Advertisements

புரியாத புதிர் அல்ல மெனோபாஸ்!

வ்வொரு மாதமும் மாதவிலக்கின் போது அதிக வலியால் அவதிப்படும் ஒவ்வொரு பெண்ணும், ‘இனி மாதவிலக்கு வராமலே போய்விட்டால் எவ்வளவு நன்றாக இருக்கும்’ என்று யோசிப்பது உண்டு. அதே நேரம், 45 – 50 வயதில் மெனோபாஸ் ஏற்படும்போது பெண்கள் சந்திக்கும் பிரச்னைகள் ஏராளம். இன்றைக்குப் பெரும்பாலான பெண்களுக்கு மெனோபாஸ் எனப்படும் மாதவிலக்குச் சுழற்சி நிற்பது பற்றிய விழிப்பு உணர்வு இருக்கிறது. ‘வாழ்வின் நடுப்பகுதியில் இது ஏற்படும், அப்போது பல ஹார்மோன்கள் மற்றும் உடலியல் மாற்றங்கள் ஏற்படும்’ என்று தெரிந்து வைத்திருக்கின்றனர். ஆனால் அந்த மாற்றங்களை அடையாளம் காணத் தவறிவிடுகின்றனர்.

40 வயதைக் கடந்த பெண்கள் எதற்கெடுத்தாலும் கோபப்படுகிறார்கள் அல்லது அடிக்கடி சோர்ந்து காணப்படுகிறார்கள் என்றால், அது மெனோபாஸுக்கான அறிகுறியாகக்கூட இருக்கலாம் என்கிற புரிதல் அவசியம். பெண்களுக்கு மெனோபாஸ் ஏன் ஏற்படுகிறது, அதன் அறிகுறிகள் என்னென்ன என்பதைத் தெரிந்து கொண்டோம் என்றால், மெனோபாஸுக்குப் பிறகான சிக்கல்களைத் தவிர்க்க முடியும்.

மெனோபாஸ் ஏன்?

ஒவ்வொரு பெண்ணுக்கும் பிறக்கும்போதே அவர்கள் சினைப்பையில், குறிப்பிட்ட எண்ணிக்கையில் கருமுட்டைகள் இருக்கும். இந்தச் சினைப்பையில்தான் இனப்பெருக்க ஹார்மோன்களான ஈஸ்ட்ரோஜென் மற்றும் புரொஜெஸ்டிரான் உற்பத்தியாகின்றன. இதன் விளைவால், ஒரு பெண் பூப்பெய்துதலில் இருந்து ஒவ்வொரு மாதமும் ஒரு கருமுட்டை முதிர்வடைந்து வெளியிடப்படுவதும் மாதவிடாய் சுழற்சியும் நடக்கும். பெண்களுக்கு  குறிப்பிட்ட வயதுக்கு மேல் சினைப்பை கருமுட்டை வெளியிடுவதை நிறுத்தும்போது, மாதவிடாய் நின்றுவிடும். தொடர்ந்து ஓராண்டுக்கு மாதவிலக்கு இல்லை என்ற நிலையை மெனோபாஸ் என்கிறோம்.
பெண்களின் உடல்நிலை, மரபு ஆகியவற்றைப் பொறுத்து, மெனோபாஸ் ஒவ்வொருவருக்கும் ஒவ்வொரு வயதில் நிகழலாம். பொதுவாக, 49 முதல் 52 வயது வரையிலான பெண்களுக்கு, ஒரு வருடத்துக்கும் மேலாக மாதவிடாய் சுழற்சி நிகழாமல் இருந்தால், அதை மெனோபாஸ் அறிகுறியாக எடுத்துக் கொள்ளலாம். சிலருக்குச் சீரற்ற சுழற்சி காரணமாகவும் மாதவிடாய் தள்ளிப்போகலாம் என்பதால், ஆறு மாதங்கள் வரை மாதவிடாய் நிகழாமல் இருந்தால், அதை மெனோபாஸாகப் பொருட்படுத்தத் தேவையில்லை.

அறிகுறிகள்
சீரற்ற மாதவிடாய், அதிகப்படியான உதிரப்போக்கு அல்லது குறைவான உதிரப்போக்கு, 15 நாள்களுக்குள் மாதவிடாய் சுழற்சி, பிறப்புறுப்பில் வறட்சி, உடலுறவில் நாட்டமின்மை, எரிச்சல், கோபம், சரும வறட்சி, அதிகப்படியாக வியர்த்தல், அடிக்கடி சிறுநீர் கழித்தல்… இவை யாவும் இதன் அறிகுறிகள்.
மெனோபாஸ் காலத்தில் பெண்களுக்கு இயல்பாகவே ‘மூட் ஸ்விங்’ ஏற்படலாம். இதனால் சோர்ந்துபோவது, பயம், பதற்றம், தூக்கமின்மை, ஞாபகமறதி இவையெல்லாம் அளவுக்கு அதிகமாக நிகழலாம்.
கால்சியம் குறைபாடு ஏற்பட வாய்ப்புள்ளதால் எலும்புத் தேய்மானமும், மூட்டுவலியும் உண்டாகலாம். ஆதலால் இந்தக் காலகட்டத்தில் எலும்புகளுக்குப் பலம் சேர்க்கும்விதமாகக் கால்சியம் மற்றும் வைட்டமின் டி சத்து மாத்திரைகளை மருத்துவரின் ஆலோசனையின் படி எடுத்துக்கொள்ளலாம்.
சிலருக்கு 30 வயதைத் தாண்டியதுமே மெனோபாஸ் அறிகுறிகள் தென்பட வாய்ப்புண்டு. அதனால் அப்போதிருந்தே ஆரோக்கியமான உணவை எடுத்துக் கொள்வதுடன் மனதுக்கும் உடலுக்கும் புத்துணர்வைத் தரக்கூடிய உடற்பயிற்சிகளை மேற்கொள்வது அவசியம்.

மெனோபாஸ் சமயத்தில் நிகழும் மனநலப் பிரச்னைகள் மற்றும் அவற்றுக்கான தீர்வுகள் குறித்துப் பேசுகிறார், மனநல மருத்துவர் ராமன்.
“மெனோபாஸுக்கு முன்பு பல வருடங்களாகவே பெண் உடல் அதற்குத் தயாராகும். 52 வயதில் நிகழவிருக்கும் மெனோபாஸுக்கான உடல் ஏற்பாடு, 45 வயதில் இருந்தே தொடங்கிவிடலாம். அந்தக் காலகட்டத்தில் (Perimenopause) அவர்கள் மனநலம் சார்ந்த பிரச்னைகளை அதிகம் எதிர்கொள்ள நேரிடும்.
திருப்தியான வாழ்க்கை அமையாதவர்கள், கணவன் மற்றும் குழந்தைகளிடம் உள்ள பந்தத்தில் குழப்பம் உள்ளவர்கள், உடல்ரீதியாக, மனரீதியாக, வயதின் காரணமாக, பணம் மற்றும் நோய் காரணமாக தங்கள் குழந்தைகளுக்குச் செய்ய வேண்டிய கடமைகளைச் செய்ய முடியாத நிலையில் உள்ளவர்கள், குழந்தைகளிடமிருந்து விலகியிருப்பவர்கள் போன்றோருக்கு மனநலம் சார்ந்த பிரச்னைகள் ஏற்படுவதற்கான வாய்ப்பு மிக அதிகம்.
மெனோபாஸ் சமயத்தில் பல பெண்களுக்கு, திடீரென உடல் கதகதப்பாவது அல்லது சூடாவது (Hot Flushes), இனம்புரியாத மன அழுத்தம், விரைவில் எரிச்சலடைவது, சலிப்பு, தன்னைப் பற்றிய தாழ்வான எண்ணங்கள், நம்பிக்கைக் குறைவு, அழுகை போன்ற உணர்வுகள் ஏற்படலாம். இதை மெனோபாஸ் சிண்ட்ரோம் (menopause syndrome) என்போம்.

தீர்வு என்ன?
முதலில், இது எல்லாப் பெண்களுக்கும் ஏற்படும் பிரச்னைதான் என்பதைப் புரிந்துகொள்ள வேண்டும்.
ஒரே வயதுள்ள பெண்களோடு கலந்துபேசி, அனைவரும் எதிர்கொள்ள நேரிடும் அறிகுறிகள், பிரச்னைகளைப் பகிர்ந்துகொண்டால் தேவையற்ற பதற்றத்தைக் குறைக்கலாம்.
உடற்பயிற்சி, ஊட்டச்சத்துள்ள உணவுகள் என வாழ்க்கை முறை மாற்றங்களை மேற்கொள்ள வேண்டும்.
பெண்களுக்கு எலும்புத் தேய்மானம், புற்றுநோய், பெண் உறுப்பில் ஈரப்பதம் குறைதல் ஆகியவை ஈஸ்ட்ரோஜென் ஹார்மோன் குறைபாட்டால் ஏற்படலாம் என்பதால், ஹார்மோன் சிகிச்சை (Hormone Replacement Treatment) ஒரு சிலருக்குத் தேவைப்படலாம்.
பதற்றம், மன அழுத்தத்துக்கு மனநல ஆலோசகர், மனநல மருத்துவரிடம் கவுன்சலிங் மற்றும் சிகிச்சை பெறலாம்.
தன்னைப் பற்றிய, தன் உடலமைப்பு குறித்த எண்ணங்களை ஆக்கபூர்வமாக, நேர்மறையாக மாற்றுவது முக்கியம்.
உடல்நிலை, மனநிலை குறித்த அச்சம் தவிர்த்து, தனக்குப் பிடித்த செயல்களில் மனதைச் செலுத்துவது நல்லது.
ஆண்கள் தங்களின் தாய்க்கும் மனைவிக்கும் மெனோபாஸ் சமயத்தில் அவர்களுக்குத் தேவைப்படும் எமோஷனல் ஆதரவைத் தவறாமல் கொடுக்க வேண்டும்.”

Advertisements
%d bloggers like this: