அமெரிக்கப் பங்குச் சந்தை 40% இறங்கலாம்!” – எச்சரிக்கிறார் சர்வதேசப் பொருளாதார நிபுணர் அனந்த நாகேஸ்வரன்

ம் நாட்டின் வளர்ச்சிக்குச் செய்யவேண்டிய திட்டங்கள் குறித்து பிரதமர் நரேந்திர மோடி நடத்திய ஆலோசனைக் கூட்டத்தில் தமிழகத்திலிருந்து கலந்துகொண்ட மிகச் சிலரில் ஒருவர் சர்வதேசப் பொருளாதார நிபுணரான டாக்டர் அனந்த நாகேஸ்வரன். தமிழக எல்லையான தடாவில் இருக்கும் ஐ.எஃப்.எம்.ஆர்-ன் டீனாக இருக்கும் அனந்த நாகேஸ்வரன், சி.எஃப்.எ இந்தியாவின் சென்னைக் கிளை சமீபத்தில் நடத்திய கூட்டத்தில் பேசினார். இந்தக் கூட்டத்தில் அவர் பேசிய பேச்சு, உலகப் பொருளாதாரம் இன்றைக்கு எப்படியிருக்கிறது என்பதைத் துல்லியமாக எடுத்துச் சொல்வதாக இருந்தது. அந்தக் கூட்டத்தில் அவர் பேசியவை இனி…

‘‘இன்றைய உலகப் பொருளாதாரம் இருக்கும் நிலையைப் பார்த்தால், விநோதமாகத்தான் இருக்கிறது. ஒருபக்கம், பங்குச் சந்தைப் புள்ளிகள் உயர்ந்துகொண்டிருக்கின்றன. இன்னொரு பக்கம், பொருளாதார வளர்ச்சி குறைந்து வருகிறது. இதையெல்லாம் பார்க்கும்போது, உலக அளவில் நாம் இப்போது கண்டுவரும் வளர்ச்சி இயற்கையானதா அல்லது செயற்கையானதா என்கிற கேள்வியே எழுகிறது.

ஐந்து விஷயங்கள்

இன்றைக்கு உலகப் பொருளாதாரம் ஆரோக்கியமானதாக இல்லை என்பதைப் பின்வரும் ஐந்து விஷயங்களைப் பார்த்தாலே புரியும்.

1. பிட்காயின் மதிப்பு 13,000 டாலர்களைத் தொட்டிருக்கிறது. ஆறு மாதங்களுக்குமுன்பு 4,000 டாலர்களாக இருந்த பிட்காயின் மதிப்பு,  இன்று ஏறக்குறைய 13,000 டாலருக்குப் பக்கத்தில் வர்த்தகமாகி வருகிறது. அதிலும், கடந்த ஜூன் 15 முதல் ஜூலை 15 வரையிலான ஒரு மாதத்தில் மட்டும் 4,000 டாலர் அதிகரித் திருக்கிறது. ஏற்கெனவே இருக்கும் முதலீடுகளின் மீது முதலீட்டாளர்களுக்கு இருக்கும் நம்பிக்கை குறைகிறதோ என்கிற கேள்வி எழுகிறது. 

2. உலக அளவில் ஏறக்குறைய 13 ட்ரில்லியன் டாலர் மதிப்புள்ள கடன் சந்தை எந்த வருமானத் தையும் தராமல், ‘நெகட்டிவ் ரிட்டர்ன்’ தந்து வருகிறது. இருந்தபோதிலும், கடன் சந்தையில் மக்கள் பணத்தைப் போடவே செய்கிறார்கள்.

3. நூறு ஆண்டுகள் கழித்து அதாவது, 2117-ம் ஆண்டில் முதிர்ச்சி அடைகிற நூறு ஆண்டு பாண்டை வெளியிட்டிருக்கிறது ஆஸ்த்ரியா அரசாங்கம். இந்த பாண்டு சராசரியாக 1% மட்டுமே வருமானம் தந்திருக்கிறது. நூறு ஆண்டுகள் கழித்து, நல்ல வருமானம் கிடைக்கும் என்கிற நம்பிக்கை மக்களிடம் இல்லை என்பதையே இது சொல்கிறது.

4. அமெரிக்காவில் அளிக்கப்பட்டிருக்கும் கடன்களில் 80% எந்த வகையிலும் பாதுகாப்பு இல்லாததாகவே இருக்கிறது. 2011 மே மாதத்தில் சுமார் 15 சதவிகிதமாக இருந்தது, இப்போது 80 சதவிகிதத்தைத் தாண்டும் அளவுக்குப் பெருகி யிருக்கிறது. இத்தனை ரிஸ்க்கான விஷயங்களுக்குக் கடன் தந்து, அந்தப் பணம் வராமல் போனால், என்ன விளைவுகள் ஏற்படும் என்பது மிகப் பெரிய கேள்வி.

5. கிரீக் பாண்டு சில ஆண்டுகளுக்குமுன்பு மிகப் பெரிய அளவில் வருமானம் தந்தது.  2009-10-ல் சுமார் 5 சதவிகிதத்துக்குமேல் வருமானம் தந்த இந்த பாண்டு, 2012-ல் 44% வருமானம் தந்தது. பிற்பாடு இந்த பாண்டின் வருமானம் குறைய ஆரம்பித்து, தற்போது வெறும் 2.44% அளவுக்கு மட்டுமே வருமானம்  தரும் நிலையில் இருக்கிறது.

இந்த ஐந்து விஷயங்களின் அடிப்படையில் பார்த்தால், உலகப் பொருளாதாரம் வளர்ச்சி காண்பதில் சிக்கல்கள் இருப்பது தெளிவாகிறது.

குறையும் ஜி.டி.பி, அதிகரிக்கும் பங்கு வருமானம்

வட்டி விகிதங்களைத் தொடர்ந்து குறைத்து வருவதில் முனைப்புடன் செயல்படுகிறது அமெரிக்க ஃபெட். அடுத்துவரும் ஆண்டுகளில் வட்டி விகிதம் ஏற வாய்ப்பிருக்கிறதா என்கிற கேள்விக்கு, ஒரு சதவிகிதம்கூட வாய்ப்பில்லை; மாறாக, வட்டி விகிதம் குறைக்கப்படுவதற்கே 100% வாய்ப்பிருக்கிறது என்பதே பலரும் சொல்லும் கருத்தாக இருக்கிறது.

 

‘கடந்த மூன்று மாத காலத்தில் உங்களுக்கு எளிதாகக் கடன் கிடைக் கிறதா’ என்கிற கேள்வியை அமெரிக்காவில் உள்ள சிறு, குறு மற்றும் நடுத்தரத் தொழில் நிறுவனங்களை நடத்துகிறவர்களிடம் கேட்டு, ஒரு சர்வே நடத்தி னார்கள். ‘கடன் கிடைப்பது கடினமாக இருக்கிறது’ என்கிற பதிலை யாருமே சொல்லவில்லை. 

அதேபோல, ‘கடன் வாங்குவதோ அல்லது வட்டி விகிதமோ உங்கள் தொழிலை நடத்த ஒரு பிரச்னையாக இருக்கிறதா’ என்கிற கேள்வியையும் தொழில் துறையினரிடம் கேட்டார்கள். ‘அதெல்லாம் எங்களுக்கு ஒரு பிரச்னையே இல்லை’ என்றுதான் பதில் வந்திருக்கிறது. 

பொதுவாக, இவ்வளவு கடன் கிடைத்தால், தொழில் பெருகி விற்பனை அதிகரித்து நிறுவனங் களின் லாபம் பெருகினால், அமெரிக்கப் பங்குச் சந்தையான எஸ் அண்டு பி 500-ன் வருமானமும் உயர்ந்து, ஜி.டி.பி-யும் அதிகமாக இருக்கும் என்று நாம் எதிர்பார்ப்பது இயற்கையான விஷயம்தான்.

ஆனால், கடந்த 70 ஆண்டு காலத்தில் நமக்குக் கிடைக்கும் புள்ளிவிவரங்களைப் பார்த்தால், நிலைமை நேர்மாறாக இருக்கிறது. 1949-ம் ஆண்டு முதல் 2000-ம் ஆண்டு வரையிலான காலத்தில் எஸ் அண்டு பி தந்த வருமானம் 15 சதவிகிதத்துக்கு மேல். இந்தக் காலகட்டத்தில் அமெரிக்காவின் நாமினல் ஜி.டி.பி 7.3 சதவிகிதத்திலிருந்து 10.8% வரை இருந்திருக்கிறது. 

ஆனால், கடந்த 20 ஆண்டுகளில் எஸ் அண்டு பி தந்த வருமானம் 15 சதவிகிதமாக இருக்க, அமெரிக்காவின் நாமினல் ஜி.டி.பி மட்டும் 3.9 சதவிகிதமாக மட்டுமே இருக்கிறது. அமெரிக் காவின் ஜி.டி.பி வளராமல், அமெரிக்கப் பங்குச் சந்தையின் வருமானம் மட்டும் அதிகரித்துவருவது விநோதமான முரண்பாடு. 

எஸ் அண்டு பி பங்குகள் தரும் வருமானம் இப்படி ஏகத்துக்கும் அதிகரித்திருப்பதால், அந்தப் பங்குகளின் மதிப்பீடும் மிக அதிகமாக இருக்கிறது. எஸ் அண்டு பி பங்குகளின் பி/பிவி (P/Bv) 10.8 மடங்கு அதிகமாக இருக்கிறது. இது கடந்த     2000-ம் ஆண்டில் டாட்காம் குமிழ் நெருக்கடி ஏற்பட்டபோது இருந்ததைவிட 26% அதிகம்.

பங்குச் சந்தை எவ்வளவு இறங்கும்?

அமெரிக்கப் பொருளாதாரம் நெருக்கடியைச் சந்திக்கும் நிலைக்கு வந்துவிட்டது என்பதற்கான அறிகுறிகள் தெரிய ஆரம்பித்துவிட்டன. அமெரிக்கா முழுக்க உள்ள பணியாளர்கள் அதிக  நேரம் வேலை பார்த்தது கடந்த மார்ச் மாதத்தில்தான். விற்பனை அதிக அளவில் இருந்ததும் அதே மார்ச் மாதத்தில்தான். தனிநபர் களின் வருமானம் உச்சபட்சமாக இருந்தது கடந்த ஆண்டு டிசம்பர் மாதத்தில்தான். அதே மாதத்தில்தான், தொழில் துறை உற்பத்தியும் அதிக அளவில் இருந்தது. இவற்றையெல்லாம் பொருளாதார வளர்ச்சி குறைந்து, தளர்ச்சி ஏற்படுவதற்கான ஓர் அறிகுறியாகவே பார்க்கலாம்.

இந்த நிலையில், அமெரிக்கப் பங்குச் சந்தைகள் சரியத் தொடங்கினால், எந்த அளவுக்குச் சரியலாம் என்பது முக்கியமான கேள்வி. கடந்த 2001-ம் ஆண்டு அமெரிக்காவில் பொருளாதார நெருக்கடி ஏற்பட்டபோது, எஸ் அண்டு பி 500 இண்டெக்ஸ் 36.8% இறக்கம் கண்டது.

2008-ம் ஆண்டில் பொருளாதார நெருக்கடி ஏற்பட்டபோது, எஸ் அண்டு பி 500 இண்டெக்ஸ் 56.8% இறக்கம் அடைந்தது. அமெரிக்காவில் இனியொரு பொருளாதார நெருக்கடி ஏற்பட்டால், எஸ் அண்டு பி 500 இண்டெக்ஸ் சுமார் 40% வரை இறங்குவதற்கு வாய்ப்புண்டு என்று எதிர்பார்க்க லாம்.

சிறந்த வருமானம் தந்த முதலீடு

அமெரிக்காவில் பொருளாதார நெருக்கடி நேர்ந்தபோதெல்லாம் எந்தெந்த முதலீடுகள் எவ்வளவு வருமானம் தந்திருக்கின்றன என்று பார்த்தால், அமெரிக்க எஸ் அண்டு பி 500 இண்டெக்ஸ் 22.7% நஷ்டத்தையே தந்திருக்கிறது.

ஆனால், நெருக்கடியான காலத்தில் தங்கமானது 0.1% என்கிற அளவுக்கு லாபம் தந்திருக்கிறது. பொருளாதார நெருக்கடி ஏற்படும்போதெல்லாம் நமது முதலீட்டினைக் காத்துக்கொள்ள வேண்டும் என்றால், தங்கத்தில் முதலீடு செய்வதே சரி. இதனால்தான் தங்கத்தை நெருக்கடியான காலத்தில் நம் முதலீட்டினைக் காக்கும் இன்ஷூரன்ஸ் என்று சொல்கிறேன்.”

வட்டி விகிதம் உயரவேண்டும்

அமெரிக்காவில் இப்போது ஏற்பட்டுள்ள பிரச்னைக்கு தீர்வு என்ன எனில், பணவீக்கம் ஏற்பட்டு வட்டி விகிதம் உயர்வதுதான். வட்டி விகிதம் குறையக் குறைய கடன்காரர்களின் எண்ணிக்கைதான் அதிகரிக்கும். கடன் வாங்கியவர்கள் குறைந்த அளவிலான வட்டியை மட்டும் கட்டிவிட்டு, அசலைத் திரும்பச் செலுத்தாமலே காலம் கடத்துவார்கள்.

ஆனால், வட்டி விகிதம் உயர்ந்தால், கடன் வாங்கியவர்கள் முடிந்தவரை சீக்கிரமாகக் கடனைத் திரும்பச் செலுத்திவிட்டு, பணத்தைச் சேமிக்கத் தொடங்கு வார்கள். இதனால் முதலீடு பெருகி, தொழில் வளர்ச்சி ஏற்படும்.

வட்டி விகிதம் குறைய வேண்டும் என்று பலரும் சொல்லும்போது, நான் இப்படிச் சொல்வது பலருக்கும் விநோதமாகத் தோன்றலாம்; ஆனால், உண்மையான பொருளாதார வளர்ச்சி ஏற்படவேண்டுமெனில், பணவீக்கம் ஏற்பட்டு வட்டி விகிதம் உயர்வது தவிர வேறு வழியில்லை’’ என்று பேசி முடித்தார் அனந்த நாகேஸ்வரன்.


இந்தியாவில் என்ன பிரச்னை?

“அமெரிக்கப் பொருளாதாரம் மட்டுமல்ல, சீனப் பொருளாதாரமும் சிக்கலில்தான் இருக்கிறது. சீனாவின் நிதித் துறையானது மிகப் பெரிய அளவில் வளர்ந்திருக்கிறது. அமெரிக்கா, இங்கிலாந்து ஆகிய நாடுகளின் நிதித் துறையைவிட அதிக அளவில் வளர்ந்திருப்பது சீனப் பொருளாதாரத்துக்கு ஒரு பெரும் எச்சரிக்கைதான். இந்த நிலையில், இந்தியப் பொருளாதாரத்தில் என்ன பிரச்னை என்று பார்ப்போம்.

கடன் வளர்ச்சி இல்லை

2008-க்குமுன் சிறப்பாக இருந்தது கடன் வளர்ச்சி விகிதம். 2013-க்குப் பிறகு கடன் வளர்ச்சி நெகட்டிவ் போக்கிலேயே இருக்கிறது. அதிலும் குறிப்பாக, தொழில் நிறுவனங்களுக்கான கடன் வளர்ச்சி 2.5% என்கிற அளவிலேயே இருக்கிறது. கடந்த 2008-ம் ஆண்டில் 25% என்கிற அளவில் தொழில் நிறுவனங்களுக்கான கடன் வளர்ச்சி இருந்தது கவனிக்கத்தக்கது. ஒட்டுமொத்தக் கடன் வளர்ச்சியும் 10% என்கிற அளவிலேயே இருக்கிறது. இது 2008-ல் 20 சதவிகிதமாக இருந்தது.

குறையும் தொழில் வளர்ச்சி 

தொழில் நிறுவனங்கள் செய்யும் மூலதனச் செலவும் ஆண்டுக்காண்டு குறைந்துவருகிறது.  2012-க்குப் பிறகு குறையத் தொடங்கிய இந்த மூலதனச் செலவு, தற்போது ஏழில் ஒரு மடங்காக மட்டுமே இருக்கிறது. 2004 – 2011-ம் ஆண்டு காலத்தில் நிதித் துறை அல்லாத தனியார் நிறுவனங்களின் கடன் 23.04 சதவிகிதமாக இருந்தது, 2011-18-ம் ஆண்டு காலத்தில் 11.53 சதவிகிதமாகக் குறைந்திருக்கிறது. அதேபோல, 2004-2011-ம் ஆண்டு காலத்தில் 21.3 சதவிகிதமாக இருந்த ஏற்றுமதி, 2011-18-ல் 2.7 சதவிகிதமாகக் குறைந்துவிட்டது. இந்த நிலையில், வங்கிசாரா நிதி நிறுவனச் சிக்கல் போன்ற பல பிரச்னைகள் உள்ளன.

அரசாங்கம் செய்ய வேண்டியது என்ன?

ன்றைய யதார்த்தமான நிலைமையை முதலில் ஒப்புக்கொள்ள வேண்டும். இந்த நிலையிலிருந்து வெளியேறும் வழிகளை மக்களிடம் எடுத்துச் சொல்லவேண்டும். இதற்குத் தேவையான தியாகத்தினை எல்லோரிடமிருந்து எதிர்பார்க்கும் அதேவேளையில், அரசியல்வாதிகள் முன்னுதாரணமாகவும் விளங்க வேண்டும். உலகப் பொருளாதாரச் சூழலில், நமக்குக் கிடைக்கும் எந்த சிறு வாய்ப்பினையும் தவறவிடக் கூடாது. பெரிதாகத் திட்டமிடுவதைவிட, குறுகிய காலத்தில் வளர்ச்சிக்கு வழிவகுக்கும் திட்டங்கள் தேவை. இன்றைக்கு இருக்கும் கொள்கைகளுக்கு எந்தவிதமான பாதிப்பினையும் ஏற்படுத்தக்கூடாது என்பதுடன் ஒரே ஒரு நபர் சொல்லும் கருத்து வேறுபட்டதாக இருந்தாலும் அதை அக்கறையுடன் கவனிக்கும் கனிவும் வேண்டும்!”

%d bloggers like this: