ஸ்டாலினுக்கு எதிராக மூத்த அமைச்சர்கள்?

பல்வேறு கருத்து மாறுபாடுகள் தமிழக அரசையும் அசைத்துப் பார்க்கத் தொடங்கியிருக்கிறது என விஷயமறிந்தவர்களShow More
தலைப்பைப் படித்ததும் சிலருக்கு ஆச்சரியமாக இருக்கலாம். சிலருக்கு அதிர்ச்சியாகக்கூட இருக்கலாம். இதெல்லாம் நடக்கிற விஷயமா எனப் பலரும் எண்ணலாம். ஆனால் தேசிய அரசியலில் வி.பி சிங், ஐ.கே குஜ்ரால் தொடங்கி பல்வேறு மாநிலங்களில் ஆட்சிகள் கவிழ்ந்த நேற்றைய வரலாற்றைக் கொஞ்சம் அலசினால் எல்லாவற்றின் பின்னணியிலும் அரசியல் கருத்து மாறுபாடுகள் இருப்பதை புரிந்துகொள்ள முடியும்.

இத்தகைய கருத்து மாறுபாடுகள்தான் இப்போது தமிழக அரசையும் அசைத்துப் பார்க்கத் தொடங்கியிருக்கிறது என விஷயமறிந்தவர்கள் கிசுகிசுக்கின்றனர்.



இத்தகைய கருத்து மாறுபாடுகள்தான் இப்போது தமிழக அரசையும் அசைத்துப் பார்க்கத் தொடங்கியிருக்கிறது என விஷயமறிந்தவர்கள் கிசுகிசுக்கின்றனர்.

துரைமுருகனின் கோபம்
விஷயத்திற்கு வருவோம்! கருணாநிதியின் மறைவுக்குப் பிறகு திமுகவின் தலைமைப் பொறுப்பில் ஸ்டாலின் அமர்ந்ததை தொண்டர்கள் முழு மனதோடு ஏற்றுக்கொண்டாலும் சில மூத்த நிர்வாகிகளுக்கு அதில் பூரண உடன்பாடு இல்லை என்று சொல்லப்படுகிறது. இதில் முதன்மையானவர் கட்சியின் பொதுச் செயலாளராக இருக்கும் அமைச்சர் துரைமுருகன் என்கின்றன உள்வட்டாரங்கள்.
அமைச்சரவை உருவாக்கத்தின்போது ஒட்டுமொத்தப் பொதுப்பணித் துறையும் தமக்குக் கிடைக்கும் என நம்பிக்கொண்டிருந்தார். ஆனால் ஸ்டாலினோ அந்தத் துறையையே கூறுபோட்டு, அதில் ஒரு பகுதியான நீர்வளத் துறையை மட்டும் தர, துரை மிகவும் கடுப்பானார் என்று கேள்வி. போதாதக்குறைக்குக் கட்சியின் முக்கிய விஷயங்களில் பொதுச் செயலாளரான தம்மிடம் கலந்தாலோசிக்காதது அவரைக் கொந்தளிக்க வைத்திருக்கிறது என்றும் சொல்கிறார்கள்.
இதனால் சமீப காலமாக துரைமுருகன் கட்சி நிகழ்ச்சிகளில் பங்கேற்காமல் தவிர்த்துவருகிறார். முன்னாள் அமமுக பிரமுகர் பழனியப்பன் ஆதரவாளர்கள் திமுகவில் இணையும் நிகழ்ச்சி பற்றி துரைமுருகனிடம் சொல்லப்படவே இல்லையாம். தனது மகனும் வேலூர் நாடாளுமன்ற உறுப்பினருமான கதிர் ஆனந்தை, வன்னியர்கள் அதிகம் வசிக்கும் தர்மபுரி மாவட்ட இணைப் பொறுப்பாளராக அறிவிக்கும்படி அவர் விடுத்த வேண்டுகோளையும் தலைமை கண்டுகொள்ளவில்லை எனக் கூறப்படுகிறது.
இதுபோன்ற காரணங்களால் ஸ்டாலின் மீது கடும் அதிருப்தியில் இருக்கும் துரைமுருகன், தனது சீற்றத்தை வழக்கம்போல வெளிப்படையாக முன்வைத்தும் வருகிறாராம். இது ஸ்டாலின் காதுகளையும் எட்ட, இருவருக்கும் இடையிலான இடைவெளி அதிகரிக்கத் தொடங்கியிருப்பதாக அறிவாலய வட்டாரங்கள் கூறுகின்றன.
அதிருப்தியாளர்கள் பட்டியலில் அடுத்த இடம் அமைச்சர் கே.என் நேருவுக்கு என்று சொல்கிறார்கள். வெளியில் பார்க்கும்போது இவருக்கும் ஸ்டாலினுக்கும் இடையில் மிக நெருங்கிய உறவு இருப்பதாகத் தெரியும். ஆனால் உள்ளுக்குள் புகைச்சல்தான் என்கின்றன கோட்டை வட்டாரங்கள். பொதுக்கூட்டங்கள், மாநாடுகளை அமர்க்களமாக நடத்தும் நேரு, அமைச்சருக்கான பணிகளைச் செய்வதில் அவ்வளவு ஆர்வம் காட்டுவதில்லையாம். சமீபத்திய மழை வெள்ளத்தின்போது ஆரம்ப நாட்களில் அவர் களத்திற்கு செல்லத் தயங்கியிருக்கிறார். இதையறிந்த ஸ்டாலின், “ஆபிசில் உட்கார்ந்துகொண்டு அதிகாரிகளுக்கு உத்தரவு போடும் நேரமா இது?’’ என சீறியதோடு தானே நேரடியாகக் களமிறங்கினார். இதன் பிறகுதான் நேரு அடித்துப் பிடித்துக்கொண்டு ஸ்டாலினுடன் இணைந்தார்.

ஆட்சியின் ஆரம்பக் கட்டம் என்பதால் டெண்டர் போன்ற விஷயங்களில் கொஞ்சம் அடக்கி வாசிக்குமாறு அமைச்சர்களுக்கு ஸ்டாலின் சொன்னதை நேரு கொஞ்சமும் கண்டுகொள்ளவில்லை என்றும் கூறப்படுகிறது. இதுபோக உயர் அதிகாரிகளை கூட ‘வா..,போ’ என சகட்டுமேனிக்கு ஒருமையில் அழைப்பதையும் ஸ்டாலின் ரசிக்கவில்லையாம். இதையெல்லாம் மனதில் வைத்து சமீபத்தில் மீசைக்காரருக்கு முதல்வர் செமத்தியாக டோஸ் விட்டதாகவும், இதனால் அவர் அப்செட் ஆனதாகவும் தகவல் உண்டு.

இவர்கள் தவிர, பசையுள்ள துறைகள் கிடைக்காத வருத்தத்தில் இருக்கும் கூட்டுறவு அமைச்சர் ஐ.பெரியசாமி, வருவாய்த் துறை அமைச்சர் கே.கே.எஸ்.எஸ்.ஆர். ராமச்சந்திரன், செய்தித் துறை அமைச்சர் மு.பெ சுவாமிநாதன் உள்ளிட்ட சிலர் இரவு வேளைகளில் தொலைபேசி வாயிலாகத் தங்களுக்கிடையே அதிருப்தியைப் பகிர்ந்துவருவதாக தகவல். இந்த அதிருப்தியாளர்கள் பட்டியலில் மீனவர் நலத் துறை அமைச்சர் அனிதா ராதாகிருஷ்ணனும் அண்மையில் இணைந்திருப்பதாக பேச்சு.
இதுபற்றி உயரதிகாரிகள் வட்டாரத்தில் விசாரித்தபோது, “நீண்ட போராட்டத்திற்கு பிறகு அரை நூற்றாண்டு கால அரசியல் அனுபவத்திற்குப் பரிசாக முதல்வர் பதவி இப்போதுதான் ஸ்டாலினிடம் வந்திருக்கிறது. எனவே அடுத்த பல ஆண்டுகளுக்கும் திமுக ஆட்சியே தொடர வேண்டும் என்கிற எண்ணத்திலேயே அவர் இருக்கிறார். இதனால் முடிந்தவரை கெட்ட பெயர் இல்லாமல் ஆட்சியை நடத்த ஸ்டாலின் விரும்புகிறார். ஆனால் பழம் தின்று கொட்டை போட்ட மூத்த அமைச்சர்களின் செயல்பாடுகள் இதற்கு நேரெதிராக இருக்கின்றன. இதன் எதிரொலியாகவே அதிருப்தி அலை சுழன்றடிக்கத் தொடங்கியுள்ளது’’ என்கிறார்கள்.

இந்த அதிருப்தி நாளைக்கே எரிமலையாக வெடித்து அரசியல் புரட்சி ஏற்படும் என யாரும் ஆருடம் கணிக்கவில்லை. ஆனால் தமிழக அமைச்சரவைக்குள்ளே கருத்து வேறுபாடுகள் தலைகாட்டத் தொடங்கிவிட்டது மறுக்க முடியாத உண்மை. இதை முதல்வர் ஸ்டாலின் ஆரம்பத்திலேயே அடக்கப்போகிறாரா அல்லது விட்டுக்கொடுத்துத் தட்டப்போகிறாரா என்பதைப் பொறுத்திருந்துதான் பார்க்க வேண்டும்.

%d bloggers like this: