Advertisements

வங்கியில் பணத்தைப் போட்டால், நீங்கள் வட்டி தரவேண்டியிருக்கும்!

மீபத்தில் வெளிவந்த ஒரு சர்வதேச ஆய்வறிக்கை, உலகப் பொருளாதாரம் மீண்டும் ஒரு பெரும் நெருக்கடியில் சிக்கினால் வட்டி விகிதம் என்பது பூஜ்யத்துக்குக் கீழே அதாவது, நெகட்டிவாக சென்றுவிட வாய்ப்புள்ளது என்று எச்சரித்திருக்கிறது. அதாவது, வங்கியில் நீங்கள் பணத்தை டெபாசிட் செய்தால், வங்கி உங்களுக்கு வட்டி தருவதற்குப் பதிலாக, வங்கிக்கு நீங்கள் வட்டி தர வேண்டியிருக்கும்!

இந்தக் கருத்தை ஆராயும்முன், உலகப் பொருளாதாரம் கடந்த பத்தாண்டுகளில் கடந்துவந்த பாதையை உற்றுநோக்கினால், இதற்குமுன்பு இப்படிப்பட்ட ஒரு கரடுமுரடான பாதையை முன்னெப்போதும் நாம் கண்டிருக்கமாட்டோம் என்பது தெரியும். குறிப்பாக, 2007-ல் அமெரிக்காவில் தொடங்கிய ‘சப் ப்ரைம்’ நிதி நெருக்கடி (தகுதி இல்லாதவர்களுக்கு வாரி வழங்கப்பட்ட வீட்டுக் கடனால் ஏற்பட்ட பிரச்னை) அடுத்த சில ஆண்டுகளில் உலகப் பொருளாதாரத்தையே தலைகீழாகப் புரட்டிப்போட்டது.
அந்த நிதி நெருக்கடி காரணமாக உலக அளவில் வங்கித் துறையே ஆட்டம் கண்டது. பல நாடுகளிலும் வங்கிகள் அமைப்பு கடுமையான சோதனைகளைச் சந்தித்தது. உலக நாடுகளின் பொருளாதாரங்கள் ஸ்தம்பிக்கத் தொடங்கியது. செய்வதறியாது திகைத்த அந்த வேளையில், அமெரிக்காவின் மத்திய வங்கியான ஃபெடரல் ரிசர்வ் வங்கி, வரலாறு காணாத வகையில் பணத்தை வாரி இறைத்து. அமெரிக்காவில் உள்ள வங்கிகளைக் காப்பாற்றியது. அதன் காரணமாகவே, நிதி நெருக்கடி மேலும் மோசம் அடையாமல் தவிர்க்கப்பட்டது. ஆனால், அந்த நிதி நெருக்கடியின் தாக்கம் இந்தியா உட்பட அனைத்து நாடுகளின் பொருளாதாரங்களிலும் அதீத தாக்கத்தை ஏற்படுத்தியது.
அதன் காரணமாக உலகத்தில் உள்ள முக்கிய மத்திய வங்கிகள், அதாவது ஃபெடரல் ரிசர்வ், ஐரோப்பிய மத்திய வங்கி, இங்கிலாந்து மத்திய வங்கி, ஜப்பான் மத்திய வங்கி என எல்லா மத்திய வங்கிகளும் வட்டி விகிதத்தை ஒருங்கிணைந்து குறைத்து வந்தன. அந்த நடவடிக்கைள் காரணமாக, வட்டி விகிதம் வரலாறு காணாத வகையில் குறைவான ஒரு நிலையை எட்டியது. அமெரிக்கா மற்றும் ஐரோப்பா  நாடுகளில் வட்டி விகிதம் என்பது கிட்டத்தட்ட 0% என்ற நிலையை அடைந்தது. முக்கியமாக, பொருளாதார வளர்ச்சி ஏற்படவும், நிதிச் சந்தைகள் ஸ்திரமடையவும் வட்டி விகிதக் குறைப்பு என்ற நிலைப்பாட்டை, கடந்த ஆண்டுகளில் மத்திய வங்கிகள் தொடர்ச்சியாகக் கடைப்பிடித்தன. அதன் காரணமாக, அடுத்த சில ஆண்டுகளில் உலகப் பொருளாதாரமும், நிதிச் சந்தைகளும் மெள்ள மெள்ள சகஜ நிலைக்குத் திரும்பின. அதன்பிறகு, கடந்த சில ஆண்டுகளாக ஃபெடரல் ரிசர்வ் வங்கிப் போன்ற மத்திய வங்கிகள் மெதுமெதுவாக வட்டி விகிதத்தை உயர்த்தத் தொடங்கியிருந்தாலும், இப்போது நிலவும் வட்டி விகிதம் என்பது கிட்டதட்ட உலக வரலாற்றிலேயே குறைவான நிலையில்தான் இன்றும் இருந்து வருகிறது.
இப்படி இருக்கிற இந்தச் சூழலில், மீண்டும் 2007/2008 போன்ற ஒரு நிதி நெருக்கடி ஏற்படும்பட்சத்தில் வட்டி விகிதம் மேலும் குறைந்து, நெகட்டிவாக செல்லவும் வாய்ப்புள்ளதாகச் சமீபத்தில் வெளிவந்த ஆய்வறிக்கைகள் தெரிவித்திருப்பது குலைநடுங்க வைப்பதாக இருக்கிறது.
நிதி நெருக்கடி ஏற்பட்டு பல ஆண்டுகளுக்குப் பிறகு, அதிரடியான வட்டி விகிதக் குறைப்பு முயற்சியை எடுத்தபிறகுதான் உலகப் பொருளாதாரம் மெள்ள மெள்ள சகஜ நிலைக்குத் திரும்பியது. இந்த நிலையில், அதேபோன்ற ஒரு நிதி நெருக்கடி மீண்டும் ஏற்பட்டால், அது உலகப் பொருளாதாரத்தைக் கடுமையான வீழ்ச்சிக்கு இழுத்துச் சென்றுவிடலாம். அப்படி ஒரு சூழல் ஏற்படும்போது, பொருளாதாரத்தைச் சீரமைக்கவும், நிதி நிறுவனங்கள் மற்றும் நிதிச் சந்தைகளைச் சீர்படுத்தவும் மத்திய வங்கிகள் மீண்டும் வட்டி விகிதத்தைக் கடுமையாகவும் பன்மடங்காகவும் குறைக்கவேண்டிய சூழல் ஏற்படும். ஏற்கெனவே, மிகக் குறைந்த நிலையிலுள்ள வட்டி விகிதத்தை மேலும் குறைக்கத் தொடங்கினால் ஆய்வறிக்கை கணித்ததுபோல, பூஜ்யத்திற்கும் கீழே மிக எளிதாக சென்றுவிடும். வட்டி விகிதக் குறைப்பு என்பது பொருளாதாரத்தைச் சீரமைக்க உதவினாலும், நெகட்டிவ் வட்டி விகிதம் என்பது உலகப் பொருளாதாரச் சூழலுக்கு எந்த விதத்திலும் ஒரு நீண்ட காலத் தீர்வாக அமையாது என்பதில் மாற்று கருத்தில்லை.
உதாரணமாக, ஜப்பானிய பொருளாதாரத்தில் கடந்த பல வருடங்களாக வட்டி விகிதம் என்பது பூஜ்யம் அல்லது பூஜ்யத்திற்கு கீழேதான் இருந்துவந்துள்ளது. ஆனால், பொருளாதாரத்தில் எதிர்பார்த்த முன்னேற்றம் துளிகூட காணப்படவில்லை. அதே சமயம், இன்று வரை உலகப் பொருளாதாரத்தில் பூஜ்யத்திற்குக் கீழான வட்டி விகிதம் என்பது பெரும்பாலான நாடுகளில் இல்லையென்பதால், பூஜ்யத்திற்குக் கீழான வட்டி விகிதத்தின் உண்மையான தாக்கத்தைத் துல்லியமாக இப்போதே கணிப்பது சிரமம்தான். அது ஏற்படும் போதுதான் உண்மையான தாக்கம் என்பது தெரியவரும். ஆனால், பூஜ்யத்திற்குக் கீழே போகும் வட்டி விகிதம் என்பது கடைசி ஆயுதமே தவிர, முதல் ஆயுதமாகாது.
ஆனால், 2007/2008 போன்ற ஒரு நிதி நெருக்கடி மீண்டும் ஏற்படுமா என்ற கேள்வி பலர் மனத்திலும் ஏற்படும். வேகமாக மாறிவிட்ட உலகப் பொருளாதாரச் சூழலால், அதுபோன்ற ஒரு நிதி நெருக்கடி வருங்காலத்திலும் நிகழ வாய்ப்புகள் இருக்கத்தான் செய்கின்றன. அதுமட்டுமின்றி, நிதிச் சந்தையில் பிட்காயின் போன்ற பலவிதமான முன்னேற்றங்கள் அசுர வேகத்தில் ஏற்பட்டு வருகின்றன. வரும் காலத்திலும் பல மாற்றங்கள் நிதிச் சந்தையில் ஏற்பட அதிக வாய்ப்புகள் உள்ளன.

ஆகையால், மாறி வரும் சூழலில் 2007/2008 போன்ற நெருக்கடிகளை முன்கூட்டியே ஆராய்ந்து அவற்றைத் தடுப்பதற்கு முன்னெச்சரிக்கை நடவடிக்கைகளை எடுப்பதுதான் நல்ல பலன் தருமேயன்றி, பொருளாதாரச் சீர்கேட்டைச் சரிசெய்ய, வட்டி விகிதத்தை மேலும் குறைத்துக்கொண்டே நெகட்டிவாக வைத்திருக்கும் போக்கு ஆரோக்கியமான தீர்வாகாது!

Advertisements
%d bloggers like this: