Advertisements

எதில் எவ்வளவு முதலீடு செய்யலாம்?

யூனிஃபை ஜி.மாறன் எழுதும் சிறப்பு கட்டுரை

ஜி.மாறன் செயல் இயக்குநர், யுனிஃபை கேப்பிட்டல் (Unifi Capital).

2018 இதோ வந்தேவிட்டது. ‘இந்த ஆண்டில் நம் அஸெட் அலோகேஷன் எப்படி இருக்க வேண்டும்?’ என்கிற  கேள்வி எல்லா  முதலீட்டாளர்களின் மனதிலும் இருக்கும். நமது செல்வத்தைப் பெருக்க உதவும் அந்த அஸெட் அலோகேஷன் வழிமுறைகளைப் பார்க்கும்முன், சில கேள்விகள்…  

1. பங்குச் சந்தை நன்கு ஏற்றம் கண்டிருக்கும் இந்தச் சமயத்தில் நம்  முதலீட்டை அதிகரிக்கலாமா?

2. தங்கம், கடந்த 5 வருடங்களாக எந்த லாபத்தையும் தரவில்லை. இந்த வருடமாவது லாபம் தருமா?
3. ரியல் எஸ்டேட் துறை மந்தமாக இருக்கிறது. ரெரா சட்டம், இந்தத் துறையை மீண்டும் வளர்ச்சிப் பாதையில் இட்டுச் செல்லுமா அல்லது விலை இன்னும் இறங்குமா?
4. கடன் மியூச்சுவல் ஃபண்ட் திட்டங்கள் நியாயமான  வருமானத்தைத் தரவில்லை. பங்குகளின் பக்கம் முதலீட்டைத் திருப்பலாமா?
5. பெரும்பாலான ஸ்மால் கேப்/மிட்கேப் பங்குகள் இரட்டை இலக்க வருமானத்தைக் கடந்த சில வருடங்களில் தந்திருக்கின்றன. எனவே, நேரடிப் பங்குகளில் முதலீடு செய்யலாமா அல்லது போர்ட்ஃபோலியோ மேனேஜ்மென்ட் சர்வீசஸ் (பிஎம்எஸ்) வழியாக முதலீடு செய்யலாமா?
இந்தக் கேள்விகளுக்கானப் பதிலை முதலில் பார்ப்பதுடன் 2018-ம் ஆண்டுக்கான அஸெட் அலோகேஷன் குறித்தும் பார்ப்போம்.
தங்கம்!
கடந்த ஐந்து வருடங்களில் தங்கம், சர்வதேச அளவில் 25% வீழ்ச்சியடைந்திருக்கிறது. டாலருக்கு நிகரான ரூபாயின் மதிப்பு வலுவிழந்ததாலும், இந்திய அரசு தங்கம் இறக்குமதி மீது வரி விதித்த தாலும் உள்நாட்டு தங்கச் சந்தையில் முதலீட்டாளர்கள் 15% நஷ்டம் அடைந்தனர். பணவீக்கமும், வட்டி விகிதமும் அதிகமாக இருந்த கடந்த ஐந்து ஆண்டு காலத்தில் தங்கத்தின் மீது வருமானமே இல்லாமல் இருந்தது முதலீடு செய்த வர்களுக்குப் பெரும் நஷ்டமாகும்.
1991-2001 க்கு இடைப்பட்ட பத்தாண்டுகளில் இதே போக்குதான் நிலவியது. உள்நாட்டில் தங்கம் விலை, இந்தப் பத்து வருடங்களாக கிராம் தங்கம் ரூ.400-லேயே இருந்தது. 
தங்கத்தின் விலை 2001-க்குப் பிறகு ஏற்றமடைய ஆரம்பித்தது. 2012-ல் கிராம் தங்கம் ரூ.3,000-க்கு உயர்ந்தது. இந்த விலை ஏற்றத்தின் முதற்கட்டமானது 2007 வரை நீர்க்குமிழி போலவே அதிகரித்து வந்தது. இரண்டாம் கட்டத்தில் அது உச்சகட்ட நிலையை அடைந்தது. காரணம், சர்வதேச சந்தையில் இருந்த செயற்கையான வட்டி விகிதக் குறைவு மற்றும் இந்தியாவில் ரூபாயின் மதிப்பு வலுவிழந்தது போன்றவைதான். இந்த இரண்டு காரணங்களும் தற்போது இல்லை.
சர்வதேச சந்தையில் வட்டி விகிதமானது உயர ஆரம்பித்ததும் தங்கத்தில் ஃபைனான்ஸ் ஆவணங்கள் மூலம் முதலீடு செய்தவர்கள் அவற்றை விற்பனை செய்வது அதிகரித்தது. ஆனால், நகைகளுக்கான தேவைக்கேற்ப சர்வதேச சந்தையில் சப்ளை இல்லை.  இறக்குமதி வரிகளில் மாற்றம் மற்றும் ஜி.எஸ்.டி அறிமுகத்தால் உள்நாட்டில் தங்கத்தின் விலை சர்வதேச விலையைக் காட்டிலும் சற்றுக் கூடுதலாக இறக்கமடைய வாய்ப்பிருக்கிறது.நகைகளுக்கான மறுவிற்பனை மதிப்பு மேலும் குறையவே வாய்ப்புள்ளது.  

தற்போது தங்கத்துக்கான நீண்டகால போக்கு 2012-ல் தொடங்கி, தொடர்ந்து இறக்கத்தை நோக்கி இருக்கிறது. எந்த வொரு சொத்துகளின் சுழற்சியைப் போலவே தங்கத்தின் நீண்டகால சுழற்சியானது இடையிடையே ஏற்றத்துக்கான போக்கையும் கொண்டிருக்கிறது. எனவே, தங்கம் மேல்நோக்கி ஏற்றமடைவதற்கான வாய்ப்புகள் தெரிகின்றன. ஆனால், வருமானம் ஈட்டுவதற்கான முதலீட்டு வகைகள் இருக்கும்போது எதற்காக கஷ்டப்பட்டு வருமானம் வருமா, வராதா என்று தெரியாத தங்கம் போன்ற ஒரு சொத்து வகையில், அதுவும் நீண்டகால சுழற்சியின் இடையில் ஏன் முதலீடு செய்ய வேண்டும்? இன்னும் சில ஆண்டுகளில் வாங்குவதற்கான நல்ல வாய்ப்புகள் உருவாகும். அதுவரைக்கும் காத்திருக்கலாம். 
கடன் சார்ந்த மியூச்சுவல் ஃபண்ட் திட்டங்கள்
கடன் சார்ந்த மியூச்சுவல் ஃபண்டுகள், வட்டி விகிதக் குறைவின்போது முதலீடு செய்யப்படும் கடன் பத்திரங்களின் முதிர்வுக் கால அடிப்படையில் வருமான பலனைக் கொடுக்கிறது. வட்டிவிகிதம் குறையும்போது கடன் பத்திரங்களின் மதிப்பு கூடுகிறது. ஏனெனில், அவை அதிகபட்ச வட்டி விகிதத்தில் வெளியிடப்படுகின்றன.  

இன்னும் சில காலத்துக்கு வட்டி விகிதம் குறைவாக இருக்கும் என்பதில் எந்தச் சந்தேகமும் இல்லை. எனவே, குறுகிய கால அடிப்படையில் கடன் பத்திரத்தில்   முதலீடு செய்வதன் மூலம் இந்த ஆண்டின் கடைசி காலாண்டில் நடந்ததுபோல், வரும் காலத்திலும்  நல்ல லாபத்தைப் பெற முடியும்.
ஜனவரி 2017-லிருந்து வருமானம் ஈட்டுவது குறைந்திருந்தாலும் அக்டோபர் / நவம்பர் மாதங்களில் கடன் பத்திரங்களின் விலை குறைந்ததால் வருமானம் உயர்ந்தது. முதலீட்டாளர்கள் நீண்டகால அடிப்படையில் முதலீடு செய்வதாக இருந்தால், இவற்றில் மூன்று ஆண்டு கால அடிப்படையில் முதலீடு செய்வது பாதுகாப்பானதாக இருப்பதோடு, வட்டி விகிதக் குறைவின்போது கிடைக்கும் பலனையும் பெற முடியும். ஒருவேளை முதலீட்டாளர்களுக்குக் குறுகிய காலத்தில் பணத் தேவை இருந்தால், அவர்கள் நீண்ட கால அடிப்படையிலான கடன் பத்திரங் களைக் கொண்ட திட்டங்களைத் தவிர்த்து விட்டு, குறுகிய கால திட்டங்களைத் தேர்ந்தெடுப்பது நல்லது.
ரியல் எஸ்டேட்
நகரவாரியாக ரியல் எஸ்டேட் சந்தையின் விலை நகர்வுகளை மிகச் சரியாக மதிப்பிடும் ஓர் அளவீடு முறை ரியல் எஸ்டேட் சந்தையில் இல்லாததால்,  நாம் என்.ஹெச்.பி ரெசிடெக்ஸ் மற்றும் ரியல் எஸ்டேட் துறை தொடர்பான டேட்டாக்களையும் நம்பியிருக்க வேண்டியிருக்கிறது.
பல்வேறு அறிக்கைகள், வீடுகளின் விலை 20% முதல் 30% வரை குறையலாம் என்றும் மிகைப்படுத்திச் சொல்கின்றன. சொத்துகளை வாங்கும் முதலீட்டாளர்கள், அதற்குக் கடன் கொடுக்கும் நிதி நிறுவனங்கள், சொத்துகளை விற்கும் டெவலப்பர்கள் என அனைவருமே தங்களுடைய பங்களிப்பை மிக அதிகமாகச் செலுத்தியிருக்கிறார்கள். எந்தவொரு சொத்து வகையாக இருந்தாலும் சம்பந்தப்பட்ட இந்த மூன்று பங்குதாரர்களும் எப்போதெல்லாம் தங்களுடைய உச்சகட்ட பங்களிப்பில் இருக்கிறார்களோ, அப்போதெல்லாம் விலைச்சரிவு தவிர்க்க முடியாததாகிவிடும்.   
மேலும், ரெரா போன்ற புதிய ஒழுங்குமுறைச் சட்டங்கள் மற்றும் விற்பனை ஆகாமல் தேங்கிக் கிடக்கும் வீடுகள் போன்றவை ரியல் எஸ்டேட் டெவலப்பருக்கு நெருக்கடியாக மாறுவதோடு, வாடகை வருமானத்தையும் குறைக்கிறது. மேலும், சென்டிமென்ட் நெகட்டிவாக இருப்பதால் வாங்குவோரின் எண்ணிக்கை மிகவும் குறைகிறது. இது, வீட்டுக் கடன் நிறுவனங்கள் மற்றும் வங்கிகள் மீது தாக்கத்தை ஏற்படுத்தும் என்பது கூடுதல் சுவாரஸ்யம். ஒருபக்கம் வீட்டுக் கடன் வழங்குவதற்கான சந்தையில் வாய்ப்புகள் அதிகமிருப்பதால், பல வெற்றிகரமான நிபுணர்கள் ஆர்வமுடன் தனிப்பட்ட பங்கு ஒதுக்கீடு (பிரைவெட் ஈக்விட்டி) மூலமும், வெளிநாட்டு முதலீடு மூலமும் தொழில்முனைவோர்களாக மாறியிருக்கிறார்கள். ஆனால், மறுபக்கம் போதுமான அளவு நம்பகமான கடன்தாரர்கள் இல்லாததால் முதலீட்டின் மீதான வருமானமானது பிரச்னைக்குரியதாக இருக்கிறது. 
பங்குச் சந்தைகள் நன்கு  செயல்பட்டு வருவதால்,  பெரும்பாலோனோர் அதிக அளவில் மூலதனத்தைத் திரட்டியிருக்கிறார்கள். ஆனால், அவர்கள் தங்களுக்குள்ளேயே போட்டிப் போட்டுக்கொள்ளும்போது கடன்தாரர்களின் நம்பகத்தன்மையை சோதிப்பதில் கவனம் செலுத்தாமல் ரிஸ்க் எடுக்கிறார்கள். டெவலப்பர்களுக்கு, தேங்கிக் கிடக்கும் வீடுகளை விலை குறைத்து விற்பனை  செய்யும்நிலை உருவாவதையும் நாம் பார்க்க நேரிடலாம். எனவே, முதலீட்டாளர்கள் அதுபோன்ற நிலை உருவாகும்வரை காத்திருக்கலாம்.
பங்குகள்
வாரன் பஃபெட் சொன்ன ‘எல்லோரும்  பயப்படும்போது நீ ஆசைப்படு, எல்லோரும் ஆசைப்படும்போது நீ பயப்படு’ என்ற கூற்று தற்போதைய சூழலுக்கு மிகப் பொருத்தமானதாக இருக்கிறது. கடந்த வருடம்  பணமதிப்பு நீக்கத்துக்குப்பின், எல்லோரும் பயந்தார்கள். கடந்த ஆண்டு 70% பங்குகளில் முதலீடு செய்யலாம் என்று கூறினோம். தற்போது ஆசையுடன் முதலீடு செய்யும் முதலீட்டாளர்கள் எண்ணிக்கை அதிகரித்திருப்பதால், இப்போது நாம் கொஞ்சம் பயத்துடன் எச்சரிக்கையாக இருக்க வேண்டும். நாம் எதைக் குறித்துப் பயப்பட வேண்டும்?
அமெரிக்கச் சந்தைகளில் திடீர் இறக்கம்
அமெரிக்காவில் நிதி நெருக்கடி ஏற்பட்ட 2008-ல் கீழிறங்கியிருந்த மதிப்புகளிலிருந்து அமெரிக்கச் சந்தைக் குறியீடுகள் நான்கு மடங்கு உயர்ந்திருக்கின்றன. இந்த ஏற்றம், கடந்த 65 ஆண்டுகளில் இல்லாத மிக விரைவான ஏற்றமாகும். இதற்கான முக்கியக் காரணங்கள், குறைவு வட்டி நிறுவனங்களின் லாபத்தை அதிகரித்ததும், முதலீட்டாளர்கள் கடன் திட்டங்களிலிருந்து முதலீட்டைப் பங்குகளுக்கு மாற்றியதுமாகும். கார்ப்பரேட் நிறுவனங்களின் லாபமானது 17 வருட உச்சத்தை எட்டியது. பி/ இ விகிதமானது, நிறுவனத்தின் லாபமானது வரலாற்று உச்சத்தில் இருந்ததால் மடங்குகளில் அதிகரித்து ஏமாற்றமடையும் சூழலை ஏற்படுத்தியிருக்கிறது. ஏற்கெனவே, வட்டி விகிதங்கள் உயர்வது ஆரம்பித்துவிட்ட  நிலையில், மேலும் வட்டி விகித உயர்வு நடக்குமானால் முதலீடுகள், பங்குகளிலிருந்து திசைமாறும் நிலை உருவாகும். அமெரிக்க டாலரின் சமீபத்திய வலுவான ஏற்றத்தால் ஏற்றுமதி குறையலாம். இதனால், நிறுவனங்களின் வருமானமும் குறையும். நீண்ட கால அடிப்படையில் இந்தியச் சந்தைகள், அமெரிக்கச் சந்தையோடு தொடர்புடையதாக இல்லாவிட்டாலும், குறுகிய காலத்தில் அமெரிக்கச் சந்தைகளின் இறக்கத்தினால் நாமும் தாக்கத்தைச் சந்திக்க வேண்டிவரும். 
உள்நாட்டு முதலீடுகள் அதிகரிப்பு
கடந்த  வருடத்தில் நம் சந்தை உயர்ந்து வர்த்தகமானற்கு முக்கியமான காரணம், உள்நாட்டு முதலீட்டாளர்களிடமிருந்து நேரடியாகவும், மியூச்சுவல் ஃபண்டில் எஸ்.ஐ.பி மற்றும் மொத்தமாகவும் முதலீடுகள் அதிகமாகச் செய்யப்பட்டதுதான். மியூச்சுவல் ஃபண்டில் மாதம் ரூ.2,000 கோடி முதலீடு செய்யப்பட்டுவந்த நிலையில், அது ரூ.5,000 கோடியாக அதிகரித்துள்ளது. மேலும், பங்குச் சந்தையில் முதலீடு அதிகரிக்கக் காரணம் சந்தையின் சமீபத்திய செயல்பாடுகள் சிறப்பாக இருந்ததாலும், பிற முதலீட்டு வகைகள் அவ்வளவு சிறப்பாக செயல்படாததாலும்தான். எனவே, சந்தை 20% வீழ்ச்சி காணும்போது முதலீடுகள் என்ன ஆகின்றன என்பதைப் பொறுத்திருந்து பார்க்க வேண்டியிருக்கிறது.
சந்தையிலிருந்து குறியீடுகள் விலகிச் செல்லுதல்
என்.எஸ்.இ-யில் – 2,000 பங்குகள் பட்டியலாகியுள்ளன. பி.எஸ்.இ-யில் அதற்கும் மேல் பங்குகள் பட்டியலாகியிருக்கின்றன. ஆனால், நிஃப்டி 50-ல் உள்ள 50 பங்குகளின் மார்க்கெட் கேப்பிட்டலைசேஷன் என்.எஸ்.இ-ன் 65 சதவிகித மார்க்கெட் கேபிட்டலைசேஷனைக் கொண்டிருக்கின்றன. டாப் 100 பங்குகள் 78 சதவிகித மார்க்கெட் கேப்பிட்டலைசேஷனைக் கொண்டிருக்கின்றன. நிஃப்டி மற்றும் சென்செக்ஸ் இரண்டிலும் 35% வங்கி மற்றும் நிதித்துறைப் பங்குகள் உள்ளன, 35% ஐடி, எஃப்.எம்.சி.ஜி மற்றும் ஆட்டோ துறை பங்குகள் உள்ளன. இவற்றின் குறியீடுகள், பல்வேறு துறைகளை உள்ளடக்கிய மொத்த சந்தையின் செயல்பாடுகளைப் பிரதிபலிக்காமல் தனித்துச் செயல்படுகின்றன. எனவே, நாட்டின் மொத்த பொருளாதாரம் வளர்ச்சி காணும்போதும், நிறுவனங்களின் வருவாய் வளர்ச்சி அடையும்போதும் கூட முக்கியத் துறைகளின் குறியீடுகளில் தாக்கம் இருப்பதில்லை.
இந்த அனைத்து நெகட்டிவ் காரணிகளையும் வைத்துப் பார்க்கும்போது, நாம் ஏன் இன்னும் பங்குச் சந்தையில் நம்பிக்கையுடன் இருக்கிறோம் என்ற கேள்வி எழுகிறது. அந்த நம்பிக்கைக்குக் காரணம், தற்போது மற்ற முதலீட்டு வகைகளைக் காட்டிலும் நல்ல வருமானம் தரக்கூடியதாகப் பங்குச் சந்தை இருப்பதுதான்.  
நிறுவனங்களின் லாப வரம்பானது தற்போது 4.65 சதவிகிதத்துக்கும் கீழ் இறங்கியிருக்கிறது. இந்த இறக்கத்துக்குக் காரணம் 2007-க்குப்பிறகு நிறுவனங்களின் உற்பத்தித்திறன் பெருமளவு அதிகரித்தும், அந்தத் திறனைப் பயன்படுத்த முடியாத நிலை ஏற்பட்டதும்தான். கடந்த சில வருடங்களில் வளர்ச்சி கொஞ்சம் உயர ஆரம்பித்தது. இதனால், லாப வரம்பும் மீண்டும் நீண்ட கால சராசரிக்கு மீண்டு வந்தது. அடுத்த சில வருடங்களில் வருமானம் 50 சதவிகிதம் உயர வாய்ப்புள்ளது.

ஜி.எஸ்.டி நடவடிக்கை, பட்டியலிடப்பட்ட நிறுவனங்களின் வருமானத்தில் குறுகிய காலத்துக்குத் தாக்கத்தை ஏற்படுத்தியிருந்தாலும், இடைப்பட்ட காலத்திலும் நீண்டகாலத்திலும் பாசிட்டிவான வளர்ச்சியை ஏற்படுத்தும். எனவே, தற்போது நிறுவனங்களின் வருமான வளர்ச்சி மீண்டுவரும் நிலையில் உள்ளதால், அடுத்த மூன்றாண்டுகளில் நல்ல வளர்ச்சியைப் பார்க்க முடியும். இது, நிறுவனங்களின் பங்குகளில் எதிரொலித்து முதலீட்டாளர்களுக்கு நல்ல வருமானத்தையும் கொடுக்கும்.
சந்தைக் குறியீடுகளில் வங்கி, ஐடி, கன்ஸ்யூமர் பொருள்கள், ஆட்டோ மற்றும் எனர்ஜி உள்ளிட்ட துறை நிறுவனங்களின் பங்களிப்பு அதிகமாக இருக்கும் நிலையில், தற்போது, அவற்றில் பெரும்பாலான நிறுவனங்களின் பிசினஸ் மாடல் இடையூறுக்குள்ளாகியிருக்கிறது. இதனால், இவற்றின் நீண்ட கால வருமான வளர்ச்சியானது யூகத்தின் அடிப்படையில்தான் இருக்கிறது. எனவே, வேளாண் துறை, உற்பத்தி, கெமிக்கல், உட்கட்டமைப்பு மற்றும் பாதுகாப்புத்துறை போல இந்தத் துறைகளில் பெரிய அளவில் வளர்ச்சி இருக்காது. எனவே, முதலீட்டாளர்கள் தங்களின் போர்ட்ஃபோலியோவை டைவர்சிஃபைடாக வைத்திருந்தால், வரும் ஆண்டுகளில் நல்ல வருமானத்தைப் பார்க்கலாம். வருமானம் குறித்த எதிர்பார்ப்பைக் குறைத்துக்கொண்டு, அதிக ஏற்ற இறக்கங்களைச் சந்திக்க தயாராக வேண்டிய நேரம் இது. ஈக்விட்டி போர்ட்ஃபோலியோவில்  25 சதவிகித இறக்கத்தைத் தாங்க முடியாதவர்கள், இறங்கிய பின் வெளியேறுவதற்குப் பதிலாக இப்போதே வெளியேறிவிடுவது நல்லது. இறக்கத்தைப் பொருட்படுத்தாமல், ஏற்ற இறக்கத்தில் சரியான நேரத்தில் முதலீடு செய்யும் துணிச்சல் உடையவர்கள் நல்ல வருமானத்தைப் பார்க்க முடியும்.   அடுத்த மூன்றாண்டுகளுக்கு எதில் எவ்வளவு முதலீடு செய்ய வேண்டும் என்கிற விவரத்தை மேலே உள்ள அட்டவணையில் பார்க்கவும்.
தொகுப்பு: ஜெ.சரவணன்


10% – 20% விலை குறைந்த ரியல் எஸ்டேட்!
கடந்த மூன்று ஆண்டுகளாக ரியல் எஸ் டேட் விலை நகர்வுகள் பெரிய அளவில் இல்லை என்பதை உறுதி செய்ய எந்தப் புள்ளிவிவரமும்  தேவையில்லை. டெல்லி, மும்பை போன்ற பெரும் மாநகராட்சிகளை எடுத்துக் கொண்டால், ரியல் எஸ்டேட் விலை 10% – 20% வரை குறைந்துள்ளது. 
விலைக் குறைவைக் காட்டிலும் ரியல் எஸ்டேட் துறையில் தற்போதுள்ள  முக்கியமான பிரச்னையே முதலீட்டாளர்களின் ஆர்வம், ரியல் எஸ்டேட் துறையில் மிகவும் குறைந் துள்ளதுதான்!


ஸ்மால் கேப், மிட்கேப் பங்குகள் விலையேற்றம்
2017-ல் நிஃப்டி, சென்செக்ஸ் உள்ளிட்ட பெரும்பாலான குறியீடு கள் 25% – 30% வரை உயர்ந்தன. பெரும்பாலான ஸ்மால் கேப் மற்றும் மிட்கேப் நிறுவனப் பங்குகள் இன்னும் அதிக அளவில் ஏற்றம் கண்டு உள்ளன. பங்கு மதிப்பு களில் தொடர்ந்து காணப் பட்ட விலையேற்றம் முதலீட்டாளர்களின் கவனத்தை ஈர்த்தது. இதனால், உள்நாட்டு முதலீடுகள் சந்தையில் முந்தைய ஆண்டு களைவிட அதிக அளவில் அதிகரித்துள்ளன.இத னால், பங்குகளின் மதிப்பு களில் மேலும் ஏற்றத்தைப் பார்க்க முடிந்தது!


இன்னும் அதிக  ஏற்ற இறக்கம்
2015-க்குமுன் நீங்கள் 5 வருடம், 10 வருடம் அல்லது அதற்கு மேல் எனப் பங்குச் சந்தைகளில் முதலீடு செய்ய திட்ட மிட்டிருந்தால், ஆண்டு அடிப்படையில் பங்குச் சந்தையானது 30% ஸ்டாண்டர்ட் டிவியே ஷன் ஆகியிருக்கும். கடந்த ஒரு வருடத்தில், சந்தை  5 சதவிகிதத்துக்கு மேலேயோ, கீழேயோ எந்தவொரு மாதத்திலும் நகரவில்லை. கடந்த 24 மாதங்களில் 21 மாதங்கள் ஏற்ற இறக்கமானது சொல் லுமளவில் இல்லை. எனவே, நீண்டகால சராசரி வருமானம் நிலைத் திருக்க வேண்டுமெனில் வரும் ஆண்டுகளில், கடந்த ஆண்டுகளில் நாம் பார்த்ததைவிட  அதிக ஏற்ற இறக்கங் களைப் பார்க்க நேரிடும்!

Advertisements
%d bloggers like this: