Daily Archives: செப்ரெம்பர் 8th, 2012

செக்ஸ் என்னெல்லாம் கொடுக்குது தெரியுமா…?

செக்ஸ் குறித்து வயது வந்த அனைவருக்குமே நன்றாகவே தெரிந்திருக்கும். எல்லாம் தெரிந்த ஏகாம்பரம் என்று இங்கு யாரும் இல்லை. இருந்தாலும் ஓரளவாவது தெரிந்து வைத்திருப்பார்கள் அனைவருமே.

செக்ஸ் குறித்த விழிப்புணர்வை ஒவ்வொருவரும் ஒருவரிடமிருந்து பெறுகிறார்கள். தாய் தந்தையிடமிருந்து சிலருக்கு இதுகுறித்துத் தெரிய வரும்.
ஆசிரியர்களிடமிருந்து சிலருக்குத் தெரிய வரும். நண்பர்கள் மூலம் தெரிய வரும். சிலருக்கு புத்தகங்கள், இன்டர்நெட் மூலம் தெரிய வந்திருக்கும்.

செக்ஸ் உறவின் மூலம் நமக்கு உடல் ரீதியான இன்பம் மட்டுமே கிடைக்கிறது என்றே பலரும் நினைத்துக் கொண்டிருக்கிறார்கள். ஆனால் மறைமுகமாக பல நல்ல விஷயங்களையும்,அது நமது உடலுக்கும், மனதுக்கும் கொடுக்கிறது. அது குறித்த ஒரு ரவுண்டப்தான் இது…

 

பதட்டத்தைக் குறைக்கிறது செக்ஸ்

செக்ஸ் உறவு கொள்பவர்களுக்கு உடல் ரீதியாகவும், மன ரீதியாகவும் ஏகப்பட்ட நல்லது நடக்கிறதாம். மன அழுத்தம், பதட்டம், மனச் சோர்வு ஆகியவை நீங்குகிறதாம். இதை ஆதாரப் பூர்வமாக, அறிவியல் பூர்வமாக நிரூபித்துள்ளனர்.

செக்ஸ் உறவில் சிறப்பாக ஈடுபட்டு வருவோர், அதில் குறைபாடு உள்ளவர்களை விட மிகவும் ஆரோக்கியமாகவும், ஆக்டிவாகவும் இருப்பார்களாம். அவர்களிடம் குழப்பம், மனச்சோர்வு, மன அழுத்தம், சோம்பேறித்தனம் ஆகியவை இருக்காதாம். எதையும் சுறுசுறுப்பாக தெளிவாக செய்வார்களாம்.

செக்ஸ் உறவின் மூலம் ஆண்களும் சரி பெண்களும் சரி நல்ல நிம்மதியான மன நிலையைப் பெற முடிகிறதாம். அதிக அளவில் உடலுறவு வைத்துக் கொள்வோருக்கு ரத்த ஓட்டம் சிறப்பாக இருக்குமாம். இதனால் அவர்கள் சுறுசுறுப்பாக வேலையைச் செய்ய முடிகிறதாம். எவ்வளவு கடினமான வேலையைக் கொடுத்தாலும் கடகடவென முடித்துத் தள்ளி விடுவார்களாம்.

செக்ஸ் மகிழ்ச்சி தருகிறது

செக்ஸ் என்ற வார்த்தையைக் கேட்டதுமே பலருக்கும் மனதுக்குள் பல லட்சம் பட்டாம்பூச்சிகள் பறப்பது போன்ற பரவச உணர்வு ஏற்படும். அதுதான் செக்ஸ் குறித்த நினைவால் ஏற்படும் மகிழ்ச்சி உணர்வாகும்.

இதுதொடர்பாக நடத்தப்பட்ட ஒரு ஆய்வில், செக்ஸ் தங்களுக்கு பெரும் மன மகிழ்ச்சியையும், சந்தோஷத்தையும் தருவதாக பலரும் தெரிவித்திருந்தனர். செக்ஸ் குறித்த நினைவே தங்களுக்கு பெரும் ஊக்கத்தைத் தருவதாகவும், இன்று இரவு விருந்து உண்டு என்பது உறுதியாகும்போது அளவு கடந்த மகிழ்ச்சியுடன் பல வேலைகளையும் இழுத்துப் போட்டுச் செய்வோம் என்றும் அவர்கள் கூறியுள்ளனர்.

உடல் ரீதியான பிணைப்பு, உள்ளத்தையும் சேர்த்து மகிழ்ச்சிப்படுத்துவதே இதற்குக் காரணம் என்பது ஆய்வாளர்களின் கருத்து. மேலும், வாரம் 3 முறைக்கு மேல் உறவு வைத்துக் கொள்வோருக்கு மன மகிழ்ச்சி அளவுக்கதிகமாக இருக்குமாம்.

நோய்களை விரட்டும் செக்ஸ்…

செக்ஸ் ஒரு மருந்தாகவும் செயல்படுகிறது. தொடர்ச்சியாக செக்ஸ் வைத்துக் கொள்வோருக்கு சளி, காய்ச்சல் போன்றவை அண்டவே அண்டாதாம். செக்ஸ் உறவில் தொடர்ந்து ஈடுபட்டு வரும்போது உடலில் நோய் எதிர்ப்புச் சக்தி அதிகமாகி ஆரோக்கியமாக திகழ முடியுமாம்.

வாரம் 2 முறை உறவு வைத்துக் கொள்வோரின் உடலில் இம்யூனோகுளோபுலின் ஏ அல்லது ஐஜிஏ என்ற நோய் எதிர்ப்புத் திறன் அதிகமாக சுரக்கிறதாம். இந்த ஐஜிஏ, நமது எச்சிலில் அதிக அளவு இருக்கிறது. எச்சில் மூலமாகத்தான் பல நோய்களும் பரவுகின்றன என்பது குறிப்பிடத்தக்கது. எனவே செக்ஸை தொடர்ந்து கடைப்பிடித்து வருவோருக்கு எச்சிலில் ஐஜிஏ சுரப்பு அதிகமாகிறதாம். இதனால் பல நோய்கள் நமது உடலுக்குள் ஊடுறுவ முடியாமல் திரும்பிப் போய் விடுகின்றனவாம்.

செக்ஸ் ஒரு நல்ல வலி நிவாரணி

செக்ஸ் உறவைத் தொடர்ந்து மேற்கொண்டு வரும்போது உடல் வலி உள்ளிட்ட பல்வேறு வலிகளும் ஓடிப் போகின்றனவாம். ஒரு நல்ல வலி நிவாரணியாக செக்ஸ் திகழ்கிறதாம்.

பெண்களுக்கு ஆர்கசம் ஏற்படும்போது அது இன்பத்தை மட்டும் வாரி வழங்குவதில்லை, மாறாக உடலுக்கு நல்ல ரிலாக்சேஷனையும் சேர்த்தேத் தருகிறதாம். எப்படிப்பட்ட உடல் வலி, அசதியாக இருந்தாலும், நல்லதொரு செக்ஸ் உறவை வைத்துக் கொண்டால் அது ஓடிப் போய் விடுமாம்.

மேலும் செக்ஸ் உணர்வுகள் பெருக்கெடுக்கும்போது உடலில் உள்ள அசதி முழுமையாக நீங்கி புத்துணர்ச்சி கிடைக்கிறதாம். பெண்களின் அந்தரங்க உறுப்பில் செக்ஸ் உணர்வுகள் தூண்டப்படும்போது, அவர்களுக்கு உடலெல்லாம் மசாஜ் செய்து விட்டதைப் போல ஒரு புத்துணர்ச்சி உருவாகிறதாம்.

இதயத்தை பாதிக்குது இன்ஸ்டன்ட் உணவு!

ht1348 உடனடி உணவுகளை அடிக்கடி சாப்பிடுவதை வழக்கமாகக் கொண்டவர்களில் நீங்களும் ஒருவரா? உங்கள் இதயம், சிறுநீரகம், மூளை உள்ளிட்ட உடல் உறுப்புகள் பழுதடைந்தால் சிகிச்சை எடுத்துக்கொள்ள, இப்போதே சேமிக்கத் தொடங்குங்கள். மொட்டைத் தலைக்கும், முழங்காலுக்கும் முடிச்சு போடுவதாக நினைக்க வேண்டாம்!
பிரியாணியிலிருந்து பீட்ஸா வரை
சாம்பாரிலிருந்து சட்னி வரை
இட்லியிலிருந்து இடியாப்பம் வரை
எதை வேண்டுமானாலும் நொடியில் வீட்டிலேயே ருசிக்கலாம் இன்று. மளிகை சாமான்களால் நிரம்பியிருந்த பல வீட்டு சமையலறைகளிலும், இன்று இன்ஸ்டன்ட் உணவு மயம்! பாக்கெட்டை வாங்கினோமா, பிரித்து சூடாக்கினோமா… உடனே சாப்பிடலாம். ‘சமைக்க வேண்டாம்… அப்படியே சாப்பிடலாம்’ என வசீகரிக்கிற இந்த உடனடி உணவுகளுக்குள் ஒளிந்திருக்கும் கேடுகள் பற்றிப் பலருக்கும் தெரிந்திருக்க வாய்ப்பில்லை.
இதுபற்றி விளக்கமாகப் பேசுகிறார் பொது மருத்துவர் பத்ரகிரி. ‘‘ரெடிமேட் உணவுகள்ல மறைஞ்சிருக்கிற முதல் ஆபத்து கொழுப்பு. ‘டிரான்ஸ்ஃபேட்’னு சொல்லக் கூடிய இது, உணவுப்பொருள்கள் சீக்கிரம் கெட்டுப் போகாமல் இருக்க உதவும். இது ரத்தத்துல உள்ள கெட்ட கொழுப்பை அதிகரிக்கச் செய்து, அதன் விளைவா இதய நோய்களுக்கு அஸ்திவாரம் போடும். குழந்தைப்பருவ பருமன், ஹைப்பர் டென்ஷன், மாரடைப்புனு பலதுக்கும் காரணமானது இது.
அடுத்த அரக்கன் சோடியம்னு சொல்லப்படற உப்பு. சோடியம் சத்து நம்ம எல்லார் உடம்புக்கும் அவசியம். உடம்புல உள்ள நீர்ச்சத்தை சரிவிகிதத்துல வைக்கவும், தசைகள் சுருங்கி விரியவும், ரத்த அழுத்தத்தை முறைப்படுத்தவும் சோடியம் தேவை. ஒருத்தருக்கு ஒரு நாளைக்கு ஆயிரத்து 500 மில்லி கிராம் அளவு சோடியம் போதுமானது. அந்த அளவைத் தாண்டும்போது ரத்த அழுத்தம் எகிறும். உடனடி உணவுகள்ல உப்பு அதிகமா சேர்க்கப்பட்டிருக்கும். ஆரோக்கியமா இருக்கிறவங்களுக்கே இது ஆபத்தானது. ஏற்கனவே இதயக் கோளாறு இருக்கிறவங்க இந்த உணவுகளை சாப்பிடறப்ப, பிரச்னை இன்னும் தீவிரமாகும்.
மூணாவது ‘ஹை ஃப்ரக்டோஸ் கார்ன் சிரப்’. இனிப்புச் சுவைக்காக சேர்க்கப்படற பிரதான பொருள் இது. உணவுக்கு ஒருவித கவர்ச்சியான பிரவுன் நிறத்தையும் கொடுக்கக்கூடியது. பர்கர் பன், குளிர்பானங்கள், கெட்ச்சப்னு பல உணவுகள்ல சேர்க்கப்படற இது, அதிகம் சாப்பிடத் தூண்டி, இதய நோய்களையும் நீரிழிவையும் வரவழைக்கக்கூடியது.
இந்த உணவுகள் கெடாமல் இருக்கவும், பாக்டீரியா வளராமல் இருக்கவும் இரண்டு விதமான ப்ரிசர்வேட்டிவ் உபயோகிக்கிறாங்க. இயற்கையான ப்ரிசர்வேட்டிவை ‘கிளாஸ் 1’ என்றும், கெமிக்கல் சேர்த்ததை ‘கிளாஸ் 2’ என்றும் சொல்றோம். உப்பு, சர்க்கரை, வினிகர் மாதிரியான இயற்கையான ப்ரிசர்வேட்டிவ்களால பெரிய பாதிப்பு கிடையாது. கெமிக்கல் ப்ரிசர்வேட்டிவ்கள்தான் ஆபத்தானவை. அதுல முதலிடம், சோடியம் பென்ஸோயட்டுக்கு. ஊறுகாய், ஜூஸ் வகையறாக்கள்ல சேர்க்கப்படற இது, அலர்ஜியை உருவாக்கி, மூளையையும் பாதிக்கலாம்.
அடுத்து நைட்ரேட், நைட்ரைட்ஸ். உடனடியா சாப்பிடக் கூடிய அசைவ உணவுகள்ல இது சேர்க்கப்படுது. தொடர்ந்து சாப்பிடறப்ப, வயிறு மற்றும் சிறுநீர்ப்பை புற்றுநோயை வரவழைக்கக்கூடிய அளவுக்கு இது மோசமானது. எல்லாத்தையும் விட, ரெடிமேட் உணவுகள்ல கலோரி எக்கச்சக்கம். அடிக்கடி சாப்பிடறவங்களுக்கு உடல் பருமன் தவிர்க்க முடியாதது’’ என்கிறார் டாக்டர் பத்ரகிரி. இதுபோன்ற உடனடி உணவுகளை வாங்குகிற பழக்கமுள்ள பலரும் தயாரிப்பு, பேக்கிங் மற்றும் காலாவதி தேதிகளை மட்டுமே பார்த்து வாங்குவதையும், அவற்றில் சேர்க்கப்படுகிற மூலப் பொருள்களைக் கவனிப்பதில்லை என்பதையும் குறிப்பிடுகிறார்.
‘‘ரெடி டூ ஈட் உணவுகள்ல ஒரு கெமிக்கலுக்கு மேல சேர்க்கக்கூடாதுனு சட்டமே இருக்கு. ஆனா, அதை யாரும் பொருட்படுத்தறதில்லை. பேக்கிங் சரியில்லாட்டா, பாக்டீரியா தொற்று அதிகமாகி, மொத்த ஆரோக்கியமும் கெட்டுப் போகும். குறைந்தபட்சம் அசைவ அயிட்டங்களையாவது தவிர்க்கலாம். ஏற்கனவே அசைவ உணவுகள்ல உள்ள கொழுப்பு, அதைக் கெடாம வச்சிருக்கறதுக்காக சேர்க்கிற இன்னொரு கொழுப்புன்னு ரெண்டுமே கெடுதல். ஒருவேளை இன்ஸ்டன்ட் உணவுகளை எடுத்துக்கிட்டா, மீதி ரெண்டு வேளைகளும் நிறைய பச்சைக் காய்கறிகள், பழங்கள் எடுத்துக்கணும். நீரிழிவு, ஹைப்பர் டென்ஷன், இதய நோய், உடல் பருமன் உள்ளவங்க இதைத் தொட்டுக்கூட பார்க்க வேண்டாம்’’ என்று எச்சரிக்கிறார்.
எக்ஸ்பிரஸ் வாழ்க்கையில் இதைத் தவிர்க்க முடியவில்லை என்கிறவர்களுக்கு என்னதான் வழி? சமையலை சுலபமாக்கும் டிப்ஸ் சொல்கிறார் சமையல் கலை நிபுணர் ரேவதி சண்முகம்.
1 கப் பருப்புக் கலவைக்கு, அரை கப் அரிசி, காய்ந்த மிளகாய், தேவைக்கேத்த உப்பு சேர்த்து, அப்படியே மிஷின்ல கொடுத்து நைஸ் ரவையா அரைச்சு, சலிக்காம ஸ்டோர் பண்ணி வச்சுக்கலாம். தேவைப்படறப்ப, கொஞ்சம் எடுத்து, தண்ணீர் விட்டு, அரை மணி நேரம் ஊற வச்சு, அடை செய்யலாம். ரவா இட்லி, ரவா தோசை மிக்ஸ்களையும் இந்த மாதிரி செய்து வச்சுக்கலாம்.
கடைகள்ல கிடைக்கிற இஞ்சி-பூண்டு விழுதுல வினிகர் சேர்ப்பாங்க. சம அளவு இஞ்சி, பூண்டு சேர்த்து நாமே அரைச்சு, ஃப்ரிட்ஜ்ல வச்சுக்கிட்டா ஒன்றரை மாசம் வரைக்கும் உபயோகிக்கலாம்.
வெங்காய விழுதையும், இஞ்சி-பூண்டு விழுதையும் எண்ணெய் விட்டு நல்லா வதக்கி, ஃப்ரிட்ஜ்ல வச்சுக்கலாம். தேவைப்படறப்ப கடாய்ல கொஞ்சம் எண்ணெய் விட்டு, இந்த விழுது சேர்த்து, தக்காளி, மிளகாய்த் தூள், உப்பு போட்டு, வேக வச்ச சன்னா சேர்த்தா, இன்ஸ்டன்ட் சன்னா மசாலா ரெடி.
சப்பாத்தி மாவைப் பிசைஞ்சு, கிளிங் ஃபிலிம்ல சுத்தி ஃப்ரிட்ஜ்ல வச்சா, நாலஞ்சு நாளைக்கு அப்படியே இருக்கும். அதையே சப்பாத்தியா இட்டு, அரை வேக்காடு வேக வச்சு, ஒவ்வொரு சப்பாத்திக்கு இடைலயும் பட்டர் பேப்பர் வச்சும் பத்திரப்படுத்தலாம். தேவைப்படறப்ப எடுத்து வாட்டி சாப்பிடலாம்.
பழைய புளி, புதுப்புளி சம அளவு எடுத்து 1 டேபிள்ஸ்பூன் உப்பு சேர்த்து, பிரஷர் குக்கர்ல வச்சு எடுத்து, அரைச்சு, ஆற வச்சு ஃப்ரிட்ஜ்ல வச்சுக்கிட்டா, புளி பேஸ்ட் ரெடி. புளி கரைக்கிற டென்ஷன் இல்லாம, இதை அப்படியே உபயோகிக்கலாம்.

விண்டோஸ் 8 சிஸ்டத்தின் எக்ஸ்புளோரர்

புதிதாய் வந்துள்ள விண்டோஸ் 8 ஆப்பரேட்டிங் சிஸ்டத்தின் விண்டோஸ் எக்ஸ்புளோரர் பல புதிய வசதிகளுடன் அமைக்கப்பட்டுள்ளது. அவை இங்கு பட்டியலிடப்படுகின்றன.
1.அதிக வசதிகளுடன் எக்ஸ்புளோரர்: ஒரு போல்டர் அல்லது பைல் தேர்ந்தெடுத்து என்ன என்ன செயல்பாடுகளை மேற்கொள்வோமோ, அவை அனைத்தும் தனித்தனியாக பல பட்டன்களில் இயங்கும் வகையில் தரப்பட்டுள்ளது. காப்பி மற்றும் பேஸ்ட் வசதியிலிருந்து, அட்வான்ஸ்டு செக்யூரிட்டி ஆப்ஷன் வரை அனைத்தும் தரப்பட்டுள்ளது. இத்தனை இங்கு எதற்கு? என நீங்கள் கருதினால், உங்களுக்குத் தேவையற்றைதை மறைத்து வைக்கலாம். பின்னர், தேவைப்படும்போது இயக்கி பெறலாம். இயங்கும் வசதிக்கான டேப்பில் கிளிக் செய்தால், அது மறைக்கப்படுகிறது. மறைக்கப்பட்ட டேப்பில் கிளிக் செய்தால், அது இயக்கப்படுகிறது.
2. கூடுதல் வசதிகள்: மேலே சொல்லப்பட்டது போல, பட்டன்களில் சிங்கிள் கிளிக் செய்து பல செயல்பாடுகளை மேற்கொள்ளலாம். அவற்றில் முக்கியமாக cut,copy,paste, copy path,file history, add as email attachment, file properties, hide/unhide items, create zip archive ஆகியவற்றைக் குறிப்பிடலாம்.
3. மீண்டும் அப் பட்டன்: விண்டோஸ் எக்ஸ்பி வரை தரப்பட்டுப் பின்னர் எடுக்கப்பட்ட அப், முன்னர் மேற்கொண்ட செயல்பாடு மேற்கொள்ள, பட்டன் செயல்பாடு மீண்டும் தரப்பட்டுள்ளது. ஆனால் அட்ரஸ் பாரில் அப்போதைய போல்டர் டைரக்டரி காட்டப்படுவதால், இந்த பட்டன் கூடுதல் வசதியாகவே உள்ளது.
4. காப்பி/பேஸ்ட்/அழித்தலை இடை நிறுத்தலாம்: விண்டோஸ் பயன்படுத்துபவர்களுக்கு இந்த வசதி மிகவும் பயனுள்ளதாக இருக்கும். ஏதேனும் பைல் ஒன்றில் காப்பி/பேஸ்ட் அல்லது அழிக்கும் செயல் ஒன்றை மேற்கொண்டிருக்கையில், அதனை இடையே நிறுத்தலாம். இதனால் தவறுதலாகக் கட்டளை கொடுத்துவிட்டால், பைல் மாற்றத்தைத் தவிர்க்கலாம்.
5. டேப்பில் குழுவாக அமைத்தல்: பொதுவாகவே விண்டோஸ் எக்ஸ்புளோரர் பிரிவு பல குழுக்களாகவே தான் அமைக்கப்படுகிறது. இப்போது இது இன்னும் செம்மைப்படுத்தப்பட்டு கிடைக்கிறது. பைல் அல்லது போல்டர் தொடர்பான செயல்பாடுகள் அனைத்தும், குழுவாக அமைக்கப்பட்டு அவற்றிற்கான பட்டன்கள் தரப்பட்டுள்ளன. மேலும் பைல் ஒன்றைத் தேர்ந்தெடுத்த பின்னர், பைல் தொடர்பான டேப் ஒன்று தரப்படுகிறது. இதன் மூலம் அதன் மாறா நிலையில் உள்ள அப்ளிகேஷன் புரோகிராமில் பைலைத் திறக்கலாம்.
6. பைல் திறக்க புதிய மெனு: இதுவரை எந்த குறிப்பிட்ட அப்ளிகேஷன் புரோகிராமுடன் தொடர்பில்லாத பைல் தேர்ந்தெடுக்கப்படுகையில், Open With டயலாக் பாக்ஸ் காட்டப்படும். அதுவே இப்போது புதிய வகையில் அமைக்கப்பட்டு, பார்க்கவும் இயக்கவும் சிறப்பாக உள்ளது.
7. பைல் தகவல்களைத் திருத்த: முன்பு ஒரு பைலைத் தேர்ந்தெடுத்து அதன் விபரங்களைப் பார்க்க முயற்சிக்கையில், அது குறித்த தகவல்கள், கீழாகக் காட்டப்படும். இப்போது பைலைத் தேர்ந்தெடுங்கள்; பின்னர் வியூ டேப் சென்று Details Pane தேர்ந்தெடுக்க வேண்டும். இப்போது விண்டோஸ் எக்ஸ்புளோரர் விண்டோவின் வலது பக்கம், பைல் குறித்த தகவல்கள் தரப்படும். இந்த புதிய ஸ்டைலில் அமைக்கப்பட்டதுதான் மாற்றம் என்றாலும், தோற்றம் நன்றாகவும், வசதியாகவும் உள்ளது. கூடுதலாக, பைல் குறித்த தகவல்களை இங்கு எடிட் செய்திடும் வசதியும் தரப்பட்டுள்ளது. எனவே இதற்கு பைல் ப்ராப்பர்ட்டீஸ் டயலாக் பாக்ஸ் திறக்க வேண்டியதில்லை.
8. டைட்டில் பார் ஷார்ட்கட்: விண்டோஸ் எக்ஸ்புளோரரில் தரப்பட்டுள்ள பல்வேறு பிரிவுகளை,நாம் விரும்புபவற்றை, அதன் விண்டோவின் டைட்டில் பாரில், பட்டன்களாக அமைத்து இயக்கலாம். இது நமக்கு விரைவான இயக்கத்தினைத் தருகிறது. முதல் முறை பார்த்து இயக்கிய போது இவையே முக்கியமானவைகளாகத் தெரிந்தன. இன்னும் புதிய பல செய்திகள் தொடர்ந்து தரப்படும்.

கொடுத்த வாக்கை காப்பாற்றுவீர்!-(செப்., 8 – கண் தான தினம்)

"வாக்கு கொடுக்கக் கூடாது. கொடுத்தால் காப்பாற்றியாக வேண்டும். அதிலும், பெண்களுக்கு வாக்களித்து விட்டு, அதைச் செய்ய மறுத்தால், கண் பார்வையே போய் விடும்’ என்கின்றன நம் புராணங்கள். சுந்தரரின் வரலாறு இதை நமக்கு உணர்த்துகிறது.
திருநாவலூரை சொந்த ஊராகக் கொண்ட சுந்தரருக்கு, திருவெண்ணெய்நல்லூரில் திருமணம் செய்ய ஏற்பாடாகி இருந்தது. ஆனால், சிவன் அதைத் தடுத்து, சுந்தரரை தன் அடிமை என நிரூபித்து, தன்னுடன் அழைத்துச் சென்றார். அன்று முதல், சிவத்தொண்டையே செய்து வந்தார் சுந்தரர். பூர்வ ஜென்மத்தில், சுந்தரர் சிவனது அடிமையாக இருந்தார். அவர் தேவலோகத்தில் இருந்த காலத்தில், அங்கிருந்த இரண்டு பெண்கள் மீது காதல் கொண்டார். அவர்களும் அவரை விரும்பினர். இதன் காரணமாக, அவர்கள் பூலோகத்தில் பிறக்க வேண்டியதாயிற்று. ஒரு பெண், பரவை என்ற பெயரில் திருவாரூரிலும், மற்றொருவர் சங்கிலி என்ற பெயரில் திருவொற்றியூர் அருகிலுள்ள ஞாயிறு என்ற கிராமத்திலும் அவதரித்தனர்.
ஒரு சமயம், திருவாரூர் சென்ற சுந்தரர், அங்குள்ள கோவிலுக்கு வந்த பரவையைப் பார்த்தார்; காதல் கொண்டார். சிவன் அருளால் அவர்களுக்கு திருமணமும் நடந்தது. சில காலம், அங்கு தங்கியிருந்த அவர், சிவத்தலங்களைத் தரிசிப்பதற்காக மனைவியை ஊரிலேயே விட்டுவிட்டு கிளம்பினார். திருவொற்றியூர் வந்த போது, அங்கே கன்னிமாடம் அமைத்து தங்கியிருந்த சங்கிலியை கண்டார். பூர்வஜென்ம வினைப் பயனால், அவளையும் திருமணம் செய்யும் எண்ணம் கொண்டார்.
சங்கிலியின் கனவில் தோன்றி, "என் பரமபக்தன் சுந்தரனை மணம் செய்து வாழ்வாயாக’ என்றார் சிவன்.
அதற்கு சங்கிலி,"அவர் ஏற்கனவே திருமணமானவராயிற்றே…’ என்றதற்கு,"உன்னை விட்டு அவன் பிரியாமல் இருக்க வாக்குறுதி தரச் சொல்கிறேன்…’ எனக்கூறி மறைந்தார் சிவன்.
இதேபோல சுந்தரர் கனவில் தோன்றி,"உனக்கும், சங்கிலிக்கும் திருமணம் நிச்சயம். ஆனால், அவளைப் பிரிய மாட்டேன் என அவளிடம் சத்தியம் செய்ய வேண்டும்…’ என்றார்.
இதன்பின், சுந்தரரும், சங்கிலியும் சந்தித்தனர்.
சங்கிலியிடம், "உன்னைத் திருமணம் செய்த பின், திருவொற்றியூரை விட்டு எங்கும் போக மாட்டேன்…’ என வாக்கு கொடுத்தார் சுந்தரர். இருவருக்கும் திருமணம் நடந்தது. சிலகாலம் சென்றது. திருவாரூரில் வசந்தவிழா விசேஷம். அதை எப்படியாவது பார்த்தாக வேண்டுமென்ற எண்ணம் சுந்தரருக்கு பிறந்தது. சங்கிலிக்கு கொடுத்த வாக்கை மீறி, அவளுக்குத் தெரியாமல், ஊர் எல்லையைத் தாண்டினார் சுந்தரர். உடனே அவரது கண் பார்வையைப் பறித்து விட்டார் சிவன்.
அதன்பின் பல சிவத்தலங்களுக்கு சென்று, பார்வை வேண்டி பதிகம் பாடினார் சுந்தரர். அவர் மீது கொண்ட இரக்கத்தால் திருவெண்பாக்கம் (திருவள்ளூர் அருகிலுள்ள திருவளம்புதூர்) என்ற தலத்தில் ஒரு ஊன்றுகோல் மட்டும் கிடைக்கச் செய்தார் சிவன். காஞ்சிபுரம் வந்து ஏகாம்பரநாதரைத் தரிசித்து உருகிப் பாடியதும், சிவனும் மனமுருகி இடதுகண் பார்வையை அளித்தார். அதன்பின் பல தலங்களைக் கடந்து திருவாரூரை அடைந்தார். அங்கு வந்து இறைவனிடம் மன்றாடி, வலது கண் பார்வையையும் தந்தருள வேண்டினார். அவருக்கு பார்வை கிடைத்தது.
சுந்தரர் போன்ற தெய்வப்பிறவிகளின் மூலம், இறைவன் நமக்களித்துள்ள பாடம், வாக்கு தவறக் கூடாது என்பது தான்!
இது ஒருபுறமிருக்க, பார்வையற்றவர்களுக்கு கண் தானம் செய்ய வேண்டும் என்றும் சிவன் கண்ணப்ப நாயனார் மூலமாக நமக்கு உணர்த்தி இருக்கிறார். கண் தானத்தின் அவசியம் அந்தக் காலத்திலேயே வலியுறுத்தப் பட்டிருக்கிறது.
இறப்புக்கு பிறகும், இந்த பூமியில் வாழ்வதற்கு வாய்ப்பளிப்பது கண் தானம். கண் தான நாளில், கண்களைத் தானம் செய்வதுடன், கொடுத்த வாக்கையும் காப்பாற்றும் நற்பண்பை வளர்க்கவும் உறுதி எடுப்போம்.