Advertisements

நீங்களும் கோடீஸ்வரர்தான் – உங்கள் முதல் செலவு முதலீடாக இருக்கட்டும்!

லக அளவில் தொழிலும், பிசினஸும் செய்து கோடீஸ்வரர் ஆனவர்களைவிட, சரியாக முதலீடு செய்ததன் மூலம் கோடீஸ்வரர் ஆனவர்கள் அதிகம். சம்பளம் வாங்கியதும் உங்களின் முதல் செலவு முதலீடாக இருந்தால், ஓய்வு பெறும்போது, நீங்களும் கோடீஸ்வரர்தான். ஒருவரின் மாதச் சம்பளத்தில் குறைந்தது 20 சதவிகிதத் தொகையை ஒருவர் அவசியம் சரியான திட்டங்களில் முதலீடு செய்யவேண்டும்.

அப்போதுதான் அவரின் எதிர்காலத் தேவைகள் சரியாக பூர்த்தியாவதோடு, பணி ஓய்வு காலமும் சிறப்பாக இருக்கும்.
செலவைச் சுருக்கி சேமிப்பை பெருக்கினால், வாழ்க்கையில் முன்னேற்றம் நிச்சயம். நம்மில் பலர் சம்பளம் வாங்கியதும் வீட்டு வாடகை, போக்குவரத்துச் செலவு, செல்போன் கட்டணம், சினிமா என பல செலவுகளைச் செய்தது போக, மீதி இருந்தால்தான் சேமிக்கிறார்கள் அல்லது முதலீடு செய்கிறார்கள். இது தவறு. இதற்கு பதில், ஒருவரின் மாதச் சம்பளம் ரூ.30,000 என்றால், அவர் குறைந்தது 6,000 ரூபாயை முதலீட்டுக்கு என தனியே எடுத்து வைத்துவிட்டு, மீதிக்குதான் பட்ஜெட் போட வேண்டும். ஆரம்பத்தில் இது சிறிது கஷ்டமாக இருக்கும். ஆனால், பழகிவிட்டால் நீங்களும் பணக்காரர்தான்.
மொத்தமாக பெரும் தொகையை ஏதாவது ஒரு திட்டத்தில் போடுவதுதான் முதலீடு என நம்மில் பலரும் நினைக்கின்றனர். இது உண்மை அல்ல. சிறு துளி பெருவெள்ளம் போல, மாதம் தோறும் சிறு தொகையைச் சேமித்து வந்தாலே பெரும்தொகை சேரும். உதாரணமாக, கணேசன் என்பவர், தன் 30-வது வயதில் மாதம் ரூ.3,000 முதலீட்டை ஆரம்பித்தார். அவன் தன் 60-வது வயது வரை முதலீட்டைத் தொடர்ந்தார். அவர் மொத்தம் ரூ.10.80 லட்சம் முதலீடு செய்திருப்பார். இந்த முதலீட்டுக்கு ஆண்டுக்கு 12% வருமானம் (மியூச்சுவல் ஃபண்ட் முதலீடு மூலம்) கிடைப்பதாக எடுத்துக்கொண்டால், ரூ.97 லட்சமாக அதிகரித்திருக்கும்.

இங்கே கணேசன் செய்த முதலீடே ரூ.10.80 லட்சம்தான். ஆனால், அவரின் முதலீடு ரூ.97 லட்சமாக பெருகி இருக்கிறது. இந்த 97 லட்சம் ரூபாயை ஆண்டுக்கு 10% வட்டி அளிக்கும் ஃபிக்ஸட் டெபாசிட்டில் போட்டால் (வயதான காலத்தில் ரிஸ்க் வேண்டாம் என்பதால்) ஆண்டுக்கு வட்டி ரூ.9.7 லட்சம் கிடைக்கும். அதாவது, மாதம் சுமார் ரூ.80,830 கிடைக்கும்.
உங்களின் முதலீடு பவர் ஆஃப் காம்பவுண்டிங் என்கிற கூட்டு வளர்ச்சியில் பெருகுவதால், முதலீட்டின் மீதான வருமானம் அல்லது வட்டியே பெரும் தொகையாக இருக்கும். எடுத்துக்காட்டுக்கு, இங்கே கணேசனின் முதலீடு, அவர் முதலீட்டை தொடங்கிய 20-வது வருடத்தில் ரூ.25.60 லட்சமாக அதிகரித்திருக்கும். அந்த ஆண்டில் அவரின் முதலீட்டுக்கு கிடைக்கும் வட்டி / வருமானம் மட்டுமே ரூ.3.11 லட்சம் என்றால் பார்த்துக் கொள்ளுங்கள்.   இங்கே நாம் ஆண்டுக்கு 12% வருமானம்தான் கணக்கில் எடுத்திருக்கிறோம். நல்ல மியூச்சுவல் ஃபண்டுகள் (பங்குச் சந்தை சார்ந்தது) ஆண்டுக்கு சராசரியாக 15 சதவிகிதத்துக்கு மேல் சர்வசாதாரணமாக வருமானம் தந்திருக்கின்றன. அப்படி அதிக வருமானம் கிடைக்கும்போது, கணேசனின் முதலீடு என்பது ரூ.2 கோடிக்கு மேல் பெருகி இருக்கும். 
ஆனால், ‘அது எங்களுக்கு நடப்பதில்லையே’ என்பது பலரின் புலம்பல். இதற்கு காரணம் நாம்தான். நாம் சில, பல வருடங்கள் தொடர்ந்து முதலீடு செய்து வந்திருப்போம். கணிசமான லாபமும் கிடைத்திருக்கும். ஆனால், ஓர் அவசர செலவுக்கு அந்த மொத்த தொகையையும் எடுத்துச் செலவு செய்திருப்போம். ஆனால், மீண்டும் முதலீடு செய்ய வேண்டும் என்பதையே மறந்திருப்போம்.
உங்களின் முதலீடானது எப்போதும் இலக்கு சார்ந்தததாக  இருக்க வேண்டும்.  அப்படி இருக்கும்பட்சத்தில் இப்படி இடையில் பணம் எடுக்கப்படுவது நடக்காது. பொறுமை என்பது முதலீட்டில் மிக முக்கியம்.

Advertisements
%d bloggers like this: