Advertisements

வங்கி சேமிப்புக் கணக்கு எதற்கெல்லாம் அபராதம்?

தாவது ஒரு வங்கிக்கு (பொதுத் துறை,  தனியார், பன்னாட்டு) நேரில் சென்று அவர்கள் தரும் விண்ணப்பத்தைப் பூர்த்தி செய்து, தேவையான ஆவணங்களை இணைத்துக் கொடுத்தால், வங்கி சேமிப்புக் கணக்கை எளிதாக ஆரம்பித்துவிடலாம் .

கணக்கை ஆரம்பிக்கும்போது, குறைந்தபட்சத் தொகையைப் போட வேண்டி இருக்கும். இது நகரம், கிராமம், காசோலை வசதி

போன்றவற்றைப் பொறுத்து மாறும். நகரமாக இருந்தால் காசோலை தேவை என்கிறபோது பொதுத் துறை வங்கியில் ரூ.1,000, தனியார் வங்கியில் ரூ.10,000 போட வேண்டி இருக்கும். காசோலை தேவை இல்லை எனில், இதில் பாதித் தொகையை இருப்புத் தொகையாக வைத்திருந்தால் போதும்.
 
இந்தக் குறைந்தபட்ச பராமரிப்புத் தொகையைப் (குறைந்தபட்ச மாத சராசரி இருப்பு தொகை) பராமரிக்கவில்லை என்றால் அபராதம் போடப்படும். இந்த அபாரதம் சில நூறு ரூபாய் களாக இருக்கும். பொதுவாக, ரூ.100 – 350 அபராதம் இருக்கும்.         
இந்த வங்கி சேமிப்புக் கணக்கை ஆரம்பிப்பது இப்போது ஒன்றும் பெரிய விஷயமில்லை. இதற்கு முன், வங்கி சேமிப்புக் கணக்கை ஆரம்பிக்க, அந்த வங்கியில் கணக்கு வைத்திருக்கும் ஒருவர் அறிமுகப் படுத்த வேண்டும். இப்போது அது தேவை இல்லை என ரிசர்வ் வங்கி அறிவித்துள்ளது. 

வங்கிக் கணக்குத் தொடங்கு வதற்கான விதிமுறைகளை ரிசர்வ் வங்கி அண்மையில் தளர்த்தி உள்ளது. இதற்குமுன், வங்கிக் கணக்கு ஆரம்பிக்க  விரும்புகிறவர்கள் அடையாளம், முகவரி குறித்த தகவல்களுக்காக பல்வேறு ஆவணங்களை இணைப்பது கட்டாயமாக இருந்தது.
   
தற்போது, அடையாளமாகத் தரப்படும் (புகைப்படம்) ஆவணத்திலேயே முகவரியும் இடம் பெற்றிருந்தால், அந்த ஆவணத்தையே முகவரி மற்றும் அடையாளம் இரண்டுக்கும் ஆதாரமாக ஏற்றுக்கொள்ளும்படி வங்கிகளுக்கு ரிசர்வ் வங்கி அறிவுறுத்தி உள்ளது.

வங்கிக் கணக்கு ஆரம்பிக்கக் கோரப்படும் ஆதார ஆவணங்களின் பட்டியலில் புதிதாக ஆதார் அட்டை, மகாத்மா காந்தி தேசிய ஊரக வேலைவாய்ப்பு உறுதி திட்டப் பணியாளர் அட்டை சேர்க்கப்பட்டுள்ளன.   

வங்கிக் கணக்கு ஆரம்பிக்க விண்ணப்பத்தில் குறிப்பிடப்படும் முகவரி, அடையாள அட்டையில் காணப்படும் முகவரியில் இருந்து மாறுபட்டிருந்தால், முகவரியை நிரூபிப்பதற்காக வேறு ஆவணத்தை இணைக்க வேண்டும். எனவே, கூடுமான வரை வங்கிக்குக் கொடுக்கும் ஆவணங்களில் ஒரே முகவரி இருக்கும்படி பார்த்துக்கொள்ளுங்கள்.

அடையாளம் மற்றும் முகவரிக்கான ஆதாரம் இல்லை என்றாலும் வங்கிக் கணக்கைத் தொடங்க லாம் என்று ரிசர்வ் வங்கி தெரிவித்துள்ளது. இந்தக் கணக்கு நிபந்தனைக்கு உட்பட்டு இயக்கப்படும்.

அதாவது, சிறிய கணக்கை (Small Account / NO FRILLS ACCOUNT) உங்களின் சமீபத்திய புகைப்படத்தைக் கொண்டு ஆரம்பிக்க முடியும். வங்கி அதிகாரி முன்பு கையொப்பம் அல்லது கைநாட்டு வைத்து கணக்கைத் தொடங்க முடியும்.
இந்தக் கணக்கில் 50,000 ரூபாய்க்கு மேல் எப்போதும் இருக்கக்கூடாது. ஆண்டுக்கு ரூ.1 லட்சம் வரை மட்டுமே பணப் பரிமாற்றம் செய்ய முடியும். மேலும், ஒரு மாதத்தில் பணப் பரிமாற்றம் ரூ.10,000 தாண்டக் கூடாது. தவிர, வெளிநாட்டில் இருந்து இந்தக் கணக்குக்குப் பணம் அனுப்ப முடியாது. இந்தக் கணக்கில் குறைந்தபட்சத் தொகை எதுவும் பராமரிக்கத் தேவை இல்லை.    

உங்களிடம் போதிய ஆவணங்கள் இருக்கின்றன. ஆனால், ஓராண்டில் வங்கியில் போடுவது மற்றும் எடுப்பது ரூ.1 லட்சத்துக்குள் இருந்தால், நோ ஃபிரில்ஸ் அக்கவுன்ட் (No Frills Account) என்று பெயர்.  இந்தக் கணக்கிலும் குறைந்தபட்சத் தொகை எதுவும் பராமரிக்கத் தேவை இல்லை. முன்பு, பணி மாற்றம் போன்றவற்றால் ஓர் ஊரிலிருந்து வேறு ஊருக்கு மாறிச் செல்லும்போது, பழைய ஊரில் உள்ள கணக்கை முடித்துவிட்டு, புது ஊரில் புதுக் கணக்கு தொடங்க வேண்டி இருந்தது. இப்போது அப்படி இல்லை. பழைய ஊரிலிருக்கும் கணக்கை அப்படியே புது ஊருக்கு மாற்றிக் கொள்ள முடியும்.
   

  எப்படிக் கணக்கை இயக்குவது?   

பே சிலிப் மூலம் ரொக்கப் பணத்தைக் கணக்கில் செலுத்தலாம். பிறர் கொடுக்கும் காசோலைகளை வங்கியில் கலெக் ஷன் போடுவது மூலம் வங்கிக் கணக்கில் வரவு வைக்கலாம். வித்ட்ரால் சிலிப் அல்லது காசோலை மூலம் கணக்கிலிருந்து பணத்தை எடுத்துக்கொள்ளலாம்.   

பொதுத் துறை வங்கிகளில் பாஸ்புக் ஒன்று தரப்படும். அதில் வங்கியில் செலுத்திய பணம், எடுத்த பண விவரம் பதிந்து தரப்படும். புதிய தலைமுறை தனியார் வங்கிகள் செலவைக் குறைக்கும்விதமாக பாஸ்புக் தருவதில்லை. இ-மெயில் மூலம் மூன்று மாதத்துக்கு ஒரு முறை ஸ்டேட்மென்ட் அனுப்புகின்றன. தேவைப்பட்டால் ஆன்லைன் பேங்கிங் வசதியை நீங்கள் பெற்றால், ஆன்லைன் மூலம் வங்கிப் பணப் பரிமாற்றம் பற்றிய விவரங்களைப் பார்த்துக் கொள்ளலாம்.    

வட்டி எப்போது கணக்கில் சேர்க்கப்படும்?   

வட்டி தினசரி கணக்கிடப்படும். இதற்கு சாஃப்ட்வேர் வந்துவிட்டதால், வங்கியில் இருக்கும் தொகைக்கு ஏற்ப வட்டி போடப்படும். ஆனால், வட்டி ஆறு மாதங்களுக்கு ஒரு முறைதான் வங்கிக் கணக்கில் வரவு வைக்கப் படும். உதாரணத்துக்கு, ஜூன் 30 மற்றும் டிசம்பர் 31 ஆகிய தேதிகளில் வட்டி வங்கிக் கணக்கில் வரவு வைக்கப்படும்.
   

  வட்டி எப்படிக் கணக்கிடுகிறார்கள்?
   
வங்கி சேமிப்புக் கணக்கில் ஒரு மாதத்துக்கு ஒரு முறை எப்படி வட்டி கணக்கிடப்படுகிறது என்பதைப் பார்ப்போம். ஒருவர் ரூ.10 லட்சம் ரூபாயை 1-ம் தேதி வங்கிக் கணக்கில் டெபாசிட் செய்கிறார். இதில்  ரூ.9.8 லட்சத்தை 25-ம் தேதி எடுக்கிறார்.  மாதக் கடைசியில் அவர் கணக்கில் ரூ.20 ஆயிரம் இருக்கிறது. (இவருக்கான வட்டிக் கணக்கை எதிர்ப்பக்கமுள்ள அட்டவணையில் பார்க்கவும்).

வங்கி சேமிப்புக் கணக்கை சரிவர பராமரிக்கவில்லை எனில், அதற்கு அபராதம் இருக்கிறது. இதுகுறித்து சென்னையைச் சேர்ந்த தனியார் வங்கியின் வெல்த் மேனேஜ்மென்ட் மேனேஜர் என்.விஜயகுமார் விளக்கினார்.

 

1. மாத சராசரி குறைந்தபட்ச பராமரிப்புத் தொகை இல்லை எனில், அபராதம் விதிக்கப்படும். இது சில 100 ரூபாயாக இருக்கும்.
   

2. நீங்கள் தந்த காசோலை பணமில்லாமல் திருப்பி அனுப்பப்பட்டால் (செக் பவுன்ஸ்) அபராதம் உண்டு. 
    

3. உங்கள் கணக்கில் கலெக் ஷன் போட்ட வேறு வங்கியின் செக் பணம் இல்லாமல் திரும்பினால் அபராதம் விதிக்கப்படும்

4. வங்கி சேமிப்புக் கணக்கு ஆரம்பித்து ஒரு வருடத்துக்குள் அதனை முடித்துக் கொண்டால், சில நூறு ரூபாயை அபராதமாகச் செலுத்த நேரிடும்.   

5. உங்கள் கணக்கில் வேறு ஊர்களிலிருந்து மற்றவர்கள் ரொக்கமாக டெபாசிட் செய்யும் போது, குறிப்பிட்ட  தொகை கட்டணமாகக் கழிக்கப்படும். உதாரணமாக, 2,000 ரூபாய் டெபாசிட் செய்யப்பட்டால், ரூ.100  கட்டணமாகக் கழிக்கப்பட்டு ரூ.1,900-தான் கணக்கில் வரவு வைக்கப்படும்.
   
அடுத்து, வங்கிக் கணக்கில் பணம் போடும்போதும் எடுக்கும்போதும், அதனை எஸ்எம்எஸ்-ஆகக் கொடுக்கும் வசதியை அவசியம் பயன்படுத்திக் கொள்ளுங்கள். இதற்கு உங்கள் செல் நம்பரை வங்கிக் கணக்குடன் இணைக்க வேண்டும். இதற்கென தனிப் படிவம் அல்லது விண்ணப் படிவத்திலே இதற்கான இடம் இருக்கும். அப்படிச் செய்யும்போது, நீங்கள் எந்தத் தொகைக்கு மேல் கணக்கில் போட்டாலும்  அல்லது எடுத்தாலும் (உதாரணத்துக்கு ரூ.1,000) உங்களுக்கு எஸ்எம்எஸ் அனுப்பப்படும். இந்த சேவையை சில வங்கிகள் இலவசமாக அளிக்கின்றன. சில வங்கிகள் காலாண்டுக்கு ரூ.15-25 கட்டணம் வங்கிக் கணக்கிலிருந்து எடுத்துக் கொள்கின்றன.

சி.சரவணன்

நன்றி – விகடன்

Advertisements
%d bloggers like this: