தடுப்பூசியின் அவசியங்கள்! தடுப்பூசி ரகசியங்கள் – 2

லகில் தடுப்பூசிகள் கண்டுபிடிக்கப்படும் வரை ஒரு நோய்க்கான எதிர்ப்பு சக்தி என்பது, அந்த நோய் ஒருவருக்கு ஏற்பட்டு, அதன் மூலம் அவருக்கு எதிர்ப்பு சக்தி பெறப்படுவதாக இருந்தது. உதாரணத்துக்கு… சின்னம்மை ஒருவருக்கு வந்து குணமான பிறகு, அந்த நோய்க்குரிய எதிர்ப்பு சக்தி கிடைத்துவிடுவதால், அவரது வாழ்நாளில் அந்த நோய் மீண்டும் வருவது இல்லை. ஆனால், நோய் ஏற்படும்போது அவர் நோயின் தன்மையால் துன்பப்படுவார். அவருடன் நெருங்கிப் பழகும் குடும்பத்தினர்கள், நண்பர்கள் அல்லது மாசடைந்த சுற்றுச்சூழல் வழியாக மற்றவர்களுக்கும் நோய் பரவ வழி உண்டு. நோய் தீவிரமடையும்போது, அந்த நபர் உயிரிழக்கவும் நேரலாம்.

இந்த நிலைமை, 1796-ம் ஆண்டில், ‘எட்வர்ட் ஜென்னர்’ என்ற இங்கிலாந்து மருத்துவர், பெரியம்மை நோய்க்கு (Small pox) முதல்முறையாகத் தடுப்பூசியை அறிமுகப்படுத்தி, அந்த நோயைக் கட்டுப்படுத்திய பிறகு மாறிவிட்டது. ஒருவர், குறிப்பிட்ட நோய்க்கான தடுப்பூசியை முறையாகப் போட்டுக்கொண்டால், அந்த நோய்க்கு உண்டான எதிர்ப்பு சக்தி அவருக்குக் கிடைத்துவிடுகிறது; அதன் பிறகு, அவருக்கு அந்த நோய் வருவது இல்லை என்பது உறுதியானது. இதன் மூலம் தடுப்பூசிகளின் மகிமையை உலகம் புரிந்துகொள்ளத் தொடங்கியது.

உடலுக்கு செயற்கையாக நோய் எதிர்ப்பு சக்தியைத் தரக்கூடியவை தடுப்பூசிகள்/தடுப்பு மருந்துகள். இவை ஒருவருக்கு நோய் ஏற்படுவதற்கு முன்பாகவே, அந்த நோய்க்குரிய எதிர்ப்பு சக்தியைக் கொடுத்துவிடுகின்ற ஆற்றல் பெற்றவை. இதன் மூலம் அந்த நோயினால் ஏற்படும் துன்பங்கள் அவருக்கு உண்டாக வாய்ப்பே இல்லை. ஒருவர் தடுப்பூசி போட்டுக் கொள்ளும்போது, அவருக்கு நோய் வராது; அதனால் அவரிடமிருந்து மற்றவர்களுக்கு நோய் பரவாது. 

மக்கள் தடுப்பூசிகளைப்  பயன்படுத்தத் தொடங்கிய பின்பு உலக அளவில் அம்மை நோய்கள், போலியோ போன்ற கடுமையான தொற்றுநோய்களின் தாக்கம் குறைந்து இறப்பு விகிதமும் குறைந்தது. குறிப்பாக, பெரியம்மை நோயை உலகிலிருந்தே விரட்டிவிட்டோம். இந்தியாவில், போலியோவை ஒழித்துவிட்டோம். சில தடுப்பூசிகள் தொற்று நோய்களைத் தடுப்பதோடு, புற்றுநோய்கள் வராமலும் தடுக்கின்றன. ‘ஹெப்படைட்டிஸ் பி’ தடுப்பூசி கல்லீரல் புற்றுநோயையும், ஹியூமன் பாப்பிலோமா வைரஸ் (HPV) தடுப்பூசி கர்ப்பப்பை வாய்ப் புற்றுநோயையும் தடுக்கின்றன. இவற்றின் ஒட்டுமொத்தப் பலனாக, மக்களின் சராசரி ஆயுள்காலம் அதிகரித்துள்ளது.

குறிப்பிட்ட சமூகத்தில் உள்ளவர்களில் பெரும்பான்மையோர் தடுப்பூசிகளைப் போட்டுக்கொண்டால், அந்தச் சமூகத்தில் உள்ள அனைவருக்கும் அந்த நோய் ஏற்படும் ஆபத்து குறைந்து விடுகிறது. இதற்குச் ‘சமூக நோய் பாதுகாப்பு’ (Herd Immunity) என்று பெயர்.

‘குழந்தைக்கு இரண்டு வயது முடியும்போது, முறைப்படி தரவேண்டிய தடுப்பூசிகளைப் போட்டுவிட்டால், அந்தக் குழந்தைக்கு 15 வகைப்பட்ட கடுமையான குழந்தைப்பருவ நோய்கள் ஏற்படுவது இல்லை. குழந்தையின் வயதுக்கேற்ற வளர்ச்சியும் சரியாக உள்ளது’ என்கிறது உலகச் சுகாதார நிறுவனம்.

நம் உடலில் நோய் எதிர்ப்பு சக்தியைப் பெருக்கி, நோய்கள் நம்மை அண்டாமல் பாதுகாத்துக்கொள்வதற்கும், நாம் நீண்ட காலம் ஆரோக்கியமாக வாழ்வதற்கும் மிக எளிய வழி, தடுப்பூசிகளைப் போட்டுக் கொள்வதுதான்! 

டீன் ஏஜ் மற்றும் முதியவர்களுக்கும் தடுப்பூசி!

குழந்தைகள் மட்டுமின்றி இளைய வயதினரும் முதியோரும் தடுப்பூசிகளைப் போட்டுக்கொள்ள வேண்டியது கட்டாயம்’ என்று அறிவுறுத்தியுள்ளது உலக சுகாதார நிறுவனம். 11 – 12 வயதில் ஆண், பெண் இரு பாலரும் ஹெச்.பி.வி தடுப்பூசியையும், 65 வயதுக்கு மேற்பட்டவர்கள் சின்னம்மை, அக்கி அம்மை, நிமோனியா, டிப்தீரியா, ஃப்ளு, கக்குவான் இருமல், டெட்டனஸ் ஆகிய நோய்களுக்கான தடுப்பூசிகளையும் போட்டுக்கொள்ள வேண்டியது மிக அவசியம்.

தடுக்கப்படும் நோய்கள்

1. தட்டம்மை – Measles

2. சின்னம்மை – Chickenpox

3. அக்கி அம்மை – Herpes zoster

4. அம்மைக்கட்டு – Mumps

5. போலியோ – Poliomyelitis

6. காசநோய் – Tuberculosis

7. காலரா – cholera

8. டிப்தீரியா – Diphtheria

9. கக்குவான் இருமல்  Pertusis

10. டெட்டனஸ் – Tetanus

11. இன்ஃபுளூயன்சா – Influenza

12. ஹெப்படைட்டிஸ் ஏ, பி – Hepatitis-A, Hepatitis-B

13. ருபெல்லா  Rubella

14. டைபாய்டு காய்ச்சல் – Typhoid Fever

15. நிமோனியா – pneumonia

16. ரோட்டா வைரஸ் வயிற்றுப்போக்கு –Rotavirus Diarrhoea

17. ரேபீஸ் – Rabies

18. மூளை உறைக் காய்ச்சல் – Encephalitis

19. மூளைக் காய்ச்சல் – Meningitis

20. கர்ப்பபைவாய் புற்றுநோய் -Cervical cancer

One response

  1. சிறந்த பகிர்வு

%d bloggers like this: