒளியில் அமர்ந்துகொண்டிருந்தால், உடம்பின் மேற்பகுதியில் படிந்துள்ள நச்சுப்பொருள்கள்

அழிந்துவிடும்.
தோலின் உட்புறத்தில் படிந்துள்ள நச்சுப்பொருள்கள், தோல் நோய்களை உருவாக்குகின்றன. சொறி, சிரங்கு, படை, கட்டி, குட்டம் போன்றவை

தோலில் வரக்கூடிய நோய்கள்.
தோலில் நோய் வராமல் தடுக்க வேண்டுமானால், சூரியக் குளியல் அவசியம் தேவைப்படுகிறது.
உடலில் சேர்ந்துள்ள நச்சுப்பொருள்களை வெளியேற்ற உடல் எடுத்துக்கொள்ளும் முயற்சிகள்தான், மலர், சிறுநீர், தும்மல், கண்ணீர், வியர்வை

ஆகியவை. நச்சுப் பொருள்களை வெளியேற்ற உடல் தயாராகும்போது, அதற்கு வேண்டிய வசதிகளைச் செய்து கொடுக்க வேண்டும். உடலின்

தன்மைக்கு ஏற்றவாறு இணக்கமான சூழலை ஏற்படுத்த வேண்டும்.
குளியலும், சூரியக்குளியலும் ஒருவகையான மருத்துவ முறையேயாகும். மருத்துவ முறையை முறையாகத் தெரிந்து செய்தால் நோய் அகலும்.

நோய் வராமலும் தடுக்கலாம்.
சூரியக் குளியலும் வாழையிலைக் குளியலும் ஒன்றேயாகும்.
சூரியக் குளியலை, கோடைக் காலத்தில் செய்யக்கூடாது. கடுமையான வெயில் அடிக்கும்போது செய்தால், அதிகப் பலன் விரைவாகக் கிடைக்கும்.
குளியல் முறை:

குளியலுக்கு, வெட்ட வெளி அல்லது வீட்டின் மேல் தளம், சிமெண்ட் பூசிய தரை, கல் தரை, பாறை போன்றவற்றைப் பயன்படுத்தலாம். கனமான படுக்கை விரிப்பைத் தண்ணீரில் நனைத்துப் பிழிந்து, தரையிலுள்ள சூடு தணியும் அளவுக்கு ஈரத்துடன் விரித்துக்கொள்ள வேண்டும். தரை விரிப்பில் ஒரு நபர் படுத்து போர்த்திக் கொள்ளும் அளவுக்கு நீளமாகவும் அகலமாகவும் உள்ள வாழை இலைகளை விரிக்க வேண்டும். சூரியக்குளியலுக்குத் தயாராகும் நபர், நன்னீரில் குளித்து விட்டு, உடலை நன்றாகத் துடைத்துக் கொண்டு, இடுப்பில் உள்ளாடை மட்டும் அணிந்திருக்குமாறு செய்ய வேண்டும். தலைக்கு ஒரு துண்டினால் முண்டாசு கட்டிவிட வேண்டும். வாழை இலையில் படுப்பதற்கு முன், அரை லிட்டர் அளவுக்கு நல்ல தண்ணீர் குடிக்க வேண்டும். இவ்வாறு செய்து, குளியலுக்குத் தயாரானவுடன், வாழையிலையில் படுக்க வைக்க வேண்டும். காலும் கையும் உடலோடு ஒட்டி இருக்க வேண்டும். அவரின் கால் முதல் தலைவரை, விரிப்பில் விரிக்கப்பட்டிருக்கும் வாழையிலையால் போர்த்தி, வாழையில் பண்டு கட்டுவதுபோல் சுற்றி கட்டிவிட வேண்டும். கட்டப்பட்டவர், மூச்சு விடுவதற்கு ஏற்றவாறு மூக்குக்கு நேராக ஒரு துளையிடுவதுபோல் இலையைக் கிள்ளி எடுத்துவிடவும்.வாழையிலையில் கட்டப்பட்டு, வெயிலில் கிடத்தப்பட்டிருக்கும் நபருக்கு அருகில் ஒருவர் இருக்க வேண்டும். அவரிடமிருந்து ஏதாவது தகவல்வருகிறதா என்று கவனித்துக் கொண்டிருக்கு வேண்டும்.
சூரியக் குளியலில் இருப்பவர் போதும் என்று சொன்னால், உடனே கட்டுகளை அவிழ்த்து, இலையைப் பிரித்துவிட வேண்டும்.

அவ்வாறு கூறாவிட்டால், அதிக அளவாக, அரை மணி நேரம் மட்டும், வெயிலில் வைத்திருக்கலாம். கட்டுகளை அவிழ்த்துப் பார்த்தால், வாழையிலை ஒரு ஓடை போலவும், ஓடை நீரில் ஒருவர் படுத்திருப்பது போலவும் தோன்றும். அவர் வியர்வை நீரில் படுத்திப்பார்.இலைக்கட்டு பிரித்தவுடன் எழுந்திருக்காமல் ஒரு பத்து நிமிடம் அப்படியே படுத்திக்கச் செய்யவும். பிறகு, மெல்ல எழுந்து, ஒரு பத்து நிமிடநேரத்துக்குப் பிறகு நன்னீரில் குளிக்க வேண்டும்.அப்போது, குளித்த நபரின் உடம்பு லேசாக இருக்கும். தோலின் நிறம் பளபளப்பு உடையதாகவும் இருக்கும். தோலின் உட்புறத்தில் படிந்துள்ளநச்சுப்பொருள்கள் வெளியேறியிருக்கும் இக்குளியலினால், தோல் நோய்கள் நீங்குவதுடன், உடல் பருமனும் எடையும் குறைகிறது.நோய் உள்ளவர்கள், வாரந்தோறும் சூரியக்குளியல் போடலாம். சாதாரணமானவர்கள் மாதந்தோறும் செய்யலாம்.இக்குளியல் முறையை மேற்கொள்பவர்கள், பால், சர்க்கரை, உப்பு ஆகியவற்றை நீக்கிவிட வேண்டும்.சூரியக்குளியல் அனைவர்க்கும் ஏற்றதில்லை. சர்க்கரை நோய், இதய நோய், ரத்த அழுத்தம், கர்ப்பிணிப் பெண்கள், 12 வயதுக்கு உட்பட்ட ஆண்,பெண், முதியோர் போன்றவர்களுக்கு இது உகந்ததல்ல.சூரியக்குளியல் போலவே, ஆவிக்குளியல், புகைக்குளியல், மண்குளியல், புதைகுழிக்குளியல் ஆகியவை, நச்சுப்பொருள்களை வெளியேற்றக்கூடியவை. அவரவர் வசதிக்கும் வாய்ப்புக்கும் நேரத்துக்கும் காலத்துக்கும் ஏற்ற முறையைத் தேர்வு செய்து கொண்டு வந்தால், தோல் நோயும்நச்சுப் பொருளும் அகலும். நல்வாழ்வுக்குள் செல்லும் பாதை தெரியும்.

எல்லாப் பொருளும் இறைவனுக்கே! (ஆன்மிகம்)

உலகம் எனும் வீட்டில், வாடகைக்கு குடியிருக்கவே நாம் வந்துள்ளோம். இங்குள்ள பொருட்களில், நமக்கு அனுமதிக்கப்பட்டவற்றை மட்டுமே நாம் பயன்படுத்திக் கொள்ளலாம்; இறைவனுக்கு கொடுக்க வேண்டியதில், முறைப்படி அவனுக்கு அர்ப்பணித்த பிறகு வேண்டுமானால், எடுத்துக் கொள்ளலாம். ஆக, இந்த உலகத்தில் படைக்கப்பட்ட அத்தனை பொருட்களும், இறைவனுக்கே உரியது என்ற தத்துவத்தையே கழற்சிங்கர் என்ற மன்னரின் வரலாறு உணர்த்துகிறது. அவரது குருபூஜை, வைகாசி பரணி நட்சத்திரத்தில் நடத்தப்படும்.
பல்லவ நாட்டை ஆண்ட கழற்சிங்கருக்கு, அழகே வடிவான பட்டத்தரசி இருந்தாள். சிவபக்தரான கழற்சிங்கருக்கு, திருவாரூர் தியாகராஜப் பெருமானைத் தரிசிக்க வேண்டும் என்ற ஆவல் வெகுநாளாக இருந்தது; அந்த ஆசை, ஒருநாள் நிறைவேறியது. மன்னர் தன் ராணியுடனும், படை பரிவாரங்களுடனும் திருவாரூருக்கு வந்தார். அங் குள்ள புற்றிடங்கொண்டார் சன்னதிக்குச் சென்று, இறைவனை மனதார வணங்கினார். தியாகராஜர் சன்னதிக்குச் சென்று, தன் ஆசையை நிறைவேற்றி வைத்தமைக்காக நன்றி சொன்னார்.
திருவாரூர் கோவில் அளவில் மிகப்பெரியது. அந்தக் கோவில் முழுமையும் சுற்றிப் பார்க்க ஆசை கொண்டாள் ராணி. தன் தோழியருடன் அவள் சன்னதிகளைச் சுற்றி வந்து கொண்டிருந்த போது, ஓரிடத்தில், சிவப்பழமாய் அமர்ந்திருந்த தொண்டர்கள் பலர், சுவாமிகளுக்கு மலர் மாலை தொடுத்துக் கொண்டிருந்தனர். மிகுந்த பயபக்தியுடன், “ஓம் நமசிவாய, சிவாயநம’ என்ற நாமங்களைச் சொல்லியபடி, பூ கட்டிக் கொண்டிருந்த அவர்கள் இருக்குமிடத்தை ராணி அடைந்தாள்.
மலர்களின் மணம் ராணியை மிகவும் கவர்ந்தது. அங்கு கிடந்த மலர் ஒன்றை எடுத்து, முகர்ந்து பார்த்தாள். அவ்வளவு தான்! மாலை கட்டிக் கொண்டிருந்த ஒருவர், ஆவேசமாக எழுந்தார்.
“ஏ பெண்ணே… உனக்கு அறிவிருக்கிறதா? இறைவனுக்கு தொடுக்கும் மலர்களை முகர்ந்து பார்க்கக் கூடாது என்ற சாதாரண விஷயம் கூடவா உனக்குத் தெரியாது! நீ எப்படி நாடாளும் ராஜாவுக்கு மனைவியாக இருக்க முடியும்?’ என்று ஆத்திரத்துடன் சொன்னதுடன், கத்தியால், அவளது மூக்கை சீவி விட்டார். அவரது பெயர் செருத்துணையார்; மிகத்தீவிரமான சிவபக்தர்.
அலறித் துடித்தாள் ராணி. கோவிலின் இன்னொரு பகுதியில் நின்ற ராஜாவுக்கு விஷயம் தெரியவந்தது. அவர் வாளை உருவியபடி, மலர் கட்டுமிடத்திற்கு வந்தார். வலி தாங்காமல், கீழே விழுந்து புரண்டு கொண்டிருந்தாள் ராணி. தோழிகள் செய்வதறியாது ஓலமிட்டனர்.
என்ன நடந்தது என்பதை மூக்கை வெட்டிய செருத்துணையாரிடமே கேட்டார் கழற்சிங்கர். அவர் நடந்ததைச் சொன்னதும், “அப்படியா… எம்பெருமானுக்குரிய பொருளை அவருக்கு படைக்கும் முன் பயன்படுத்திய இவளுக்கு இந்த தண்டனை போதாது…’ என்றவர், வாளால் அவளது கையையும் வெட்டிவிட்டார்.
அப்போது வானில் ஒளி பிறந்தது. பார்வதியுடன், சிவபெருமான் காட்சி தந்தார். அவர்களது பக்தியின் பெருமையை வெளிப்படுத்தவே, இவ்வாறு திருவிளையாடல் புரிந்ததாகச் சொன்னார். ராணியும் ஏதும் நடக்காதவள் போல் எழுந்தாள்.
இந்த நிகழ்ச்சி மூலம் எல்லாப் பொருளும் இறைவனுக்குத்தான் என்பது தெளிவுபடுத்தப்படுகிறது. எந்தப் பொருளாயினும், முதலில் இறைவனுக்கு அர்ப்பணித்து விட்டோ, அதை நமக்கு தந்த அவனுக்கு நன்றி சொல்லி விட்டோ பயன்படுத்த, இந்த நன்னாள் முதல் பழக்கம் ஏற்படுத்திக் கொள்வோம்.