Advertisements

மணியைப் பார்த்து ‘மணி’யை வளர்ப்போம்!

ம் வாழ்க்கையானது காலத்தால் நிர்ணயிக்கப்படுகிறது மற்றும்  நிர்வகிக்கப்படுகிறது. காலம் என்பது முன்னே சென்றுகொண்டே இருக்கிறது; அது எப்போதும் பின்னோக்கிப் பார்ப்பதில்லை.  

அதேபோல, நமது வாழ்க்கையும் படிப்படியாக முன்னேற்றத்தை நோக்கி சென்றுகொண்டே  இருக்கவேண்டும். நாம் எத்தனை காலம் இருக்கப் போகிறோம் என்று யாருக்கும் தெரியாது. ஆனால், வாழும் காலத்தில் முறையாகவும், மற்றவர்கள் பாராட்டும்படியும் வாழ முயற்சி செய்கிறோம். 

நம் வாழ்க்கை சிறப்பாக அமைய வேண்டுமெனில், முதலீடு தொடர்பான நம் முடிவுகளும் சரியானதாக இருக்கவேண்டும். நமது முதலீடு சரியாக இருக்க வேண்டுமெனில், அதற்கான பாடங்களைக் கடிகாரத்திடமிருந்து கற்றுக்கொள்ளலாம். கடிகாரம் நமக்குக் கற்றுத் தரும் தத்துவங்கள் என்ன? 
நான் எப்போதும் முன்னோக்கித்தான் செல்வேன்; நிகழ் காலத்தை எப்போதும் முறையாகப் பயன்படுத்துவேன்;  வருங்காலத்தை முறையாகத் திட்டமிட்டுச் சொல்வேன்.  கடிகாரத்தைப் பார்த்து நேரத்தைச் செலவிடுகிறமாதிரி, வருமானத்தைப் பார்த்துப் பணத்தைச் செலவழிக்க வேண்டும். 
கடிகார மணியின் அடிப்படையில் முதலீட்டின் பல்வேறு தன்மைகளை நாம் எளிமையாகப் புரிந்துகொள்ளலாம். கடிகாரத்திலுள்ள 1 முதல் 12 வரை உள்ள எண்களையொட்டி நாம் நமது முதலீடுகளை அமைத்துக்கொண்டால், நம்மால் நல்ல லாபத்தை ஈட்ட முடியும்.
1, 2, 3 என்பதை மாதம் மற்றும் வருடமாகக் கருதி முதலீடுகளை மேற்கொள்ளலாம். 1, 2, 3 என்பதை மாதம் என எடுத்துக்கொண்டால், அதிக முயற்சி செய்யாமல், ரிஸ்க் எடுக்காமல் உத்தரவாதமாகக் கிடைக்கக்கூடிய முதலீடுகளில் பணத்தை முதலீடு செய்யலாம்.
அரசுக் கடன் பத்திரங்கள், வங்கி டெபாசிட், அஞ்சலக முதலீடுகள், மியூச்சுவல் ஃபண்டில் கடன் சார்ந்த லிக்விட் ஃபண்ட், பிக்ஸட் மெச்சூரிட்டி பிளான், அல்ட்ரா ஷார்ட் டேர்ம் ஃபண்ட் போன்றவற்றை 1 முதல் 3 மாத கால முதலீட்டுக்குத்  தேர்வு செய்யலாம். இதன் மூலம் 4% முதல் 8% வரை வருமானம் கிடைக்கும்.
நாம் பல பொருள்களை, குறுகிய காலக் கடனில் வாங்கி மகிழ்கிறோம். அதற்குப் பதிலாக, குறுகிய காலத்துக்கு முதலீடு செய்து தேவைகளைப் பூர்த்தி செய்யலாம். குறுகிய கால முதலீட்டின் மூலம் அவசரத் தேவை, மருத்துவச் செலவுகளைக் கூட ஈடுசெய்யலாம். 
1, 2, 3 என்பதை ஆண்டுகள் என எடுத்துக் கொண்டு, கொஞ்சம் ரிஸ்க் எடுத்தால், கூடுதல் வருமானம் கிடைக்கும். உதாரணத்துக்கு, ஃபிக்ஸட் டெபாசிட், கடன் சார்ந்த பேலன்ஸ்டு ஃபண்டுகளைக்  குறிப்பிடலாம்.
4, 5, 6 மாதங்கள் அல்லது வருடங்களில் நமது வாழ்க்கையின் எதிர்கால இலக்குகளுக்குத் திட்டமிட்டு முதலீட்டைத் தேர்வு செய்யலாம். 4 முதல் 6 மாதத் தேவைக்கு, வங்கி குறுகிய கால ஃபிக்ஸட் டெபாசிட், மியூச்சுவல் ஃபண்ட் லிக்விட் ஃபண்ட் போன்றவற்றில் பணத்தைப் போட்டு வரலாம்.
4 முதல் 6 ஆண்டு இலக்குகளுக்கு, வங்கி ஃபிக்ஸட் டெபாசிட், தபால் அலுவலக ஆர்.டி (முதலீட்டுக் காலம் 5 ஆண்டுகள்), டேர்ம் டெபாசிட், பேலன்ஸ்டு மியூச்சுவல் ஃபண்ட் போன்றவற்றில் முதலீடு செய்யலாம். 
இரு சக்கர மற்றும் கார் கடன், சுற்றுலா கடன், தனிநபர் கடன், பண்டிகை கடன் என்று கடன் வாங்காமல், 4, 5, 6 வருடங்களுக்கு முதலீடு செய்து, இந்தத் தேவைகளை நிறைவேற்ற வழி இருக்கிறது.
7, 8, 9 மாதங்கள் அல்லது வருடங்களில் நமது வாழ்க்கைக் கனவுகளுக்குத் திட்டமிட்டு முதலீட்டைத் தேர்ந்தெடுக்கலாம். 7 முதல் 9 மாதத் தேவைகளுக்கு வங்கி குறுகிய கால ஃபிக்ஸட் டெபாசிட், லிக்விட் மியூச்சுவல் ஃபண்ட் போன்றவற்றைப் பயன்படுத்திக் கொள்ளலாம்.
7 முதல் 9 ஆண்டுகள் வரையிலான இலக்குகளுக்கு வங்கி நீண்ட கால ஃபிக்ஸட் டெபாசிட், பேலன்ஸ்டு மியூச்சுவல் ஃபண்ட், ஈக்விட்டி மியூச்சுவல் ஃபண்ட் ஆகியவற்றைத் தேர்வுசெய்யலாம். குழந்தைகளின் கல்லூரிப் படிப்பு, திருமணம், நமது சொந்தத் தொழில் முயற்சி, நமது ஓய்வுக்காலத் தேவைகளை இதன் மூலம் நிறைவேற்றிக்கொள்ள முடியும்.
10 முதல் 12 மாத தேவைகளுக்கான முதலீடுகளை வங்கி குறுகிய கால ஃபிக்ஸட் டெபாசிட், மியூச்சுவல் ஃபண்ட் லிக்விட் ஃபண்ட் போன்றவற்றில் செய்துவரலாம்.  10 ஆண்டுகள் முதல்  12 ஆண்டுகள் வரையிலான இலக்குகளை நிறைவேற்ற,  நீண்ட கால ஃபிக்ஸட் டெபாசிட், பேலன்ஸ்டு மியூச்சுவல் ஃபண்ட், ஈக்விட்டி மியூச்சுவல் ஃபண்டுகள் (லார்ஜ் கேப், மிட் கேப், ஸ்மால் கேப், இண்டெக்ஸ் ஃபண்ட்) போன்றவற்றில் முதலீடு செய்யலாம்.  
சொந்த வீடு, உலகச் சுற்றுலா, வெளிநாட்டுக் கல்வி, மகன் / மகள் திருமணம், சுகமான ஓய்வுக் காலம் போன்றவற்றுக்கு, பத்தாண்டுகளுக்கு மேல் முதலீடு செய்துவரும்பட்சத்தில், இந்தத் தேவைகளைக் கடன் வாங்காமல் நிறைவேற்றிக் கொள்ள முடியும்.  
காலத்தையும், தேவையும் உணர்ந்து, எந்த முதலீடு, எவ்வளவு வளர்ச்சியைத் தருகிறது என்று தீர்மானித்து முதலீடு செய்வது அவசியம். முதலீட்டில் ரிஸ்க் குறைவாக இருந்தால், வருமானம் குறைவாகக் கிடைக்கும். ரிஸ்க் அதிகமிருந்தால், வருமானம் அதிகம் கிடைக்கும்.
அதேநேரத்தில், முதலீட்டை ஐந்தாண்டுகளுக்கு மேல் நீண்ட காலத்தில் மேற்கொள்ளும்போது, ரிஸ்க் பரவலாக்கப்படும். அந்த வகையில், நீண்ட கால முதலீட்டுக்குப் பங்குச் சந்தை சார்ந்த பேலன்ஸ்டு மற்றும் ஈக்விட்டி மியூச்சுவல் ஃபண்டுகளில் முதலீடு செய்யலாம். இனியாவது  ‘மணி’யைப் பார்த்து ‘மணி’யை வளர்த்து உங்கள் கனவுகளை நிறைவேற்றிக் கொள்ளுங்கள்.
முக்கியக் குறிப்பு:
முதலீடுகளில் நாம் லைஃப் இன்ஷூரன்ஸ் (ஆயுள் காப்பீடு) பாலிசிகளைக் குறிப்பிடவில்லை. காரணம், ஆயுள் காப்பீடு பாலிசிகள் என்பது முதலீடு கிடையாது. மேலும், ஆயுள் காப்பீட்டில் முதலீடு என்பது பவர் ஆஃப் காம்பவுண்டிங் (கூட்டு வளர்ச்சி) முறையில் வளர்வதில்லை. அந்த வகையில், ஆயுள் காப்பீட்டு பாலிசியை முதலீடாகக் கருதுபவர்கள், தங்கள் வாழ்க்கை முன்னேற்றத்துக்குத் தாங்களே தடையை  ஏற்படுத்திக்கொள்கிறார்கள்.  

Advertisements
%d bloggers like this: