Daily Archives: மே 13th, 2011

இந்தியாவின் `மணக்கும்’ நகரம்!

இந்தியாவின் `மணக்கும்’ நகரம்!

`இந்தியாவின் மணக்கும் நகரம்’ என்று கன்னுஜ் நகரத்தை அழைக்கிறார்கள். ஏனென்றால் உலகத்தரம் வாய்ந்த வாசனைத் திரவியங்களில் பெருமளவு இங்கே தயாரிக்கப்படுகிறது. உத்தரபிரதேச மாநிலத்தின் மையத்தில் அமைந்துள்ள கன்னுஜ் நகரத்தில் எங்கே பார்த்தாலும் மல்லிகை மற்றும் ரோஜா மலர்கள் மணம் வீசுகின்றன.

மணம் வீசும் கன்னுஜ் நகரத்தில் சுற்றுப் பயணம் மேற்கொண்ட எழுத்தாளர் ஒருவர் தனது அனுபவத்தை இப்படி கூறுகிறார்.

“என்னுடைய தோழி ஒருத்தியின் பாட்டி வீடு கன்னுஜ் நகரத்தில் இருந்தது. நான் அங்கே சென்றபோது அந்த பாட்டி என்னை வரவேற்று, ஒரு சென்ட் பாட்டிலை தந்தார். நான் அதை திறந்தவுடனேயே சந்தன மணம் என்னைத் தழுவிக் கொண்டது. நீண்ட நேரம், அந்த மென்மையான மணமும், அது தந்த புத்துணர்வும் என்னை பரவசத்தில் ஆழ்த்தின. இத்தனை சிறப்பு மிகுந்த சென்ட்டை அங்கே எப்படி தயாரிக்கிறார்கள் என்பதை தெரிந்து கொள்ளும் ஆர்வம் எனக்கு ஏற்பட்டது. உடனடியாக அதற்குரிய விடை காண முயற்சித்தேன். அந்த மணத்துக்கு அடிப்படை காரணம் கங்கை மற்றும் காளி நதி நீர்தான் என்று தெரிந்து கொண்டேன்.

கன்னுஜ் நகரத்தின் வரலாற்றுப் பின்னணியும் சிறந்த சென்ட் தயாரிப்பதற்கு ஒரு காரணம் என்பதை தெரிந்து கொண்டேன். அந்த பகுதியை அரசாண்ட சக்கரவர்த்தியான ஹர்ச வர்தன் கி.பி.600-ம் ஆண்டில் பெர்பியூம் உருவாவதற்கு அடித்தளமிட்டிருக்கிறார். ஹர்சருக்கு வாசனை திரவியங்கள் மற்றும் அழகு சாதனங்கள் மீது அதிக ஆர்வம் இருந்துள்ளது. அதனால் அவைகளை தயாரிக்க ஊக்குவித்தார். நிறைய சலுகைகளும் வழங்கினார். மேலும் இதற்கான மூலப்பொருட்களை வெளிநாடுகளிலிருந்து வரவழைத்தார். தன்னை சந்திக்க வரும் விருந்தினர்களுக்கு சிறந்த வாசனை திரவியங்களை பரிசளித்துள்ளார். இதனால் அங்கே வாசனை திரவியங்கள்தயாரிக்கும் தொழில் வளர்ந்தது. இதன் மூலம் சென்ட் மட்டுமின்றி வாசனை சோப் மற்றும் வாசனை பொருட்களும் உருவாக்கப்பட்டன. இதன் மூலம் உலகம் முழுவதும் கன்னுஜ் நகரத்தின் புகழ் மணம் பரவியுள்ளது.

கன்னுஜ் நகரத்தில் வாசனை திரவியங்களை தயாரிக்கும் 650 நிறுவனங்கள் உள்ளன. அதில் ஒரு நிறுவனத்தைச் சேர்ந்த புஷ்ப்ராஜ் ஜெயின் என்பவரை சந்தித்தேன். அவர் வாசனை திரவியங்கள் தயாரிக்கும் தொழில் ரகசியங்களை என்னிடம் கூறினார். அவற்றை உருவாக்க கையாளும் சூட்சுமத்தையும் விவரித்தார். ரோஜா, மல்லிகை மற்றும் சந்தனம் ஆகியவற்றிலிருந்து சாறு எடுத்து, அதனை `சென்ட்’ ஆக மாற்றும் விதத்தையும் விளக்கினார். நவீன கால சென்ட்களைவிட, பாரம்பரிய வாசனை திரவியங்கள்தான் சிறந்தவை என்றும் தெரிவித்தார்.

அடுத்து அருகில் இருந்த விஜய் மார்க்கெட் என்றழைக்கப்படும் பிரதான சந்தைக்கு சென்றேன். அங்கே ஒவ்வொரு கடையிலும் விதவிதமான மணங்களைக் கொண்ட சென்ட்கள் உள்ளன. மேலும் அங்கே வித்தியாசமான உணவு வகைகள், லஸ்ஸி மற்றும் ரோஸ் வாட்டர் ஆகியவை பிரபலமாக உள்ளன. அவை ஒவ்வொன்றையும் அவர்கள் மிகச் சிறந்த முறையில் தயாரிக்கிறார்கள்.

அங்குள்ள சித்தேஸ்வரர் கோவில் 500 ஆண்டுகளுக்கு பழமையானது. இந்த சிவன் கோவிலின் தோற்றமும், கட்டமைப்பும் நகரத்தின் பழமை மற்றும் பாரம்பரியத்தை பறைசாற்றுகின்றன. கங்கை நதியின் அழகும், அதைச் சுற்றியுள்ள பகுதியின் பசுமையும் நமது மனதுக்கு இதமான அனுபவத்தை தருகிறது. அத்தர், சந்தனம், மல்லிகை மற்றும் ரோஜா மணம் கலந்த காற்றும், அதன் வாசமும் ஆத்மாவுக்கு இதமாக இருக்கின்றன” என்று நெகிழ்கிறார் அவர். உலகப் புகழ் பெற்ற வாசனை திரவியங்களும், ஆன்மிக சிறப்புகளும், கங்கையின் அழகும் நிறைந்த இந்த மணக்கும் நகரத்தை, எல்லோரும் பார்த்து ரசிக்க வேண்டும்தான்!

எக்ஸெல்: வாட்ச் விண்டோ

பார்முலாக்களைப் பயன்படுத்துவது எக்ஸெல் ஸ்ப்ரெட் ஷீட்டில் ஓர் அத்தியாவசிய செயல்பாடாகும். பார்முலாக்கள் அதிகமாகும்போது எந்த பார்முலா, எந்த செல்களையெல்லாம் இயக்கும் என்பதனைப் பல வேளைகளில் நம் நினைவில் வைத்துக் கொள்ள இயலாமல் போய்விடும். சில வேளைகளில் செல்களில் மதிப்புகளைத் தருகையில் இந்த பார்முலாக்கள் ஒன்றுக்கொன்று தொடர்புடையதாய் கணக்குகளை மேற்கொண்டு முடிவு களை செல்களில் அமைக்கும்படி ஏற்பாடு செய்திருப்போம். இதனால் புதிய பார்முலாக்கள் அமைக்கையில் அவை தொடர்பு டைய செல்களில் சரியாகச் செயலாற்றி விடைகளைத் தருகிறதா என்பதைக் கண் காணிக்க பல இடங்களில் உள்ள செல்களுக்குச் சென்று பார்க்க வேண்டியதிருக்கும். சில நேரங்களில் தவறான செல்களைப் பார்த்து தவறான தகவல்கள் மற்றும் பார்முலாக்களைத் தரும் சந்தர்ப்பங்களும் ஏற்படுவதுண்டு. இவற்றைத் தவிர்க்க எக்ஸெல் தொகுப்பு தரும் வசதி தான் எக்ஸெல் வாட்ச் விண்டோ.
அடுத்தடுத்து எக்ஸெல் பார்முலாக்கள் கணக்கிடுவதனைக் கண்காணிக்க நமக்குக் கிடைத்திருக்கும் வசதிதான் வாட்ச் விண்டோ. நாம் செல்களின் மதிப்பை மாற்றும்போதெல்லாம் சம்பந்தப்பட்ட செல்களில் என்ன மாறுதல்கள் ஏற்படுகிறது என்று நமக்குக் காட்டும் ஜன்னல் தான் இந்த வாட்ச் விண்டோ. இதனால் நாம் ஒவ்வொரு செல்லுக்கும் தாவிச் சென்று கண்காணிக்கும் வேலை மிச்சமாகிறது. இந்த வாட்ச் விண்டோவினை அமைத்திட முதலில் Tools மெனு சென்று அதில் துணை மெனுவான Formula Auditing என்பதனைத் தேர்ந்தெடுக்க வேண்டும். பின் அதில் உள்ள Show Watch Window என்பதனைக் கிளிக் செய்திட வேண்டும். Formula Auditing விண்டோவில் கண் கண்ணாடி படத்துடன் உள்ள சிறிய பிரிவுதான் Watch Window. இதனை கிளிக் செய்தவுடன் நமக்கு வாட்ச் விண்டோ கிடைக்கும். இப்போது எந்த செல்லில் உள்ள பார்முலா செயல்படுவதனைக் கவனிக்க விரும்புகிறீர்களோ அதனைத் தேர்ந்தெடுத்து Add Watch என்னும் பட்டனை அழுத்த வேண்டும். இப்போது வாட்ச் விண்டோவில் பார்முலா சம்பந்தப்பட்ட செல்கள் அவற்றின் மதிப்பு, கணக்கிடப்பட்ட விடை ஆகியவை தெரியும். இதே போல எந்த பார்முலாக்களின் செயல்பாடுகளைக் கண்காணிக்க விரும்புகிறீர்களோ அவற்றை வரிசையாகத் தேர்ந்தெடுத்து Add பட்டனை அழுத்தினால் அவை அனைத்தும் Watch விண்டோவில் சேர்க்கப்படும். இந்த விண்டோனை மானிட்டரின் எந்த மூலையிலும் வைத்துக் கொள்ளலாம். இனி செல்களில் மதிப்புகளை மாற்றும் போதெல்லாம் இந்த பார்முலாக்கள் மூலம் எந்த செல்களில் மதிப்புகள் மாறுகின்றன என்று இந்த ஒரே விண்டோவில் கண்காணிக்கலாம். ஏதாவது ஒரு பார்முலா செயல்படுவதனைக் கண்காணிக்க விரும்ப வில்லை என்றால் அதனை மட்டும் தேர்ந்தெடுத்து Delete Watch button ஐ அழுத்தி நீக்கிவிட்டு மற்ற பார்முலாக்களின் செயல் பாடுகளைக் கண்காணிக்கலாம். ஒவ்வொரு செல்லுக் காய் மவுஸ் மூலம் ஓடி ஓடிப் பார்ப்பதனைத் தவிர்த்து ஒரே ஜன்னலில் அனைத்தையும் கண் காணிப்பது எவ்வளவு எளிது பாருங்கள்.