Advertisements

குழந்தைகளுக்கு மட்டுமல்ல… பெற்றோருக்கும் திட்டமிடுங்கள்!

ங்கள் குழந்தைகளின் எதிர்காலத்துக்கும், உங்கள் ஓய்வுக்காலத்துக்கும் திட்டமிடும்போதே உங்களுடைய பெற்றோர்களுக்கும் சேர்த்தே திட்டமிடுங்கள். அவர்கள், நிதி நிலையில் உங்களை சார்ந்து இருக்காமல் சுயமாக இருக்க என்ன செய்யலாம் என்பதை முன்னரே திட்டமிடுவது நல்லது. 

இப்போது  மனிதர்கள் வாழும் ஆயுள் காலம் கணிசமாக உயர்ந்து வருகிறது. சிறுக சிறுக சேர்த்திருந்தாலும், அவை பெற்றோர்களுக்கு போதுமானதாக இருக்கும் என்று சொல்ல முடியாது. உங்கள் பெற்றோர்கள் தங்களது நிதி நிலையைச் சமாளிக்க, நீங்கள் செய்ய வேண்டிய சில வழிமுறைகளை இதோ…
   

1. முன்னரே தொடங்குங்கள்!

பெற்றோர்கள் ஏற்கெனவே சேர்த்து வைத்திருந்த பணத்தில் வாழ்ந்து வருவார்கள்.  அவர்களுக்கு மாதாந்திர சேமிப்பு அல்லது பென்ஷன் திட்டத்தை ஆரம்பிப்பது நல்லது.

இப்படி சேமிக்கும்போது குறைந்த தொகையாக இருந்தாலும் சரி, அது மாதாந்திர சேமிப்பாக இருக்கவேண்டும் என்பது அவசியம். இதனை உடனேயும், விரைவிலும் தொடங்குவது நல்லது. குறிப்பிட்ட காலத்துக்கு இப்படி சேமிப்பதன் மூலம்,  எதிர்காலத்தில் நல்ல வருமானம் கிடைப்பதற்கு வாய்ப்பு உண்டு.

2. முதலீட்டுத் திட்டத்தை வகுக்க!

பெற்றோர்களுக்கு உதவும் வகையில் முதலீட்டுத் திட்டத்தினை வகுப்பது அவசியம். இவ்வாறு திட்டமிடும்போது அடுத்த வருடம் பெற்றோர்களுக்கு என்ன தேவை என்பதை அறிந்து, அதற்கு தகுந்தாற்போல் திட்டமிட வேண்டும். இவ்வாறு செய்யும்போது பெற்றோர்களின் சேமிப்பைக் கணக்கில் எடுத்துக்கொள்ள வேண்டாம்.  முதலீடு செய்யும்போது ஒன்றிரண்டு ஆண்டுகளில் வருமானம் கிடைக்கும் வகையில் பார்த்துக் கொள்ளுங்கள். இவ்வாறு திட்டமிடும்போது பணவீக்கமும், அடுத்த வருடத்துக்கு எவ்வளவு பணம் தேவைப்படும் என்பது போன்ற விவரங்களையும் கணக்கில்கொண்டு திட்டமிடவும்.

3. ரிஸ்க் எடுக்க வேண்டாம்!

குறுகிய காலத்தில் அதிக வருமானம் வருகிறது என்பதற்காக  அதிக ரிஸ்க் நிறைந்த முதலீடுகளில் முதலீடு செய்வதைத் தவிர்க்க வேண்டும். பொதுவாக, ஐந்து ஆண்டுகளுக்கு மேல் செல்லாமல் இருக்கும் வகையில் பார்த்துக் கொள்ளுங்கள்.

ஒரு குறிப்பிட்ட தொகையினை 10 – 20 வருடம் என்ற நோக்கில், நீண்ட கால முதலீட்டுக்கு ஒதுக்குங்கள். இதற்கு உதவியாக நிதி ஆலோசகர்களை நாடினாலும் தவறில்லை.
   

4. முதலீட்டைக் கண்காணிக்கவும்!

முதலீடு செய்தால் மட்டும் போதாது. இரண்டு, மூன்று மாதங்களுக்கு ஒரு முறை, தொடர்ந்து முதலீடு செய்தவை எந்தளவுக்கு வளர்ச்சி பெற்றிருக்கிறது என்பதைப் பார்த்து வர வேண்டும். முதலீடு குறைந்த கால அளவிலும், நீண்ட கால அளவிலும் நல்ல வருமானம் தருவதாக இருக்க வேண்டும். ஒரு வேளை வளர்ச்சி இல்லாத நிலையில் இருந்தால், அதனை  வளர்ச்சி உள்ள திட்டங்களில் மாற்றிவிட வேண்டும்.

5. ஹெல்த் கவரேஜை அதிகமாக்குங்கள்!

உங்களுடைய பெற்றோர்களுக்கு மெடிக்கல் பாலிசி இல்லை என்றால் உடனே எடுக்கவும். நியூ இந்தியா அஷுரன்ஸ் மற்றும் ஸ்டார் ஹெல்த் இன்ஷூரன்ஸ் போன்ற நிறுவனங்கள் சீனியர் சிட்டிஷன் ஹெல்த்கேர் பாலிசி திட்டங்களை வைத்திருக்கின்றன. இந்தத் திட்டங்களை 60 முதல் 80 வயது வரை பயன்படுத்திக்கொள்ளலாம்.

முதல் வருடத்தில் பரிசோதனை செய்வதற்கும், ஏற்கனவே உள்ள பிரச்னைகளுக்கு பலனளிக்காமல் போனாலும், இரண்டாவது ஆண்டில் இருந்து பயனுள்ளதாக இருக்கும். மிகவும் வயதானவர்களாக இருந்தால் மட்டும் இந்த பாலிசி உங்களுக்கு பயனளிக்காது.

பெற்றோருக்கு ஏற்கெனவே மெடிக்கல் பாலிசி இருந்தால், அவர்களுக்கான கவரேஜை அதிகரிக்கவும். காரணம், பெற்றோர்களைப் பொறுத்தவரை, அவர்களுக்கு வயது ஆக ஆக உங்களுடைய மருத்துவச் செலவும் அதிகரிக்கும். சின்ன மருத்துவ உதவி என்றாலும் அதற்கு அதிகம் செலவு பிடிக்கும் என்பதால் ஹெல்த் இன்ஷூரன்ஸ் பாலிசி மிக அவசியம்.
           

6. கடன் சார்ந்த திட்டங்கள்!

முதலீடு பாதுகாப்பானதாகவும், முதலீட்டுக்கு  ஓரளவு நல்ல வருமானம் வருவதாகவும், ரிஸ்க் குறைவானதாகவும் இருக்க வேண்டும். ஆகையால் நல்ல கடன் சார்ந்த திட்டங்களாகப் பார்த்து முதலீடு செய்யவும். உங்களுடைய முதலீட்டை உடனடியாக பணமாக மாற்றும் வகையிலும் இருக்க வேண்டும்.  ஆகையால் உங்களுடைய பெற்றோர்களுடன் பேசி உடனே திட்டமிடுங்கள். 

 

7. எதில் முதலீடு?

வங்கி ஃபிக்ஸட் டெபாசிட், கம்பெனி ஃபிக்ஸட் டெபாசிட், அரசு பத்திரங்கள், லிக்யூட் ஃபண்டுகள்,  மாதாந்திர முதலீட்டு திட்டங்கள், கடன் சார்ந்த மியூச்சுவல் ஃபண்ட் திட்டங்கள், ஓய்வு ஊதிய யூலிப் திட்டங்கள், பங்கு முதலீடுகள், தங்கம், வெள்ளி போன்றவற்றில் பெற்றோருக்காக பிரித்து முதலீடு செய்யலாம். எதில், எவ்வளவு சதவிகிதம் முதலீடு செய்ய வேண்டும் என்கிற விவரத்தைத் தெரிந்துகொள்ள, மேலே உள்ள அட்டவணையைப் பாருங்கள்.

8. நிதி ஆலோசகர்களின் உதவி பெறலாம்!

நீங்கள் வயதான பெற்றோர்களுக்காக முதலீடு செய்யும் போது, எதில் முதலீடு செய்வது என்கிற குழப்பம் இருந்தால் நிதி ஆலோசகர்களின் உதவியைப்  பெறலாம். இவர்கள் உங்களுடைய முதலீட்டைத் தொடர்ந்து கண்காணித்து, உங்களுக்கு உதவுபவர்களாகவும் இருக்க வேண்டும் என்பதையும் கவனத்தில் கொள்ளவும்

Advertisements
%d bloggers like this: