Advertisements

வெயில் காலத்தில் பெண்கள் கட்டாயம் சாப்பிட வேண்டிய உணவு!

வெயில் காலங்களில் பலருக்கும் திட உணவு சாப்பிட பிடிக்காது. இந்தப் பிரச்னை இருப்பவர்களுக்கு கேழ்வரகுக் கூழ் நல்லதொரு உணவு.”

வெயில் காலத்தில் வயிற்றுக்குக் குளுமையான ஓர் உணவு கேழ்வரகுக் கூழ். அதனால்தான், வெயில் லேசாகத் தலைகாட்ட ஆரம்பித்தவுடனே சாலையோரங்களில் திடீர் கேழ்வரகுக் கூழ் கடைகள் உருவாகிவிடுகின்றன. வீட்டிலேயே முறைப்படி கேழ்வரகைக் கூழை எப்படித் தயாரிப்பது என்று சமையற்கலை நிபுணர் லதாமணி ராஜ்குமாரிடமும், அதை யாரெல்லாம் எந்த முறையில் சாப்பிடலாம் என்று டயட்டீஷியன் அம்பிகாவிடமும் கேட்டோம். 

கேழ்வரகுக் கூழ் தயாரிப்பது எப்படி?

 

கேழ்வரகை நிறையப் பேர் புடைத்து அப்படியே அரைத்து விடுகிறார்கள். அப்படியில்லாமல், கேழ்வரகைப் புடைத்து, கழுவி, காயப் போட்டு, லேசாக வறுத்தப் பிறகுதான், மெஷினில் கொடுத்து அரைக்க வேண்டும். அப்போதுதான் கூழ் சுவையாகவும் மணமாகவும் இருக்கும். 

ஒரு கப் கேழ்வரகு மாவை, முந்தைய நாள் இரவு 3 கப் தண்ணீரில் உப்புப் போட்டுக் கரைத்து வைத்து விடுங்கள். மறுநாள் மதியம் கூழ் காய்ச்சுவதற்கு ஏற்றப் பதத்தில் மாவு புளித்திருக்கும். கேழ்வரகு மாவுப் புளித்தால்தான் கூழ் சுவையாக இருக்கும். அடுத்து, ஒரு கப் கேழ்வரகு மாவுக்குக் கால் கப்புக்கும் கொஞ்சம் கூடுதலாக அரிசி நொய் எடுத்துக்கொள்ளுங்கள். இரண்டு கப் தண்ணீரில் களைந்த நொய்யைப் போட்டு, நன்கு வேக விடுங்கள். வெந்ததும், புளித்த கேழ்வரகு மாவை இதனுடன் சிறிது சிறிதாக ஊற்றி, அடுப்பை மிதமான தீயில் வைத்து கை விடாமல் கிளறிக்கொண்டே இருங்கள். 20 நிமிடத்தில் கேழ்வரகு மாவு வெந்து, கூழ் ரெடியாகி விடும். இதை அப்படியே ஆற விட்டு எடுத்து வைத்து விடுங்கள். மறுநாள் காலையில் தேவையான தண்ணீர் விட்டுக் கரைத்து, தயிர், நறுக்கிய வெங்காயம் சேர்த்து குடிக்கலாம். 

கேழ்வரகுக் கூழ் செய்யும்போது, கேழ்வரகு மாவில் பாதியளவுக்கு கம்பு மாவைச் சேர்த்தும் கூழ் செய்யலாம். 

கேழ்வரகு கூழ் யார், எப்படிக் குடிக்க வேண்டும்?

கேழ்வரகு கூழ் உடம்புக்கு நல்ல குளிர்ச்சித் தருகிற உணவு. இதை நொதிக்க வைத்து செய்முறையில் தயாரிக்கிற கூழை எல்லோருமே குடிக்கலாம். 

ஆனால், உடல் பருமன் பிரச்னை இருப்பவர்கள், இந்த முறையில் தயாரித்த கூழைக் குடித்தால் எடை இன்னமும் அதிகமாகலாம். இவர்கள், கேழ்வரகு மாவை நீரில் கரைத்து, அப்படியே காய்ச்சிக் குடிக்கலாம். 

நீரிழிவு பிரச்னை இருப்பவர்கள், கேழ்வரகில் கூழுக்குப் பதில் களியாகச் செய்து சாப்பிடலாம். 

குழந்தைகளுக்குக் கூழுடன் தயிர், சாம்பார் வெங்காயத்தை பொடிப்பொடியாக நறுக்கிப் போட்டு கொடுத்தால், உடல் குளிர்ச்சியாவதுடன் நோய் எதிர்ப்பு சக்தியும் கிடைக்கும். 

வெளியே சூடு அதிகமாக இருக்கும்போது, நம் உடம்பின் உள்ளுறுப்புகளிலும் சூடு அதிகமாக இருக்கும். அதனால், உணவு  ஜீரணமாவதிலும் பிரச்னை இருக்கும்.  அதனால்தான்,  வெயில் காலங்களில் பலருக்கும் திட உணவு சாப்பிட பிடிக்காது. இந்தப் பிரச்னை இருப்பவர்களுக்கும் கேழ்வரகுக் கூழ் நல்லதொரு உணவு.

ரத்த சோகையோ அல்லது கால்சியம் சத்துக் குறைபாடோ இல்லாத பெண்களை பார்க்கவே முடியாது என்கிற நிலைமையில்தான், இன்றைக்குப் பெண்களின் ஆரோக்கியம் இருக்கிறது. அவர்கள் எல்லோருமே வாரம் இரண்டு அல்லது மூன்று நாள்கள் கேழ்வரகுக் கூழை உணவில் சேர்த்துக் கொள்ளலாம். மேலே சொன்ன இரண்டு பிரச்னைகளுக்குமே ஒரே தீர்வு கேழ்வரகுக் கூழ்தான்.

Advertisements
%d bloggers like this: