கண்டிப்பு, காமெடி, கெடுபிடி… `ஆல்ரவுண்டர்’ எடப்பாடி பழனிசாமி

எதிர்க்கட்சியினர் கேள்வியைக் கேட்டு முடிக்கும் முன்பே எழுந்து பதில் சொல்வது முதல், அமைச்சர்கள் அளிக்க வேண்டிய பதிலுக்கு முந்திக்கொண்டு முதல்வராகப் பதில் சொல்வது வரை சட்டசபையில் எனர்ஜி காட்டிவருகிறார் முதல்வர் எடப்பாடி பழனிசாமி.

ஜெயலலிதா முதல்வராக இருந்தபோது, எதிர்க்கட்சிகள் கேள்விகளை எழுப்பினால், சம்பந்தப்பட்ட துறையின் அமைச்சர்கள் பதில் சொல்கிறார்களோ இல்லையோ தக்க பதிலளித்து பலநேரங்களில் எதிர்க்கட்சியினருக்கு நெருக்கடி கொடுத்தார். அதேபோல் கருணாநிதி முதல்வராக இருந்த நேரத்தில் எதிர்க்கட்சிகள் கேள்விகளை எழுப்புவதற்கு முன்பாக ஒன்றுக்கு இரண்டு முறை அதை சரி செய்துகொண்டே கேள்விகளை எழுப்பினார்கள். இல்லையென்றால் அதற்கு கருணாநிதியிடமிருந்து வரும் பதில் எப்படி இருக்கும் என்று இருதரப்புக்கும் நன்றாகத் தெரியும். இப்படி அ.தி.மு.க, தி.மு.க இரண்டு கட்சிகளிலும் அந்தக் கட்சிகளின் தலைமைகள் ஆல்ரவுண்டர் போன்று சட்டசபையில் கலக்கி வந்தனர்.

எடப்பாடி முதல்வராகி மூன்றாண்டுகள் முடிந்துவிட்டன. ஆட்சியின் தலைவராக தன்னை நிலைநிறுத்திக்கொண்டது போல தனது ஆளுமை அனைத்திலும் வெளிப்பட வேண்டும் என்று எடப்பாடி முடிவு செய்துவிட்டது, இப்போது நன்றாகத் தெரிகிறது. முதல்வராக அவர் பொறுப்பேற்ற காலங்களில் எதிர்க்கட்சிகள் எழுப்பும் கேள்விகளுக்கு அவருடைய பதிலைத் தாண்டி, செங்கோட்டையன், ஜெயக்குமார் உள்ளிட்ட மூத்த அமைச்சர்கள் எழுந்து பதில் அளிப்பார்கள். அடுத்தடுத்த காலங்களில், முதல்வருடன் பக்கபலமாக வேலுமணி, தங்கமணி உள்ளிட்டவர்களும் அவை முன்னவர் பன்னீர்செல்வமும் பதில் அளித்துவந்தனர். ஆனால், இப்போது சட்டசபையிலும் தானே கதாநாயகராக இருக்க வேண்டும் என்று முடிவெடுத்துவிட்டார் போலும். எதிர்க்கட்சித் தலைவர் முதல் எதிர்க்கட்சி உறுப்பினர்கள் வரை எழுப்பும் அனைத்துக் கேள்விகளுக்கும் அமைச்சர்களோடு சேர்ந்து எடப்பாடியும் பதிலடி கொடுத்துவருவதைப் பார்த்து ஆளுங்கட்சியினர் ஆச்சர்யப்படுகின்றனர்.

குறிப்பாக என்.பி.ஆர். விவகாரத்தில் எதிர்க்கட்சிகள் தீர்மானம் கொண்டு வர வேண்டும் என்று கடுமையாக வலியுறுத்தியபோதும், சிறிதும் சஞ்சலம் இல்லாமல் அவர்களுக்கு ஈடுகொடுத்து பதில் அளித்தார். அதேபோல் கடந்த வெள்ளியன்று இதே விவகாரம் மீண்டும் சட்டமன்றத்தில் கிளம்பியபோது அமைச்சர் உதயகுமார் பதில் அளிப்பார் என்று எதிர்பார்த்தார்கள். ஆனால், அமைச்சர் அளித்த விளக்கத்துக்குப் பிறகு முதல்வர் எழுந்து, “2003 என்.பி.ஆர் சட்டத்தைக் கொண்டு வந்த காரணத்தினால்தான் இவ்வளவு பிரச்னைகளே வந்தன. 2003-ல் மத்திய அரசு என்.பி.ஆர் சட்டத்தைக் கொண்டு வந்ததன் விளைவு இப்போது நீங்கள் பேசிக் கொண்டிருக்கிறீர்கள். அதில் சில அம்சங்களைச் சேர்க்கலாம், நீக்கலாம் என்று அந்தச் சட்டத்தில் இடம் பெற்றிருக்கிறது. அந்தச் சட்டத்திலே இடம் பெற்றிருக்கின்ற காரணத்தினால்தான் இன்றைக்கு மத்திய அரசு மூன்று புதிய அம்சங்களைச் சேர்த்திருக்கிறார்கள். அதற்குதான் விளக்கம் கேட்டிருக்கிறோம். நீங்கள் நிறைவேற்றிய சட்டம். அதாவது, திராவிடமுன்னேற்றக் கழகம் மத்தியிலே ஆட்சி அதிகாரத்திலே இருக்கின்றபோது கொண்டுவந்த சட்டம். 2010-ல் நீங்கள் கணக்கெடுப்பு செய்தீர்கள். என்.பி.ஆர் கணக்கெடுப்பு தமிழ்நாட்டில் முதன்முதலில் செய்தது நீங்கள்தான். அந்த அடிப்படையிலேதான் இப்படி பதற்றமான சூழ்நிலையில் அச்ச உணர்வோடு இருக்கின்ற அந்த மக்களுக்கு அரசாங்கம் செய்ய வேண்டிய கடமையைத்தான், நாங்கள் இந்தத் தகவல்களை மத்திய அரசிடம் கேட்டிருக்கின்றோம்” என்று பதிலடி கொடுத்தார்.

ஏற்கெனவே, பிப்ரவரி மாதம் நடந்த கூட்டத்தொடரில் குடியுரிமை சட்டத்துக்கு எதிராகத் தீர்மானம் நிறைவேற்ற வேண்டும் என்று தி.மு.க போர்க்கொடி தூக்கியது. அதற்கு முதல்வர் எடப்பாடி பழனிசாமி பதிலடியாக “குடியுரிமை திருத்தச் சட்டத்தால், யாராவது ஒருத்தருக்காவது பாதிப்பு ஏற்பட்டதா எனச் சொல்லுங்கள்,” என்று தி.மு.க-வுக்குச் சவால்விட்டவர், “இந்த விவகாரத்தில், உங்களைப்போல நாங்கள் நடிக்கவில்லை; நாடகமாடவில்லை,” என்று காரசாரமாக பேசிய வீடியோ சமூகவளைதளங்களிலும் வைரலானது. அதேபோல்தான் என்.பி.ஆர் விவகாரத்திலும் முதல்வரின் பதிலுரை அமைந்திருந்தது.

நடப்புக் கூட்டத்தொடரில் எதிர்க்கட்சி உறுப்பினர் ஒருவர், “படிப்படியாக மது விலக்கு என்று தேர்தல் அறிக்கையில் அ.தி.மு.க குறிப்பிட்டதே அதன் நிலை என்ன?” எனக் கேள்வி எழுப்பியதற்கு, முதல்வரிமிருந்தே பதில் வந்தது. “தேர்தல் வாக்குறுதி கொடுக்கின்றபோது படிப்படியாகத்தான் எல்லாமே செய்யமுடியும். குறிப்பிட்ட காலத்திலேயே எல்லாவற்றையும் செய்திட முடியாது. உங்களுடைய தலைவர் எப்படியெல்லாம் பேசியிருக்கிறார் என்று எல்லா குறிப்புகளும் எங்களிடம் இருக்கிறது. எல்லோரும் ஒரு கருத்தை ஏற்றுக்கொள்ளும் விதத்தில் இன்றைக்கு பூரண மதுவிலக்கு கொண்டுவர வேண்டும் என்று சொல்கிறீர்கள். படிப்படியாகத்தான் அதைச் செயல்படுத்த முடியும். கள்ளச்சாராயம் வந்துவிடக் கூடாது என்பதற்காகத்தான் அரசு கவனமாக இருக்கிறது. படிப்படியாக மதுக்கடைகள் குறைக்கப்படும் என்ற செய்தியைச் சொல்லி இருக்கிறது” என்றார்.

அதோடு தி.மு.க-வுக்கு செக் வைக்கும் விதத்தில் “நீங்கள் ஆட்சியமைத்த காலத்தில் தேர்தல் அறிக்கையில் நிலமற்ற ஏழை விவசாயிகளுக்கு 2 ஏக்கர் நிலம் கொடுப்பேன்” என்று சொன்னீர்கள். ‘எத்தனை விவசாயிகளுக்கு கொடுத்திருக்கிறீர்கள்?, எங்கே கொடுத்தீர்கள்? எத்தனை விவசாயிகள் பயன்பெற்றிருக்கிறார்கள்?” என்று கேள்விகளை முன்வைத்து தி.மு.க-வை திணறடித்ததைப் பார்த்து அ.தி.மு.க உறுப்பினர்கள் ஆச்சர்யப்பட்டார்கள்.

ஒருபுறம் கண்டிப்பான பேச்சு இருந்தாலும், எதிர்க்கட்சிகளும் சிரிக்கும் அளவுக்கு சில காமெடிகளையும் அவ்வப்போது சொல்லிவருகிறார். வியாழக்கிழமை அன்று கொரோனோ குறித்த சிறப்புக் கவன ஈர்ப்புத் தீர்மானம் அவையில் கொண்டுவரப்பட்டது. அப்போது எதிர்க்கட்சித் துணைத்தலைவர் துரைமுருகன் “கொரோனா பயம் அதிகமாக இருக்கிறது. தொலைபேசியை எடுத்தால் இருமலுடன் கொரோனா என்கிறார்கள். சட்டமன்றத்தின் வெளியே, பொது இடங்களில் கொரோனா நடவடிக்கை என எங்கு பார்த்தாலும் கொரோனா பயம் இருக்கிறது. நீங்கள் அதற்குப் பயப்பட வேண்டாம் என்கிறீர்களே?” என்று கேட்டார்.

இதற்கு உடனடியாக எழுந்து பதில் சொன்ன முதல்வர் “ 70 வயதுக்கு மேல் உள்ளவர் என்பதால் எதிர்க்கட்சித் துணைத் தலைவர் அச்சம் கொள்கிறார்போல. உங்களுக்கு வயது அதிகமாக இருந்தால் கூட நீங்கள் அச்சப்பட வேண்டாம். அதற்குரிய சிகிச்சை அளிக்கத் தயாராக உள்ளோம்” என்று சொல்லியதும் அவையில் இரண்டு புறமும் இருந்த உறுப்பினர்களிடையே சிரிப்பலை எழுந்தது. குறிப்பாக சில மூத்த அமைச்சர்கள் பதில் அளிக்கும்போது முதல்வர் குறிக்கீடு செய்வதில்லை. ஆனால், ஜூனியர் அமைச்சர்களின் துறை சார்ந்து எதிர்க்கட்சிகள் கேள்வி எழுப்பினால், அந்தக் கேள்விக்கான பதிலை அமைச்சர்கள் கொடுக்கும்போது, அதற்கு பக்கபலமாக முதல்வரின் பேச்சும் இருக்கிறது. சில நேரங்களில் தங்கமணி, வேலுமணி, விஜயபாஸ்கர் உள்ளிட்டவர்களி்ன் துறை ரீதியான கேள்விகளுக்கே முதல்வர் எழுந்து பதில் கொடுத்து வருகிறார்.

முதல்வரின் இந்த ஆல்ரவுண்டிங் பேச்சை எதிர்க்கட்சித் துணைத்தலைவர் துரைமுருகன், ஒருமுறை சட்டமன்றத்திலே “பேரவைகளில் எதிர்க்கட்சியினர் எழுப்பும் கேள்விக்கு பதிலளிப்பதில் முதல்வர் எடப்பாடி பழனிசாமி நன்கு தேறிவிட்டார். முதலமைச்சர் ஒன்றும் பதில் சொல்ல முடியாதவர் அல்ல. எடப்பாடி பழனிசாமி பதிலளிப்பதைப் பார்த்து பலமுறை நானே அசந்துபோய் இருக்கிறேன்” என்றார். அந்த அளவுக்கு முதல்வரின் பேச்சு முன்னேற்றம் அடைந்துள்ளது.

தன்னை ஒரு ஆளுமைமிக்க தலைவராக அனைத்திலும் நிரூபணம் செய்ய வேண்டும் என்பதில் எடப்பாடி உறுதியாக இருக்கிறார். அதை பல நேரங்களில் நிருபித்தும் வருகிறார்…!

%d bloggers like this: