Advertisements

Daily Archives: ஜூன் 27th, 2010

“குடி’யிலும் நாங்க தான் “பர்ஸ்ட்!’ சொல்கின்றனர் கேரள “குடி’மகன்கள்

“கல்வியில் மட்டுமல்ல; “குடி’யிலும் நாங்கள் தான் முன்னணி’ என, நிரூபித்துள்ளனர் கேரள “குடி’மகன்கள். ஆம். இந்தியாவில் மது அருந்துவதில் கேரளாதான் முதலிடம் வகிக்கிறது என, சமீபத்திய ஆய்வு ஒன்று தெரிவிக்கிறது. “தேசிய மாதிரி ஆய்வு’ அலுவலகம் (என்.எஸ்.எஸ்.ஓ.,), சமீபத்தில் கேரளாவில் ஓர் ஆய்வு நடத்தியது. அதில், கேரளாவில் குடும்பச் செலவு, கல்விச் செலவு, நுகர்வுச் செலவு போன்றவையோடு, “குடி’ப்பதற்கும் எவ்வளவு செலவு செய்கின்றனர் என்பதும் கணக்கில் எடுத்துக் கொள்ளப்பட்டது.

இதுகுறித்து என்.எஸ்.எஸ்.ஓ.,வின் துணை இயக்குனர் சி.ஆர்.கே.நாயர் கூறுகையில், “கேரளாவில் நகர்ப்புறங்களில் சராசரியாக ஒரு நாளைக்கு 19 ரூபாயும், கிராமப்புறங்களில் 17 ரூபாயும் மதுவிற்காகச் செலவழிக்கின்றனர்’ என்று தெரிவித்தார்.

இந்தியாவின் சராசரி “குடி’ அளவு, நாள் ஒன்றுக்கு, நகர்ப்புறங்களில் 7 ரூபாயும், கிராமங்களில் 6 ரூபாயும் தான். இவற்றை விட இரண்டு மடங்கு கேரளாவில் “குடி’க்காக செலவழிக்கப்படுகிறது. டில்லியில் மாதச் செலவாக 1,828 ரூபாய் செலவழிக்கின்றனர். ஆனால் கேரளாவில் 1,948 ரூபாய் செலவழிக்கின்றனர். அதே போல், புகையிலை மற்றும் அது சார்ந்த பொருட்களுக்காக, சராசரியாக, இந்தியாவில் 9 ரூபாய் 90 காசுகள் செலவழிக்கப்படுகின்றன. ஆனால் கேரளாவின் நகர்ப்புறங்களில் 18 ரூபாய் 50 காசும், கிராமங்களில் 14 ரூபாய் 50 காசும் செலவழிக்கின்றனர்.

ஒட்டு மொத்தத்தில் கேரளாவில் உணவு, மருத்துவம் மற்றும் நுகர்வோர் பொருட்கள் வாங்குவதில் அதிகமாக செலவழிப்பதாக அந்த ஆய்வறிக்கை கூறியுள்ளது. ஆனால், கேரளாவில் 2005-06ல் 12 சதவீதமாக இருந்த வேலையில்லாத் திண்டாட்டம், தற்போது 9.8 சதவீதமாகக் குறைந்துள்ளது. தொழில்முறைப் படிப்புகளுக்கு, இந்தியாவின் பிற இடங்களை விட, கேரளாவில் 20 சதவீதம் செலவு குறைவாகவே ஆகிறது.

Advertisements

செய்தி துணுக்குகள் -27.6.2010

1) ஜார்ஜ்  வாஷிங்டனுக்கு அபராதம்?
அமெரிக்காவின் முதல் அதிபர் ஜார்ஜ் வாஷிங்டன், இன்று உயிருடன் இருந்தால், அவருக்கு நியூயார்க் நூலகம் ஒன்று மிக கடுமையான அபராதம் விதித் திருக்கும். காரணம், அவர் நூலகத்தில் இருந்து எடுத்த முக்கியமான புத்தகங்களை திருப்பி தராததால் தான். நியூயார்க் நகரில் உள்ள மிக புராதனமான நூலகத்தில் இருந்து  ஜார்ஜ் வாஷிங்டன் இரண்டு புத்தகங்களை படிக்க எடுத்துச் சென்றார். 220 ஆண்டுகளாக அந்த புத்தகம் திரும்பி வரவில்லை என நூலக பதிவேடுகள் தெரிவிக்கின்றன. “சர்வதேச சட்டங்கள்’ என்ற  புத்தகம், சர்வதேச அரசியல் நிலையை விளக்கமாக கூறியுள்ளது; இன்னொரு புத்தகம் பிரிட்டன் கீழ் சபையில் நடந்த விவாதங்களின் தொகுப்பு. இந்த இரண்டு புத்தகங்களையும், திருப்பி கொடுத்திருக்க வேண்டும்.  ஆனால், இன்று வரை அந்த புத்தகம் இந்த நூலகத்தில் வரவு வைக்கப்பட வில்லை. “ஜார்ஜ் வாஷிங்டன் கட்ட வேண்டிய அபராதத்தை நாங்கள் எதிர்பார்க்க வில்லை; மீண்டும் அந்த புத்தகங்கள் கிடைத்தால் மிகவும் மகிழ்ச்சி அடைவோம்…’ என்கிறார் இந்த நூலகத்தின் தலைவர் மாரக் பார்ட்லெட்.

(2) விடாமல் துரத்தும் பறவை  !
எழுபத்தி இரண்டு வயது ஆசாமி ஒருவரை, ஒரு பறவை விடாமல் துரத்தி, துரத்தி தாக்குகிறது. அதற்கு என்ன காரணம் என தெரியாமல், அவர் திணறி வருகிறார்.
பிரிட்டனில் பிரான்ஸ்கோம்பி என்ற நகரில், கிழக்கு தேவொன் என்ற ஊரில், வசிப்பவர் ஜான் டக்கர்; பறவைகள் ஆராய்ச்சியாளர்; பணி ஓய்வு பெற்றவர். இவர் வீட்டில் இருந்து வெளியே வந்தாலே, எங்கிருந்தோ, “பிசன்ட்’ என்ற ஒரு பறவை அங்கு வந்து விடும். இவர் தலை, கை, கால்களை தன்  நீண்ட அலகால் கொத்தும். இறக்கைகளை படபடவென அடித்து, அவர் மேல் பாய்ந்து தாக்கும். இந்த பறவைக்கு பயந்து, கைகளில் நீண்ட கையுறை அணிந்து கொள்கிறார். பெரிய, “வாக்கிங் ஸ்டிக்’ ஒன்றையும் கையில் பிடித்துக் கொள்வார்.
“வீட்டின் வாசல் வழியாக இவர் எப்போது வெளியே வருவார்…’ என்று கூட, அந்த பறவை தெரிந்து வைத்திருக்கிறது.
எனவே, ஜானும் அவர் மனைவியும் இப்போதெல்லாம் வீட்டை விட்டு வெளியேற வேண்டும் என்றால் பின் பக்கத்தில் உள்ள  ஜன்னலை திறந்து, அதன் வழியாக குதித்து வெளியேறுகின்றனர். அப்படியும், அந்த பறவை மோப்பம் பிடித்து, அவர்கள் காரில் ஏறும் முன் தாக்க ஆரம்பித்து விடுகிறது. “ஆரம்பத்தில் பறவை எங்களிடம் விளையாடுகிறது என்று தான் நினைத்தோம்; ஆனால், இப்போது அது மிகவும் தொல்லையாகி விட்டது…’ என்கிறார் ஜான். பறவை ஆராய்ச்சியாளரான இவருக்கே, இந்த பறவையின் கோபம் என்ன என்பதை கண்டுபிடிக்க முடியவில்லை.                                               — ஜோல்னா பையன்.

(3) ஆன்லைனில், “பேய்கள் ஏலம்’  2 லட்சம் பேர்  போட்டா போட்டி!
ஆன்லைனில், சோப்பு, சீப்பு முதல் கம்ப்யூட்டர்  வரை வாங்கலாம்; பேயை வாங்க முடியுமா? என்னாது பேயா… என்று டென்ஷன் ஆகிட்டீங்கல்ல… உண்மை தான்.  நியூசிலாந்து நாட்டை சேர்ந்த பெண் ஆவி உட்பரி; (அவர் பெயரிலும் ஆவி!) தன் வீட்டில் பேய்கள் இருப்பதாக, பேய் ஓட்டும் பூசாரிகளை அழைத்து, இரு குப்பிகளில் தண்ணீர் பிடித்து அதில் அடக்கி வைத்தார்.  “இந்த குப்பிகளின் மூடியை மட்டும்  திறந்து விடாதீர்கள், திறந்தால் நாங்கள் பொறுப்பல்ல; மீண்டும் வீட்டை ஆவிகள் சுற்றி வரும்…’ என்று பூசாரிகள் எச்சரித்து விட்டுச் சென்றனர்.  கம்ப்யூட்டர் மூளையுள்ள இந்த பெண், ஒரு ஐடியா செய்தார். வெப்சைட் ஒன்றில், “என்னிடம் இரு குப்பிகளில்  ஆவிகள் உள்ளன; அவற்றை ஏலம் விடத் தயார். அதிக தொகை கேட்போருக்கு தரப்படும்…’ என்று விளம்பரம் செய்தார்.  இதை படித்து விட்டு சிலர் பயந்தனர்; ஆனால், ஏகப்பட்ட பேர் வரவேற்றனர். மொத்தம் இரண்டு லட்சம் பேர், ஏலத்தில் பங்கேற்றனர்.ஒரு லட்சம் ரூபாய் கொடுத்து, எலக்ட்ரானிக் சிகரட் கம்பெனி உரிமையாளர் ஏலத்தில் எடுத்தார். ஏலத்தில் விட்டதும் தான் உட்பரிக்கு நிம்மதியே வந்தது.”என் வீட்டில் அலைந்து கொண் டிருந்த வரை, எனக்கு இந்த ஆவிகளால் தூக்கமே இல்லை. தினமும் ஏதாவது ஒரு அறையில் பொருட்களை அலங்கோலப் படுத்தி விடும்; சில சமயம், அமைதியாக இருக்கும். என்னால், அவற்றுடன் நட்பாக போக முடியவில்லை. குப்பிகளில் அடைத்த நாளில் இருந்து, எந்த சத்தமும் இல்லை. ஆனால், குப்பிகளில் தண்ணீர் அலைந்து கொண்டே இருக்கும்; ஆவிகள் படுத்தும் பாடு தான் என்று உணர்ந்தேன்!’ என்றார் உட்பரி.   இதில் தமாஷ் என்னவென்றால், இதை ஏலத்தில் வாங்கியவர் , உள்ளூர் பத்திரிக்கைகளில் ஒரு விளம்பரம் கொடுத்துள்ளார்.  அதில் என்ன சொல்லியுள்ளார் தெரியுமா?  “என்னிடம் இரு ஆவிகள் உள்ளன. அவற்றை எந்த வழியில் பயனுள்ளதாக செய்ய முடியும் என்பதற்கு, நீங்கள் ஐடியா தர முடியுமா? தந்தால் பரிசு உண்டு!’ உங்களிடம் ஐடியா இருக்கா?

மனித உருவில் ஆட்டுக்குட்டி காண மக்கள் கூட்டம்

ஆத்தூர் அருகே, மனித உருவில் இறந்தே பிறந்த ஆட்டுக்குட்டியை ஏராளமானோர் பார்த்து வியந்தனர். சேலம் மாவட்டம், ஆத்தூர் நகராட்சி பைத்தூர் ரோடு பகுதியை சேர்ந்தவர் வெற்றிவேல். 50க்கும் மேற்பட்ட வெள்ளாடுகளை வளர்த்து வருகிறார். நிறைமாத சினையாக இருந்த ஆடு, நேற்று அதிகாலை 5 மணியளவில் கடும் சிரமத்துடன் குட்டியை ஈன்றது. பிறந்த ஆட்டுக் குட்டி மனித உருவத்தில் இறந்தே பிறந்ததை கண்ட வெற்றிவேல் அதிர்ச்சியடைந்தார். ஆட்டுக் குட்டியின் உடலில் முடிகள் இல்லை. ரப்பர் பொம்மை குழந்தை போல காணப்பட்டது. தகவலறிந்த அப்பகுதியினர், அதிசய ஆட்டுக் குட்டியை வியப்புடன் பார்த்துச் சென்றனர். கால்நடை மருத்துவ ஆய்வாளர் சேகரன், ஆட்டுக்குட்டியின் உடலை ஆத்தூர் கால்நடை மருத்துவமனைக்கு பரிசோதனைக்கு எடுத்து சென்றார்.

கால்நடை மருத்துவர் தேவேந்திரன் கூறியதாவது: ஒரே வகையான கிடா ஆடு மூலம் பெட்டை ஆடுகளுக்கு இனவிருத்திக்காக கருவூட்டல் செய்கின்றனர். மரபணு கோளாறு காரணமாக உடல் முழுவதும் நீர் நிரம்பி, ரப்பர் போன்ற குட்டி பிறந்துள்ளது. ஆடு சினை பிடிப்புக்கு வேறு கலப்பின கிடாவை பயன்படுத்த வேண்டும். மனித இனத்தில் நெருங்கிய உறவு முறையில் திருமணம் செய்தால் குறைபாடு உள்ள குழந்தைகள் பிறப்பது போல, ஆடுகளுக்கும் இனவிருத்தியில் குறைபாடு ஏற்படும். ஆத்தூரில் பிறந்த ஆட்டுக் குட்டி மனித உருவத்தில், ரப்பர் குழந்தை போல் உள்ளதால் பரிசோதனை செய்யவுள்ளோம். இவ்வாறு தேவேந்திரன் கூறினார்.

வேர்ட் டிப்ஸ்-27.6.2010

அட்டவணை செல்களை இணைக்கவும் பிரிக்கவும்:
வேர்டில் டேபிள் ஒன்றை உருவாக்குகிறீர்கள். திடீரென்று ஏதேனும் ஓர் இடத்தில் இந்த இரண்டு செல்களையும் பிரித்துக் காட்டுவதற்குப் பதிலாக இணைந்திருந்தால் நன்றாக இருக்குமே என்று எண்ணுகிறீர்களா? இதை மெர்ஜ் செல் (Merge Cells) என்று கூறுகிறார்கள். எப்படி இந்த செல்களை மட்டும் இணைப்பது? என்று யோசிக்கிறீர்களா?
அதே போல ஏதேனும் ஒரு செல்லை சிறு பிரிவுகளாக அமைத்தால் நன்றாக இருக்குமே என்று எண்ணுகிறீர்களா? இது ஸ்பிளிட் செல் என்று அழைக்கப்படுகிறது. இவற்றை எப்படி மேற்கொள்வது என்று இங்கு பார்க்கலாம்.
முதலில் செல்களை இணைப்பது, (மெர்ஜ் செய்வது) எப்படி என்று பார்ப்போம். இங்கு இணைப்பது என்பது இரண்டு அல்லது அதற்கும் மேலே உள்ள செல்களின் இடையே உள்ள கோடுகளை எடுத்து ஒரே பெரிய செல்லாக அமைப்பது. முதலில் எந்த செல்களை மெர்ஜ் செய்திட வேண்டுமோ அவற்றை செலக்ட் செய்திடவும். மவுஸ் பட்டனை அழுத்திப் பிடித்து தேவையான செல்கள் செலக்ட் ஆகும் வரை வைத்திருந்து பின் விடுவிக்கவும். இப்போது அந்த செல்கள் தேர்ந்தெடுக்கப்பட்டிருக்கும். பின் டேபிள் (Table) மெனு சென்று (Merge Cells) என்ற ஆப்ஷனை மவுஸால் தட்டவும். அல்லது டேபிள் மீதாக ரைட் கிளிக் செய்து அதில் Merge Cells ன்பதனைத் தேர்ந்தெடுத்து கிளிக் செய்திடவும். இப்போது பல செல்கள் ஒன்றாக இணைந்து ஒரே கட்டமாக ஆவதனைப் பார்க்கலாம்.
இனி அடுத்து ஸ்பிளிட் செய்வது குறித்துப் பார்ப்போம். மெர்ஜ் செல் என்ற செயல்முறைக்கு நேர் எதிரானதுதான் ஸ்பிளிட் செய்வது. ஒன்று அல்லது அதற்கு மேற்பட்ட செல்களைத் தேர்ந்தெடுத்து அவற்றைப் பிரித்து அமைப்பதுதான் ஸ்பிளிட் செல் ஆகும். இதில் ஒன்றை நீங்கள் தெரிந்து கொள்ள வேண்டும். ஸ்பிளிட் ஆகும் போது சில வேளைகளில் டேபிள் பெரிதாகும். ஏனென்றால் ஒரு செல் குறைந்த பட்சம் ஓர் அளவில் இருக்க வேண்டும். பிரிக்க வேண்டிய செல்களை முன்பு கூறியபடி செலக்ட் செய்திடவும். அதன்பின் Split Cells என்ற பட்டனில் கிளிக் செய்திடவும். இங்கும் டேபிள் மெனு சென்று Split Cells ஆப்ஷன்ஸ் தேர்ந்தெடுத்து கிளிக் செய்திடவும். அல்லது ரைட் கிளிக் செய்து கிடைக்கும் மெனுவில் Split Cells மீதாகக் கிளிக் செய்திடவும். இப்போது ஸ்பிளிட் செல் விண்டோ ஒன்று திறக்கப்படும். இதில் நீங்கள் தேர்ந்தெடுத்துள்ள செல்லின் உள்ளாக எத்தனை படுக்கை வரிசை (number of rows) மற்றும் நெட்டு வரிசை (number of columns) இருக்க வேண்டும் என்பதனைத் தரவும். பிறகு அந்தக் கட்டத்தில் ஓகே கிளிக் செய்திடவும்.
வேர்டில் காப்பி – ஒரு புது வழி:
வேர்டில் டாகுமெண்ட்களை உருவாக்கிக் கொண்டிருக்கையில், எதனையேனும் காப்பி செய்திட நாம் கிளிப் போர்டு காப்பி வழியைப் பயன்படுத்துகிறோம். காப்பி செய்திட வேண்டிய டெக்ஸ்ட் அல்லது ஆப்ஜெக்டைத் தேர்ந்தெடுத்த பின்னர், அதனைக் காப்பி செய்திடுகையில் அது கிளிப் போர்டுக்குச் செல்கிறது. பின் அதனை நாம் விரும்பும் இடத்தில் ஒட்டுகிறோம். அடுத்து ஒன்றை மீண்டும் காப்பி செய்கையில், கிளிப் போர்டில் ஏற்கனவே காப்பி செய்யப்பட்டது நீக்கப்பட்டு, புதிய டெக்ஸ்ட் அமர்ந்து கொள்கிறது.
இது போன்ற சூழ்நிலையில், கிளிப் போர்டில் இருப்பதனை நீக்காமல், மேலும் ஒரு டெக்ஸ்ட்டை காப்பி செய்து, இன்னொரு இடத்திற்கு நகர்த்தவோ அல்லது ஒட்டவோ விரும்பினால் என்ன செய்யலாம்?
அதற்கான வழி ஒன்றினை வேர்ட் தருகிறது. இதன் மூலம் கிளிப் போர்டின் உதவி இல்லாமல், ஒன்றை காப்பி செய்து ஒட்டலாம்.
1. எந்த டெக்ஸ்ட்டை காப்பி செய்திட வேண்டுமோ அதனை முதலில் தேர்ந்தெடுக்க வேண்டும்.
2. அடுத்து ஷிப்ட் + எப் 2 கீகளை அழுத்த வேண்டும். ஸ்டேட்டஸ் பாரில் Copy to where? என்ற செய்தி காட்டப்படும்.
3. அடுத்து கர்சரின் இடைச்செருகும் பாய்ண்ட்டரை, எந்த இடத்தில் காப்பி செய்திடும் டெக்ஸ்ட்டை ஒட்ட வேண்டுமோ, அங்கு எடுத்துச் சென்று அமைத்திட வேண்டும்.
4. பின் என்டர் தட்டினால், டெக்ஸ்ட் காப்பி செய்யப்பட்டு, அங்கு ஒட்டப்படும். இந்த வேலை நடைபெறுகையில், ஏற்கனவே காப்பி செய்யப்பட்டு கிளிப் போர்டில் உள்ள டெக்ஸ்ட் அல்லது ஆப்ஜெக்ட் அங்கேயே இருக்கும்.
எத்தனை சொற்கள் இதுவரை?
வேர்ட் டாகுமென்ட் ஒன்றில் எத்தனை சொற்களை நீங்கள் அமைத்திருக்கிறீர்கள் என்று தெரிய வேண்டுமா? தொடர்ந்து அவ்வப்போது இதனை செக் செய்திட வேண்டுமா? இதற்கு View | Toolbars   என்று சென்று அதில்  Word Count என்பதனைத் தேர்ந்தெடுக்கவும். இந்த டூல்பாரை அப்படியே மவுஸால் அழுத்திப் பிடித்து ஏற்கனவே இருக்கும் டூல்பாரின் வலது பக்கத்திற்குக் கொண்டு சென்று உங்கள் திரையின் மேலாக விட்டுவிடவும். வேர்ட் கவுண்ட் டூல் பார் அங்கேயே இருக்கும். எத்தனை சொற்களை நீங்கள் பயன்படுத்தி இருக்கிறீர்கள் என்று காட்டும் விண்டோ வினையும் நீங்கள் உங்களுக்குத் தேவையான அளவிற்கு மாற்றலாம். இதற்கு Tools | Customize | Toolbars என்று சென்று கிடைக்கும் விண்டோவை மாற்றி அமைத்துக் கொள்ளலாம். கஸ்டமைஸ் டயலாக் பாக்ஸில் இருக்கும்போது அளவை மாற்றும் பணியை மேற்கொள்ளலாம். இனி எப்போது சொற்களின் எண்ணிக்கை தெரிய வேண்டும் என்றாலும் டூல்பாரில் உள்ள Recount பட்டனில் கிளிக் செய்து கிடைக்கும் விண்டோவில் தெரிந்து கொள்ளலாம்.

மன்னனின் உயிரைக் காத்த மகேசன்

பல ஆண்டுகளுக்கு முன்பு வீரபாகு என்ற மன்னன் பாண்டிய நாட்டை ஆண்டு வந்தான். இவன் இரவில் தலைநகரை காவல்காக்கும் பொறுப்பையும் ஏற்று இருந்தான். குறிப்பாக, வெளியூர் செல்பவர்களின் வீடுகளை கூடுதலாக காவல்காத்து வந்தான்.

ஒருநாள் வழக்கம்போல் வீரபாகு பாண்டியன் காவல் பணியில் இருந்த போது, வெளியூர் சென்ற அந்தணர் ஒருவர் நள்ளிரவில் வீடு திரும்பினார். அவரை திருடன் என்று கருதிய பாண்டிய மன்னன் அவரை கொன்று விட்டான்.

இதனால் பிரம்மஹத்தி தோஷத்துக்கு மன்னன் ஆளானான். மேலும், அவனது நாட்டிலும் குழப்பம் ஏற்பட்டது. இந்த நிலையை பயன்படுத்தி சோழமன்னன் விக்ரமன், பாண்டிய நாட்டின் மீது படையெடுத்தான். இதனால் பெரும் கவலை அடைந்த பாண்டிய மன்னன் வீரபாகு, இறைவனை வேண்டினான்.

அன்றிரவே அவன் கனவில் தோன்றிய சிவபெருமான், `சோழனை எதிர்த்து நீ போரிடு, அப்போது நானும், எமது பூதக்கணங்களும் உதவுவோம்’ என்று கூறினார். அதன்படி படை நடத்தி சென்ற பாண்டிய மன்னன் போரில் வெற்றி பெற்றான். ஆனாலும் சோழ மன்னன், பாண்டிய மன்னனுக்கு தொடர்ந்து பல இன்னல்கள் செய்து வந்தான்.

போரில் வெல்ல முடியாத பாண்டிய மன்னனை, சூழ்ச்சியால் வீழ்த்த நினைத்தான். பாண்டியனை கொல்லும் எண்ணத்தோடு, ஒரு நச்சாடையை (நஞ்சு கலந்த ஆடை) தயார் செய்து தூதுவன் முலம் அனுப்பி வைத்தான்.

இதையறிந்த சிவபெருமான், பாண்டியன் கனவில் தோன்றி, `தூதுவன் கொண்டு வரும் ஆடையை திருக்குளத்தில் நீராடியதும் அணிய வேண்டாம். அதை ஒரு கம்பால் எடுத்து தூதுவன் மேலே போர்த்தி விடு’ என்று கூறினார்.

அதன்படியே தூதுவன் கொண்டுவந்த நச்சாடையை அவன் மேலேயே போர்த்திய தனது உயிரை காத்து கொண்டான் பாண்டிய மன்னன். அவனுக்கு நச்சாடையால் ஏற்பட இருந்த தீமையை போக்கிய ஈசன் `நச்சாடை தவிர்த்தருளிய சுவாமி’ என்று அழைக்கப்படுகிறார்.

இக்கோவில் விருதுநகர் மாவட்டம் ராஜபாளையம் அருகே உள்ள தேவதானம் என்ற இடத்தில் அமைந்துள்ளது. இங்குள்ள அம்மன், தவம்பெற்றநாயகி என்று அழைக்கப்படுகிறார்.

இப்பகுதி மக்களால் பெரிய கோவில் என்று அழைக்கப்படும் இக்கோவில், தென் தமிழகத்தின் பஞ்சபூதத் தலங்களில் ஆகாயத் தலமாக திகழ்கிறது.

இக்கோவில் கொடி மரத்துக்கு முன்பு தனிக்கல்லில் செதுக்கப்பட்டுள்ள ஆமையின் உருவம் சிறப்பானதாக கருதப்படுகிறது. ஆபத்து வரும் காலத்தில் ஆமை தனது உறுப்புகள் ஐந்தையும் உள்ளிழுத்து தன்னை காப்பாற்றி கொள்ளும். அதைப்போல, இக்கோவிலுக்கு வரும் பக்தர்கள், தங்களது ஐந்து பொறிகளையும் அடக்கி ஆசாபாசங்களை கட்டுப்படுத்தி செல்லவேண்டும் என்பதை குறிப்பால் தெரிவிக்கும் பொருட்டே, ஆமையை இங்கு பீடத்தில் பதித்துள்ளதாக தெரிகிறது.